ئەڤرۆ نیوز:
ل روژێن ده‌ربازبوى خودانێن هنده‌ك موه‌لیدا ل سنورێ پارێزگه‌ها دهوكێ نه‌رازیبونا خودیاركربو ل دور بهایێ ده‌ستنیشانكرى بو ئه‌مپێرێ كاره‌با موه‌لیدا وژڤانێ هلكرنا وان … ل دور بابه‌تێ ناڤبرى وره‌وشا كاره‌با گشتى لرێكه‌فتى 18/12/2018 ب چاڤدێری و ئاماده‌بوونا رێزدار فه‌رهاد ئه‌مین ئه‌تروشى پارێزگه‌رێ دهوكێ كومبونه‌ك دگه‌ل لایه‌نێن په‌یوه‌ندیدار ب باتیڤه‌ هاته‌ گرێدان وپشتى دان وستاندنێن تێروته‌سل هاتینه‌ كرن ئه‌ڤ بریاره‌ هاتنه‌ دان :-
1 – به‌رنامێ كاركرنا موه‌لیدان یێ مه‌ها (12) 2018 گهورین تێدا نا هێته‌ كرن وپێدڤى یه‌ خودانێن موه‌لیدا پێگریێ پێبكه‌ن و به‌روڤاژى ڤێ چه‌ندێ پێرابوونێن پێدڤى دێ هێته‌ وه‌رگرتن .
2- بهایێ ئه‌مپێرى وه‌ك به‌رى نوكه‌ هاتیه‌ راگه‌هاندن دێ مینیت و هیچ گورانكاریه‌ك تێدا ناهێته‌ كرن و بزاڤ دێ هێنه‌ كرن بو چاره‌سه‌ریا جیاوازیا بهایێ ئه‌مپێرى بو خودانێن موه‌لیدا .
3 – بریار هاته‌ دان كاره‌با نیشتمانى یا به‌رده‌وام ژ پروژه‌ و دام و ده‌زگه‌هێن جودا جودا بهێته‌ برین و بچیته‌ دناڤ خشتێ كاره‌با گشتى دا بو وێ یه‌كێ هاولاتى پتر مفاى ژ كاره‌با گشتى وه‌رگرن ژبلى پروژێن (ئاڤێ – نه‌خوشخانا ئازادى و ته‌نگاڤیان و چاكسازیێن زركا و ئێتیتێ) .
4 – بزاڤ دێ هێته‌ كرن دگه‌ل ئه‌نجومه‌نێ وه‌زیران بو دابین كرنا رێژه‌كا پتر یا گازوایلێ بو وێستگه‌ها كاشێ یا به‌رهه‌مئینانا كاره‌بێ ژ بو زێده‌كرنا رێژا كاره‌با گشتى .
هه‌ژى گوتنێ یه‌ به‌رى نوكه‌ لیژنا بلند یا موه‌لیدا ل پارێزگه‌هێ بهایێ ئێك ئه‌مپێرێ كاره‌با موه‌لیدێ ده‌ست نیشانكریه‌ كو بتنێ (8,500) دینارن وژڤانێن كاركرنا موه‌لیدا ژى دێ ژ ده‌م ژمێر (7-9) سپێدێ وژ(2پشتى نیڤرو هه‌تا 2شه‌ڤ ) بیت.

ئەڤرۆ نیوز هوگر محه‌مه‌د:‎

پروژێ گوھارتنا رەنگێن تەکسیێن دھوکێ کو بۆ دو رەنگان دێ ھێنە گوھورین چاڤەرێ رازیبوونێ دھێتە کرن دا کو کار بۆ کومپانیەکێ بھێتە رادەستکرن‎.‎

ل دور ڤی بابەتی خوشڤی عوسمان رێڤەبەرێ ڤەگوھاستنێ ل پارێزگەھا دھۆکێ بۆ ئەڤرۆ نیوز دیارکر کو نوکە پروژە ل پارێزگەھا دھۆکێ یە و چاڤەرێ ‏رازیبوونێ دکەن دا کو بھێتە رادەستکرن بۆ کۆمپانیەکێ‎.‎

زێدەتر ناڤھاتی گۆت: رەنگێ تەکسیێن ناڤا باژێری دێ رەش بن و یێن کاری ل دەرڤە دکەن دێ قەھوەیی بن و ب ڤێ چەندێ ھەتا رادەکی دێ شێین ئاریشە و ‏سەرپێچیێن کارکرنا وان چارەسەرکرن و جوداکرن‎.‎

زێدەتر ئاماژە ب وێ چەندێ کر کو ھەیڤانە راپۆرتەکێ ددەنە رێڤەبەریا ھاتنوچوونا پارێزگەھا دھۆکێ ل سەر وان ترۆمبێلێن سەرپێچیا کارکرنێ و ڤەگۆھاستنا ‏رێڤینگان دکەن‎.‎