ئه‌ڤرۆنيوز:
سوباهى ئێكشه‌مبى 30/9/2018 ل ده‌مژمێر 8 سپێدێ ده‌نگدانا گشتى ل هه‌رێما كوردستانێ دێ هێته ئه‌نجامدان، چو ئه‌نجام ژى دفه‌رمى نينن تاكو كۆمسيۆن به‌لاڤ نه‌كه‌ت.
هندرين محه‌مه‌د، سه‌رۆكێ كۆمسيۆنا بلند يا هه‌لبژارتنان وراپرسيێ ل هه‌رێما كوردستانێ راگه‌هاند، پشتى 72 ده‌مژمێران ژ ئه‌نجامدانا هه‌لبژارتنان، كۆمسيۆن دێ پێگير بيت ب به‌لاڤكرنا ئه‌نجامێن ده‌ستپێكى يێن هه‌لبژارتنان.
گۆت ژى” چو ئه‌نجامه‌ك ژى يا فه‌رمى نينه تاكو كۆمسيۆن به‌لاڤ نه‌كه‌ت”.
ئه‌ڤرۆنيوز:
به‌رى ده‌مه‌كێ كێم ياريا دێربى دناڤبه‌را ريال مه‌دريد وئه‌تله‌تيكۆ مه‌دريد ل سه‌ر ياريگه‌ها سانتياگۆ برنابيۆ ب وه‌كهه‌ڤيێ بێ گۆل ب دووماهى هات.
ب ڤى ئه‌نجامى ئه‌تله‌تيكۆ خزمه‌ته‌كا مه‌زن پێشكێشى به‌رشه‌لونا كر كو هه‌ر مايه ل سه‌رێ رێزبه‌ندا خۆلا ئيسپانى يا ته‌پا پێ ب 14 خالان وريال ژى ب ڤێ وه‌كهه‌ڤيێ گه‌هشته خالا 14 و ل رێزا دويێ دهێت ب جوداهيا گۆلان ل گه‌ل به‌رشه‌لونا. ئه‌تله‌تيكۆ مه‌دريد ژى گه‌هشته خالا 12 ول رێزا چارێ دهێت.
ئه‌ڤرۆنيوز:
كۆمسيۆنا بلند يا هه‌لبژارتنان وراپرسيێ ل هه‌رێما كوردستانێ راگه‌هاند، بكارئينانا مۆبايلێ وئامێرێ وێنه‌گرتنێ دناڤ ويستگه‌هێن ده‌نگدانێ دا قه‌ده‌غه‌يه وهه‌ر فه‌رمانبه‌ره‌كێ سه‌رپێچيێ بكه‌ت، دێ هێته بێ به‌هركرن ژ پارێ بۆ وى هاتيه ته‌رخانكرن.
ئيسماعيل خورمالى، بريارده‌رێ كۆمسيۆنا بلند يا هه‌لبژارتنان وراپرسيێ ل هه‌رێما كوردستانێ راگه‌هاند” ل دووڤ رێنمايێن كۆمسيۆنێ بكارئينانا مۆبايلێ وئاميرێ وێنه‌گرتنێ قه‌ده‌غه‌يه دناڤ ويستگه‌هێن ده‌نگدانێ دا ودڤێت فه‌رمانبه‌رێن كۆمسيۆنێ وبريكارێن قه‌وارێن سياسى رێ نه‌ده‌ن ب چو شێوه‌كى ئه‌و كاره بهێته كرن”.
گۆت ژى” بۆ فه‌رمانبه‌رێن كۆمسيۆنێ، هه‌ر سه‌رپێچيه‌ك دێ وان بێ به‌هر كه‌ت ژ وى گۆژمێ پاره‌ى ئه‌وێ بۆ هاتيه ته‌رخانكرن، زێده‌بارى لايه‌نێ قانوونى يێ وێ چه‌ندێ”.
ئه‌ڤرۆنيوز:
دياريێن گه‌را حه‌فتێ دا ژ خۆلا ئينگليزى يا ته‌پا پێ، يانا لێڤه‌رپۆل پشتى شه‌ش سه‌ركه‌فتنان ئه‌ڤرۆ شه‌مبيێ ل ده‌رڤه‌ى ياريگه‌ها خوه ل گه‌ل يانا شيلسى ب ئه‌نجامێ 1-1 وه‌كهه‌ڤ بوو.
گۆلا يانا شيلسى ل خۆله‌كا 25 ژلايێ ياريكه‌رێ وێ يێ به‌لجيكى ئيدن هازارد هاته تۆماركرن وگۆلا وه‌كهه‌ڤيێ يا لێڤه‌رپۆل ل خۆله‌كا 89 ژلايێ دانيێل ستوريدج ڤه هاته تۆماركرن.
ب ڤى ئه‌نجامى يانا لێڤه‌رپۆل خالين خوه گه‌هاندنه 19 خالان ل رێزێ دويێ پشتى رێزا ئێكێ ژده‌ستداى بۆ يانا مانشسته‌ر ستى ئه‌وا ل سه‌رێ رێزبه‌ندێ دهێت ب 19 خالان ب جوداهيا گۆلان ل گه‌ل لێڤه‌رپۆل خودانا رێزا دويێ. يانا شيلسى ژى خالێن خوه گه‌هاندنه 17 خالان ول رێزا سيێ دهێت.
ئه‌ڤرۆنيوز:
سه‌رۆك وه‌زيرێن عيراقێ ئه‌ڤرۆ شه‌مبيێ 29/9/2018 پێشوازى ل فوئاد حسێن به‌ربژارێ پارتى ديموكراتى كوردستان بۆ سه‌رۆكاتيا كۆمارا عيراقێ كر.
ئوفۆسا راگه‌هاندنا سه‌رۆك وه‌زيرێن عيراقێ به‌لاڤكر” سه‌رۆك وه‌زيران حه‌يده‌ر عه‌بادى ئه‌ڤرۆ پێشوازى ل فوئاد حسێن به‌ربژارێ سه‌رۆكاتيا كۆمارا عيراقێ ژ پارتى ديموكراتى كوردستان كر”.
دياركر” دديداره‌كێ دا به‌حسێ ره‌وشا سياسى ل عيراقێ وده‌نگدان بۆ هه‌لبژارتنا سه‌رۆك كۆمارى ودانوستاندنێن پێكئينانا حوكمه‌تا داهاتى وگرنگيا بجهئينانا پێدڤيێن وه‌لاتى ژ ئاڤه‌دانكرنێ ودابينكرنا ده‌ليڤێن كارى وپاراستنا وێ چه‌ندا بده‌ستڤه‌هاتى دشه‌رێ تيرۆرێ دا وسه‌قامگيريا ئه‌منى وپه‌يوه‌نديێن ده‌رڤه”.
به‌رده‌وامی دان ب گه‌هاندنا پروژێن خزمه‌تكاری بو وه‌لاتیێن پارێزگه‌ها دهوكێ تایبه‌ت چێكرن وفره‌هرنا رێكا ئه‌ڤرو سپێدێ 29-9-2018ب چاڤدێریا به‌رێز فه‌رهاد ئه‌مین ئه‌تروشی پارێزگه‌رێ دهوكێ وب ئاماده‌بونا به‌رێزان ئوسمان یونس جێگرێ پارێزگه‌رێ دهوكێ بو كاروبارێن ته‌كنیكی وقایمقامێ قه‌زا ئامێدیێ وچه‌ند به‌رپرسێن حزبی وئیداری رێ ورسمێن ڤه‌كرنا رێكا جوت سایدێ ناحیێن دێرالوك شێلادزێ ل سنورێ قه‌زا ئامێدیێ هاتنه گێران.
ل به‌راهیێ په‌یڤا بخێر هاتنێ ژلایێ اسماعیل مسته‌فا قایمقامێ قه‌زا ئامێدیێ هاته خاندن تێدا بخێر هاتنا هه‌موو به‌رهه‌ڤبویان كر وسوپاسیا حكومه‌تا هه‌رێما كوردستانێ وپارێزگه‌ها دهوكێ وهه‌موو لایه‌نان كر یێن بوینه هاریكار بو ڤه‌كرنا رێكا ناڤبری .
پاش پارێزگه‌رێ دهوكێ دپه‌یڤه‌كێدا پیروزباهیا خه‌لكێ ده‌ڤه‌را دێرالوك وشێلادزێ وده‌وروبه‌ران كر كو ئه‌ڤ پروژێ نوو بو هاتیه دورستكرن وده‌ست خوشی ل كومپانیا بجهكه‌ر كر كو شیایه ب قه‌ر ڤی پروژه‌ی بجهبینیت.
هه‌روه‌سا سوپاسیا رێزدار سه‌روكێ حكومه‌تا هه‌رێما كوردستانێ كر كو پشته‌ڤانیا دارایی ل پروژه‌ی كریه وته‌كه‌زكر كو ئه‌ركێ حكومه‌تا كوردستانێ یه خوشگوزاریا خه‌لكی خوشكه‌ت وپروژێن خزمه‌تكاری بو وه‌لاتییان ئه‌نجامده‌ت ب تایبه‌تی رێك وبانا وپروژێن گرێدای ژیانا روژانه یا وه‌لاتیان.
پارێزگه‌رێ دهوكێ ژوه‌لاتیێن ده‌ڤه‌رێ خواست كو دهاریكاربن بو چێكرنا 2كم دی یێن رێكا دێرالوكێ شێلادزێ بو وێ یه‌كێ رێك هه‌موو ببیته دووسایدی وهاتن وچون خوشتر لێ بهێت.
هه‌ربڤێ هه‌لكه‌فتێ زكری به‌شیر سه‌رپه‌رشتێ كومپانیێن دارین گروپ وكاڤین گروپ یێن پروژه بجهكری ته‌كه‌زكر كو رێك هه‌موو ل ب كوالیتیه‌كا رێك وپێك ولدوڤ ستاندارتێن رێڤه‌به‌ریا رێك وپرا هاتیه دروستكرن.
پاش پروژه ب ره‌نگه‌كێ فه‌رمی هاته ڤه‌كرن.
هه‌ژی گوتنێ یه درێژاهیا رێكا جوت سایدێ ناحیێن دێرالوك شێلادزێ 8كم وفره‌هیا وێ 28م بكوژمێ 25ملیار دینارا ل سه‌ر بودجا گه‌شه‌پێدانا پارێزگه‌ها دهوكێ ژلایێ كومپانیێن دارین گروپ وكاڤین گروپ هاتیه بجه ئینان.
ئه‌ڤرۆ نیوز، نه‌وزاد هلۆرى:
ده‌مه‌كێ كێم به‌رى نوكه ستافێ سه‌ره‌كیێ نه‌وه‌ى نوێ ل دڤه‌را ئامێدیێ ده‌ستكاركێشانا خوه ل قه‌واره‌یێ نه‌وه‌ى نوێ راگه‌هاند و پێكڤه گه‌شتنه دناڤ رێزێن پارتى دیموكراتى كوردستان دا .
هانى عه‌ونى، جێگرێ رێكخه‌رێ نه‌وه‌ى نوێ ل ئامێدیێ بۆ ئه‌ڤرۆ نیوز گۆت: (مه وه‌ك ستافێ نه‌وه‌ى نوێ ل ئامێدیێ كو نێزیكێ 100 كه‌سان پێكدهێن ، ده‌ستكاركێشانا خوه ل نه‌وه‌ى نوێ راگه‌هاند و ئه‌ڤرۆ وێڤه مه چوو په‌یوه‌ندى ب نه‌وه‌ى نوێ ڤه نه‌مایه ، و دێ دناڤ رێزێن پارتى دیموكراتى كوردستان درێژیێ ب خه‌باتا خوه ده‌ین و كار ژى بو سه‌رئێخستنا لیستا پارتى ده‌ین د هه‌لبژارتنێن په‌رله‌مانێ كوردستانێ).
زێده‌تر گۆت: (ستاف ب خوه زێده‌تر ژ 100 كه‌سانه، به‌لێ چاار ژ وان سه‌ره‌كى نه كو ئه‌و ژى نێچیرڤان شكرى رێكخه‌رێ نه‌وه‌ى نوێ ل ئامێدیێ ، و ئه‌ز وه‌كو جێگرێ رێكخه‌رێ نه‌وه‌ى نوێ ل ئامێدیێ و دلشاد رێكانى به‌رپرسێ شوسیال میدیایا نه‌وه‌ى نوێ ل ئامێدیێ ، ل گه‌ل جوتیار عومه‌رخان جێگرى نه‌وه‌ى نوێ ل دهوكێ، و ب هه‌موو بزاڤێن خوه دێ كاركه‌ین كو هه‌موو لایه‌نگرێن نه‌وه‌ى نوێ بهێنه دناڤ پارتى دا).
هانى ل دۆر ده‌ست ژكاركێشانێ گوت: (هه‌ت نوكه مه چو ئه‌گه‌ر دیار نه‌كرینه، به‌لێ پاشى دێ بۆ رایا گشتى هه‌موو ئه‌گه‌ران رۆهن كه‌ین و تنێ نها هاتینه دناڤ پارتى دا و مه چو په‌یوه‌ندى ب نه‌وه‌ى نوێ ڤه نه‌مایه).
ئه‌ڤرۆنيوز:
كۆمسيۆنا بلند يا هه‌لبژارتنان وراپرسيێ ل هه‌رێما كوردستانێ راگه‌هاند، پێدڤيه بۆ رۆژا ده‌نگدانێ دهه‌لبژارتنێن په‌رله‌مانێ كوردستانێ دا سوباهى ئێكشه‌مبى 30/9/2018 پێدڤيه ده‌نگده‌ر كارتا نيشتمانى يان ره‌گه‌زناما عيراقێ يان پاسه‌پۆرتا عيراقى ل گه‌ل خوه ببه‌ته بنگه‌هێ ده‌نگدانێ تاكو بشێت ده‌نگێ خوه بده‌ت.
كۆمسيۆنێ درۆهنكرنه‌كێ دا دياركر” پێدڤيه ده‌نگده‌ر ئێك ژ به‌لگه‌نامێن (كارتا نيشتمانى، ره‌گه‌زناما عيراقى، پاسه‌پۆرتا عيراقى) ل گه‌ل بيت بۆ ده‌نگدانێ”.
ئاماژه كر ژى” هه‌كه هه‌ر ده‌نگده‌ره‌كى چو ژوان به‌لگه‌نامان نه‌بن، دشێت ره‌گه‌زناما عيراقى يا بابێ خوه ل گه‌ل ناسناما خوه ببه‌ت ووى ده‌مى دشێت ده‌نگێ خوه بده‌ت.
ئه‌ڤرۆنيوز:
ئه‌نداما جڤاتا پارێزگه‌ها هه‌ولێرێ ژ بزاڤا گۆران وئه‌نداما ديار يا وێ بزاڤێ ل سنورێ پارێزگه‌ها هه‌ولێرێ، هيڤى هه‌ياڤ، ده‌ست ژ كاركێشا ژ رێزێن بزاڤا گۆران.
درۆهنكرنه‌كێ دا هيڤى هه‌ياڤ ل سه‌ر به‌رپه‌رێ خوه ل تۆرا جڤاكى يا فه‌يسبووكى دبێژيت” ئه‌ز هيڤى هه‌ياڤ به‌كر هه‌لسوراوا به‌رێ يا بزاڤا گۆران وئه‌نداما جڤاتا پارێزگه‌ها هه‌ولێرێ، من چو په‌يوه‌ندى ب بزاڤا گۆران ڤه نه‌مايه”.
گۆت ژى” پشتى ل ده‌مێ بۆرى من باوه‌ريه‌كا ب هێز ب وێ رێبازێ هه‌بوو ومن كاركر بۆ سه‌رخستنا بزاڤا گۆران، به‌لێ پشتى مرنا نه‌وشێروان مسته‌فاى، رێره‌وێ رێبازێ هااته لادان وچ دژايه‌تى نه‌مايه كو ل به‌رامبه‌ر من نه‌كرى”.
دياركر” ژبه‌ر هه‌بوونا بالان ئه‌ز يا به‌رهه‌ڤ نينم ببم سوته‌مه‌نى دناڤبه‌را بالان دا، پێشتر ژى من رێكخه‌رێ گشتى وگه‌له‌ك هه‌لسوراو ئاگه‌هداركرن ژ وێ ره‌وشێ ومن ئاگه‌هداركرن كو دێ من هه‌لويسته‌كێ جدى هه‌بيت”.
ئه‌ڤرۆنيوز:
دچارچۆڤێ گه‌را حه‌فتێ ژ خۆلا ئيسپانى يا ته‌پا پێ، به‌رى ده‌مه‌كێ كێم يانا به‌رشه‌لونا ژ دوراندنێ قورتال بوو ده‌مێ ل سه‌ر ياريگه‌ها خوه ل گه‌ل يانا ئه‌تله‌تيك بلباو ب ئه‌نجامێ 1-1 وه‌كهه‌ڤ بووى.
گۆلا يانا ئه‌تله‌تيك بلباو ل خۆله‌كا 41 ژلايێ ئوسكار دى ماركۆس هاته تۆماركرن وگۆلا وه‌كهه‌ڤيێ بۆ يانا به‌رشه‌لونا ل خۆله‌كا 84 ژلايێ مونير حه‌دادى ڤه هاته تۆماكرن.
ب ڤى ئه‌نجامێ به‌رشه‌لونا ب شێوه‌كێ به‌روه‌خت ل رێزا ئێكێ ب 14 خالا ما وچاڤه‌رێ ياريا ئه‌ڤ شه‌ڤه دناڤبه‌را ريال مه‌دريد وئه‌تله‌تيكۆ مه‌دريد دكه‌ت هه‌كه ريال تێدا ب سه‌ركه‌ڤيت دێ ب 16 خالان چيته ريزا ئێكێ ل شوونا به‌رشه‌لونا، يانا ئه‌تله‌تيك بلباو ژى گه‌هشته خالا 7 ول رێزا 14 دهێت.
نيشاندان