ئه‌ڤرۆنيوز:

كۆمسيۆنا بلند يا هه‌لبژارتنان وراپرسيێ ل هه‌رێما كوردستانێ درۆهنكرنه‌كێ دا چه‌ند مه‌رجێن قانوونى راگه‌هاندن بۆ رۆژا هه‌لبژارتنێن په‌رله‌مانێ كوردستانێ بۆ وان وه‌لاتيێن مافێ ده‌نگدانێ هه‌ى.

كۆمسيۆنێ دياركر كو ئه‌و مه‌رجێن قانوونى ب ڤى شێوه‌ى نه‌:

1-ناڤ دتۆمارا ده‌نگده‌ران دا هه‌بيت.

2- شايسته‌يا تمام هه‌بيت.

3- خودانێ ره‌گه‌زناما عيراقى بيت.

4-  پێدڤيه‌ ده‌نگده‌رى 18 سالى تمام كربيت ل رۆژا ده‌نگدانێ دا.

5- پلێتا ئاهين خوارنێ يا ئێك ژ پارێزگه‌هێن هه‌رێما كوردستانێ هه‌بيت.

6- ئاكنجيێ هه‌رێما كوردستانێ بيت.

ئه‌ڤرۆنيوز:

دكه‌رنه‌فالا ئه‌ڤرۆ ئێكشه‌مبى 23/9/2018  يا پارتى ل سلێمانيێ، سه‌رۆك مه‌سعود بارزانى په‌يڤه‌ك پێشكێشكر ودياركر كو چه‌ند رۆژ يێن ماين بۆ هه‌لبژارتنه‌كا چاره‌نڤيسساز كو هه‌كه‌ خودێ ده‌ليڤه‌ دا وپارتى سه‌ركه‌فتنه‌كا مه‌زن ب ده‌ستڤه‌ئيننا، دێ گوهۆرينه‌كا مه‌زن وچاكسازيه‌كا مه‌زن كه‌ت، له‌وما ل 30 ئه‌يلوولێ وه‌كو هه‌موو جاران رۆلێ خوه‌ ببينن ووێ ده‌ليڤێ بۆ خوه‌ وپارتا خوه‌ بره‌خسينن.

سه‌رۆك بارزانى گۆت ژى” ل هه‌يڤا گۆلانا بۆرى هه‌لبژارتنه‌كا دى بۆ په‌رله‌مانێ فيدراليێ عيراقێ هاته‌ ئه‌نجامدان، گرنگيا وان هه‌لبژارتنان دوێ چه‌ندێ دابوو كو سه‌نگێ پارتى دياربوو، گه‌له‌ك كه‌سان خوه‌ به‌رهه‌ڤ كربوو كو دووماهيا پارتى ببينن، به‌لێ ب هيمه‌تا هه‌وه‌يێن قه‌هره‌مان ل سه‌رانسه‌رى كوردستانێ، جه‌ماوه‌ر وئه‌ندام ولايه‌نگرێن پارتى وه‌كر كو پارتى ببيته‌ حزبا هژمار ئێك ل سه‌ر ئاستێ هه‌موو عيراقێ، ئه‌و ئارمانجا هه‌وه‌ هاته‌ بده‌ستڤه‌ئينان، سه‌نگێ پارتى دياربوو ونوكه‌ هه‌موو لايه‌ك دزانيت كو پارتى ئانكو چ، پارتى نوونه‌راتيا پتريا خه‌لكێ كوردستانێ دكه‌ت، وئه‌ڤ هه‌لبژارتنه‌ ده‌ليڤه‌كه‌ بۆ وێ چه‌ندێ په‌يوه‌نديا دناڤبه‌را هه‌رێمێ وبه‌غدا باشتر ببيت وچاره‌سه‌ريا گرفتان بهێته‌ كرن، مه‌ پێخوه‌شه‌ ودبه‌رهه‌ڤين ومه‌ حه‌زكريه‌ ژى گرفتان ب تێگه‌هشتن وخوه‌شى چاره‌سه‌ر بكه‌ين، به‌لێ رامانا وێ نينه‌ پاشكه‌شێ ژ ئارمانجێن خوه‌ بكه‌ين”.

سه‌رۆك بارزانى دياركر ژى” هه‌لبژارتنێن 30 ئه‌يلوولێ دچاره‌نڤيسسازن، بۆ وێ چه‌ندێ يه‌ ده‌ليڤه‌ بۆ پارتى بره‌خسيت، وه‌كو ئه‌وا وێ دڤێت وپێدڤى ومافێ هه‌وه‌يه‌ خزمه‌تا هه‌وه‌ بكه‌ت، ئه‌م سۆزێ دده‌ينه‌ هه‌وه‌ كو ل گه‌ل هه‌وه‌ دراستگۆ بين وهه‌رچ ژ ده‌ستێ مه‌ بهێت بۆ خزمه‌تا هه‌وه‌، خه‌مساريێ نه‌كه‌ين”.

 گۆت ژى” سوپاسيا خوه‌ وهه‌موو هه‌ڤالێن خوه ل سه‌ركردايه‌تيا پارتى بۆ پارتيێن ڤێ ده‌ڤه‌رێ دهنێرم، چونكى مه‌ ئاگه‌هداريه‌كا باش ل ده‌رده‌سه‌ريا هه‌وه‌ هه‌يه‌ هه‌ر ژ ده‌مێ زه‌عيم سديقى هه‌تا ئه‌ڤرۆ، تيرۆر وتوقاندن وبێ به‌هكرن پشكا هه‌وه‌ بوو ل ڤێ ده‌ڤه‌رێ، به‌لێ هوون دخۆراگر بوون وئه‌م يێن هاتين ژهه‌وه‌ فێرى خۆراگريێ بين، خۆراگريا هه‌وه‌ جهێ شانازيێ يه‌ وئه‌م شانازيێ ب هه‌وه‌ دكه‌ين، پێدڤيه‌ دووماهى ب ڤێ ره‌وشێ بهێت، كوردستان بۆ هه‌موو كوردستيانه‌، پێدڤيه‌ قورخكرنا ده‌ستهه‌لاتێ ل هه‌موو جهه‌كێ ب دووماهى بهێت، يا دياره‌ ژى ل كيرێ قورخكرنا ده‌ستهه‌لاتێ هه‌يه‌، مه‌ دڤێت ده‌وله‌تا قانوونێ بهێته‌ دامه‌زراندن ووه‌لاتێ ديه‌كسان بن وهه‌موو ب مافێن خوه‌ شاد ببن وميزاجێ كه‌سى ته‌حه‌كومێ ب چاره‌نڤيسێ وان نه‌كه‌ت، مه‌حاله‌ بهێته‌ قه‌بوولكرن جاره‌كا دى ته‌عه‌دا ل پارتى وباره‌گايێن پارتى وخه‌لكێ هه‌ژارێ پارتى ل ڤێ ده‌ڤه‌رێ بهێته‌ كرن”.

سه‌رۆك بارزانى ئاماژه‌ ب خاله‌كا گرنگ دا وگۆت”پێدڤيه‌ ل به‌ر چاڤێ وان هه‌ڤالان بيت يێن سه‌رپه‌رشتيا رۆژا هه‌لبژارتنان دكه‌ن ول سه‌ر سندووقان هاتينه‌ ده‌ستنيشانكرن، ل هه‌لبژارتنێن بۆرى دا ل ده‌مه‌كێ دياركرى دا هنده‌ك ژ چاڤدێران سندووق بجه هێلان، ئه‌ڤه‌ شاشيه‌كا مه‌زن بوو، ڤێ جارێ داخواز دكه‌م ئێك سندووقێ بجه نه‌هێلن وده‌ليڤێ نه‌ده‌ن فێل بهێته‌ كرن، مه‌حاله‌ بهێته‌ قه‌بوولكرن ژى تبله‌ك بۆ ئێك چاڤدێر ژى بهێته‌ درێژكرن يان گه‌ف لێ بهێنه‌ كرن”.

خوياكر ژى” گه‌له‌ك جاران به‌حسێ ناڤمالا كوردى وئێكرێزيێ دهێته‌ كرن، به‌لێ ب ديتنا من هوون هه‌موو وێ دزانن كو هه‌رچ دشيانێن مه‌ دابوو، مه‌ يا كرى بۆ وێ چه‌ندێ ناڤمالا كوردى ئێك بيت ويا پاراستى بيت، به‌لێ ئه‌ڤ چه‌نده‌ دڤێت ب هه‌موويان بهێته‌ كرن، مه‌ ستراتيژيه‌ت وئارمانجا خوه‌ يا هه‌ى، كى ل گه‌ل مه‌ هه‌ڤرا بيت، ل گه‌ل وى دا دته‌باينه‌ وئێك مالين، ئه‌وين دژى وى ئارمانجێ بن، زه‌حمه‌ته‌ ئێكرێز وئێك مال بين”.

سه‌رۆك بارزانى دياركر” ئه‌م خودان دۆزه‌كا ره‌واين، هه‌وه‌ يا سه‌لماندى كو ژبۆ وێ رێباز ودۆزێ عه‌زيزترين كه‌سێن خوه‌، عه‌زيزترين كه‌سێن هه‌وه‌ ومه‌ گيانێ خوه‌ به‌خشى يه‌، ئه‌وژى نيشتمانه‌ و كوردستانه‌، ئه‌ز ب پێدڤى نزانم هوون گه‌له‌ك ژوێ چه‌ندێ ئاگه‌هدارترن ودلسوزترن كو ئه‌ز بهێمه‌ ڤێرێ وداخوازێ ژ هه‌وه‌ بكه‌م ده‌نگ ب ليستا 183 بده‌ن، هوون خوه‌شتڤيێن مه‌نه‌، گه‌له‌ك باش دده‌رده‌سه‌ريا هه‌وه‌ دگه‌هين، به‌لێ پشتى 30 ئه‌يلوولێ، دێ دووماهى ب وێ ده‌رده‌سه‌ريێ هێت”.

ئەڤرۆ نیۆز، عەزیز هەورامى

په‌يڤدارێ جڤاتا سه‌ركردايه‌تيا پارتى ديموكراتى كوردستان ل پاريزگه‌هێن سلێمانيێ وهه‌له‌بجه‌ بۆ ئه‌ڤرۆنيوز راگه‌هاند زێده‌تر ژ 15 هزار ئه‌ندام ولايه‌نگرێن پارتى پشكداريێ دكه‌رنه‌فالا ئه‌ڤرۆ يا پارتى دا دكه‌ن.

عەتا شێخ حەسەن، په‌يڤدارێ جڤاتا سه‌ركردايه‌تيا پارتى ديموكراتى كوردستان ل پاريزگه‌هێن سلێمانيێ وهه‌له‌بجه‌ بۆ ئه‌ڤرۆنيوز گۆت” ب به‌رهه‌ڤبوونا سه‌رۆك بارزانى و به‌رپرسێن بلند يێن پارتى زێده‌تر ژ 15 هزار ئه‌ندام ولايه‌نگرێن پارتى كه‌رنه‌فاله‌كا مه‌زن نوكه‌ رێك دئێخن وبه‌ربژارێن مه‌ ب جه‌ماوه‌رى دده‌نه‌ نياسين”.

گۆت ژى” كه‌رنه‌فال ل جڤاتا سه‌ركردايه‌تيا سلێمانيێ – هه‌له‌بجه‌ يا پارتى ب پشكداريا جه‌ماوه‌رێ پارتى ل سنورێ لقێن 11 رانيا و12 هه‌له‌بجه‌ و4 سلێمانى و21 ده‌وروبه‌رێن سلێمانيێ، دهێته‌ ئه‌نجامدان”.

گۆت ژى” سه‌رۆك بارزانى پشكداريێ د كه‌رنه‌فالێ دا دكه‌ت ونوكه‌ يێ په‌يڤه‌كێ دخوينيت”.

 ئەڤرۆ نیۆز، قائید میرۆ

به‌رپرسه‌كێ پارتی ديموكراتى كوردستان ل كەركووكێ ئاشكراكر، رۆژانە گەنجێن كورد دهێنە دەستەسەركرن و ئەشكەنجەدان ژلایێ هێزێن عێراقی و عەرەبێن كەسوكارێن وان بەرێ تیرۆرست، ب شێوەیەكی دخوازن لەزێ بكەن ل تەپەسەركرنا كوردان بەری حوكمەتا نوو بهێتە پێكئینان.

دیاری حسێن، جێگرێ سەرۆكێ جڤاتا سەركردایەتیا پارتی ل كەركووكێ بۆ ئەڤرۆ نیۆز دیاركر” ئەڤە بۆ دەمێ چەند رۆژانە هێزێن عێراقی ل كەركووكێ و دەوروبەران دەست ب هەوەكا دەستەسەركرنا گەنجێن كوردان كریە و هەتا نوكە ب دەهان گەنج هاتینە دەستەسەركرن و ئەشكەنجەدان، ئەڤەژی پیلانەكا دیى يە بۆ تەپەسەركرنا كوردان ل كەركووكێ ، نوكە دەستەسەركرنا گەنجێن كورد یا بوویە دیاردەكا رۆژانە.

ڤی به‌رپرسێ پارتی ئاماژەكر” دەستەسەركرنا كوردان بۆ دو ئەگەران ڤەدگەڕیت، یا ئێكێ ئەفڤ دەسهەلاتا نوكە ل كەركووكێ هەی دزانیت پشتی پێكئینانا حوكمەتا نوو یا عێراقێ، دێ رەوشا دەڤەرێن داگیركرنێ هێتە گۆهۆڕین و دخوازن لەزێ بكەن ل گرتن و ئەشكەنجەدانا وەلاتیێن كورد”.

دیاری حسێن گۆت ژى” ئەگەرەكێ دی ئەڤوە بەری روودانێن 16ی ئۆكتۆبەرێ، هێزێن كوردان چەندین كەس ب تۆمەتا تیرۆرێ دەستەسەركرینە و دەست هەبوویە ل كریارێن تیرۆرستی ،ڤێجا سەردەمێ رێكخراوا تیرۆرستیا قاعیدە هەتا سالا بۆری، نوكە كەسوكارێن وان تیرۆرستان تولا خوە ل وەلاتیێن كورد ڤەدكەن”.