ئەڤرۆ نيوز:
بڕیارە ل دەمژمێر 12 نیڤرۆیا ئەڤرۆ چارشەمبی 31-10-2018 پەرلەمانێ کوردستانێ روونشنا خۆلا چارێ یا خوە یا مال ئاڤاھیێ ئەنجام بدەت.
دەستەیا سەرۆکاتیا پەرلەمانێ کوردستانێ برگێن بەرنامێ کارێ دووماھی روونشتنا خۆلا چارێ راگەھاند کو ل دەستپێکێ دێ ب دووماھی ئینانا خۆلا چارێ یا پەرلەمانێ کوردستانێ ل دووڤ مادێ شەش ژ پەیرەوێ ناڤخوەیێ پەرلەمانێ کوردستانێ ھێتە راگەھاندن.
دیسا پەیڤا جێگرێ ئێکێ یێ سەرۆکێ پەرلەمانی ب ھەلکەفتا ب دووماھی ھاتنا خۆلا چارێ یا پەرلەمانێ کوردستانێ دێ ھێتە پێشکێشکرن.
ئه‌ڤرۆ نيوز:
بریت ماکگورک نوونەرێ ئەمریکا یێ د شەرێ ل دژی داعشێ د داخویانیەکی دا راگەھاند کو ل باکورێ سووریێ شەرێ ل دژی داعشێ ب دژواری بەردەوام دکەت و ھەتا نھا ژی ئەڤ رێکخستنا تیرۆرست نەھاتیە ژناڤبرن و گۆت: (ل گەل ھەڤپەیمانێن خوە یێن ل سەر ئەردێ سووریێ ب دژواری ئۆپەراسیۆنا ل دەوروبەرێن دێرازۆرێ برێڤە دبەین و ئەم دشێین بێژین ھەتا ئاستەکێ داعش ھاتیە لاواز کرن لێ ب تەمامی نەھاتیە ژناڤبرن و ھەتا دەڤەر ب تەمامی ژ کۆمێن تیرۆرست بھێتە پاقژ کرن دێ ھێزێن مە ل سووریێ و رۆژھەلاتا ناڤین بمینن).
ماکگورکی د پشکەکا دی یا ئاخڤتنا خوە دا ژی ل سەر رۆلێ ئیرانێ ل سووریێ راوەستیا و راگەھاند کو نھا ھەری زێدە دەولەتا ئیرانێ ناخوازیت ئالۆزی و شەرێ ناڤخوە ل سووریێ ب داوی بھێت و گۆت: (ئیران ھەبوونا خوە ل رۆژھەلاتا ناڤین و سووریێ ب شەرێ ل ھەرێمێ را گرێدایە و دەمێ شەر نەمینیت ئیران نەشێت کاریگەریێ ل سەر سووریێ، یەمەنێ و ھێزێن چەکدار بکەت و بۆ ڤێ چەندێ ب ھەموو ھێزا خوە ڤە ھەول ددەت کو ئالۆزیێن سووریێ ھەتا دەمەکێ درێژ بەردەوام ببیت و ھەبوونا ئیرانێ ل سووریێ دەستێ تیرۆرستان ژی بھێزتر دکەت).
نوونەرێ ئەمریکا بۆ شەرێ داعشێ ل سووریێ و عیراقێ ھەروەسا راگەھاند ژی کو ھژمارەکا زێدە تیرۆرستێن داعشێ ھەول ددەن کو ژ سووریێ دەربازی عیراقێ ببن و جارەکا دی دەڤەرێن سنۆری بکەنە بن کۆنترۆلا خوە و گۆت: (نھا شەرەکی دژوار ل دژی داعشێ ل سووریێ دھێتە کرن و ھێزێن سووریا دیمۆکرات کو ھەڤپەیمانێ مە یێ سەرەکی نە، ئۆپەراسیۆنا پاقژکرنا دێرازۆرێ ژ تیرۆرستان برێڤە دبەن و ھەڤپەیمانیا نێڤدەولەتی ژی ب رێیا فرۆکێن شەری ھەڤکاریا ھێزێن سووریا دیمۆکرات دکەن و ئارمانجا مە ئەڤە کو سووریێ و عیراقێ ژ کۆمێن تیرۆرست پاقژ بکەین).
بریت ماکگورک د دووماھیا ئاخڤتنا خوە دا ژی ل دۆر چارەکرنا قەیرانا سووریێ ب رێیا دیالۆگێ و ئاشتیێ راوەستیا و راگەھاند کو پشتی ب تەمامی ژناڤچوونا تیرۆرستان دڤێت دستوورەکێ نوو بۆ سووریێ بھێتە ئامادە کرن و ھەموو پێکھاتێن سووریێ د نڤیسینا دستووری دا پشکدار بن.
ئه‌ڤرۆ نيوز:
مانا رەوشا کەرکووکێ بڤان ئالۆزیێن نوکە ڤە بۆیە ئەگەرێن وێ چەندێ ھەتا بھێت پێشنیازێن نوو بۆ رەوشا کەرکووکێ بھێنە کرن، بەرپرسەکێ پارتی دیموکراتی کوردستان ئاشکرا کر، ژبلی ئاسایی کرنا رەوشێ و لادانا دەسھتەلاتا داگیرکاری پارتی چو پێشنیاز و رێکێن دیتر پەسەند ناکەت.
ئەڤە چەند رۆژەکە ئێکەتیا نیشتیمانی بزاڤێن خوە زێدەکرینە بۆ چارەسەرکرنا رەوشا کەرکووکێ و دانانا پارێزگارەکێ ئێکەتی، بەلێ بزاڤێن ئێکەتیێ بێ مفا بووینە و لایەنێن عەرەبی و تورکومانی بەرھەڤنینە ل گەل ئێکەتیێ بگەھنە رێککەفتنێ بۆ دانانا پارێزگەرەکێ نوو بۆ کەرکووکێ، عەدنان کەرکووکی پەیڤدارێ جڤاتا سەرکرداتیا پارتی ل کەرکووکێ بۆ رۆژناما ئەڤرۆ گۆت: کۆمبوونێن ھاتینە ئەنجامدان و ھەموو بزاڤێن ئێکەتیێ بۆ دانانا پارێزگارەکێ کورد بۆ کەرکووکێ بەردەوامن، بەلێ ھەتا نوکە چو ئەنجام نەبووینە، ژ بەر کو لایەنێن عەرەبی و تورکومان رازینینە ب ئەڤان پێشنیازێن ئێکەتیێ بۆ تەناکرنا رەوشا کەرکووکێ، ئەڤە د دەمەکیدایە ئێکەتیێ چەندین تەنازۆل بۆ پێکھاتێن عەرەبی و تورکومان کرینە تنێ رازی بکەت پارێزگارەکێ ئێکەتی ببیتە پارێزگارێ کەرکووکێ.
لایەنێن سیاسی یێن عەرەبی ل کەرکووکێ پێشنیارەکا نوو بۆ چارەسەرکرنا رەوشا ئالۆزا کەرکووکێ ھەیە و گورەی پڕۆژێ لایەنێن عەرەبی ل کەرکووکێ دخوازن پارێزگارێ نوکە یێ کەرکووکێ راکان سەعید ل پۆستێ خوە دا بمینیت ھەتا ھەلبژارتنێن داھاتی یێن جڤاتا پارێزگەھا کەرکووکێ، پەیڤدارێ جڤاتا سەرکرداتیا پارتی ل کەرکووکێ دبێژیت، راستە ھەڤپەیمانیا کەرکووکێ یا ئێکگرتی کو ھەموو لایەنێ، عەرەب بخۆڤە دگریت پێشنیارەکا وەسا کریە، بەلێ پێشنیارا وان ئەڤە پارێزگەرێ ب داگیرکاری ھاتیە سەپاندن بمینیت لسەر کارێ خوە ھەتا ھەلبژارتن تێنەکرن، کو پێشنیاز کریە ھەلبژارتنێن کەرکووکێ ل ھەیڤا حەفت یا سالا بھێت بھێنە برێڤەبرن دووڤدا پارێزگار و پۆستێن پارێزگەھا کەرکووکێ بھێنە بەلافکرن ل سەر لایەنێن کەرکووکێ.
عەدنان کەرکووکی دیارکر” ئەم وەک پارتی دیموکراتی کوردستان دگەل چو ئەڤان پێشنیاران نینە یێن ھاتینەکرن ژلایێ ئێکەتیێ و لایەنێن عەرەبی بۆ چارەسەرکرنا رەوشا ئالۆزا کەرکووکێ، چونکە بدیتنامە کەرکووک یا داگیرکریە و لسەر ھەلوێستێ خوە رژدین پێدڤیە دەستپێکێ رەوشا باژێڕێ کەرکووکێ بھێتە ئاسایی کرن و ئەف پڕۆسا داگیرکاری دوماھی بھێت، ھەروەسا دام و دەزگەھێن مەدەنی دەست بکارێ خوە بکەن و جڤاتا پارێزگەھێ بڕیار لسەر چارەسەرکرنا ھەموو پرسان بدەت، بێ ئاسایی کردن و دوماھی ئینان ب داگیرکاریێ پارتی چو دانوستان و پێشنیاران بۆ رەوشا کەرکووکێ ناکەت.
ئەڤرۆ نیوز:
د ئەڤ شەڤە دا فڕۆکێن شەرکەر یێن تورکیا ترۆمبێلەک ل سنورێ قه‌زا ئامێدیێ بۆردومانكر و خەلکێ وێ دەڤەرێ دبێژن : کو ئەو ترۆمبێل یا “پەکەکێ” بوویه.
ژێدەرەکێ ژ گوندێ بەرچێ، کو نەدڤیا ناڤێ وی ئاشکرابیت، بۆ ئەڤرۆ نیوز گۆت: فڕۆکێن شەرکەر یێن تورکیا ئەڤ شەڤە دناڤبەرا گوندی بەرچی و گوندێ سەرگەلێ “ترۆمبێلەکا پەکەکێ” بۆردومانکریا.
گۆتیە ژی : ئەو بۆردومان نێزیکی 150 مەتران ژ گوندی بەرچی دوورە، بەلێ ئەو نزانن زیانێن گیانی یێن وێ بۆردومانێ چنە و هەتا نوکە ئاگر ب وێ ترۆمبێلێ ڤەیە .
هەمان ژێدەر دیارکریه، کو ب ئەگەرێ نێزیکی و بهێزیا دەنگێ وێ بۆردومانێ دەرگەە و پەنجەرێن خەلکێ گوندی هاتینە شکاندن.
ئه‌ڤرۆ نیوز ، زنار تۆڤى:
گه‌شتیارناس عه‌بدولرزاق نهێلى د دیداره‌كێ دا بۆ ئه‌ڤرۆ نیوز دیاركر: كو لاوازى و نه‌بوونا پرۆژێن نایاب یێن گه‌شتیارى ل هه‌رێما كوردستانێ ب گشتى و ل سنۆرێ پارێزگه‌ها دهۆكێ بتایبه‌تى كارتێكرنه‌كا مه‌زن ل بزاڤا گه‌شتیارى كریه ل كوردستانێ، چونكى هه‌بوونا پرۆژێن نایاب باوه‌ریه‌كا گه‌له‌كا موكوم ل ده‌ف گه‌شتیارا په‌یدا دكه‌ت، ده‌مێ گه‌شتیارێ بیانى گه‌شتێ دكه‌ت بۆ وه‌لاته‌كێ دى و ئه‌و حه‌ز دكه‌ت، لایه‌نێ گه‌شتیارى د گۆپیتكا خزمه‌تگۆزاریان دا بیت، ئانكو دڤێت هه‌موو ئه‌و پێدڤیێن گه‌شتیار پێدڤى دبیتێ ل ده‌مێ گه‌شتێ دكه‌ت، ل وى جهێ گه‌شتیارى هه‌بیت، لێ لاوازیا ڤان پرۆژان ل هه‌رێما كوردستانێ، بۆ وێ چه‌ندێ دزڤریت، كو هه‌تا نوكه حوكمه‌تا هه‌رێما كوردستانێ چو ڤاڤارتن نه‌كریه دناڤبه‌را وه‌به‌رهێنه‌را و سه‌رمایه‌داران دا، چونكى ده‌مێ وه‌به‌رهێنه‌ره‌ك پرۆژه‌كێ گه‌شتیارى ئه‌نجام دده‌ت، ل وێ چه‌ندێ دگه‌ریت كو ژێرخانه‌كا گه‌له‌كا باش و ب رێكوپێك و لدووڤ نووترین رێكێن شارستانى و هه‌ڤچه‌رخ وى پرۆژێ گۆزارى ئه‌نجام بده‌ت، ژ پێخه‌مه‌ت سه‌ركه‌فتنه‌كا مه‌زن ب ده‌ست خوه‌ڤه بینیت و قازانجه‌كێ مسوگه‌ر د وى پرۆژه‌ى دا ب ده‌ست وى وه‌به‌رهێنه‌رى ڤه بهێت،ئه‌ڤه دێ بیته هوكاره‌ك كو حوكمه‌ت ژى پتر هاریكاریا وى وه‌به‌رهێنه‌رى بكه‌ت داكو پتر پرۆژێن گه‌شتیارى ب ده‌ست خوه‌ڤه بینیت.
ناڤهاتى گۆت ژى: سه‌رمایه‌دار ل وێ چه‌ندێ ناگه‌ریت كو بچیت كه‌سه‌كێ شاره‌زا بینیت د وارێ گه‌شتیارى دا، یان ژى سه‌ركه‌فتنا وى پرۆژه‌ى سه‌دێ سه‌د ب ده‌ست خوه‌ڤه نائینیت، لێ ب تنێ یا وى پالدانه‌كه كو پرۆژه‌كێ گه‌شتیارى ئه‌نجام بده‌ت، یان ژى وى گه‌شته‌ك كریه بۆ چه‌ند وه‌لاتان و وى چه‌ند جهێن گه‌شتیارى دیتینه، هه‌روه‌سا ژبه‌ركو وى پاره‌كێ زه‌به‌لاح یێ هه‌ى، دێ پرۆژه‌كێ ئه‌نجام ده‌ت، لێ پشتى چه‌ند سالان دێ شكه‌ستنێ د وى پرۆژه‌ى دا ئینیت، دێ زیانه‌كا مه‌زن گه‌هیتێ، ئه‌ڤ چه‌نده دێ كارتێكرنێ ل ئابوورێ وه‌لاتى ژى كه‌ت، ئه‌ڤ چه‌نده دێ باوه‌ریا گه‌شتیارى ژى ژ ده‌ست ده‌ت، چونكى ده‌مێ ئه‌و پرۆژێ گه‌شتیارى دهێته ڤه‌كرن و پشتى هنگێ دهێته دائێخست دێ كارتێكرنه‌كا راسته‌وخۆ ل سه‌ر ئاستێ نێڤده‌وله‌تى ژى په‌یدا كه‌ت، چونكى ئه‌و پرۆژه نایابێ نێڤده‌وله‌تى دچیته د چارچۆڤێ گرۆپێن كۆمپانیێن گۆزارى یێن جیهانى یێن ناڤدار، له‌وما ده‌مێ دهێته دائێخستن دێ گۆمانه‌ك بۆ گه‌شتیارى چێبیت و باوه‌رى بۆ وى چێنابیت، كو جاره‌كادى قه‌ستا وى وه‌لاتى بكه‌ت، له‌وما هه‌تا نوكه حوكمه‌تا هه‌رێمێ ڤاڤارتن نه‌كریه دناڤبه‌را وه‌به‌رهێنه‌رى و سه‌رمایه‌دارى دا.
هێشتا دیاركر ژى: هه‌تا نوكه سه‌رمایه‌دارێن پارێزگه‌ها دهۆكێ ب ره‌نگه‌كێ گشتى خوه نه‌هاڤێتینه پرۆژێن گه‌شتیارى، چونكى پرانیا وان هزر ل ب ده‌سته‌ئینانا قازانجێ ب له‌ز دكه‌ن، هه‌ر چه‌نده قازانجێ پرۆژێن گه‌شتیارى گه‌له‌ك یێ مسۆگه‌ره، لێ داهاتێ وێ هێدى هێدى دهێت، لێ دڤێت حوكمه‌تا هه‌رێمێ پلانه‌كا توكمه دارێژیت ل گه‌ل وه‌به‌رهێنه‌ران، دیسا ده‌مێ ئه‌و پرۆژه‌كێ وه‌به‌رهێنانێ دده‌نه وه‌به‌رهێنه‌ران، پێدڤیه حوكمه‌ت ل سه‌ر وان ب سه‌پینیت كو ئه‌و پرۆژه‌كێ نایاب یێ گه‌شتیارى ل ده‌ڤه‌ره‌كا وه‌كو ئامێدیێ چێكه‌ت و لدووڤ ستانداردێن جیهانى بیت، چونكى جهه‌كێ گه‌له‌كێ گۆنجایه ل دهۆكێ، ئه‌ڤ چه‌نده دێ سه‌رنجا گه‌شتیارێن بیانى ژى راكێشیت.
ئه‌و گه‌شتیارناسه دبێژیت ژى: یا فه‌ره كۆمپانیێن بیانى یێن نایاب یێن جیهانى د وارێ گه‌شتیاریێ دا بهێنه كوردستانێ و ب هه‌ڤرا ل گه‌ل كۆمپانێن گه‌شتیارى یێن كوردستانێ كونتاكتێ چێكه‌ن و ب هه‌ڤرا كار بكه‌ن، دیسا ئه‌و پرۆژێن نوو یێن گۆنجاى بۆ ده‌ڤه‌را دهۆكێ دروست بكه‌ن، چونكى هه‌تا نوكه پووته‌دان ب گه‌شتیاریا زڤستانى نه‌هاتیه‌دان، له‌وما پێدڤى بوو، هه‌تا نوكه ڤى جۆرێ گه‌شتیارى گه‌شه‌كرنه‌كا باش ب خوه‌ڤه دیتبا، چونكى مه ده‌ڤه‌رێن گۆنجاى هه‌نه، ئه‌ڤه دێ خاله‌كا ئه‌رێنى بیت، هه‌كه هه‌موو خزمه‌تگۆزارى بهێنه دابینكرن، ئه‌ڤ لاوازیا نوكه هه‌ى دێ هێته چاره‌كرن و دێ كه‌رتێ گه‌شتیارى گه‌هیته ئاسته‌كێ بلند، دێ بنیاته‌كێ باش ژى هێته دانان و دێ ژین و ژیاره‌كا دیتر ده‌ته خه‌لكێ دهۆكێ و دێ بارێ ئابوورى یێ خه‌لكێ ژى باشتر لێ هێت، هه‌كه پرۆژێن دیلۆكس ل ده‌ڤه‌رێن دوورى باژێران ژى بهێنه چێكرن لدووڤ كوالێتیا جیهانى بیت، دێ بیته ئه‌گه‌رێ دلخۆشى و ئارامیێ بۆ گه‌شتیاران ژى.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ سێشه‌مبى 30/10/2018 پێشوازى ل سه‌عد جه‌نابى سه‌رۆكێ گردبوونا كۆمارى ل عيراقێ كر.
ل دووڤ ويبسايتێ تايبه‌ت يێ سه‌رۆك بارزانى، دديداره‌كێ دا ره‌وشا سياسى يا عيراقێ وپێكئينانا حوكمه‌تا عيراقى يا نوو هاته به‌حسكرن.
هه‌ر د وێ كۆمبوونێ دا، به‌حسێ ره‌وشا باژێرێ كه‌ركووكێ هاته كرن ودووپاتى هاته كرن كو پێدڤيه ره‌وشا كه‌ركووكێ بهێته ئاساييكرن وكه‌ركووك وه‌كو نموونا پێكڤه‌ژيانا پێكهاتێن باژێرى بمينيت.
ئه‌ڤرۆ نیوز، نه‌وزاد هلۆرى:
گوندێ دێویكێ ل ده‌ڤه‌را زێبار ل سنوورێ ناحیا شێلادزێ ئێكه ژ وان گوندان كو پرانیا كاروبارێن خوه‌یێن روژانه ب ئامیرێن كه‌ڤن و ساده ب رێڤه دبه‌ن و زانست و ته‌كنولوژیا نكاریت روولێ خوه د هه‌موو كاران دا ببینیت ب تایبه‌تى د چاندنێ.
ل گوندێ دێویكێ نێزیكێ 60 خێزانان هه‌نه و دكه‌ڤیته باشوورێ ناحیا شێلازدزێ و نێزیكه ل رووبارێ زێ مه‌زن، و ده‌شته‌كا مه‌زن هه‌یه و هه‌موو جورێن ده‌رامه‌تى تێدا دهێنه چاندن، ئه‌ڤه زێده‌بارى كو ته‌رش و كه‌واله‌كێ باش تێدا دهێته خواندنكرن.
ئه‌ڤا ل خوارێ چه‌ند دیمه‌نێن دورین و گێره‌كرنا برنجێ كوردى یه ب شێوازێ كه‌ڤن ئانكو ب داسێ دهێته دورین و ب شینكێ برنجى ب پشتێ دهێته كێشان بو جهێ جوخینێ، و پاشان ب تراكتورێ سه‌را دهێن و دچن داكو پوشك ژ شینكى ڤه‌بیت و ببیته برنج.
ئه‌ڤرۆنيوز:
چه‌كدارێن تيرۆرستێن داعشێ هێرشێ دكه‌نه سه‌ر گونده‌كى ل سنورێ باژێرێ حه‌ويجه وسه‌رۆكێ جڤاتا وى گوندى دكوژن، بۆ ده‌مێ ساله‌كێ يه باژێرێ حه‌ويجه ژ تيرۆرستێن داعشي هاتيه پاقژكرن، به‌لێ ب شه‌ڤ چه‌كدارێن داعشێ هێرشێ دكه‌نه سه‌ر مالان وكريارێن تيرۆرستى ئه‌نجام دده‌ن.
ل شه‌ڤا بۆرى داعشێ هێرش كره سه‌ر گوندێ (جاسميه) ل سنورێ باژێرێ حه‌ويجه وپشتى شه‌ره‌كى كه‌سه‌كى دكوژن ب ناڤێ (محه‌مه‌د جومعه) كو سه‌رۆكێ جڤاتا وى گوندى بوو وپاشى چه‌كدارێن داعشێ ژ گوندى ده‌ردكه‌ڤن.
ئه‌ڤرۆنيوز:
وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ راگه‌هاند، زانكۆيا ئوكسفۆرد يا بريتانى 140 سكۆله‌رشيپ بۆ هه‌موو وه‌لاتێن جيهانێ رادگه‌هينيت وئه‌وێن ل هه‌رێما كوردستانێ ژى دخوازن ل وێرێ بخوينن، دشێن داخوازا خوه پێشكێش بكه‌ن، ئه‌ڤه ژى دده‌مه‌كى دايه كو هه‌موو خه‌رجيێن ڤێ سكۆله‌رشيپێ ل سه‌ر ستوويێ زانكۆيا ئوكسفۆرده.
ئێك/ مه‌رجێن خواندنا ماسته‌رێ:
دوو/ مه‌رجێن خواندنا دكتۆرايێ
ديسا دياركريه كو دووماهى ژڤان بۆ پێشكێشكرنێ 25/1/2019 يه.
ئه‌ڤرۆ نیوز:
سه‌رۆك وه‌زیرێن هه‌رێما كوردستانێ د توویته‌كی دا ب زمانێ عه‌ره‌بی چلیا ئیمام حسێن ب هێمایێ خوه‌راگری و ئارامگرتنێ ناساند.
نێچیرڤان بارزانی ب هه‌لكه‌فتا چلیا ئیمام حسێن گۆت ژی:(سالڤه‌گه‌را چلیا شه‌هیدبوونا ئیمام حسێن هێمایێ خوه‌راگری و ئارامیێ یه بۆ هه‌ر كه‌سه‌كی، كو دڤێت شوون تبلێن خوه د دیرۆكا خه‌باتێ دا بۆ ب ده‌ستڤه‌ئینانا مافان بهێلیت، ئه‌ڤجا شیانێن یه‌یاران هه‌ر چه‌ند بن).
سه‌رۆك وه‌زیرێن هه‌رێما كوردستانێ هیڤی خواست رێوره‌سمێن ساخكرنا سالڤه‌گه‌را ئیمام حسێن ب ئارامی برێڤه بچیت و ببیته هانده‌ره‌ك بۆ نه‌هێلانا سته‌م و گه‌نده‌لیێ و بزاڤكرن بۆ په‌یدابوونا ئاسایش و پێكڤه‌ژیان و ب ده‌ستڤه‌ئینانا مافان بۆ هه‌موو خودان مافان.
نيشاندان