ئه‌ڤرۆ نيوز:

مامۆستایەکێ زانکۆیێ دیار دکەت کو مانا ھێزێن ئەمریکا ل سووریێ و ناکۆکیێن ئیرانێ و ئەمریکا ‏د بەرژەوەندیا کوردێن رۆژئاڤایێ کوردستانێ دایە و دڤێت کورد مفایی ژ مانا ھێزێن ئەمریکا ل ‏سووریێ وەربگرن و پێدڤیە کورد سیاسەتا ھەڤسەنگیێ ل گەل ئەمریکا و روسیا برێڤە ببەن و خوە ‏نەکەنە دوژمنێ روسیا ژی.‏

حسێن فەتاحی مامۆستایێ زانکۆیێ بۆ رۆژناما ئەڤرۆ دیار کر کو نھا کوردێن رۆژئاڤایێ کوردستانێ ‏پێدڤی ب پشتەڤانیا ئەمریکا نە، چاوا پشتەڤانیا ئەمریکا بۆ ھەرێما کوردستانێ پشتی سالێن ١٩٩١ ‏بۆ ئەگەرێ ھندێ کو پێگەھێ ھەرێما کوردستانێ بھێز کەڤیت نھا دڤێت کوردێن رۆژئاڤا ژی ھەمان ‏سیاسەتێ برێڤە ببەن و پشتەڤانیا ئەمریکا بدەستڤە بینن و گۆت: (ئاشکرایە کورد ل رۆژئاڤایێ ‏کوردستانێ د لاوازن و پێدڤی ب پشتەڤانیا ھێزێن جیھانی نە، ب تایبەتی ژی ئەمریکا، ژ بەر ‏ناکۆکیێن ئەمریکا یێن ل گەل ئیرانێ و تورکیا، ئەمریکا جارێ ناخوازیت رۆژئاڤایێ کوردستانێ ‏چۆل بکەت، ئانکۆ مرۆڤ دشێت بێژیت بەرژەوەندیێن ھەڤپشک د ناڤبەرا رۆژئاڤایێ کوردستانێ و ‏ئەمریکا دا ھەنە و دڤێت کورد ژی مفایەکا باش ژ ڤێ یەکێ وەربگرن).‏

ناڤھاتی ئەو یەک ژی دیار کر کو راستە روسیا د بابەتێ عەفرینێ دا خیانەت ل کوردان کر و رێ بۆ ‏تورکیا خوەش کر دا عەفرینێ داگیر بکەت، لێ نابیت کوردێن رۆژئاڤا نھا روسیا وەکو دوژمنێ خوە ‏ببینن، سیاسەت وەسا ناھێتە کرن، دڤێت کورد فێر ببن کو ل گۆر راستیا سیاسی یا ھەرێمێ و ‏جیھانێ سیاسەتێ بکەن، پشتەڤانیا روسیا بۆ مافێن کوردان ل رۆژئاڤایێ کوردستانێ گرنگە و ئەز ‏ھێڤیدارم کورد بشێن وەسا بکەن کو ھەکە روسیا پشتەڤانیا کوردان ژی نەکر دوژمناتیا وان نەکەت ‏و گۆت: (مەرجێن نھا یێن جیھانی و ھەرێمی بۆ رۆژئاڤایێ کوردستانێ باشن، ئەمریکا وەسا زوو رێ ‏نادەت کو تورکیا گەلەک زێدەگاڤیان ل رۆژئاڤایێ کوردستانێ بکەت، ئەو یەک بۆ کوردان باشە و ‏ھەتا ھێزێن ئەمریکا ل رۆژئاڤایێ کوردستانێ بمینن دڤێت کورد ژی بزاڤێ بکەن کو پێگەھێ خوە ‏یێ سیاسی، ئابووری و سەربازی بھێز بکەن و دەم یێ ھاتی کو ناکۆکیێن خوە ژی نھا بدەنە ‏رەخەکێ).‏

ئەو یەک د دەمەکێ دایە کو بەری نھا وەزارەتا دەرڤە یا ئەمریکا دیار کربوو جارێ چو بەرنامێ ‏ئەمریکا بۆ ھندێ نینە کو ھێزێن خوە ژ سووریێ ڤەکێشیت و ھەتا ھێزێن ئیرانێ ل سووریێ بن ‏دێ ئەمریکا ژی ل وێرێ مینیت، ھەروەسا ئالۆزیێن ل ئدلبێ و ناکۆکیێن د ناڤبەرا ئەمریکا و تورکیا ‏دا وەسا کرینە کو ئەمریکا بۆ پاراستنا بەرژەوەندیێن خوە ل سووریێ بمینیت.‏

ل ئالیێ دی نۆم چۆمسکی زانایێ ناڤدارێ ئەمریکی ژی ھەفتیا بۆری راگەھاند کو دڤێت ئەمریکا ‏بۆ پاراستنا کوردان ل سووریێ بمینیت، چونکو کوردان شەرەک مەزن ل دژی داعشێ کر و گەلەک ‏لاوێن کورد بوونە قوربانی و کوردان شیا داعشێ ژناڤ ببەن، نھا ژی کورد ل ھەمبەر ھێرشێن تورکیا ‏و یێن رژێما سووریێ پێدڤی ب پشتەڤانیا ئەمریکا نە و نابیت ئەمریکا نھا سووریێ چۆل بکەت و ‏گۆت: (ئەو دەڤەرێن نھا ل ژێر کۆنترۆلا کوردان دڤێت ژ ئالیێ ئەمریکا ڤە بھێنە پاراستن و دڤێت ‏ئەمریکا رێ نەدەت تورکیا یان ھەر ئالیەکێ دی ھێرشی دەڤەرێن کوردی ل سووریێ بکەت، ھەکە ‏ئەمریکا خوەدان ژ کوردان دەرکەڤیت و وان بپارێزیت ئەو یەک بۆ ئەمریکا ژی دێ گرنگ بیت، ‏چونکو ئەمریکا پێدڤی ب ھەڤپەیمانێن نوو یە و کورد ژی رۆژ ب رۆژێ ل عیراقێ و سووریێ بھێز ‏دکەڤن و ھەکە ئەمریکا کوردان ب تنێ نەھێلیت کورد دشێن ببنە ھەڤپەیمانێ ھەری راست و باش ‏بۆ ئەمریکا).‏

زانایێ ئەمریکا ئەو یەک ژی دیار کر کو ھەبوونا ھەرێمەکا کوردی ل سووریێ دشێت رێ بۆ ‏ئەمریکا خوەش بکەت دا کو بەرژەوەندیێن خوە ل سووریێ و دەڤەرێ باشتر بپارێزیت و ھەکە کورد ‏لاواز بن ھێزێن دی یێن وەکو تورکیا، ئیرانێ و رژێما سووریێ دشێن ئالۆزیێن مەزن بۆ ئەمریکا ‏دروست بکەن، ژ بەر ھندێ ژی جارەکا دی دبێژم گرنگە ئەمریکا کوردان بپارێزیت و وان ب تنێ ‏نەھێلیت.‏

ئه‌ڤرۆ نيوز:

رۆژ بۆ رۆژێ پارێزگارێ ب وەکالەت یێ کەرکووکێ بڕیارێن ‏دژی کوردان زێدە دکەت، ئەندامەکا جڤاتا پارێزگەھا ‏پارێزگەھا کەرکووکێ ژی دبێژیت، بڕیارێن پارێزگارێ عەرەب ‏دژی خەلکێ کەرکووکێ نە و زیانێن مەزنژی ب ھەموو ‏پێکھاتێن پارێزگەھا کەرکووکێ گەھاندینە، لدۆر کاراکرنا ‏جڤاتا پارێزگەھێ ژی ئاماژەکر، بڕیارە جڤات بھێتە کاراکرن و ‏پارێزگارەکێ کوردژی بھێتە دانان بۆ کەرکووکێ. ‏

جوان حەسەن، ئەنداما لیستا برایەتی ل جڤاتا پارێزگەھا ‏کەرکووکێ بۆ رۆژناما ئەڤرۆ گۆت” لڕۆژێن بۆری پارێزگارێ ‏ب وەکالەت راکان سەعید کومەکا بڕیارێن دی یێن شوڤێنی ‏دەرکرینە بۆ پارێزگەھا کەرکووکێ و زیانێن مەزن بۆ ‏کەرکووکێ ھەنە، ھەموو بڕیارێن پارێزگەرێ ب وەکالەتژی ‏بەرۆڤاژی دستوور و قانوونێن عێراقێ یە، ژبەرکو ل دەرکرنا ‏بڕیاران نەڤەگەڕیایە بۆ جڤاتا پارێزگەھێ، ھەتا راکان ‏سەعیدی نڤیسارەک دایە بەغدا کو پارێزگەھا کەرکووکێ چو ‏جڤات نینە لەوڕا ئێک لایەنە بڕیار دەرکرینە، دەرکرنا ئەڤان ‏بڕیارێن بێ قانوونی بوینە جھێ دلگرانیا خەلکێ کەرکووکێ، ‏چونکە بووینە بارگرانیەکا مەزن لسەر خەلکی، بتایبەتی ‏دانانا دو خالێن گومرکی دناڤبەرا کەرکووک و ھەرێما ‏کوردستانێ بووینە ئەگەرێ بلندبوونا بھایێ کەلو پەلان د ‏بازاڕێن کەرکووکێ دا، خویایە بڤێ پێنگاڤێ راکان سەعید ‏دخوازیت پارێزگەھا کەرکووکێ ل ھەرێما کوردستانێ ‏ڤەقەتینیت، بەلێ گەلی کورد دەمەکە بڕیارا خوە دەرکری، کو ‏بھەر بھایەکێ ھەبیت کەرکووک خاکا کوردستانێ یەو بڕیارێن ‏شوڤێنی چو بھایێ خوە نابن لسەر کوردستانیەتا کەرکووکێ، ‏تنێ بۆ دەمەکی دێ بیتە ئەگەرێ گرانیا بازاڕی، ژبەرکو کەلو ‏پەلێن لھەرێما کوردستانێ و دەرڤەژی دھێنە کەرکووک گومرک ‏لسەر دانایە. ‏

جوان حەسەن گۆت” پارێزگارێ عەرەب چەندین پارە بناڤێ ‏بجە ئینانا پڕۆژەیێن خزمەتگوزاری ل کەرکووکێ وەرگرتینە ‏و ھژمارەکا زۆرا یاریگە و مولکێن حوکمەتێ ب کرێ داینە، ‏بێی کو چو زانیاری و ھویردەکاریان ئاشکرا بکەت، ھەتا جڤاتا ‏پارێزگەھێ یا ئاگەھدارنینە حەفتیا بۆری مە ل جڤاتا ‏پارێزگەھێ کۆمبوونەکا شیرەتکاری ئەنجامدا و ئەندامێن ‏عەرەبژی تێدا پشکداربوون، مەرەم ژ کۆمبوونێ دانانا ‏سینورەکیە بۆ پارێزگارێ سەپاندی جڤاتا پارێزگەھێ یا ‏بەرھەڤە بۆ کۆمبوونێن خوە، بەلێ ئاریشا کۆمنەبوونا جڤاتێ ‏بۆ ڤێ چەندێ ڤەدگەڕیت کورد دخوازیت د کۆمبوونێ دا ‏پارێزگارەکێ کورد بھێتە ھەلبژارتن، بەلێ لیستێن تورکومان و ‏عەرەب دبێژن تنێ سەرۆک و جێگرێن جڤاتێ دێ ھێنە ‏دیارکرن نەک پارێزگار، ھەر چاوا بیت و کەنگی جڤاتا ‏پارێزگەھێ کۆمبوونێن خوە دەست پێبکەت دێ ھەموو ‏بڕیارێن پارێزگاری ھەلوەشینین و رێکێ نادەین ب چو ‏شێوەیەکی بڕیارێن دژی کوردان بھێنە بجە ئینان ل ‏کەرکووکێ.‏

ئه‌ڤرۆنيوز:

سه‌رۆكێ ليستا پارتى ديموكراتى كوردستان بۆ هه‌لبژارتنێن په‌رله‌مانێ كوردستانێ راگه‌هاند، مه‌ هێلا سوور ل سه‌ر چو لايه‌نه‌كى نينه‌ وده‌رگه‌هێ مه‌ يێ ڤه‌كريه‌ بۆ دانوستاندنا به‌رپرسيارانه‌ ل گه‌ل هه‌موو ليستێن سه‌ركه‌فتى دهه‌لبژارتنێن په‌رله‌مانێ كوردستانێ دا.

هێمن هه‌ورامى، ئه‌ندامێ سه‌ركردايه‌تيا پارتى وسه‌رۆكێ ليستا پارتى دهه‌لبژارتنان دا گۆت” به‌رى هه‌موو تشته‌كى سه‌ركه‌فتنا پرۆسێ بۆمه‌ يا گرنگ بوو، دروستكرنا كوردستانه‌كا ب هێز درووشمێ مه‌بوو، له‌وما پارتى مه‌غروور نه‌بوويه‌ ژ وێ سه‌ركه‌فتنا مه‌زن يا ب ده‌ستڤه‌ئيناى”.

گۆت ژى”ده‌رگه‌هێ مه‌ ژى يێ ڤه‌كريه‌ بۆ دانوستاندنه‌كا به‌رپرسيارانه‌ ل گه‌ل هه‌موو ليستێن سه‌ركه‌فتى، دانوستاندنێ دێ ل گه‌ل هه‌موو لايانان كه‌ين ومه‌ هێلا سوور ل سه‌ر چو لايه‌نه‌كى نينه‌”.

هێمن هه‌روامى زێده‌تر بۆ رووداو گۆت” هه‌ر لايه‌نه‌كێ سياسى ب گۆره‌ى ئيستيحقاقێ خوه‌ به‌رهه‌ڤبيت ل گه‌ل پارتى ملێ خوه‌ بده‌ته‌ به‌ر وێ به‌رپرسياره‌تيا هه‌ڤپشك، هه‌كه‌ ئه‌و پێنگاڤه‌كێ به‌ر  ب پارتى ڤه‌ بهێن، پارتێ دێ دو پێنگاڤان به‌ر ب وان لايه‌نان چيت، له‌وما دێ ب به‌رپرسيارانه‌ دانوستاندنێ كه‌ين”.

ئه‌ڤرۆنيوز:

ل دووڤ نڤيساره‌كا وه‌زاره‌تا دارايى وئابوورى ل هه‌رێما كوردستانێ، گۆژمێ پارێ فه‌رمانبه‌ران ئه‌وێ نه‌هاتيه‌ خه‌رجكرن ل هه‌يڤێن سالا 2017، كو هاتينه‌ خستن ل سه‌ر مووچێ هه‌يڤا 12 يا هه‌مان سال وپێ نه‌هاتيه‌ دان، ل گه‌ل مووچێ هه‌يڤێن داهاتى ژ سالا 2018 دێ بۆ فه‌رمانبه‌ران هێته‌ خه‌رجكرن.

ل پشكه‌كا وێ نڤيسارا وه‌زاره‌تا دارايى كو ل رۆژا 4/10/2018 هاتيه‌ ده‌ركرن وئه‌ڤرۆ ئێكشه‌مبى 7/10/2018 هاتيه‌ به‌لاڤكرن، تێدا هاتيه‌، ژبه‌ر پاشكه‌فتكرنا مووچێ هه‌يڤا كانوونا ئێكێ سالا 2017 بۆ هه‌وه‌ رادگه‌هينين، هه‌موو ئه‌و جوداهيا مووچێن بۆ هه‌يڤێن سالا 2017 دێ ڤه‌گه‌ريت ول گه‌ل ليستا مووچێ هه‌يڤا كانوونا ئێكێ 2017 بۆ فه‌رمانبه‌ران ومووچه‌خۆران گرێدايه‌، بهێته‌ خه‌رجكرن ب ليستا جودا ول ده‌مێ به‌لاڤكرنا مووچێ هه‌يڤانه‌