ئەڤرۆ نیوز ، زنار تۆڤی:
پشتی گەهشتنا نووچێ بن ئاڤبوونا به‌له‌مەکا كۆچبه‌ران ل كه‌نارێن شارۆچكێ دیكیلی یێ سەر ب پارێزگەها ئزمیرێ ڤە، تیمێن هەوارهاتنێ گه‌هشتنه جهێ روودانێ.
ل دەمژمێر شەش و 20 خوله‌كی سپیدێ ل دەڤەرا دەنیز كۆی، دو كۆچبه‌ران ب مه‌له‌ڤانیان خۆ رزگاركرینە و دیارکریه، کو به‌له‌ما وان بن ئاڤ بوویە و 10 كه‌سێن دیتر دبێ سه‌روشینن.
پشتی تیمێن هەوارهاتنێ هاتینە ره‌وانه‌کرن بۆ وی جهی، دەست ب کارێن لێ گه‌ریانێ و پشكنینێ کریە، لێ هێشتا تەرمێن وان نەهاتینە دیتن.
ئەڤرۆ نیوز:
وه‌زیرێ بازرگانیا عیراقێ لێژنه‌کا بلند پێکئینایە ژ بۆ باشترکرنا فورمێن خوارنێ و كرینا مادێن خوارنێ و باشكرنا كوالێتیا مادان راگه‌هاندیە.
محەمەد ھاشم ئەلعانی، وەزیرێ بازرگانیا عیراقێ بۆ میدیایێن عێراقی راگەهاندیە، کو ھەڤدەم ل گەل باشترکرنا مادێن خوارنێ دێ بزاڤێ کەین وێ فۆرمێ دەولەمەندتر لێ بکەین و مادێن خوارنێ یێن دیتر بۆ زێدە بکەین.
گوت ژی، مە لیژنەک پێکئینایە بۆ دانوستاندنێ ل سەر ڤی بابەتی و دابینکرنا پارێ پێدڤی بۆ ماوێ سالەکێ، نەکو بۆ ماوێ 6 هەیڤان، لدووڤ بڕیارا ژمارە 986 یا نەتەوێن ئێکگرتی، ل سالا 1997چەند بڕگەک ژ مادێن خوارنێ ب رێیا بریکاران ب سەر وەلاتێن عێراقێدا دهێنە دابەشکرن و سالانە گۆژمەکێ پارەی بۆ دهێتە تەرخان کرن.
ھەولێر، قائید میرۆ:
پشتی بزاڤێن مەزن ھاتینەکرن بڕیارە مووچێ کەسوکارێن شەھید و ئەنفالکریان بھێتە ھەڤبەرکرن دگەل مووچێ کەسوکارێن شەھیدێن عیراقێ و پەرلەمانتارەک ژی دیار کر کو ب تنێ دێ ئێک ناڤونیشان بۆ شەھیدی مینیت و ئیدی شەھیدێ راستەقینە و وەلاتی نامینن.
ھەدار بارزانی، ئەنداما لیژنا شەھید و زیندانیێن سیاسی ل پەرلەمانێ عیراقێ بۆ رۆژناما ئەڤرۆ دیار کر کو بادەکا مووچێ شەھید و زیندانیێن سیاسی ژ لایێ شاندێ وەزارەتا کاروبارێن شەھیدان ڤە رادەستی فڕاکسیۆنێن پەرلەمانێ عیراقێ یێن کورد ھاتیەکرن و پێنج فڕاکسیۆن یێ کار بۆ ڤەگوھاستنا لیستا مووچێ شەھید و زیندانیێن سیاسیێن کوردستانێ بۆ سەر میلاکێ دەزگەھێ شەھیدێن عیراقێ دکەن و گۆت: “بزاڤێن مە دێ د بەردەوامبن ھەتا مووچە دھێتە ھەڤبەرکرن و کەسوکارێن شەھید و ئەنفالکری و زیندانیێن سیاسی ژ مافێن خوە یێن دستووری مفاداربن”.
ناڤھاتیێ ئاماژە دا وێ چەندێ کو ل گورەی بڕیارا پەرلەمانێ عیراقێ ل ھەیڤا تیرمەھا ئەڤ سالە دڤێت کەسوکارێن شەھیدان و زیندانیێن سیاسی ل کوردستانێ ھەمان ماف ھەبیت بۆ وەرگرتنا مووچە و ھەموو ئیمتیازاتێن بەغدا، چونکی ل بەغدا ب تنێ ئێک جورێ شەھیدان ھەیە و مووچێ شەھیدەکی ملیۆنەک و 200 ھزار دینارە و گۆت: “ب ڤێ چەندێ ژی ھەکە مە لیستا شەھیدان ڤەگوھاست بۆ سەر میلاکێ بەغدا دێ ناڤەک ب تنێ بۆ شەھیدی مینیت و مووچە دێ ھێتە راستڤەکرن، نوکە مە شەھید ھەیە ب تنێ مووچێ وی 450 ھزار دینارە”.
ئەڤرۆ، سالار دۆسکی:
رێڤەبەرێ رێڤەبەریا ئاری ل دھۆکێ بۆ رۆژناما ئەڤرۆ ئاشکرا کر کو حوکمەتا عیراقێ یا ب کەیفا خوەیە، ھندەک سالان چ گەڕێن ئاری ناسۆژن و ھندەک سالان دو گەڕ و سالا بۆری ژی چار گەڕێن ئاری ھاتنە سۆتن، ئانکو د دەمێ 12 ھەیڤان دا ب تنێ ھەشت ھەیڤان ئار ل سەر وەلاتیان ھاتیە بەلاڤکرن و دبێژیت: ئەڤە بڕیارێن وەزارەتا بازرگانیا عیراقێ نە و ھندەک جاران 35 رۆژان و ھندەک جاران 40 رۆژان جارەکێ ئاری بەلاڤە دکەت.
نەجم عەبدوللا، رێڤەبەرێ رێڤەبەریا ئاری ل دھۆکێ گۆت: “نوکە کاودان ب گشتی ھاتینە تێکدان و وەزارەتا بازرگانیا عیراقێ ھندەک ھەیڤان ئار رادەستی کارگەھەکا سلێمانیێ کر و پاش نەشیا وی کاری بکەت، ھندەک وەلاتیان ھێشتا بەھرا خوە ئارێ ھەیڤا نیسانێ وەرنەگرتیە و یێ ھەیڤا پێنج مە یێ دایە ھەموویان، یێ مایی ژی دێ ل سەر ھەموویان ھێتە بەلاڤەکرن”.
ناڤبری ئەو ژی ئاشکرا کر کو ئەڤ ئارە ھەموویێ 12 کارگەھێن دھۆکێ یە و گەنمێ ناڤخوە ل گەل گەنمێ بیانی دھێتە تێکەلکرن و دبیتە ئار و ل سەر خەلکی دھێتە بەلاڤەکرن و وەزارەتا بازرگانیا عیراقێ گرێبەست ل گەل دا ھەیە.
نەجمی ئەو ژی دیار کر کو پارێزگەھا دھۆکێ ھەیڤانە پێدڤی ب 13 ھزار و 850 تەنێن گەنمی یە بۆ دروستکرنا 11 ھزار تەنێن ئاری، ئاواران ژی پێدڤی ب سێ ھزار و 499 تەنێن ئاری ھەیە.
ھەولێر، قائید میرۆ
پشتی ئێکگرتوویا ئیسلامی د ھەلبژارتنێن بۆری یێن پەرلەمانێ کوردستانێ پاشڤەچوونکری و ھژمارا کۆرسیێن خوە یێن بەرێ ل دەستدای دەنگێ نەڕازیبوونێ ل ناڤ ئێکگرتوویا ئیسلامی بلندبوویە و ئێکگرتوو بڕیاردایە ھەمبەر ئەڤێ شکستێ پشکداری کابینا داھاتیا حوکمەتا ھەرێما کوردستانێ دا نەکەت، ئەندامەکا سەرکرداتیا ئێکگرتوو ئاشکرا کر، ژبلی ئۆپۆزسیۆن بوونێ مە چو رێکێن دی نەماینە.
ناسک تۆفیق، ئەنداما سەرکرداتیا ئێکگرتوویا ئیسلامی بۆ رۆژناما ئەڤرۆ دیار کر، مە ل ھەیڤا بۆری کۆمبوونا سەرکرداتیا یەکگرتوو ئەنجامدایە پشتی بابەتێ پشکداریا ئێکگرتووی کەفتیە دەنگدانێ دو ل سەر سێ یا سەرکرداتیا ئێکگرتوو ل گەل ڤێ چەندێ بوون د چوار سالێن بھێت ئێکگرتوو وەک ھێزەکا ئۆپۆزسیۆن بمینیت و نەچیتە ناڤا حوکمەتا نوویا ھەرێما کوردستانێ، بەری ئەڤ بڕیار بھێتە پەسەندکرن ژ لایێ سەرکرداتیا یەکگرتووی مە راپرسی دناڤا ئورگێن خوەدا کریە وەکی پشتەڤانیەکێ بۆ بڕیارا سەرکرداتیێ، ئەگەر زۆرن بۆ کێمبوونا دەنگێن یەکگرتوو د ھەلبژارتنێن بۆری یێن پەرلەمانێ کوردستانێ و ھندەک ژوان نافخۆیی و ھندە کژی دەرەکینە، ب دیتنامە بھایێ ھەلبژارتنان ھاتیە کێمکرن ل ھەلبژارتنان و ھەر ل ھەلبژارتنێن 12ی ئایارا بۆری یا پەرلەمانێ عیراقێ سەختەکاریێن زۆر ھاتنەکرن و دربەکا مەزن ل ھەلبژارتنان ھاتەدان، ئەڤێ سەختەکاریێ بڕیار ل سەر ڤێ چەندێ دایە پڕۆسا دیموکراتیێ ل ھەرێما کوردستانێ لبن پرسیارێ دایە، 60%ێ یا دەنگدەرێن ھەرێما کوردستانێ پشکداری د ھەلبژارتنێن پەرلەمانێ کوردستانێ دا نەکر، ئەڤێن پشکداری دەنگدانێ نەکری ئەون یێن نەڕازی ل پارتی و ئێکەتیێ، ھەروەسا ئۆپۆزسیۆن نەشیایە ببیتە ئەگەرەک بۆ باشترکرنا ژیانا وەلاتیان و گوھۆڕینان د سیستەمێ حوکمیدا بکەن،لەوڕاژی پشکداری نەکرنا ڤێ ھژمارا دەنگدەران ئەگەرەکە دەنگێن ئێکگرتوو ژی کێمکرینە، لەوانەیە پشکەک ل کێمبوونا دەنگێن ئێکگرتوو پەیوەندی ب پشکداریا ئێکگرتووی ئیسلامی ڤە ھەیە دناڤا حوکمەتێ دا و وەزیرێن مە چو دەستھەلات نەبوون و ھەموو دەستھەلات ددەستێ سەرۆکاتیا جڤاتا وەزیراندایە وەزیرێن مە ژی نەشیاینە خزمەتا زێدەتر بکەن.
ل دۆر پرسیارەکا رۆژناما ئەڤرۆ کو لسالێن بۆری ئۆپۆزسیۆن نەشیایە رۆلێ خوە یێ سەرەکی بگێڕیت وێ سەرکردا ئێکگرتوو دیارکر، پرسیار ئەڤەیە بۆچی ئۆپۆزسیۆن نەشیایە ئەڤی رۆلی بگێڕیت، ئەم یێ ل ھەرێمەکێ دا دژین مافێن ئۆپۆزسیۆن بوونێ ب قانوونێ نەھاتینە پاراستن، پارە و ھێزێن چەکدار و ھەموو تشت ل دەڤ ھێزێن دەستھەلاتدارە، ئۆپۆزسیۆن ھاتیە پشتگوھاڤێتن و چو مافێن قانوونی نینە ھەتا رۆلێ خوە ھەبیت، ھەتا بشێن خزمەتەکا باش پێشکەش بکەن، و ھەکە بزانن وەزیرەک وەک پێدڤی بکاری رانابیت بەدل ھەبیت.
ناسک تۆفیق گۆت: ژبلی ئۆپۆزسیۆن بوونێ مە چو چارەسەرێن دی نینە، مادەم پشکداریێ مە ل کابینا حوکمەتێ نەبیتە شەراکەتا راستەقینە ئەڤە خراپترە بوێ چەندێ باشترە ئەم ببینە ئۆپۆزسیۆن، ب رێیا ئۆپۆزسیۆن بوونێ دێ پتر شێین خزمەتا خەلکێ کوردستانێ بکەین، بەلێ ھەبوونا مە دناڤا حوکمەتێ ب لاوازی نەک نەشێین خزمەتێ بکەین، بەلکو کادرێن مەژی عەیبدار دبن و حزبا مەژی دێ پێ عەیبدار بیت، لەوڕاژی ھەر ئەڤە بەرژەوەندیا یەکگرتوودایە ل دەرڤەی حوکمەتێ بەردەوامیێ ب خزمەتا خوە بدەین و چاڤدێریا کارێن حوکمەتێ بکەین ھەڤکاربین بۆ چاکسازیێ.
ناسک تۆفیق ئاماژەکر” ب پشتتڕاستی ڤە ھەر حزبەک دڤێت پێداچوونێ بکارێن خوە بکەت، سالا بھێت دێ تەمەینَ ئێکگرتوویا ئیسلامی ببیتە 25 سال، لەوڕاژی پێدڤی بڤێ ئێکێ ھەیە پێداچوون ھەبیت ھەتا بەردەوامیێ و گەشێ بدەینێ حزبا خوە، ھەگەر ئەم توشی ئەڤێ پاشڤەھاتنێ ژی نەباینە ھەر پێداچوون دا ھێتەکرن، بەلێ ڤێجارێ ئەم پتر رژدین ل سەر پێداچوونێ ب ئەدایێ کارێ ئێکگرتوو.
ئه‌ڤرۆ نيوز:
جڤاتا سه‌ركرداتيا ئێكگرتوو ئه‌ڤرۆ رۆژا دوشه‌مبى رێكه‌فتى 12ى چريا دويێ 2018 دێ كۆم بيت و بڕيارێ ل سه‌ر راسپاردێن جڤاتا گشتى ده‌ست كو ل هه‌يڤا بۆرى ب رێڤه چووبوو.
ئێكگرتوو ئيسلامى كوردستان د كۆمبوونا خوه يا جڤاتا گشتى دا، ب پتريا ده‌نگدان بڕيار ل سه‌ر وێ چه‌ندێ دايه كو پشكداريێ د كابينا نوو يا حوكمه‌تا هه‌رێما كوردستانێ دا نه‌كه‌ت و وه‌كو ئۆپۆزسيۆن بۆ ماوێ چار سالان د ناڤ حوكمه‌تێ دا بيت.
ئێكگرتوو ئيسلامى كوردستان د هه‌لبژارتنێن 30ى ئيلۆنێ يێن په‌رله‌مانێ كوردستانێ دا د چارچۆڤێ ليستا به‌ره ب ئيسلاحێ پشكدارى كربوو و شيابوو ب تنێ 5 كورسيێن په‌رله‌مانى ب ده‌ست ڤه بينيت.
ئەڤرۆ، سالار دۆسکی:
چاڤدێرەکێ سیاسی ئاشکراکر، خەلکی کوردستانێ ب دەنگێن خوە خشتێ ھێزێن حزبێن کوردستانی گوھۆرین، دڤێت ئەف ئیرادە د ھولا پەرلەمانی و پێکئینانا حکومەتا نوویا ھەرێما کوردستانێ دا رەنگ ڤەدەت.
خالد ئەحمەد چاڤدێرێ سیاسی گۆت: پەیوەندێن پارتی و ئێکەتی و کارکرنا وان پێکڤە خالا ب ھێزا ھەرێما کوردستانێ یە، و ل خولا بوری ژی دا ھەرچەندە یەکێتی ھێزا سیێ بوو لێ پارتی ئێکەم لایەن سەرەدانا ئێکەتیێ کر بوو پشکداریکرنا د حوکمەتێ دا ، و گرنگە ئەڤ جارە ژی پارتی و ئێکەتی ب حوکمێ بەرپرسیارەتی و گرنگیا رولێ وان بناغێ حوکمەتا داھاتی بن ل دیف مافێن ھەلبژارتنان، لایەنێن دی ژی و ل پێشیا وان بزاڤا گۆران ھەکە مەرەم ژ بەژدار کرنێ بوو ب ھێز کرنا حوکمەتێ بیت دێ دەرگەە بوو د ڤەکری بن ، و نابیت حوکمەتا داھاتی بێ بەژداریا پێکھاتێن کریستیان و تورکمان بێتە ئاڤا کرن.
خالد ئەحمەد، چاڤدێرێ سیاسی بۆ رۆژناما ئەڤرۆ گۆت: سەرکەفتنا مەزن یا پارتی و دەستڤەئینانا ٤٥ کورسیا و داکەتنا بەرچاڤ یا لایەنێن رکمانی دژی پارتی، دێ بناغەکێ موکم بیت بۆ ئارامیا سیاسی ل کوردستانی، ئارامی و تەڤایی د پەرلەمان و حوکمەتا ھەرێما کوردستانێ دا ، سەرەدەری و رێکخستنا پەیوەندیێن ھەرێمێ ل گەل بەغدا و دەوروبەرا و نیڤ دەولەتی ب شێوەکێ باشتر، سەرکەفتنا پارتی دێ ھاندەر بیت بوو دەرێخستنا یاسایێن گرنگ و پێدڤی بوو رێکخستن و نووژەنکرنا ئورگانێن حوکمەتا ھەرێمێ و سازیێن جڤاک سڤێل و روخساندنا بیاڤێ ھەبوونا ئوپوزسیونەکا ساخلەم و ب بەرھەم دار، سەرکەفتنا پارتی لاپەرەکێ نوی یێ ژیانا سیاسی ل ھەرێمێ بەر دەست کریە بوو چارەکرنا کێشەیان و داوی ئینان ب پیلانگێری و تیرورا ھزری و گوتارا تاری و کاڤل کەر، سەرکەفتنا پارتی کوردستان ل لیڤا داکەتن و داگیرکرن و پاشڤە چوونێ رزگار کر و دەلیڤە گەش کر بوو زاڵ بوون ل قەیرانا و ڤەگەراندنا کاروانێ ئاڤەدانیێ و خزمەتگوراریێ، سەرکەفتنا پارتی دێ گوھۆرینێ ب بەرنامە و گوتارا لایەنێن سیاسی یێن کوردستانێ دا ھینیت و پتر بەرەف بەرنامێن کردار ولوجیک ڤە بەتن و دێ ل خواستێن خەلکی پتر نێزیک کەتن چونکە سەرکەفتنا پارتی ژ لایەکی پاداشکرنا وێ بوویە ل سەر ھەلویست و کردار و بەرپرسیارەتیا نەڤەقەتیای ژ خاست و ھێڤێن خەلکی بوو و ژلایەکێ دی راسپاردنا پارتی یە بوو زال بون ل ئاستەنگا و خزمەتکرنەکا زێدەتر.
خالد ئەحمەد گۆت: خەلکی ب دەنگێن خوە خشتێ سیاسی یێ ھێزێن کوردستانی گوھۆرین ب سەر دا ئینا، دڤێت ئەف ئیرادە رەنگ ڤەدەت د ھولا پەرلەمانی و پێکئینانا حکومەتا ھەرێما کوردستانێ، ژ بازنە و گریکێن گەڤن رزگار بیت، ئەزموونا دوھی و ئەنجامێن نوی دبێژن مودێلا حکومەتا فرەلایەن و بنکە فروان شکەستن ئینایە، دڤێت ل پشت خوە بھێلین و بیر ل حکومەتەکا بھێز و ئێکگرتی بکەین و خویایە کو حکومەتا ب ھێز ئەوە ژ چەند لایەنێن کێم پێک بێت و یا ھاریکار و ئێکگرتی بیت ، ژمارا وەزارەتا ل دیف پێدفیا کاری بیت نەک رازی کرنا کەس و لایەنا بیت، دڤێت بەرنامێ چاکسازیێ ژ ئاڤا کرنا حکومەتێ دەسپێبکەت .
ھەمان چاڤدیرێ سیاسی گۆت: بڕیارا ھندەک لایەنا بوو نەپشکداریا د حوکمەتێ دا نیشانا ژ دەست دانا ھەڤسەنگیێ یە ژ شکەستن ھەلبژارتنان دا و دێ بیتە ھوکارێ داکەتنا زێدەتر ل ئایندەی، پارتی دێ جودا د گەل ھەر ئێک ژ لایەنێن سەرکەفتی دان و ستاندنێ کەتن و ل دیف مافێن وان دێ زەمینێ بوو خوش کەتن پشکدار بن، ئەز پێشبینیا پشکداریا گۆڕان دحوکمەتێ دا دکەم.
ئەو ژی گۆت: پێشینەیا کارێ خولا نوی یا پەرلەمانی ، گرنگە دستورێ ھەرێما کوردستانێ و یاسا چاکسازیێ و یاسا سەروکاتیا ھەرێمێ بیتن، زێدەباری چەندین یاسایێن دی یێن ژ ھوکارێن موزایداتێن حیزبی دەرنەچوینە .
ئەڤرۆ نیوز:
سەرۆک وەزیرێن ھەرێما کوردستانێ دیارکریه کو ھەرێما کوردستانێ دێ ل سەر بنەمایێن پێکڤەژیانا نەتەوەیی و ئۆلی و ڤەحەواندن و پاراستنا ئاوارە و پەنابەران یا بەردەوام بیت.
نێچیرڤان بارزانی، سەرۆک وەزیرێن ھەرێما کوردستانێ پێشوازی ل گرەیھام فرەنکلین، سەرۆکێ رێکخستنا سەماریتان پێرس یا ئەمریکی کریە و د وێ ھەڤدیتنێ دا فرەنکلینی رۆلێ خەلک و حوکمەتا ھەرێمێ بۆ حه‌واندن و دابینکرنا خزمەتگوزاریان بۆ ئاوارەیان و قۆربانیێن پێشمەرگەی و خەلکێ کوردستانێ د روو ب رووبوونا شەرێ ل دژی تیرۆرێ و پاراستنا ھەموو پێکھاتان دا بلند نرخاند.
ھەروەسا د وێ هەڤدیتنێ دا بەحسێ ھاریکاریێن رێکخستنا خوە بۆ ئاوارەیان کر و مانا کریستیانان ل عیراقێ وەک پێکھاتەکێ گرنگ یا جڤاکێ عیراقێ ب پێدڤی زانیە.
ژ لایێ خوە ڤە سەرۆک وەزیرێن ھەرێمێ، رۆلێ فرەنکلینی د ھاریکاریکرنا ئاوارە و پەنابەران دا بلند نرخاندیە و گۆت ژی: خەلک و حوکمەتا ھەرێما کوردستانێ دێ ل سەر بنەمایێ پێکڤەژیانا نەتەوەیی و ئۆلی و ڤەحەواندن و پاراستنا ئاوارە و پەنابەران د بەردەوام بن، ھەروەسا داخواز ژ جڤاکا نێڤدەولەتی کر ،ھاریکاریا ھەرێما کوردستانێ د سەپاندنا کولتوورێ پێکڤەژیانێ ل سەرانسەری عیراقێ دا بکەت.
ئه‌ڤرۆنيوز:
وه‌زاره‌تا كاروبارين شه‌هيد وئه‌نفالكريان راگه‌هاند، ل چه‌ند رۆژێن بهێت پارێ خواندنا ساله‌كێ يا كه‌سوكارێن شه‌هيدان دێ هێته به‌لاڤكرن.
فوئاد عوسمان، په‌يڤدارێ وه‌زاره‌تا كاروبارێن شه‌هيد وئه‌نفالكريان ل هه‌رێما كوردستانێ گۆت”پشتى وه‌رگرتنا رازيبوونا وه‌زاره‌تا دارايى، ل چه‌ند رۆژێن بهێت دا دێ پارێ خواندنێ يا ساله‌كێ يا كه‌سوكارێن شه‌هيدان هێته به‌لاڤكرن”.
ناڤبرى زێده‌تر بۆ باسنيوز گۆت”ل دووڤ قانوونێ، پارێ خواندنا كه‌سوكارێن شه‌هيدان ل سه‌ر حوكمه‌تا هه‌رێما كوردستانێ يه، به‌لێ ژئه‌گه‌رێ قه‌يرانا دارايى، ده‌مێ دو سالانه پارێ خواندنێ گيرۆبوويه”.
رۆهنكر ژى” ل چه‌ند رۆژێن بۆرى وه‌زاره‌تا دارايى رازيبوون ل سه‌ر خه‌رجكرنا پارێ سالا خواندنێ 2016 – 2017يا كور وكچێن شه‌هێدان ده‌ربريه، بۆ سالا خواندنێ 2017 -2018 ژى، ل گه‌ل زانكر وپه‌يمانگه‌هان وناڤه‌ندێن خواندنێ رێككه‌فتن هاتيه كرن كو قوتابيێن كور وكچێن شه‌هيدان فۆرمه‌كێ دابگرن و ب وێ فۆرمێ پارێ خواندنێ نه‌ده‌ن، تاكو حوكمه‌ت پاره‌ى خه‌رج دكه‌ت”.
دياركر” ل چه‌ند رۆژێن داهاتى دا ئه‌و پاره دێ ل رێڤه‌به‌ريێن كاروبارێن شه‌هيد وئه‌نفالكريان ل پارێزگه‌هان هێته به‌لاڤكرن وهه‌كه هه‌ر قوتابيه‌كى چ گۆژمه‌كێ پاره‌ى دابيت، دێ پاره پێ هێته دان به‌لێ هه‌كه پارێ خواندنێ نه‌دابيت، راسته‌وخوه پارێ خواندنێ دێ ب زانكۆ وپه‌يمانگه‌هان هێته دان”.
نيشاندان