ئەڤرۆ نیوز ، زنار تۆڤی:
ل شەڤا بوری پشتی ململانەکا درێژ ل گەل نەساخیێ عه‌لادین قه‌یسی قورئان خوینێ مەزنێ عیراقێ د ژیێ 75 سالیێ دا ل عه‌مانا پایته‌ختێ ئوردنێ وەغەرکریە.
جهێ ئاماژە پێکرنێیە کو عه‌لادین قه‌یسی، خودانێ ده‌نگەکێ خۆش و شیانێن باش هه‌بوون ل مقاماتێن عیراقی دا، هەروەسا ل سالا 2009 دا هاتیە هەلبژارتن ب سه‌رۆكێ ( رابیتا ئیسلامی یا جیهانی) ل مالیزیا.
ئەڤرۆ نیوز ، زنار تۆڤی:
رێڤەبەریا گشتی یا سەقاناسی و بیڤەلەرزان ل ھەرێما کوردستانێ پێشبینێن سەقایی د 48 دەمژمێرێن بهێن دا بەلاڤکرینە و لدووڤ پێشبینیێن وان سوبەهی ل چەندین دەڤەران دێ باران باریت.
رێڤەبەریا سەقاناسی و بیڤەلەرزان ل ھەرێمێ پێشبینیێن خوە د 48 دەمژمێرێن داهاتی دا دیارکرینە، هەروەسا و لدووڤ پێشبینیێن وان ئەڤرۆ ئەینیێ دێ ئەسمانێ ھەرێمێ د ناڤبەرا نیڤ ساهی و نیڤ عەوری دابیت و ئەگەرێ باران بارینەکا هوور ل هندەک جهێن جۆدا دا ھەیە.
هەروەسا لدووڤ پێشبینێن سەقاناسیا ھەرێمێ سوبەهی شەمبیێ دێ ل هەموو پارێزگەھێن هەرێمێ ئەسمان د ناڤبەرا نیڤ عەوری بۆ عەورێن تەمام دا بیت و ئەگەرێ باران بارینێ ژی هەیە.
ئەڤرۆ نیوز ، زنار تۆڤی:
پشتی ژ لایێ سەرۆک کۆماری ڤە هاتیە راسپاردن بۆ پێکئینانا حوکمەتا نوو یا عیراقێ، سەرۆک وەزیرێ راسپاردیێ عیراقێ راگەھاندیە، کو ل رۆژا چارشەمبیا بھێت دێ پشکەکا کابینا نوو یا حوکمەتا عیراقێ ئاشکرا کەت.
ئۆفیسا عادل عەبدولمەھدی سەرۆکێ راسپاردی یێ حوکمەتا عراقێ د بەیانەکێ دا راگەھاندیە، کو رۆژا چارشەمبیا بھێت، دێ ناڤێن پشکەکا وەزیرێن کابینا نوو یا حوکمەتا عیراقێ ھێنە ئاشکراکرن، لێ هەتا نوکە ناڤێن چو وەزیران د حوکمەتا نوودا ب فەرمی نەهاتینە ئاشکرا کرن.
ئەڤرۆ نیوز:
هه‌ر چه‌نده د چه‌ند سالێن بوریدا دروستكرنا ئاڤاهی و بالەخانان پێشكه‌فتنەکا به‌رچاڤ ب خوەڤە دیتیە و د ماوەکێ كێمدا ئاڤاهیێن مەزن دهێنە دروست کرن.
کۆمپانیەکا چینى بریار دایە کو ڤێ هەڤرکیێ ببەته ئاستەکێ دیتر و د ماوێ 90 رۆژان دا بلندترین ئاڤاهی ل جیهانێ دروست بكەت.
ئەڤ ئاڤاهیە دێ ژ کەلوپەلێن پێشتر بۆ هاتینە ئامادەکرن هێتە دروستکرن و ل سالا 2012 دا ڤێ كۆمپانیێ ئه‌ڤ ئه‌زموونه ئه‌نجامدایه و ئاڤاهیەکێ 30 قاتى د ماوێ 15 رۆژان دا دروست كریه.
ئه‌ڤ باله‌خانا نوو کو بریارە د ماوێ 90 رۆژان دا بهێتە چێکرن، دێ بلندترین باله‌خانه بیت ل جیهانێ و دێ ناڤێ وی کەنە (باژێرەک ژ ئەسمانی)، بلنداهیا ڤی ئاڤاهی دێ 838 مه‌تر بیت و ژ 220 قاتان پێكدهێت.
ئەڤ ئاڤاهیە دشێت به‌رگریا بیڤه‌له‌رزان بکەت هەتا دگەهیتە 9 پلێن ریختەرێ.
ئەڤرۆ نیوز ، زنار تۆڤی:
جڤاتا ئاسایشا هه‌رێما كوردستانێ راگه‌هاندنه‌ك به‌لاڤكر و تێدا ئاماژه ب گرتنا گرۆپه‌كا دزین و ب قاچاخبرنا نەفتێ راگه‌هاندیە.
د وێ راگه‌هاندنا جڤاتا ئاسایشا هه‌رێما كوردستانێ دا هاتیه: کو د چارچۆڤێ بزاڤێن جێبەجێكرنا قانوونێ بۆ روو ب رووبوونا گه‌نده‌لیێ و نه‌هێلانا ده‌ستێوه‌ردانێ د مۆلكێ گشتی دا و لدووڤ بریارا دادوه‌ری، د ئۆپه‌راسیۆنه‌كا سازیێن ئێمناهیێ و رێڤه‌به‌راتیا ئاسایشا گشتی دا گرۆپه‌كێ دزین و ب قاچاخبرنا نەفتێ هاته گرتن.
د وێ راگه‌هاندنێ دا هاتیه ژی: ئه‌و گرۆپه ژ چار وه‌لاتی و دو كارمه‌ندێن ئاسایشێ پێكهاتی بوون و دێ لدووڤ رێكارێن قانوونێ سه‌ره‌ده‌ری ل گه‌ل دا هێته كرن.
هه‌روه‌سا جڤاتا ئاسایشا هه‌رێمێ ئاشكه‌را كریه ژی، كو ئه‌و هه‌موو وه‌لاتیان پشت راست دكه‌ن، کو ژ پێخەمەت سه‌روه‌ریا قانوونێ رێکێ ناده‌ن ده‌ست درێژی ل سه‌ر مۆلك و مالێ گشتی و وه‌لاتیان بهێته كرن و هه‌ر ئالیه‌كێ قانوونێ بشكێنیت دێ روو ب روو دادگه‌هێ بیت و دێ سزایێ خوه یێ قانوونی وه‌رگریت.
ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن: کو ئەڤرۆ د روودانەکا ترافیکێ دا دو کەسان گیانێ خوە ژ دەستدا.
ناڤهاتی زێدەتر دا دیارکرن: ئەڤرۆ پێنجشەمبی 18/10/2018ل دەمژمێر(3:00)ئێڤاری ل سەر جادا گشتی یا دناڤبەرا قەزا بەردەرەش بۆ پرا حسێنیێ و ل نێزیک مفرەقا گوندێ دولێجانێ روودانەک ژ جۆرێ لێگدان روودایە و د وێ رووانێدا دو کەسان گیانێ خوە ژ دەستدایه و هندەک کەس ژی بریندار بووینە.
ئه‌ڤرۆ نیوز، نه‌وزاد هلۆرى:
ب به‌رهه‌ڤبووونا رێڤه‌به‌رێ گشتیێ په‌روه‌ردا پارێزگه‌ها دهۆك و قایمقامێ قه‌زا سێمێل و شانده‌كێ نڤێسینگه‌ها رێكخراوا یونێسێف و رێڤه‌به‌رێ بوردێ كاروبارێن مروڤایه‌تى و ژماره‌كا به‌رپرسێن حكومى و رێكخراوێن نیڤده‌وله‌تى ، پروژێ زڤرین بو قوتابخانێ ل كه‌مپا دومێز ئێك هاته راگه‌هاندن.
دڤى واریدا ئه‌حمه‌د زوبێر به‌رپرسێ راگه‌هاندنا رێڤه‌به‌ریا گشتى یا په‌روه‌ردا پارێزگه‌ها دهۆك بۆ ئه‌ڤرۆ نیوز گۆت: (دپروژه‌ى دا بزاڤ دهێنه‌كرن كو قوتابیێن ئاواره و په‌نابه‌ر مینا قوتابیێن خوجهێن پارێزگه‌ها دهۆكێ بێ به‌هر نه‌بن ژ مافێ خواندنێ ، و ئه‌ڤ پرۆژه ب هه‌ڤكاریا رێكخراوا یونێسێف هاتیه ئه‌نجام دان)
زێده‌تر گۆت: (ئه‌ڤ پروژه ل 10/10/2018 ده‌ستپێكریه ودێ بو ماوێ هه‌یڤه‌كێ ڤه‌كێشیت ول سه‌رانسه‌رى پارێزگه‌ها دهوكێ ڤه‌دگریت ومه‌ره‌م ژ ئه‌نجامدانا ڤى پروژه‌ى ئه‌وه هه‌ول وبزاڤ بهێنه كرن كو ئه‌و قوتابیێن ژبه‌ر هه‌ر ئه‌گه‌ره‌كێ هه‌بیت په‌یوه‌ندى ب قوتابخانێ نه‌كربیت جاره‌كا دى بزڤریته قوتابخانێ وهه‌مى هاریكارى وئاسانكارى بو بهێنه كرن)
ئه‌ڤرۆ نيوز، نيوار محه‌مه‌د سه‌ليم:
پشتى كاره‌با هه‌رێمێ راگه‌هاندى كو دێ بۆ ماوێ 48 هه‌تا 72 ده‌مژمێران كاره‌با نشتيمانى هێته راگرتن و لژنا مواليدان ژى به‌حس ل ده‌مژمێرێن كاره‌با گشتى دكه‌ت.
ب گۆره‌يى به‌ياننامه‌كا وه‌زاره‌تا كاره‌با هه‌رێما كوردستانێ، بڕياره سوبه‌هى رۆژا ئه‌ينى و بۆ ده‌مێ 48 هه‌تا 72 ده‌مژمێران كاره‌با نشتيمانى بهێته بڕين ب ره‌مه‌ما گوهۆڕينا سيسته‌مێ كاره‌بێ بۆ يێ غازێ و زێده‌كرنا رێژا به‌رهه‌مئينانا كاره‌بێ.
به‌شير مزوورى، به‌رپرسێ لژنا مواليدان ل قايمقاميا پارێزگه‌ها دهۆكێ، بۆ ئه‌ڤرۆ نيوز گۆت: “ل ده‌سپێكێ مه به‌رنامه‌ك دانابوو كو هه‌كه كاره‌با نشتميانى نه‌بيت، ل رۆژانێن بهێن ڤه‌دان ل ده‌مژمێر 11:00 هه‌تا ده‌مژمێر 03:00ى پشتى نيڤرۆ هه‌بيت و ژ ده‌مژمێر 05:00 هه‌تا 02:00 شه‌ڤ”.
زێده‌تر گۆت: “پاشان هاتينه ئاگه‌هدار كرن كو دهێته پێشبينيكرن كاره‌با نشتيمانى ل دهۆكێ د ڤان رۆژان دا هه‌تا 10 ده‌مژمێران ژى هه‌بيت، هه‌كه ب ڤى ره‌نگى ژى بيت، كاره‌با مواليدان دێ ل وان ده‌مژمێرێن ڤالا هێته دابينكرن و ب ره‌نگه‌كێ 24 ده‌مژمێرى دێ هه‌بيت”.
نه‌ڤه‌شارت ژى كو ل حاله‌تێ وێ چه‌ندێ كو هه‌كه شه‌ش ده‌مژمێران ل سه‌ر ئێك كاره‌با نشتيمانى نه‌بوو، ل وى ده‌مى بۆ ماوێ ده‌مژمێره‌كێ خودانێ مواليده‌يى دێ بهێنڤه‌دانێ ده‌ته مواليده‌يى دا كو ژ كار نه‌كه‌ڤيت.
ئه‌ڤرۆ نيوز:
سه‌رۆكێ ديوانا وه‌زاره‌تا ناڤخۆ راگه‌هاند كو به‌غدا بڕيارا هه‌لوه‌شاندنا رێڤه‌به‌ريا گشتى يا ره‌گه‌زناما هه‌رێما كوردستانێ دايه و ب ڤێ چه‌ندێ ژى پتريا كارێن وه‌لاتيان دێ ڤه‌گه‌رن بۆ به‌غدا.
سامى جه‌لال، سه‌رۆكێ ديوانا وه‌زاره‌تا ناڤخۆ، د داخۆيانيه‌كێ دا راگه‌هاند كو حوكمه‌تا به‌غدا بڕيارا هه‌لوه‌شاندنا رێڤه‌به‌ريا گشتى يا ره‌گه‌زنامێ ل هه‌رێما كوردستانێ دايه.
دا زانين ژى كو ب ڤێ بڕيارێ دێ پتريا كاروبارێن وه‌لاتێن هه‌رێما كوردستانێ بۆ به‌غدا ڤه‌گه‌رن و ئێدى كارئاسانى بۆ وه‌لاتيان دێ ب زه‌حمه‌ت كه‌ڤيت.
پشتى هه‌ر ئێك ژ گۆڕان و نه‌وه‌يى نوێ و كۆمه‌لا ئيسلامى سكالا ل سه‌ر هه‌رێما كوردستانێ تۆمار كرى ب مه‌ره‌ما ده‌ستكاريكرن د ناسنامان دا ب مه‌ره‌ما ده‌نگدانێ، حوكمه‌تا به‌غدا لژنه‌ك بۆ ڤه‌كۆلينێ پێك ئينايه و بڕيارا گرتنا رێڤه‌به‌ريا گشتى يا ره‌گه‌زنامێ ژى ل هه‌رێما كوردستانێ دايه.
ئەڤرۆ نیوز، نەوزاد ھلۆری:
وەزارەتا خواندنا بلند و ڤەکوینێن زانستی دایە دیارکرن کو ماوێ پێشکێشکرن بو زانکو و پەیمانگەھێن ئەھلی ل ھەرێما کوردستانێ ھاتە زێدەکرن و قوتابی دشێن ھەتا روژا 8ێ چریا ئێکێ فورمێن خوە پێشکێش بکەن.
ب گورەی نڤیسارەکێ کو رێڤەبەریا خواندنا ئەھلی یا سەر ب وەزارەتا خواندنا بلند و ڤەکوینێن زانستی بەلاڤکریە و ئیمزا سەرپەرشتیارێ زانکو و پەیمانگەھێن ئەھلی یێن حوکمەتا ھەرێما کوردستانێ ل سەر ھەیە ، دیاردبیت کو ماوێ پێشکێشکرنا فورمان بو ھەتا 8ێ چریا ئێکێ ھاتیە درێژکرن.
دەمێ پێشکێشکرنێ چەند روژێن بوری دەست پێ کریە و ھەتا روژا 27 چریا ئێکێ 2018 و دەمژمێر 8:00ێ سپێدێ دێ یا بەردەوام بیت و دڤی ماوەی دا قوتابی دشێن فورمێن خوە پێشکێش بکەن.
نيشاندان