ئه‌ڤرۆ نيوز:

چاڤدێرەکێ سیاسی ل وەلاتێ بریتانیا دیار دکەت کو ب ئازادکرنا قەشەیێ ئەمریکی پەیوەندیێن ‏تورکیا و ئەمریکا ئاسایی نابن، چونکو ناکۆکیێن ھەر دو وەلاتان ژ بابەتێ قەشەیی گەلەکێ ‏مەزنترە، چەنکو ئازادکرنا قەشەیێ ئەمریکی ب فەرمانا ئەردۆگانی بوویە و ژ نەچاریێ ئەڤ بریارە ‏ھاتیە دان.‏

ھێمن سەیدی چاڤدێرێ سیاسی ل وەلاتێ بریتانیا بۆ رۆژناما ئەڤرۆ دیار کر کو ئازادکرنا قەشەیێ ‏ئەمریکا ژ بەر گەف و سزایێن ئەمریکا بوو کو بەری نھا ل سەر تورکیا ھاتبوو سەپاندن و ‏ئەردۆگانی نەشیا خوە ل ھەمبەر ڤان سزایان رابگریت و ژ بەر ھندێ ژی ژ نەچاریێ بریارا ‏ئازادکرنا قەشەیی ھاتە دان و گۆت: (رەنگە ھندەک کەس بێژن کو ل ھەمبەر ئازادکرنا قەشەیی دێ ‏ئەمریکا ژی ل ھەمبەر تورکیا نەرم بیت، لێ ئەز باوەر ناکەم تشتەک وەسا ھەبیت، رەنگە ئەمریکا ‏ھندەک سزایێن ل سەر تورکیا راکەت، لێ بۆ ھەموو کەسەکێ ئاشکرایە کو ئالۆزیێن د ناڤبەرا تورکیا ‏و ئەمریکا تنێ گرێدایی قەشەیێ ئەمریکی نینن و ئالۆزی گەلەکێ ژ ھندێ مەزنترن).‏

ناڤھاتی ھەروەسا ئەو یەک ژی دیار کر کو بەری ھەر تشتەکێ نھا ل دۆر سووریێ و ھەروەسا ‏پەیوەندیێن روسیا و تورکیا و بابەتێ کڕینا سیستەمێ موشەکی بووینە ئاریشێن مەزن د ناڤبەرا ‏ئەمریکا و تورکیا دا، ئەمریکا ژی سزایێن گران ل سەر تورکیا سەپاندن و ئابوورێ تورکیا بەر ب ‏ژناڤچوونێ ڤە دچوو، ئەردۆگانی ژی دیت کو نەشێت ل ھەمبەر ڤان سزایان خوە رابگریت و ژ ‏نەچاریێ بریارا ئازادکرنا قەشەیی دایە و گۆت: (لێ ئەردۆگان دخوازیت ئەڤ بابەتە کارتێکرنێ ل ‏رایا گشتی یا تورکیا نەکەت و ژ بەر ھندێ ژی دبێژیت دێ ھێرشی رۆژئاڤایێ کوردستانێ کەت، لێ ‏ئەز باوەر ناکەم کو ئەمریکا بۆ بابەتێ ھێرشکرنا ل سەر رۆژئاڤایێ کوردستانێ ھاریکاریا تورکیا ‏بکەت، چونکو ئەمریکا بەرنامەکێ خوە یێ دەمدرێژ بۆ سووریێ و رۆژئاڤایێ کوردستانێ ھەیە و ‏ھەتا نھا گەلەک کار بۆ ھندێ ژی ھاتیە کرن و باوەر ناکەم ئەمریکا ل ھەمبەر ھەر ھێرشەکا ‏تورکیا بۆ سەر رۆژئاڤایێ کوردستانێ بێدەنگ بیت).‏

چاڤدێرێ سیاسی یێ کورد کو نھا ل بریتانیا دژیت د پشکەکا دی یا ئاخڤتنا خوە دا ئەو یەک ژی ‏دیار کر کو ئازادکرنا قەشەیی ب فەرمانا ئەردۆگانی بوویە، ئەردۆگانی نەشیا تشتێن ل دژی ‏ئەمریکا دگۆت وەسا بکەت و د ئەنجام دا نەچار ما داخوازا ترامپی قەبوول کەت، ب گشتی ‏سیاسەتێن شاش یێن ئەردۆگانی ب تایبەتی ژی بابەتێ پەیوەندیێن ل گەل روسیا وەسا کر ئەمریکا ‏ب توندی تورکیا سزا بدەت، ژ بەر ھندێ ژی ئەز باوەر ناکەم ئازادیا قەشەیی ببیتە ئەگەرێ ھندێ ‏کو پەیوەندیێن وان ھەر زوو ئاسایی ببن و گۆت: (ناکۆکیێن تورکیا و ئەمریکا ل سووریێ، عیراقێ و ‏ب گشتی ل رۆژھەلاتا ناڤین مەزنن و تورکیا گەلەک زیان گەھاندینە ستراتیژیا ئەمریکا ل دەڤەرێ، ‏ژ بەر ھندێ ژی زەحمەتە مرۆڤ بێژیت ئازادیا قەشەیی دێ بارگرانیا نھا ل سەر تورکیا کێم کەت، ‏وەکو من بەری نھا دیار کری بابەت ژ ھندێ مەزنترە).‏

ئه‌ڤرۆ نيوز:‏

پێنگاڤێن پێک ئینانا حوکمەتا نوویا عیراقێ ھاتینە ‏دەستپێکرن و بۆ چوونێن جودا لدۆر حوکمەتا نوویا ‏عیراقێ ھەنە و چاڤدێرێن رەوشا عیراقێ ئاشکرا دکەن، ‏کو حوکمەتا داھاتی دێ ھەروەکی حوکمەتێن بەرێ بیت ‏و یا سەرکەفتی نابیت، شرۆڤەکارەکێ سیاسی ژی دیارکر، ‏پێشبینی دھێتەکرن حوکمەتەکا سەرکەفتی نەبیت، ‏ژبەرکو ھێشتا حوکمەت نەھاتیە پێک ئینان مەرج بۆ ‏ھاتینە دیارکرن. ‏

شرۆڤەکارەکێ سیاسی ئاماژە بوێ چەندێ دکەت، پێدڤیە ‏بەربژێرێن حوکمەتا نوویا عیراقێ پێدڤیە ل ھێزێن ‏سەرکەفتی بن یێن ھەلبژارتنا 12ی ئایارا بۆری یا ‏پەرلەمانێ عیراقێ نەک وەکی نوکە عادل عەبدولمەھدی ‏داخواز ل ھەموو عێراقیان کری سیڤیێن خوە بۆ ‏وەرگرتنا پۆستێن حوکمەتێ پێشکەش بکەن بۆ وەرگرتنا ‏وەزارەتێن حوکمەتێ، دکتۆر سەباح بەرزنجی شرۆڤەکارێ ‏سیاسی بۆ رۆژناما ئەڤرۆ دیارکر” راستە ژلایەکێ ھەمبەر ‏جیھانا دەرڤە پێنگاڤەکا باشە بۆ دانانا وەزیرێن ‏حوکمەتێ وەرگرتنا ئاشکرا ھەبیت و داخوازا کەسێن ‏ھەژی بھێتەکرن، بەلێ نابیت ژبیر بکەین ئەڤە عیراقە ‏ھەرچەندە کەسەک یێ تەقنوقرات بیت ھەگەر چو ‏ھێزێن سیاسی لپشت نەبن یێ سەرکەفتی نابیت د کارێ ‏خوە دا.‏

ئەڤی شرۆڤەکارێ سیاسی گۆتژی” گورەی ئەزموونا ل ‏عیراقێ ھەی پێشبینی دھێتەکرن حوکمەتا داھاتیا ‏عیراقێ حوکمەتەکا لاواز و لەرزووکبیت، ژبەرکو ‏حوکمەتێن بەرفرەە سەرکەفتی نینە ل چو وەلاتەکی، ‏چونکی سەرۆک وەزیر دێ لبن گڤاشتنێن لایەنێن سیاسی ‏بیت، ھەر سەرۆک وەزیرانەکێ زۆرینەیا پەرلەمانی لپشت ‏نەبیت نەشێت وەکە پێدڤی کارێ خوە رابیت، ھەر نوکە ‏کومەکا مەرجان لسەر عادل عەبدولمەھدی ھاتینە ‏سەپاندن ئەڤەژی نیشانا ڤێ چەندێ یە دەستێ سەرۆک ‏وەزیران یێ ڤەکری نابیت و دبیت خاترا ھەموو لایەکی ‏بگریت.‏

دکتۆر سەباح بەرزنجی گۆت: بۆ نموونە ھەر نوکە ‏موقتەدا سەدر سەرۆکێ باسکێ سەدر مەرجێن بەروەخت ‏بۆ حکوومەتا نوویا عیراقێ داناینە، کو ددەمێ سالەکێ دا ‏دێ ھەلسەنگاندن بۆ کارێن حوکمەتێ ھێتەکرن ئەڤەژی ‏جھێ گومانێ یە چونکە ھەموو لایەک باش ڤێ راستیێ ‏دزانن چو حوکمەت ددەمێ سالەکێ دا نەشێن خوە لسەر ‏پێن خوە بگرن، برینێن ئاریشەیێن عیراقێ ھند دژوار و ‏زۆرن ئەز بخوە باوەرناکەم ب پێک ئینانا حوکمەتا نوویا ‏عیراقێ بھێنە چارەسەرکرن، بەلێ پێشبینی دکەم ‏بەربژێرێ راسپاردی بکاریت ددەمێ خوە یێ قانوونی ‏کابینا حوکمەتێ پێک بینیت، ھەرچەندە گرنگ پێک ‏ئینانا حوکمەتێ نینە مەرجە دەستێ سەرۆکێ حوکمەتێ ‏یێ ڤەکری بیت و پەرلەمانەکێ بھێز لپشت ھەبیت، ‏ژبەرکو حالەتێ عیراقێ یێ تایبەتە و پێدڤیە کەسێن ‏بھێز بچنە ناڤا حوکمەتێ ھەتا بشێن ئامانجێن حوکمەت ‏لسەر تێتە پێک ئینان بجە بینن.‏

ئەڤرۆ نيوز:‏

ماموستایەکا زانکویێ ل کوردستانێ ل دور رەوشا پەرلەمانێ کوردستانێ ‏راگەھاند : ھەرێما کوردستانێ ب دروستبۆنا خولەکا نویا پەرلەمانێ ‏کوردستانێ نەشێت دوماھیێ ب قەیرانا بینیت ، خولا نویا پەرلەمانێ ‏دشێت رێکەفتنێن باشتر ل گەل بەغدا دروست بکەت و کو گورانکاری بسەر ‏رەوشا کوردستانێ دا بھێنیت و ھندەک قەیرانا ژی دوماھیک بینیت ، ‏پەرلەمانێ کوردستانێ گەر قەیرانا ژی درەباز نەکەت و دوماھیک بینیت ‏ھەبۆنا پەرلەمان یاگرنگە ژبەرکو بەریا نوکە ل بوشایا دروستبۆنا ‏پەرلەمانێ کوردستانێ مەدیت چەند ئاریشە لسەر ئێک پەیدا بۆن .‏

کوێستان لەتیف والی ماموستایا زانکویێ بۆ روژناما ئەڤرۆ گوت : ل ھەمو ‏حوکمەتێن دونیایێ ھەبۆنا ئوپوزوسیونێ یا گرنگە بەلێ ئوپوزوسیونەکا ‏دروست نەیا کەفتی،بۆ کابینا حوکمەتا نویا کوردستانێ کو ئوپوزوسیون ‏ھەبیت باشترە ژبەرکو ل دەمێ بۆری و ل کابینا حوکمەتێ کو ب حوکمەتا ‏بنکە فروان ھاتیە دیتن مە دیت چەندین ئالۆزی دروستبۆن ئاریشە زێدەتر ‏بۆن ئوپوزوسیونەک یا باشەو گرنگە ئەگەر ئەگەر چاڤدێرەکا باش بیت نە ‏ب تنێ ناڤ بیت و چۆ کارا نەکەت .‏

کوێستان گوتژی : ل دەمێ بۆری ل پەرلەمانێ کوردستانێ ئوپوزوسیون ‏ھەبۆ بەلێ نەشیا وەک پێدڤی کارێن خوە بکەت ئەوا ئوپوزوسیونێ ‏بەرامبەر حوکمەتێ کری یا دروست نەبۆ ، ب مەرجەکێ ھەبۆنا ‏ئوپوزوسیونێ یا گرنگە کو کارێن حوکمەتێ بەرەڤ باشیێ و باشتریێ ببەت ‏نە ک ب تنێ کارێ وێ نیشاندانا تشتێ خراب بیت ھەمو کارێن حوکمەتێ ‏دخراب نینە کارێ ئوپوزوسیونێ باشتر کرنا کارێن خراب و لاوازێن ‏حوکمەتێ یە.‏

ئه‌ڤرۆ نيوز:

چاڤدێرەکێ سیاسی ئاشکراکر کو یاریا عیراقی یا ھەرێمی و دەولی ‏یا و دووڤ دا یاریا پارتێن سەرەکی یە، عادل عەبدوالمھدی سەنگ ‏نینە ل چ پارتێن بھێز ل عیراقێ بتنێ جھێ پێکھاتنا ھەموو ئالیێن ‏عیراقی یە.‏

سامی رێکانی بۆ رۆژناما ئەڤرۆ گۆت: یاریا عیراقی یا ھەرێمی و ‏دەولی یا و دووڤ دا یاریا پارتێن سەرەکی یە، عادل عەبدوالمەھدی ‏سەنگ نینە ل چ پارتێن بھێز ل عیراقێ بتنێ جھێ پێکھاتنا ھەموو ‏ئالیێن عیراقی یە و دڤێت ژ کاودانێن عیراقی دەرکەڤن دا قەیران ‏مەستر لێ نەھێت، نە بابەت ئەوە باوەری ب ڤی کەسایەتی ھەیە دێ ‏شێت تشتەکی کەت، دێ ھەر گەھیتە وی ئاستی و ھەڤرکیێن ‏ئالیان ل سەر وەرگرتنا پوستێ سەرۆک وەزیران و کەسەکی ‏وەرگرت ژ دەرڤەی ھەر دو ئالیان ب بھانا وێ چەندێ کو کەسەکێ ‏سەربەخۆیە و ئەڤە بتنێ قورتالبوونە ژ قەیرانێ و دەست ھەلات ‏دێ ھەر دەستێ ھەردوکان دابیت، سنورێن عادل مەھدی گەلەک ‏دتەنگن، نەشێت چ تشتێ مەزن بکەت ھەکە ھێزەکا وەک ئەمریکا ‏یان ئیرانێ ل پشت نەبیت کا چەوا پێشتر بۆ مالکی و عەبادی ‏کرین. ‏

ھەمان چاڤدێرێ سیاسی گۆت: کێشێن کوردان ل گەل ھەر دو ‏ئالیێن شیعی دێ ھێشتا ئالۆزبن و ئەڤە نەشێت تشتەکی بۆ کوردان ‏ژی بکەت و ھەتا ئابوورنەکێ مەزن ژی نەشێت، دبیت بیاڤێ ‏ئابووری دا و پشتەڤانیا ئیرانێ بشێت ھندەک پێنگاڤێن گەشەکرنا ‏ئابووری ب ھاڤێت چنکو ئەڤە بوویە کێشەکا مەزن نەبتنێ ل ‏کوردستانێ بەلکو ل عراقێ ژی، بنەرەت نەشێت چ بکەت.‏

رێکانی خویاکر کو دناڤبەرا کوردان و بەغدا دا چ تشتەکێ مەزن ‏دروست نابیت، بتنێ دبیت ھندەک بزاڤ پەیدا بکن وەک سوزان، ‏کوردان کێشێن مەزن یا گرنگ ئابوورێ کوردستانێ یە، ئەرێ دێ ‏زڤریتە بەغدا؟ یان دێ مینت و پتر دێ دەست ھەلاتا وەرگرن و ‏ئەڤە دێ شەرێ مەزن بیت یێ مە کوردان ل گەل بەغدا چنکو ‏کوردان گرێبەستێن درێژخایەن ھەنە ل گەل روسیا و تورکیا و ‏ئەڤێ چەندێ ژی ئالوزیەکا دی دناڤبەرا کوردان و بەغدا دروست ‏بیت و بەغدا نەشێت ئێکلایی بکەت و نە ئەم شێن ئێکلایی بکەین ‏چنکو رێگر بەغدایە، ڤێ قوناغێ ئەڤە دێ چارەنڤسیێ گەشەکرنا ‏ئابوورێ کوردستانێ بیت، ھەکە ستراتیجی نەبیت و پێنگاڤ بۆ ‏نەھێنە ھاڤێتن ھەموو سیاسەتێن دی دێ شکەستی بن.‏

سامی رێکانی گۆت ژی: کێشێن چارەنڤێسی ل گەل بەغدا ‏بۆچوونێن جودا ل سەر ھەنە، بەرامبەر کێشێن رۆژانە گرێدایی ب ‏ژیانا خەلکی ڤە وەک ئابووری و رێکخستنا خەلکی، چوونا دو ‏حزبێن سەرەکیێن کوردستانێ بۆ بەغدا و رەفتارکرنا بەغدا ل گەل ‏کوردستانێ دێ بەرامبەر ھەر دو حزبێن سەرەکی بیت و ئەوان ‏انوستاندن ل گەل بەغدا کرینە، ل سەر کێشا کوردی دڤێت ئەم ‏پێداچوونەکا دی دخودابکەین دا خەلکی بزانیت رامانا ڤێ چەندێ ‏چیە، کا مە چ دڤێت دەست ھەلاتا مە ژ بەغدا ڤەبیت، ئەنجامێن ‏ریفراندومێ بکەینە ئارمانج و ل سەر کاربکەین ڤێ قوناغێ دا ‏ناھێتە بەحسکرن ھەکە کاودانێن دەولی تێک نەچن ئێدی کورد ‏نەشێن بەحسا ڤێ قوناغێ بکەن، چنکو کوردا ئێم بیربچوون و ‏ئێک ستراتیجی نینە، بەغدا ژی ھند تەماشەی ڤێ ناکەت و ‏گەھشتیە وی ئاشتی ب گونەە دھێتە ھەژمارتن ھەکە ئێک بەحسێ ‏ڤێ چەندێ بکەت چنکو کورد ژی پیچەک پشتەڤانێن ڤێ چەندێ ‏بووینە.‏

ھەمان چاڤدێر گۆت: نەشێن بێژین ھەر کەسەکێ بچیتە وێرێ دێ ‏بەحسێ چارەنووسی کەت چنکو ھەر پوستەکێ وەرگرتن سویند ‏خوارنێ دەستوری و پەرلەمانی ل سەر ئێکگرتنا عیراقێ، دڤێت ئەم ‏ل گەل کەتواری بچین و داخازیەکا مەزن نەکەین چنکو شیانێن وا ‏دا نینە ھەکە نەشێن چ بۆ پاشەرۆژا کوردی بکەن، پێدڤی یە ‏قەیرانا ئابووری یا گرێدایی ژین و ژیارا خەلکی ڤە چارەسەربکەن ‏و ئەڤە قەیرانا کوردی یە و دڤێت بچووک نە سحکەنێ چنکو ‏سەرکەفتنا ھەر مللەتەکی دڤێت تە ستراتیجی یەتا ئابووری ‏ھەبیت، ھەکە تە نەبیت تو نەشێی چ بکەی و دێ شکەستنا ئینی.‏

ناڤبری ل دووماھیێ بەحسێ پەیوەندیێن ئالیێن سیاسی کر، دیارکر ‏کو کێشا وەرگرتنا پوستێ سەرۆک کومار دێ چارەسەربیت چنکو ‏مە چ رێکێن دی نین، ھەر دو حزبێن سەرەکی نە و پشتی شکەستنا ‏ئوپزسیوونێ نوکە ھەر کەفتە بەرۆوکێ وان، باوەرناکەم سەرا ‏پوستێ سەرۆک کومار کێشە دناڤبەرا ھەر دو ئالیان دا دروست بیت ‏و دێ تەنازل بۆ ئێک ھەبن، ھەکە پارتی زەرەمەند بیت دێ بەغدا ‏بزاڤێ کەت رازی بکەت چنکو پارتی ھێزەکا مەزنە ل سەر ‏کوردستانێ و ل سەر ئاستێن بەغدا و پەیوەندیێن دەرڤە ژی و ‏جارەکا دی ھێزا کوردی دێ سەنگێ جاران ڤەگەرینتە ڤە.‏