ئەڤرۆ نیوز ، زنار تۆڤی:
بریاره ئەڤرۆ و سوبەهی چارشه‌مبێ 9 و 10 چریا ئێکێ مووچێ هەیڤا ته‌مووزێ یێ فه‌رمانبه‌رێن دو وه‌زاره‌تێن حوکمه‌تا هه‌رێما كوردستانێ بهێنە دابه‌شکرن.
ژێدەرەکێ دایە دیارکرن کو ئەڤرۆ سێشه‌مبی 9 چریا ئێکێ دێ مووچێ هەیڤا ته‌مۆزێ یێ فه‌رمانبه‌رێن وه‌زاره‌تا ساخلەمیێ هێتە خه‌رجکرن.
هەروەسا بڕیاره ل رۆژا چارشه‌مبی 10 چریا ئێکێ مووچێ هەیڤا ته‌موزێ یێ فه‌رمانبه‌رێن وه‌زاره‌تا دارایی و ئابوورى بهێتە دابه‌شکرن.
ئەڤرۆنیوز، سەباح زوهێر:
ئەڤ شەڤە ل سەنتەرێ قەزا ئاکرێ ل تاخێ ( مەهەتێ ) ل ئەنجامێ روودانەکا هاتنوچوونێ دا دو ترومبێلان لێكدا و د ئەنجام دا چار کەس برينداربوون و هاتنە رەوانەکرن بۆ نەخوه‌شخانا تەنگاڤیان ل ئاکرێ.
رەعەد رەشید، نوشدارێ نوبەدار ل نەخوشخانا تەنگاڤی ل ئاکرێ بۆ ئەڤرۆ نیوز دیارکر کو هەر چار کەس زەلامن وچاره‌سه‌رى ژلایێ تیمێن ساخلەمیێ ڤه بۆ هاتیەکرن و هەتا نها چ مەترسی ل سەر ژیانا کەسێ نینە و برینێن وان د سڤکن.
ئەڤرۆنيوز،عەزیز هەورامی
دده‌مێ هه‌شت رۆژان دا، هێزێن پۆليسێن سلێمانيێ 18 تۆمه‌تبار ده‌سته‌سه‌ركرن وهه‌موو دێ هێنه هنارتن ل به‌رده‌م دادگه‌هێ.
رێڤه‌به‌ريا پۆليسێن سلێمانيێ به‌لاڤكر” دده‌مێ هه‌شت رۆژێن بۆرى دا، هێزێن پۆليسێن سلێمانيێ شياينه 18 تۆمه‌تباران ده‌سته‌سه‌ر بكه‌ن وروو ب روويێ دادگه‌هێ بكه‌ن”.
دياركر ژى”چار ته‌قه‌كه‌ر وچار تۆمه‌تبار ب گۆره‌ى مادێن 305 – 31 و دو تۆمه‌تبار ژى ب گۆره‌ى مادێ 412 وهه‌شت تۆمه‌تبار ژى ب گۆره‌ى مادێن 453 – 456 يێن هاتينه ده‌سته‌سه‌ركرن زێده‌بارى ده‌ست ب سه‌رداگرتنا دو ده‌بانجان وكلاشينكۆفه‌كێ.
ئه‌ڤرۆنيوز:
رێبه‌رێ ره‌وتێ سه‌درى وليستا سائيرون، موقته‌دا سه‌در، د به‌رپه‌رێ خوه ل سه‌ر تۆرا جڤاكى يا تويته‌رى ل دۆر پۆست وپارێ حزبان راگه‌هاند، ده‌مێ 15 سالانه ب رێيێن قانوونى ونه‌قانوونى هوون يێ پۆست وپاران دبه‌ن، ما ئێدى به‌س نينه؟.
موقته‌دا سه‌در گۆت ژى” نوكه ده‌مێ وێ چه‌ندێ يه گه‌لێ عيراقێ مافێن خوه ب ده‌ستڤه‌بينيت، ب رێيا كه‌سێن سه‌ربخوه وته‌كنوكرات”.
دياركر”هه‌روه‌سا پێدڤيه كه‌سێن گه‌نده‌لكار نه‌هێنه پله بلندكرن وكه‌سێن باش وپاقژ بهێنه پله بلندكرن”.
ئه‌ڤرۆنيوز:
سترانبێژى ئيرانى موعين ئه‌سفه‌هانى دنووترين ده‌ركه‌فتن دا وێنه‌كێ خوه وهه‌ڤژينا خوه يا دويێ به‌لاڤ دكه‌ت.
موعين كو ژدايكبوويێ سالا 1951 يه نوكه ل باژێرێ لوس ئه‌نجلس ل ويلايه‌تا كاليفۆرنيا يا ئه‌مريكى ل گه‌ل هه‌ڤژينا خوه يا نوو وكچا خوه دژيت.
هه‌ڤژينا ئێكێ يا موعينى خه‌لكێ ئيسپانيا بوو وكچه‌ك ژێ هه‌يه وپشتى چار سالێن ژيانا هه‌ڤژينيێ، ژێك جوداببوون، هه‌ڤژينا وى يا دويێ كو ئيرانى يه ناڤێ وێ (پانته‌ئا) يه.
ئه‌ڤرۆنيوز:
راهێنه‌رێ هه‌لبژارتيێ ئه‌رجه‌نتين، ليونێل سكالۆنى، راگه‌هاند دده‌مێ چه‌ند رۆژێن بهێت دا، هه‌لبژارتيێ ئه‌رجه‌نتين دێ دو ياريێن هه‌ڤالينى ل گه‌ل هه‌ردو هه‌لبژارتيێن عيراقێ وبه‌رازيل ئه‌نجام ده‌ت.
ليونێل سكالۆنى، راهێنه‌رێ هه‌لبژارتيێ ئه‌رجه‌نتين بۆ ده‌زگه‌هێن راگه‌هاندنێ يێن وه‌لاتێ خوه گۆت” ئه‌رجه‌نتين دێ پشكداريێ دقاره‌مانيا سعوديێ يا هه‌ڤالينى كه‌ت وتێدا دێ دو ياريان ئه‌نجام ده‌ت”.
گۆت ژى” ياريا ئێكێ دێ ل گه‌ل هه‌لبژارتيێ عيراقێ بيت ل ده‌مژمێر 9 شه‌ڤا 11/10/2018 وياريا دويێ ل گه‌ل هه‌لبژارتيێ به‌رازيل ل 8:45 شه‌ڤا 16/10/2018.”.
ئه‌ڤرۆنيوز:
رێڤه‌به‌رێ گشتيێ داتايێن كۆمسيۆنا بلند يا هه‌لبژارتن وراپرسيێ ل هه‌رێما كوردستانێ راگه‌هاند، ئه‌م دبه‌رده‌وامين دكاركرنێ ل سه‌ر ئه‌نجامێن هه‌لبژارتنان وب دووماهى ئينانا وى كارى ژى پێدڤى ب 10 رۆژانه.
كاروان جه‌لال، رێڤه‌به‌رێ گشتيێ داتايێن كۆمسيۆنا بلند يا هه‌لبژارتن وراپرسيێ ل هه‌رێمێ گۆت” تيمێن مه مژوولى داخلكرنا پێزانينێن سه‌ر هه‌رسێ فۆرمێن 51 و52 و53 كو ده‌م بۆ دڤێت، چونكى مه شه‌ش هزار و412 ويستگه يێن هه‌ين وهه‌ر فۆرمه‌كێ ژى شه‌ش هزارن، له‌وما مه 10 رۆژێن دىدڤێن تاكو كارێن خوه ب دووماهى بينين”.
كاروانى زێده‌تر بۆ مالپه‌رێ فه‌رميێ پارتى ديموكراتى كوردستان گۆت” پشتى كارى ب دووماهى دئينين، دێ هه‌موو ئه‌نجامان ب رێيا راپۆرته‌كێ ئاراسته‌ى جڤاتا كۆمسياران كه‌ين بۆ وێ چه‌ندێ بريارێ ل سه‌ر بده‌ن”.
ئەڤرۆ نیوز ، زنار تۆڤی:
پشتی کو ل 30 ئیلۆنا ئەڤ سالە هەلبژارتنێن پەرلەمانێ کوردستانێ هاتینە ئەنجامدان و کۆمسیۆنا بلند هژمارا دەستپێکی یا دەنگێن قەوارە و ئالیێن کوردستانی داینە دیارکرن، كۆمسیۆنا بلند یا سه‌ربه‌خۆیا هه‌لبژارتن و راپرسیێ ل هه‌رێما كوردستانێ راگه‌هاندیە، کو ئەڤرۆ دوشەمبی دێ هه‌لسه‌نگاندنا سكالایان ب دوماهی هێت.
شێروان زرار، په‌یڤدارێ كۆمسیۆنا بلند یا سەربەخۆ و راپرسیێ ل هه‌رێما کوردستانی گۆتیە، د هه‌لبژارتنێن په‌رله‌مانێ كوردستانێ دا ل 30 ئیلۆنێ، 1045 سكالا ژ لایێ ئالیێن سیاسی ڤە هاتینه تۆماركرن و كۆمسیۆنا بلند ژی به‌رده‌وام كاری ل سه‌ر وان سكالایان دكه‌ت، دهێتە چاڤه‌رێکرن کو ئەڤرۆ دوشه‌مبێ، هه‌لسه‌نگاندنا سكالایان ب دوماهی بهێت.
هەروەسا گۆتیە ژی: راگه‌هاندنا ئه‌نجامێن دوماهیێ یێن هه‌لبژارتنێن پەرلەمانێ کوردستانێ نێزیك بووینه و ئەو ئالیێن سه‌خته‌كاری كرین، دێ ب دژواری هێنه سزادان.
ماجد سید سالح به‌رپرسێ باده‌كا به‌لافكرنا سوته‌مه‌نیێ ل كارگێریا پارێزگه‌ها دهوكێ د داخویانیه‌كێ دا دیار كر كو كارگێریا پارێزگه‌ها دهوكێ پلانه‌ك ب هه‌فكاریا رێڤه‌به‌ریا به‌لافكرنا به‌رهه‌مێن گازێ ل دهوكێ و قایمقامێن قه‌زایێن دهوكێ به‌رهه‌ڤ كریه بو به‌لافكرنا گازا سپی ل سه‌ر هاولاتیێن پارێزگه‌هێ و گوت ..بریار وه‌سا ل ده‌ڤه‌رێن چیایی و دویر ده‌ست ده‌ست ب به‌لافكرنا گازا سپی بهێته كرن ژبه‌ر دو ئه‌گه‌را ئێك هه‌كه هات به‌فرو و بارانا ده‌ست پێكر دێ به‌لافكرنا گازێ ل وان ده‌ڤه‌را ب زه‌حمه‌ت كه‌ڤیت یا دویی ژبه‌ر پاراستنا دارستانا و ژینگه‌هێ دا بشێین هه‌تا راده‌كی كونترولا برینا دارو بارا بكه‌ین هه‌روه‌سا گوت . دێ به‌رنامه به‌رده‌وام بیت بو هه‌می ده‌ڤه‌را و هه‌ر خێزانه‌كا سالا پار گازا سپی نه‌وه‌رگرتبیت دێ گازا سپی ئه‌ف ساله وه‌رگریت ,
دده‌رباره‌ی رێژا عمبار كری یا گازێ و چه‌ند گاز تێرا هه‌یه كو هه‌می خێزان وه‌رگرن به‌رێز ماجد سید سالح گوت ل سنورێ پارێزگه‌ها دهوكێ 250 هزار خێزان هه‌نه و بو هه‌ر خێزانه‌كێ 200 لترێن گازێ بده‌ینێ دێ پێدڤی ب 50 ملیون لیترا بین و ب هه‌می شیانا دێ بزاڤێ كه‌ین و ب ئانه‌هیا خودێ دێ هه‌می خێزان گازا سپی وه‌رگرن ژبلی وان خێزانێن سالا بوری گازا سپی وه‌رگرتی .
دیسان گوت .. ده‌مێ ئه‌م ده‌ست ب ده‌ڤه‌رێن چیایی دكه‌ین دێ دگه‌ل وان ده‌ست ب ده‌ڤه‌رێن دیژی كه‌ین داكو ب زویترین ده‌م گاز بگه‌هیته خه‌لكێ پارێزگه‌هێ .
ئه‌ڤرو سپێدێ 8-10-2018 فه‌رهاد ئه‌مین ئه‌تروشی پارێزگه‌رێ دهوكێ پێشوازیا كونسلێ وه‌لاتێ هوله‌ندا به‌رێز(ولییه‌م كوسجین) وشاندێ دگه‌لدا كر.
دهه‌ڤدیتنه‌كێدا به‌حسێ په‌یوه‌ندیێن دوو قولی دناڤبه‌را هه‌رێما كوردستانێ وهوله‌ندا دوارێ سیاسی وئابوری وبازرگانی وكشتوكالی دا هاته كرن.
پارێزگه‌رێ دهوكێ په‌سنا رولێ حكومه‌تا هوله‌ندا كر هه‌مبه‌ر ئه‌و هاریكاریێن بو هه‌رێما كوردستانێ كرین دوارێن له‌شكری وسیاسی وئابوری دا وخواست كو هوله‌ندا هاندانا كومپانیێن خو یێن وه‌به‌رهێنانێ بكه‌ت وپروژێن وه‌به‌رهێنانێ ل كوردستانێ وپارێزگه‌ها دهوكێ ئه‌نجامده‌ت هه‌روه‌سا خواست هوله‌ندا پتر گرنگیێ بده‌ته پێش ئێخستنا كه‌رتێ چاندنێ وپشته‌ڤانیا پارێزگه‌هێ نیشان دا بو هه‌ر هاریكاری وئاسانكاریه‌كێ.
ژلایێ خوڤه كونسلێ ده‌وله‌تا هوله‌ندا خوشحالیا خو دیاركر هه‌مبه‌ر په‌یوه‌ندیێن وه‌لاتێ وان دگه‌ل هه‌رێما كوردستانێ وبه‌رهه‌ڤیا وه‌لاتێ خو دیاركر كو وان په‌یوه‌ندیان دهه‌موو واره‌كیدا خوتر لێ بكه‌ن.
نيشاندان