ئه‌ڤرۆنيوز:

ئه‌ندامه‌كا په‌رله‌مانێ عيراقێ ژ ليستا پارتى ديموكراتى كوردستان راگه‌هاند، دهه‌لبژارتنێن په‌رله‌مانێ كوردستانێ پارتى پتريا كورسيێن په‌رله‌مانى ب ده‌ستڤه‌ئينان ودێ سه‌رۆكاتيا حوكمه‌تێ وپه‌رله‌مانێ كوردستانێ وه‌رگرين.

مه‌ياده‌ نه‌جار، ئه‌نداما په‌رله‌مانێ عيراقێ ژ ليستا پارتى د به‌ياننامه‌كا رۆژنامه‌ڤانى دا گۆت” پيرۆزباهيێ ل گه‌لێ كوردستانێ دكه‌ين ب هه‌لكه‌فتا سه‌ركه‌فتنا هه‌لبژارتنێن په‌رله‌مانێ كوردستانێ، داخوازێ ژ جه‌ماوه‌رى دكه‌ين گوهێ خوه‌ نه‌ده‌نه‌ هێجه‌تێن لايه‌نێن شكه‌ستن خوارى كو دخوازن گۆمانێ بێخنه‌ سه‌ر ئه‌نجامان وكێشان دروست بكه‌ن”.

دياركر ژى” ئه‌نجامێن هه‌لبژارتنێن په‌رله‌مانێ كوردستانێ رێ دده‌ته‌ مه‌ وه‌كو پارتى ديموكراتى كوردستان ئه‌م حوكمه‌تێ پێكبينين وسه‌رۆكاتيا حوكمه‌تێ وپه‌رله‌مانى ژى هه‌ر بۆمه‌ بيت، چونكى مه‌ پتريا كورسيان يێن ب ده‌ستڤه‌ئيناين”.

ئه‌ڤرۆنيوز:

ئه‌ندامێ كۆمسيۆنا مافێن مرۆڤان ل عيراقێ، عه‌لى ئه‌لبه‌ياتى، ئه‌ڤرۆ شه‌مبيێ 6/10/2018 ئاشكراكر كو چار هزار قوتابيێن پارێزگه‌ها به‌سرا خوه‌ ڤه‌گوهاستيه‌ قوتابخانێن هه‌ولێرێ دده‌مێ دو رۆژان دا.

ل دووڤ مالپه‌رێ (هنا الجنوب) يێ عيراقى، ئه‌لبه‌ياتى گۆت” نوونه‌راتيا وه‌زاره‌تا په‌روه‌ردێيا فيدرالى ل هه‌رێما كوردستانێ دده‌مێ هه‌ردو رۆژێن چارشه‌مبى وپێنجشه‌مبيا بۆرى چارهزار قوتابيێن پارێزگه‌ها به‌سرا تۆماركرن كو خوه‌ ژ قوتابخانێن به‌سرا بۆ قوتابخانێن هه‌ولێرێ ڤه‌گوهاستيه‌”.

ئه‌ڤرۆنيوز:

وه‌زاره‌تا په‌روه‌ردێ ل هه‌رێما كوردستانێ ئه‌ڤرۆ شه‌مبيێ 6/10/2018  ب هه‌لكه‌فتا رۆژا جيهانى يا مامۆستايان راگه‌هاند، مامۆستا ميكانيزما گه‌شه‌كرنا هه‌ر جڤاكه‌كى نه‌،

وه‌زاره‌تا په‌روه‌ردێ دياركر”ل ڤان چه‌ند سالێن بۆرى دا، هه‌رێما كوردستانێ ب ره‌وشه‌كا ئابوورى يا گران دا ده‌رباز بوو وكاريگه‌ريا قه‌يرانا دارايى  ل سه‌ر ته‌خا مامۆستايان ژ هه‌موو ته‌خێن دى يا زێده‌تر بوو، به‌لێ ب خوه‌شحالى ڤه‌ وژبه‌ر به‌رپرسياره‌تيا ڤێ ته‌خێ به‌رامبه‌ر جڤاكى، نه‌هێلا ده‌رگه‌هێن قوتابخانان بهێنه‌ داخستن وپرۆسا خواندنێ ب راوه‌ستيت، مامۆستايێن مه‌ هه‌روه‌كو پێشمه‌رگان كو به‌رگرى ژ سنووران دكر ل به‌رامبه‌ر هێرشێن داعشێ، مامۆستايێن مه‌ ژى ا ناڤخوه‌ ب فێركرنێ نه‌هێلا هزرا نه‌مروڤايه‌تى يا وێ گرۆپێ هزرا تاكێ كورد داگير بكه‌ت”.

وه‌زاره‌تا په‌روه‌ردێ راگه‌هاند ژى” ب ئه‌ركێ خوه‌ دزانين هاريكاروبه‌رگريكارێن مامۆستايان بين بۆ وێ چه‌ندێ ئاستێ وان يێ زانستى بلندتر بيت وبارێ گوزه‌رانيا وان باشتر بيت”.

ئه‌ڤرۆ:عه‌زیز هه‌ورامی

د رۆهنكرنه‌كێ دا مه‌كته‌با عارف ته‌يفوور سه‌رۆكێ جڤاتا سه‌ركردايه‌تيا سلێمانيێ – هه‌له‌بجه‌ يا پارتى ديموكراتى كوردستان كو ئه‌ڤرۆ شه‌مبيێ 6/10/2018 هاتيه‌ به‌لاڤكرن، تێدا ره‌ت دكه‌ت كو داخۆيانيه‌ك دابيت ل دۆر سه‌رۆكێ حوكمه‌تا هه‌رێما كوردستانێ.

د وێ رۆهنكرنێ دا هاتيه‌” مالپه‌رێ چه‌واشه‌كارى (ميلله‌ت پرێس) ل رۆژا ئه‌ينيێ 5/10/2018  ده‌نگوباسه‌كێ نه‌راست ب ناڤێ عارف ته‌يفوور به‌لاڤكريه‌ كو بۆ تۆرا ده‌نگوباسێن سلێمانيێ گۆتيه‌ كو نێچيرڤان بارزانى دێ ژ پێكئينانا كابينا نوو يا حوكمه‌تێ هێته‌ دوورخستن ومه‌سرور بارزانى دێ بيته‌ سه‌رۆكێ حوكمه‌تێ، كو دوور و نێزيك عارف ته‌يفوورى داخۆيانيه‌كا ژ وى جۆرى نه‌دايه ودهه‌مان ده‌م دا بۆ يار ونه‌ياران ته‌ئكيد دكه‌ين كو پارتى ته‌نها هێزا كوردستانى يه‌ كو جه‌سته‌يه‌كێ مونسه‌جمه‌ ودوور ژ بال بالينێ يه‌‌”.

هه‌روه‌سا هاتيه‌” دبێژينه‌ سايتێ (ميلله‌ت) يێ چه‌واشه‌كارى كو ئه‌ڤ جۆرێ ياريكرنێ ب په‌يڤان دووره‌ ژ ئادابێن رۆژنامه‌ڤانى.

ئه‌ڤرۆنيوز:

سه‌رۆك مه‌سعود بارزانى ئه‌ڤرۆ شه‌مبيێ 6/10/2018 ب هه‌لكه‌فتا جه‌ژنا جه‌مايێ يا كوردێن ئێزدى داخوازا پتر ب هێزكرنا فه‌رهه‌نگا پێكڤه‌ژيانێ وبرايه‌تيێ دناڤبه‌را هه‌موو پێكهاتێن ئاينى ونه‌ته‌وى كر.

سه‌رۆك بارزانى د مالپه‌رێ خوه‌ يێ تايبه‌ت دا ب هه‌لكه‌فتا جه‌ژنا جه‌مايێ يا كوردێن ئێزدى پيرۆزباهيێن خوه‌ ئاراسته‌ى هه‌موو خووشك وبرايێن ئێزدى ل كوردستاني وهه‌موو جيهانى كر وگۆت” هيڤيدارم ئه‌ڤ جه‌ژنه‌ ببيته‌ ئه‌گه‌رێ خوه‌شيێ وئاراميا خووشك وبرايێن ئێزدى وبشێن هه‌موو ساله‌كێ جه‌ژن وخوه‌شيێن خوه‌ ب ئاشتى وئاسووده‌يى بكه‌ن”.

سه‌رۆك بارزانى گۆت ژى” ب ڤێ هه‌لكه‌فتى دووپات دكه‌م كو پێدڤيه‌ ئه‌م هه‌موو كار بكه‌ين بۆ پتر ب هێزكرنا فه‌رهه‌نگا پێكڤه‌ژيانێ وبرايه‌تيێ وته‌بايێ دناڤبه‌را پێكهاتێن ئاينى ونه‌ته‌وى ل كوردستانێ وببارێزين”.