ئه‌ڤرۆنيوز:
سترانبێژى ئيرانى موعين ئه‌سفه‌هانى دنووترين ده‌ركه‌فتن دا وێنه‌كێ خوه وهه‌ڤژينا خوه يا دويێ به‌لاڤ دكه‌ت.
موعين كو ژدايكبوويێ سالا 1951 يه نوكه ل باژێرێ لوس ئه‌نجلس ل ويلايه‌تا كاليفۆرنيا يا ئه‌مريكى ل گه‌ل هه‌ڤژينا خوه يا نوو وكچا خوه دژيت.
هه‌ڤژينا ئێكێ يا موعينى خه‌لكێ ئيسپانيا بوو وكچه‌ك ژێ هه‌يه وپشتى چار سالێن ژيانا هه‌ڤژينيێ، ژێك جوداببوون، هه‌ڤژينا وى يا دويێ كو ئيرانى يه ناڤێ وێ (پانته‌ئا) يه.
ئه‌ڤرۆنيوز:
راهێنه‌رێ هه‌لبژارتيێ ئه‌رجه‌نتين، ليونێل سكالۆنى، راگه‌هاند دده‌مێ چه‌ند رۆژێن بهێت دا، هه‌لبژارتيێ ئه‌رجه‌نتين دێ دو ياريێن هه‌ڤالينى ل گه‌ل هه‌ردو هه‌لبژارتيێن عيراقێ وبه‌رازيل ئه‌نجام ده‌ت.
ليونێل سكالۆنى، راهێنه‌رێ هه‌لبژارتيێ ئه‌رجه‌نتين بۆ ده‌زگه‌هێن راگه‌هاندنێ يێن وه‌لاتێ خوه گۆت” ئه‌رجه‌نتين دێ پشكداريێ دقاره‌مانيا سعوديێ يا هه‌ڤالينى كه‌ت وتێدا دێ دو ياريان ئه‌نجام ده‌ت”.
گۆت ژى” ياريا ئێكێ دێ ل گه‌ل هه‌لبژارتيێ عيراقێ بيت ل ده‌مژمێر 9 شه‌ڤا 11/10/2018 وياريا دويێ ل گه‌ل هه‌لبژارتيێ به‌رازيل ل 8:45 شه‌ڤا 16/10/2018.”.
ئه‌ڤرۆنيوز:
رێڤه‌به‌رێ گشتيێ داتايێن كۆمسيۆنا بلند يا هه‌لبژارتن وراپرسيێ ل هه‌رێما كوردستانێ راگه‌هاند، ئه‌م دبه‌رده‌وامين دكاركرنێ ل سه‌ر ئه‌نجامێن هه‌لبژارتنان وب دووماهى ئينانا وى كارى ژى پێدڤى ب 10 رۆژانه.
كاروان جه‌لال، رێڤه‌به‌رێ گشتيێ داتايێن كۆمسيۆنا بلند يا هه‌لبژارتن وراپرسيێ ل هه‌رێمێ گۆت” تيمێن مه مژوولى داخلكرنا پێزانينێن سه‌ر هه‌رسێ فۆرمێن 51 و52 و53 كو ده‌م بۆ دڤێت، چونكى مه شه‌ش هزار و412 ويستگه يێن هه‌ين وهه‌ر فۆرمه‌كێ ژى شه‌ش هزارن، له‌وما مه 10 رۆژێن دىدڤێن تاكو كارێن خوه ب دووماهى بينين”.
كاروانى زێده‌تر بۆ مالپه‌رێ فه‌رميێ پارتى ديموكراتى كوردستان گۆت” پشتى كارى ب دووماهى دئينين، دێ هه‌موو ئه‌نجامان ب رێيا راپۆرته‌كێ ئاراسته‌ى جڤاتا كۆمسياران كه‌ين بۆ وێ چه‌ندێ بريارێ ل سه‌ر بده‌ن”.
ئەڤرۆ نیوز ، زنار تۆڤی:
پشتی کو ل 30 ئیلۆنا ئەڤ سالە هەلبژارتنێن پەرلەمانێ کوردستانێ هاتینە ئەنجامدان و کۆمسیۆنا بلند هژمارا دەستپێکی یا دەنگێن قەوارە و ئالیێن کوردستانی داینە دیارکرن، كۆمسیۆنا بلند یا سه‌ربه‌خۆیا هه‌لبژارتن و راپرسیێ ل هه‌رێما كوردستانێ راگه‌هاندیە، کو ئەڤرۆ دوشەمبی دێ هه‌لسه‌نگاندنا سكالایان ب دوماهی هێت.
شێروان زرار، په‌یڤدارێ كۆمسیۆنا بلند یا سەربەخۆ و راپرسیێ ل هه‌رێما کوردستانی گۆتیە، د هه‌لبژارتنێن په‌رله‌مانێ كوردستانێ دا ل 30 ئیلۆنێ، 1045 سكالا ژ لایێ ئالیێن سیاسی ڤە هاتینه تۆماركرن و كۆمسیۆنا بلند ژی به‌رده‌وام كاری ل سه‌ر وان سكالایان دكه‌ت، دهێتە چاڤه‌رێکرن کو ئەڤرۆ دوشه‌مبێ، هه‌لسه‌نگاندنا سكالایان ب دوماهی بهێت.
هەروەسا گۆتیە ژی: راگه‌هاندنا ئه‌نجامێن دوماهیێ یێن هه‌لبژارتنێن پەرلەمانێ کوردستانێ نێزیك بووینه و ئەو ئالیێن سه‌خته‌كاری كرین، دێ ب دژواری هێنه سزادان.
ماجد سید سالح به‌رپرسێ باده‌كا به‌لافكرنا سوته‌مه‌نیێ ل كارگێریا پارێزگه‌ها دهوكێ د داخویانیه‌كێ دا دیار كر كو كارگێریا پارێزگه‌ها دهوكێ پلانه‌ك ب هه‌فكاریا رێڤه‌به‌ریا به‌لافكرنا به‌رهه‌مێن گازێ ل دهوكێ و قایمقامێن قه‌زایێن دهوكێ به‌رهه‌ڤ كریه بو به‌لافكرنا گازا سپی ل سه‌ر هاولاتیێن پارێزگه‌هێ و گوت ..بریار وه‌سا ل ده‌ڤه‌رێن چیایی و دویر ده‌ست ده‌ست ب به‌لافكرنا گازا سپی بهێته كرن ژبه‌ر دو ئه‌گه‌را ئێك هه‌كه هات به‌فرو و بارانا ده‌ست پێكر دێ به‌لافكرنا گازێ ل وان ده‌ڤه‌را ب زه‌حمه‌ت كه‌ڤیت یا دویی ژبه‌ر پاراستنا دارستانا و ژینگه‌هێ دا بشێین هه‌تا راده‌كی كونترولا برینا دارو بارا بكه‌ین هه‌روه‌سا گوت . دێ به‌رنامه به‌رده‌وام بیت بو هه‌می ده‌ڤه‌را و هه‌ر خێزانه‌كا سالا پار گازا سپی نه‌وه‌رگرتبیت دێ گازا سپی ئه‌ف ساله وه‌رگریت ,
دده‌رباره‌ی رێژا عمبار كری یا گازێ و چه‌ند گاز تێرا هه‌یه كو هه‌می خێزان وه‌رگرن به‌رێز ماجد سید سالح گوت ل سنورێ پارێزگه‌ها دهوكێ 250 هزار خێزان هه‌نه و بو هه‌ر خێزانه‌كێ 200 لترێن گازێ بده‌ینێ دێ پێدڤی ب 50 ملیون لیترا بین و ب هه‌می شیانا دێ بزاڤێ كه‌ین و ب ئانه‌هیا خودێ دێ هه‌می خێزان گازا سپی وه‌رگرن ژبلی وان خێزانێن سالا بوری گازا سپی وه‌رگرتی .
دیسان گوت .. ده‌مێ ئه‌م ده‌ست ب ده‌ڤه‌رێن چیایی دكه‌ین دێ دگه‌ل وان ده‌ست ب ده‌ڤه‌رێن دیژی كه‌ین داكو ب زویترین ده‌م گاز بگه‌هیته خه‌لكێ پارێزگه‌هێ .
ئه‌ڤرو سپێدێ 8-10-2018 فه‌رهاد ئه‌مین ئه‌تروشی پارێزگه‌رێ دهوكێ پێشوازیا كونسلێ وه‌لاتێ هوله‌ندا به‌رێز(ولییه‌م كوسجین) وشاندێ دگه‌لدا كر.
دهه‌ڤدیتنه‌كێدا به‌حسێ په‌یوه‌ندیێن دوو قولی دناڤبه‌را هه‌رێما كوردستانێ وهوله‌ندا دوارێ سیاسی وئابوری وبازرگانی وكشتوكالی دا هاته كرن.
پارێزگه‌رێ دهوكێ په‌سنا رولێ حكومه‌تا هوله‌ندا كر هه‌مبه‌ر ئه‌و هاریكاریێن بو هه‌رێما كوردستانێ كرین دوارێن له‌شكری وسیاسی وئابوری دا وخواست كو هوله‌ندا هاندانا كومپانیێن خو یێن وه‌به‌رهێنانێ بكه‌ت وپروژێن وه‌به‌رهێنانێ ل كوردستانێ وپارێزگه‌ها دهوكێ ئه‌نجامده‌ت هه‌روه‌سا خواست هوله‌ندا پتر گرنگیێ بده‌ته پێش ئێخستنا كه‌رتێ چاندنێ وپشته‌ڤانیا پارێزگه‌هێ نیشان دا بو هه‌ر هاریكاری وئاسانكاریه‌كێ.
ژلایێ خوڤه كونسلێ ده‌وله‌تا هوله‌ندا خوشحالیا خو دیاركر هه‌مبه‌ر په‌یوه‌ندیێن وه‌لاتێ وان دگه‌ل هه‌رێما كوردستانێ وبه‌رهه‌ڤیا وه‌لاتێ خو دیاركر كو وان په‌یوه‌ندیان دهه‌موو واره‌كیدا خوتر لێ بكه‌ن.
ئه‌ڤرۆ نیوز، زنار تۆڤى:
سه‌ربه‌ست زاخۆیى ئێكه ژ مێشه‌ڤانێن پشكدار ل كۆنفرانسێ یازدێ یێ ئێكه‌تیا میشه‌ڤانێن عه‌ره‌ب ل وه‌لاتێ لبنانێ بۆ ئه‌ڤرۆ نیوز دیاركر: كۆنفرانسێ یازدێ یێ ئێكه‌تیا مێشه‌ڤانێن عه‌ره‌ب ل سالا 2018 ل وه‌لاتێ لبنانێ دێ بۆ ماوێ سێ رۆژان یێ به‌رده‌وام بیت و دڤى كۆنفرانسى دا دێ باشترین هنگڤینێ دۆبێ و باشترین هنگڤینێ شانێ و باشترین وێنێ مێشێن هنگڤینى و هه‌وره‌سا باشترین ڤه‌كۆلین ل سه‌ر مێشێن هنگڤینى دێ هێنه دیاركرن و خه‌لاتكرن، دیسا ئه‌و سێكته‌رێن گرێدایى ژینگه‌ه و سه‌قایێ مێش تێدا دژیت دێ هێنه گه‌نگه‌شه كرن دیاركرن، ناڤهاتى گۆت ژى: ب ره‌نگه‌كێ فه‌رمى 61 مێشه‌ڤانێن كوردستانێ كو ژ هه‌ر چار پارێزگه‌هێن كوردستانێ ل سلێمانیێ و هه‌ولێر و دهۆك و كه‌كۆكێ پشكدارى دڤى كۆنفرانسى دا كریه، پشتى سێ رۆژێن كۆنفرانسى دێ باشترین هنگڤینێ دۆبه و شانێ و دیسا باشترن ڤه‌كۆلین ل سه‌ر مێشێن هنگڤینى هێنه خه‌لاتكرن، هه‌روه‌سا چه‌ندین ڤه‌كۆله‌رێن مێشان و شه‌ش قوتابیێن كو دكتۆرایێ دخوینن ل سه‌ر مێشان ل گه‌ل شاندێ كوردستانێ هه‌نه و پشكدارى دوى كۆنفرانسى دا كریه و ئه‌ڤه ژى پێنگاڤه‌كا باشه بۆ باشتركرنا به‌رهه‌مێ هنگڤینێ خۆمالى.
سه‌ربه‌ستى دیاركر ژى: ژ ئه‌گه‌رێ هه‌بوونا ژینگه‌هه‌كا پاقژ و سه‌قایه‌كێ باش هنگڤینێ كوردستانێ بوویه نمره ئێك ل سه‌ر ئاستێ جیهانێ و ل سالا بورى ل كۆنفرانسێ شه‌ره‌ملشێخ ل وه‌لاتێ مسرێ هنگڤینێ دهۆكێ بوویه نمره ئێك ل سه‌ر ئاستێ هه‌موو جیهانێ، هه‌ر چه‌نده ئه‌ڤ كۆنفرانسه ل وه‌لاتێن عه‌ره‌بى دهێنه ئه‌نجامدانن لێ پرانیا وه‌لاتێن جیهانى یێن كو مێشان بخودان دكه‌ن، پشكداریێ دڤى كۆنفرانسى دا دكه‌ن، ئه‌ڤ ساله پرانیا وه‌لاتێن ئورۆپى و ئه‌مریكى پشكدارى د كۆنفرانسێ مێشان ل وه‌لاتێ لبنانێ دا كریه، هه‌روه‌سا كه‌سه‌كێ فرنسى سه‌رپه‌رشتیا كۆنفرانسێ ئه‌ڤ ساله یێ مێشان ل لبنانێ دكه‌ت، دیسا مێشه‌ڤانێن كورد ژى مفایه‌كێ باش ژ ڤى كۆنفرانسى وه‌رگرتیه و شیاینه فێرى گه‌له‌ك تشتێن نوو ببن د بخودانكرنا مێشێن هنگڤینى دا، هێشتا دبێژیت: هه‌كه ئه‌ڤ ساله ژى لیژنا به‌رهه‌ڤكرنا ڤى كۆنفرانسى غه‌درێ ل مێشه‌ڤانێن كورد نه‌كه‌ن، ئه‌ڤ ساله ژى دێ هنگڤینێ كوردستانێ بیته پله ئێك ل سه‌ر ئاستێ جیهانێ، لێ بدیتنا مه ئه‌ڤ ساله دێ غه‌دره ل مه هێته‌كرن و ئه‌ڤ ساله ئه‌م نابینه یێن ئێكێ و وه‌كو دیار وان دڤێت وه‌لاته‌كێ دى یێ پشكدار بكه‌نه یێن ئێكێ، ژ پێخه‌مه‌ت هندێ داكو دلمانى و نه‌ڤیان چێنه‌بیت، له‌وما هه‌كه ب دروستى بیت، ئه‌ڤ ساله دێ مێشه‌ڤانێن كورد پلا باشترین پله ب ده‌ست خوه‌ڤه ئینن و هنگڤینێ دهۆكێ دێ بیته باشترین هنگڤین ل جیهانێ، ژبه‌ركو پلێن گه‌رمێ ل كوردستانێ دهاریكارن كو هنگڤینێ كوردستانێ ببیته باشترین هنگڤین، دیسا گوهۆرینێن سه‌قایێ وێ كو سار و گه‌رماتى تێدا هه‌یه و هه‌بوونا سرۆشته‌كێ جوان و پرى گل و گیا، ئه‌ڤه ژى وه دكه‌ت كو هنگڤین گه‌له‌ك باش چێببیت و ژ هه‌موو روویه‌كێ ڤه یێ خۆش و ب تام بیت، ئه‌م ب هیڤینى نه ئه‌ڤ ساله ژى ئه‌م دێ یێن ئێكێ بین.
ئه‌و مێشه‌ڤانه زێده‌تر دیاردكه‌ت: ئه‌ڤ ساله چو مێشه‌ڤانێن كورد د لیژنا سه‌نگێ هنگڤینى دا نینه، له‌وما ئه‌م وه‌سا دبینین كو ئه‌ڤ ساله ئه‌م مه‌دالیا زێرى ب ده‌ست خوه‌ڤه نائینین، لێ ئه‌م ب هیڤى نه ئه‌ڤ ساله ژى ئه‌م پله‌ما باش ب ده‌ست خوه‌ڤه بینین، هه‌روه‌سا دێ گرنگیه‌كا باشتر بخودانكرنا مێشێن هنگڤینى ده‌ین، چونكى مفایێ مێشێ نه بتنێ بۆ چێكرنا هنگڤینى یه، به‌لكو بۆ كونترۆلكرنا ژێنگه‌هێ یه و دیسا هه‌كه مێشێن هنگڤینى كێم ببن، یان ژى نه‌مینن، دێ پرانیا جۆرێن فێقى و كولیلكان یێن كو ئه‌م مفاى ژێ دبینین، دێ كێم بن و نامینن، دیسا وان ل به‌ره هه‌موو مێشه‌ڤانێن كورد ب جلێن كوردى ئه‌ڤرۆ پشكداریێ د وى كۆنفرانسى دا بكه‌ن، هه‌روه‌سا ل گه‌له‌ك وه‌لاتێن جیهانێ بهایێ هنگڤینى گرانتره ژ كوردستانێ، ئەڤ سالە ژی هنگڤینێ کوردستانێ بۆیێ ئێکێ ل جیهانێ و دیسا سالا بهێت دێ کۆنفرانسێ مێشەڤانێن عەرەب ل کوردستانێ هێتە ئەنجامدان.
ئه‌ڤرۆ نيوز:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو سوبه‌هى رۆژا سێشه‌مبى 9ى چريا ئێكێ 2018ێ دهێته پێشبينيكرن ئه‌سمان ئه‌ورێ ته‌مام بيت و ئه‌گه‌رێ هه‌بوونا باران و بريسا ل هنده‌ك ده‌ڤه‌ران يێ هه‌يى.
پشكا پێشبينيان ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ د نڤيساره‌كێ دا راگه‌هانديه كو ژ ئه گه‌رێ نزمبوونا گه‌رما سلانه و كارتێكرنا فشارێن نزمێن ده‌ريا سۆر، دهێته پێشبينيكرن ئه‌سمان ئه‌ورێ ته‌مام بيت و ئه‌گه‌رێ هه‌بوونا باران و بريسا ل هنده‌ك ده‌ڤه‌ران يێ هه‌يى.
پشكا پێشبينيان خۆيا ژى كريه كو نزمترين پلا گه‌رما پێشبينيكرى دێ 21 پله بيت و بلندترين پله ژى دێ 30 پله بيت.
هه‌ر ب گۆره‌ى ڤێ راپۆرتا رێڤه‌به‌ريا ناڤبرى له‌زاتيا باى ژى دێ د ناڤبه‌را 10 بۆ 15كم بيت د ده‌مژمێره‌كێ دا و ماوێ ديتنێ ژى دێ 9 بۆ 10كم بيت د ده‌مژمێره‌كێ دا.
ئەڤرۆ نیوز، عەزیز ھەورامی:
ئەڤرۆ 8ى چريا ئێكێ 2018، ب ئاماده‌بوونا ژماره‌كا به‌رپرسێن حزبى و حكومى و چالاكڤانێن كۆمه‌لگه‌ها مه‌ده‌نى ئازاد ته‌وفيق، پارێزگارێ نوو يێ هه‌له‌بچه ده‌ست ب كار بوو.
زێده‌تر ژ دو سالان بوو عه‌لى عوسمان جێگرێ پارێزگارێ هه‌له‌بچه ب وه‌كاله‌ت كربوو پارێزگارێ هه‌له‌بچه و جێگره‌كێ دى بۆ هاتبوو دانان و كارێن پارێزگه‌هێ برێڤه دبرن.
ئازاد ته‌وفيق، پارێزگارێ نوو يێ هه‌له‌بچه ل ده‌مێ ده‌ست ب كاربوونێ د كۆنگره‌كێ رۆژنامه‌ڤانى دا گۆت: “هه‌موو دنيا قه‌ردارێ هه‌له‌بچه‌يه، كار دكه‌ين بۆ ئاڤه‌دانكرنا ڤى باژێرى”.
ئه‌ڤرۆ نيوز:
سەرۆکێ لیژنا قانوونی و ھێزێن ناڤخۆ ل جڤاتا پارێزگەھا دھۆکێ بۆ رۆژناما ئەڤرۆ دیار کر کو بھایێ لترا پەنزینێ ل سەرانسەری ھەرێما کوردستانێ گرانبوویە نەبتنێ ل پارێزگەھا دھۆکێ و گۆت: “نابیت ل وەلاتەکێ خودان پەترۆل، بھایێ لترا پەنزینێ وەکو وەلاتەکی بھێتە فرۆتن کو چو پەترۆل لێ نەبیت”.
ئدریس ھەرکی، سەرۆکێ لیژنا قانوونی و ھێزێن ناڤخۆ ل جڤاتا پارێزگەھا دھۆکێ ئاشکرا کر کو ژ ئەگەرێ بلندبوونا بھایێ پەترۆلێ ل جیھانێ بھایێ لترا پەنزینێ ل سەرانسەری ھەرێما کوردستانێ گرانبوویە نەبتنێ ل پارێزگەھا دھۆکێ و ھەر لترەکا پەنزینێ 50 دینار لێ ھاتینە زێدەکرن و گۆت: “دڤێت پێرابوونێن قانوونی ھەمبەر خودانێن وان پەنزینخانان بھێنە وەرگرتن یێن کو پەنزین ب ئەرزانی کری و دەمێ بھایێ لترا پەنزینێ گرانبووی ئەو پەنزینا عمبارکری ب گرانی فرۆتی”.
ناڤھاتی ئاماژە دا وێ چەندێ کو راستە سیستەمێ کرینا پەنزینێ بازرگانی یە، بەلێ دڤێت چاڤدێری ژ ئالیێ حوکمەتێ ڤە ل سەر ھەبیت و رێ یێن چارەسەریێ بۆ ڤێ چەندێ بھێنە دیتن، چونکی ھەکە چاڤدێری نەبیت دێ بھایێ لترا پەنزینێ ھەتا ھزار دیناران ژی چیت و گۆت: “لژنا سۆتەمەنیێ ل جڤاتا پارێزگەھا دھۆکێ ل سەر گرانبوونا بھایێ پەنزینێ یا ئاگەھدارە و دێ بزاڤ ھێنە کرن ئەڤ بھایە بھێتە کێمکرن، چونکی نابیت ل وەلاتەکێ خودان پەترۆل، بھایێ لترا پەنزینێ وەکو وەلاتەکی بھێتە فرۆتن کو چو پەترۆل لێ نەبیت”.
نيشاندان