ئه‌ڤرۆ نيوز:

ئەندامەکێ سەرکردایەتیا پارتی دیموکراتی کوردستان/ سووریا دیار دکەت کو رێککەفتن د ناڤبەرا ‏تورکیا، ئیران، سووریێ و روسیا دا ھەیە و ئارمانجا سەرەکی یا وان وەلاتان ژی ئەڤە کو نەھێلن چو ‏کیانێن کوردی ل رۆژئاڤایێ کوردستانێ ھەبیت، ژ بەر ھندێ ژی تورکیا دێ دەستان ژ منبجێ ‏بەردەت و دێ بەرێ خوە دەتە رۆژھەلاتێ فراتێ و مەترسیێن مەزن دێ بۆ کوردان ل سووریێ ‏ھەبن.‏

سەعید عومەر ئەندامێ سەرکردایەتیا پارتی دیموکراتی کوردستان/ سووریا بۆ رۆژناما ئەڤرۆ دیار ‏کر کو پیلانەکا مەزن ل دژی رۆژئاڤایێ کوردستانێ د رۆژەڤێ دایە، تورکیا، ئیران و روسیا ل دۆر ‏ھندێ رێککەفتینە کو نەھێلن چو کیانەکێ کوردی ل سووریێ بھێتە ئاڤاکرن و داخۆیانیێن وان یێن ‏پشتی کۆمبوونا ئستەنبولێ ژی ڤێ راستیێ نیشا ددەت کو پیلانەکا مەزن ل دژی رۆژئاڤایێ ‏کوردستانێ ھەیە و گۆت: (ئارمانجا سەرەکی ئەڤە کو رۆژئاڤایێ کوردستانێ ژ ھەڤدو پارچە بکەن، ‏پیلانێن وان یێن ھێرشکرنا ل سەر رۆژھەلاتێ فراتێ ژی بۆ ھندێ یە، مخابن رەوشا نھا گەلەکێ ‏ئالۆزە).‏

ناڤھاتی راگەھاند کو بەری نھا گەلەک بزاڤ ھاتنە کرن کو رژێما سووریێ ژناڤ بچیت، لێ ئەڤ پیلانە ‏سەرنەگریت نھا تورکیا دبێژیت ھەکە دێ رژێما سووریێ ھەر مینیت بلا کۆنترۆلا ھەموو سووریێ ‏بکەت دا چو کیانێن کوردی ئاڤا نەبن، ژ بەر ھندێ ژی تورکیا ئێدی بەحسێ منبجێ ناکەت و ‏بەرھەڤیان بۆ ھێرشەکا مەزن ل رۆژھەلاتێ فراتێ دکەت و گۆت: (ئەز ب باوەرم ل دووماھیێ دێ ‏ھەر ئەڤ تشتە روو دەت، ئانکۆ دێ تورکیا ھاریکاریا لەشکرێن سووریێ کەت دا ھەموو دەڤەرێن نھا ‏ل ژێر کۆنترۆلا یەپەگێ و ھێزێن سووریا دیموکرات جارەکا دی بکەڤنە ژێر کۆنترۆلا حوکمەتا ‏سووریێ).‏

ئەندامێ سەرکردایەتیا پارتی دیموکراتی کوردستان/ سووریا ئەو یەک ژی دیار کر کو بابەتێ ئدلبێ ‏دێ پتر دەستێ رژێما سووریێ بھێز کەت، چونکو پیلانەکا ھەی ئدلبێ بێی شەر رادەستی رژێما ‏سووریێ بکەن، بەری نھا ژی چەندین جاران بەرپرسێن رژێما سووریێ گۆتینە کو پشتی رەوشا ‏ئدلبێ سافی بوو دێ بەرێ خوە دەنە دەڤەرێن دی یێن سووریێ ب تایبەتی ژی رۆژھەلاتێ فراتێ و ‏گۆت: (مخابن نھا روسیا ژی رۆلەکێ خراب ل دژی کوردان دگێریت، چەندین جاران بەرپرسێن ‏سووریێ گۆتن کو ئەمریکا دخوازیت دەولەتەکا کوردی ل باکورێ سووریێ ئاڤا بکەت و ئەم ناھێلین ‏تشتەک وەسا روو بدەت، ھەر کەس باش دزانیت کو د بەرنامێ پەیەدێ دا دەولەتا کوردی نینە، ‏ئانکۆ ئاشکرایە روسیا ڤێ خالێ وەکو بەھانەکێ بکار دئینیت دا نەھێلن کورد ل سووریێ بگەھنە ‏مافێن خوە، ژ بەر ھندێ ژی ئەز دبێژم مەترسیەکا مەزن ل سەر پاشەرۆژا کوردان ل سووریێ یا ‏ھەی).‏

سەعید عومەر ئەو یەک ژی دیار کر کو بابەتێ ئدلبێ و منبجێ دێ وەسا کەن دەستێ رژێما سووریێ ‏بھێز کەڤیت، وەکو بەرێ نھا کەس دژبەریا رژێما بەشاری ژی ناکەت، ژ بەر ھندێ ژی بەرەیێن کو ‏دژبەریا مافێ کوردان ل سووریێ دکەن ئانکۆ دەولەتێن تورکیا، ئیران، سووریا و روسیا دگەھنە ئێک و ‏ئەو یەک ژی مەترسیەکا مەزنە بۆ کوردان ل سووریێ و گۆت: (سیاسەتا شاش یا پەیەدێ کو نەھێلا ‏کورد ل رۆژئاڤایێ کوردستانێ خوە ب رێکخستن بکەن ژی وەسا کر کو پێگەھێ کوردان لاواز بیت و ‏مە بەری نھا ژی گۆتبوو کو رژێما شامێ بخوە ئەو دەڤەر رادەستی پەیەدێ کرن و نھا ژی جارەکا دی ‏دخوازیت ژ وان وەربگریت و رەنگە پشتی دەمەکێ ھەموو تشت پتر بۆ رایا گشتی ئاشکرا ببن).‏