ئه‌ڤرۆ نيوز:

ژ ئه‌گه‌رێ هه‌ڤركيێ ل سه‌ر پۆستێ وه‌زيرێ به‌ره‌ڤانيێ، كێشه‌ كه‌فتينه‌ ناڤبه‌را هێزێن سوننى، د هه‌مان ده‌م دا، پۆستێ وه‌زيرێن ناڤخۆ ژى كێشه‌ بۆ لايه‌نێن شيعى دروست كرينه‌.

ئه‌گه‌رێ هه‌يى سوبه‌هى ده‌نگدان ل سه‌ر وان هه‌شت وه‌زيرێن مايى يێن حوكمه‌تا عه‌بدلومه‌هدى نه‌هێته‌ دان ژ به‌ر كانديدێن هه‌ردو وه‌زيرێن ناڤخۆ و به‌ره‌ڤانيێ كو هێشتا نه‌هاتينه‌ ئێكلاكرن ب گۆره‌يى رۆژناما شه‌رقولئه‌وسه‌ت.

بڕياره‌ سوبه‌هى 6ى چريا دويێ 2018ێ جڤاتا نوونه‌رێن عيراقێ روونيت بۆ ده‌نگدان ل سه‌ر هه‌شت وه‌زيرێن ماين يێن كابينا عه‌بدولمه‌هدى يێن ب به‌تالى ماين. ئه‌ڤه‌ ژى د ده‌مه‌كى دايه‌ كو هه‌ڤركى كه‌فتينه‌ ناڤبه‌را هه‌ردو هه‌ڤپه‌يمانيێن ئيسلاح ب سه‌رۆكاتيا موقته‌دا سه‌در و هه‌ڤپه‌يمانيا بينا ب سه‌رۆكاتيا هادى عامرى ل سه‌ر پۆستێ وه‌زيرێ ناڤخۆ.

سيهام موسه‌وى، ئه‌نداما جڤاتا نوونه‌رێن عيراقێ ل سه‌ر هه‌ڤپه‌يمانيا بينا بۆ شه‌رقولئه‌وسه‌ت دياركريه‌ كو ئه‌گه‌ر يێ هه‌يى كو د كۆمبوونا سوبه‌هى رۆژا سێشه‌مبى دا ناڤێ چو به‌ربژارن نه‌كه‌ڤيته‌ به‌ر ده‌نگدانێ ژ ئه‌گه‌رێ هه‌ڤركيا ل سه‌ر هه‌ردو پۆستێن وه‌زاره‌تا به‌ره‌ڤانيێ و ناڤخۆ ژ به‌ر كو هه‌ڤپه‌يمانيا سائيرون ره‌تكريه‌ كو ده‌نگى ب فالح فه‌ياز كانديدێ هه‌ڤپه‌يمانيا بيناء بده‌ت بۆ پۆستێ وه‌زيرێ ناڤخۆ.

هه‌ڤده‌م د ناڤبه‌را سوننان ژى دا كێشه‌ ل سه‌ر پۆستێ وه‌زيرێ ناڤخۆ دروست بوويه‌.

عه‌بدولا خه‌ربت ئه‌ندامێ جڤاتا نوونه‌رێن عيراقێ ل سه‌ر فراكسيۆنا ميحوه‌رێ وه‌ته‌نى ئاشكه‌را كر كو كێشه‌ هێشتا ل سه‌ر پۆستێ وه‌زيرێ به‌ره‌ڤانيێ د به‌رده‌وامن و دو به‌ربژار بۆ وى پۆستى يێن هه‌ين، كو پێكهاتى نه‌ ژ هيشام ده‌رجانى و فه‌يسه‌ل جه‌ربا و ئه‌ڤ چه‌نده‌ ئێكلا نه‌بووينه‌ د ناڤبه‌ر سوننيان دا كا دێ كيشك وى پۆستى وه‌رگريت.

د ده‌مه‌كى دا ميحوه‌رێ وه‌ته‌نى هاشم ده‌راجى به‌ربژار كريه‌ بۆ پۆستێ وه‌زاره‌تا به‌ره‌ڤانيێ، هه‌ڤپه‌يمانيا وه‌ته‌نيه‌ ژى ب سه‌رۆكاتيا ئه‌ياد عه‌لاوى فه‌يسه‌ل جه‌ربا به‌ربژار كريه‌ بۆ وى پۆستى.

ئه‌ڤرۆ نيوز:

مامۆستایەکێ زانکۆیێ ب دووری زانی سەرۆک وەزیرێن عیراقێ بشێت ‏کێشێن کوردان چارەسەربکەت چنکو نە ب خواستا خەلکێ عیراقێ ‏ھاتیەدانان و دەست ھەلات نینە بەلکو بریاردان ل سەر کێشێن ‏چارەنڤێسی د دەستێ مەرجەعیەتێ و ھێزێن ھەرێمی دایە، بەرامبەر ‏کوردان کارتێن فشارێ گەلەک د دەستی دا ھەنە.‏

د.کاروان عەلی، نڤسیەر و مامۆستایێ زانکۆیێ، ل ھەمبەر چارەسەرکرنا ‏کێشێن ھەرێما کوردستانێ ل گەل بەغدا ل قوناغا داھاتی بۆ رۆژناما ‏ئەڤرۆ گۆت: حوکمەتا عیراقێ یا نوو تەمامکەرا حوکمەتێن بوری یە ‏ئەوێن پشتی سالا 2013 ل عیراقێ ھاتیە دانان، ھەر ھەموویان ‏پشتەڤانی و بەرھەڤی یا خوە و ھەتا رێککەفتن بووینە ل گەل ‏سەرکرداتیا سیاسی و فراکسیۆنێن کوردی کو کێشێن ھەرێمێ ل گەل ‏بەغدا دووماھی پی بھێت، تایبەت کێشێن قانوونی وەک بودجە و ‏پێشمەرگی، بەلێ چ حوکمەتا ئەو کێشە ب رژدی نە وەرگرتینە و چارە ‏نەکرینە، چنکی ب گشتی دیتنا عەقلێ عەرەبی بۆ کێشا کوردی ئەوە کو ‏ئەو کێشە ھەر ب ھەلاویستی بمینن، ئەو ھێزا پێشمەرگێ کوردستانێ ب ‏ھێزەکا نەدروست دبینن، لەوما بەرھەڤ نین بۆدجەک بۆ بھێتە ‏دابینکرن.‏

کاروان عەلی ئاماژە دا، وێ چەندێ کو حزبێن عەرەبی گەلەک ب باشی ‏زانن کەرکووک و شنگال و خانەقین و ھەتا زنجیرا چیایێ حەمرین ئاخا ‏کوردستانێ یە، لێ چاڤێ ئاڤان حزبا ل داھات و سامانێ ڤێ ئاخێ یە و ‏بەرھەڤ نینن مادێ 140ێ دەستوری جێبە جێ بکەن، ب کورتی ئەو ‏بەرھەڤ نینن چ مادە و برگێن دەستوری ئەوێن کێشە د ناڤبەرا بەغدا و ‏ھەرێمێ ھەی چارە بکەن، بتنێ کوشتنا دەمی بوو ب بھانا وێ چەندێ کو ‏مادە ب دووماھی ھاتینە و رابنە سەر پێن خوە و ھێزێن خوە رێکخستنێ ‏تێدا بکەن، ئانکو نوکە بگشتی ھەلویستێ بەغدا بەرامبەر کوردان ھاتیە ‏گوھۆرین ب بھانا وێ چەندێ کور دبێ ھێزن وبڤێ چەندێ سەردەریێ ل ‏گەل کوردان دکەن.‏

مامۆستایێ زانکۆیێ ئەو ژی گۆت: عادل مەھدی بتنێ دوستێ کوردان ‏نەبوو، بەلکو سومبلەک بوو دناڤا شورش و چیا و تێکەلی و ھەڤالینیەکا ‏بھێز ل گەل کوردان ھەبوویە و ھەتا پشتی سەرھلدانا 1991 ئەڤ ‏تێکەلی یە ھەر ھەبوویە، بەلێ نوکە دڤێت ئەم خوە دوور بخێین ژ ‏ھەست سوزێن خوە و دڤێت پەنایێ بەینە بەر عەقلیەت و لوژیک و ‏لێکدانێن عەقلانە بکەین بۆ شێواز و ھوکارێن دەست ھەلاتا مەھدی، ئێک ‏ھەر عەرەبەک ھەبیت وەک عەرەب ھزرێ ل گەل کوردان دکەت، ھەر ‏چەوا بیت بەرھەڤ نینە تەنازولێ ل گەل کوردان بکەت، راستە ئەو ‏سەرۆک وەزیرە لێ ژبیرنەکەین ئەو بتنێ حوکمی ناکەت بەلکو چەندین ‏فلتەر و رێگری ل بەرامبەر بریارێن وی ھەنە و تایبەت بریارێن ‏چارەنڤێسی وەک بابەتێن کەرکووک و پەترۆل و پێشمەرگە، دیارترین ‏رێگریێن بۆ سەرۆک وەزیران، حەشدا شەعبی، مالکی، عامری، ‏مەرجەعیەتا شیعی ئەڤان ھەموویا رێگری ل سەر بریارێن عادل مەھدی ‏ھەنە نوکە بۆ سەرۆک وەزیرێن داھاتی ژی کا چەوام ە ل حوکمەتێن ‏بوری دیت، دانانا وی نەبتنێ بریار و رێکەفتنەکا ھێزێن شیعی یان ‏ھێزێن عیراقی بگشتی بوو، بەلکو دووماھی بریار ل سەر دانانا ڤی پوستی ‏وەلاتێن ھەرێمێ و دەرڤە و زلھێز بریارێ د دەن و نە خەلکێ عیراقێ، ‏عیراق وەلاتەک سەروەری نینە، وەلاتەک ھێز و سوپا و بنگەھێن سەربازی ‏و ھەوالگێری چەندین وەلاتان تێدا ھەیە ژلایێ کومەکا پایتەختێن ‏وەلاتان ڤە چارەنڤیسێ بۆ دیاردکەن و بریارێن دەرەکی پێش عیراقێ ڤە ‏دھێنەدان، لەوما سەرۆک وەزیران نەشێت بێی ھێزێن ھەرێمی و زلھێز و ‏ھێزێن شیعی ھەر چ بریارێن چارەنڤێساز بدەت، ئانکو سەرۆک وەزیران ‏نەشێت ب حەزا خوە سەرۆک وەزیرەکی ژی بدانیت بەلکو ھەموو بۆ ‏دھێنەدانان ژلایێ حزبێن سیاسی ڤە، لەوما دبینم گەلەک یا بزحمەتە ‏عادل مەھدی ئێک کێشا کوردان ژی چارەسەربکەت.‏

ل دۆر ھەبوونا کارتێن فشارێ، د.کاروان عەلی گۆت: کوردان کارتێن فشارێ ھەنە و ‏گرنکترین کارتا کوردان یا فشارێ رێکخستنا گوتار و ناف مالا کوردی یە ل بەغدا و ‏رێکخستنا بەرنامە و کارێ سیاسی یە بەرامبەر وەلاتێن ھەرێمێ و جیھانێ ‏وکارتێن گرنگ د دەستێ کوردان دا ھەنە لێ بتنێ دەم بۆ دڤێت و مفایی ژ ‏پشتەڤانیا نیڤ دەولەتی وەرگبرن، کارتێن فشارێ ئابووری جیوپولەتکیش یێن ‏ھەنەوەک بابەتێ ئاڤێ و سنور، ھنارتنا پەترۆلێ، پێدڤی یە گەلەک ب عەقلانە ‏بکاربینت بۆ بدەست ڤەئینانا بابەتێن نەتوەیی و خوەشکرنا ژین و ژیارا خەلکێ ‏کوردستانێ.‏

ھەمان مامۆستایێ زانکۆیێ خویاکر کو نوکە سەنگا کوردان گەلەک نەیا باشە و ‏خراپترین دەمە کو کورد گەلەک لاواز بوویە و چ پووتە بۆ نوونەرێن کوردان ‏ناھێـتەکرن و گوھداریا وان ناھێتەکرن د دانا بریارێ دا پشکدار نابن ھەتا ئەو ‏بریارێن گرێدایی ب کوردان ڤە ژی ھەیە، دناڤ فراکسیونێن کوردی ژی دا ململانێ ‏یەکا نەشەریف ھەیە ل سەر پلە و پوستان ل بەغدا و مژوولی شکاندنا ئێک دو نە ‏و کرێتکرنا کوردان بەرامبەر نەتەوێن دی، بگشتی کوردان سەنگ ل بەغدا نافخوە ‏و دەرڤە سەنگا جاران نەمایە ب چاڤەکێ کێم دھێتە دیتن، ململانێ یا کوردان ل ‏گەل ئێک ئەگەرێ سەرەکی یە، بەری نوکە پشکداریا کوردان ل بەغدا یا بھێز بوو، ‏مخابنی ڤە نوکە وەک مێھڤان دھێتە دیتن.‏