NO IORG
نووترين نووچه
نووترين نووچه

فۆتۆ: نيوار باشوورى

ئه‌ڤرۆ نيوز:

ب بەرھەڤبوونا سەرۆک (مەسعود بارزانی) سەرۆکێ پارتیا دیموکراتا کوردستانێ، ئەڤرۆ ‏‏27/9/2018 ل دەمژمێر چاری ئێڤاری ل یاریگەھا یانا دھۆک یا وەرزشی، پارتی دێ ‏ئاھەنگەکا جەماوەری یا مەزن بۆ پشتەڤانیکرنا لیستا 183 یا پارتی و بەربژارێن وێ ‏گێڕیت.‏

مەسعود سەرنی، کارگێرێ لقێ ئێکێ پارتی دیموکراتی کوردستان و بەرپرسێ نڤسینگەھا ‏رەوشەنبیری و جەماوەری بۆ رۆژناما ئەڤرۆ ئاشکرا کر، ئەڤ ئاھەنگە ب مەرەما ‏پشتەڤانیکرن و سەرخستنا لیستا 183 یا پارتی و بەربژارێن وێ بۆ ھەلبژارتنێن ‏پەرلەمانێ کوردستانێ دێ ھێتە گێڕان و گۆت: “ئەم پێشبینی دکەین نێزیکی 30 ھزار ‏کەسان بەرھەڤی ڤێ ئاھەنگێ ببن، دیسا ل دەمژمێر چار خەلک دێ کۆمڤە بن و ل ‏دەمژمێر شەش دێ ئاھەنگ دەست پێ کەت”.‏

مەسعود سەرنی ئاماژە ب وێ چەندێ ژی کر، سەرۆک مەسعود بارزانی دێ پەیڤەکێ د ڤێ ‏ئاھەنگێ دا پێشکێش کەت، پاشی دێ برگێن ھۆنەری دەست پێ کەن ب پشکداربوونا ‏چەندین سترانبێژێن دەنگ خوەش، وەکو (حەسەن شەریف، کاروان کامل، دیلان، مەلیت ‏بەرجەل) دیسا ھەلبەستڤانێ مەزنێ کورد (موئەیەد تەیب) ژی دێ ھەلبەستەکێ پێشکێش ‏کەت.‏

ئه‌ڤرۆ نيوز‎:‎

محسن ئەرتیسی‎ ‎دوسکی بەربژارێ پارتی دیموکراتی کوردستان بۆ ‏پەرلەمانێ کوردستانێ دیارکر کو بەرنامەیێ پارتی بو تەخان گەنجان ‏بەرنامەیەکێ گشتگیرە و بۆ ئەڤرۆ گۆت: پارتی دیموکراتی کوردستان ‏ھەر ژ دەستپێکا دامەزراندنا خوە ھەتا نوکە پوتەکێ گرنگ ب تەخا ‏گەنجان دایە، و گەنج وەکو بنەما و بناغەیێ ناڤا رێکخستنێن خوە ‏دیتیە ، و دەما چویە دناڤ حوکمەتێ ژی دا زورترین دەلیڤە بو گەنجان ‏دایە ژبەرکو گەنج بناغەیێ بونیات و درۆستکرنا کوردستانەکا ب ھێز.‏

زێدەتر گۆت: ئێک ژ گرنگترین کارنامەیا خولا داھاتی یا ‏بەرنامەیێ پارتی دێ ئەو بیت کو کار بکەت بو نەھێلانا بێکاریێ ، و ‏خانەنشینکرنا دانعەمران و دامەزراندنا گەنجان ل شوونا وان ، ب ‏گورەی سیستەمەکێ کو ل گەل ژینگەھا حوکمەتا ھەرێما کوردستانێ ‏بگونجیت، و ب سیستەمەک رێکخستی و بێ بەرچاڤ وەرگرتنا ھزر و ‏بیرێن سیاسی و حزبی و خزمەتکرنا گەنجان ب گشتی.‏

بەربژارێ پارتی د درێژاھیا ئاخفتنێن خودا دیارکر ژی کو رولێ گەنجان د ‏ئاڤاکرنا کوردستانێ ب تایبەتی د سکتەرێ پێشەسازی و ھێزا کاری زۆر ‏گرنگە و زێدەتر گۆت: زێدەباری خزمەتکرنا گەنجان د وارێ ‏پەروەردە و فێرکرن و پێگەھاندنا وان ژ روویێ مەعریفی دھەمان دەم دا ‏گرنگە کو خزمەتا گەنجان بھێتەکرن د دروستکرنا خێزانەکا ‏بەختەوەر و گونجای ، ئەو ژی د خزمەتکرنا وان دا ب رێیا دانا ‏پێشینەیێن ئاڤاھی و ھەڤژنی و قەرێن بچوک، و درۆستکرنا ئێکەیێن ‏ئاکنجیبوون و پەیداکرنا کاری داکو ئەو گەنج بشێت ژیانەک خوش و ‏نورمال ببورینیت و توشی چوو کێشەیان نەبیت ب تایبەتی ژ روویێ ماددی ‏ڤە.‏

دوسکی دیارکر ژی کو ھژمارەکا زور یا گەنجێن خودان بەھرە و داھێنان ل ‏کوردستانێ ھەنە و پێدڤی یە لایەنێن شولەژێ کار بکەن بو وان گەنجان ‏داکو ئەو بشێن خزمەتا خوە و جڤاکێ خوە بکەن و زێدەتر گۆت: بو قوناغا ‏داھاتیا کوردستانێ پێدڤی یە زێدەتر گرنگی ب گەنجان بھێتەدان ، و ‏پوستێن کارگێری و بریاری زێدەتر بو گەنجان دناڤا دام و دەزگەھێن ‏حوکمەتێ بھێتەدان، و من د دەمێ بوریدا چەندین سالان خزمەت بو تەخا ‏گەنجان کرینە و باش دزانم گەنج چەند گرنگە ژبەرڤێ دخوازم کو ‏خەلکێ کوردستانێ دەنگی ب من بدەن داکو ئەز ژی بشێم خزمەتەکا ‏باشتر و زێدەتر بو تەخا گەنجان بکەم.‏

ئەڤرۆ نيوز:

بەربژارێ ھژمار 54 ل سەر لیستا 183 یا پارتی دیار کر، پارتی کارنامەکا تەڤگر ‏بۆ خزمەتکرنا ھەموو تەخ و چینێن جڤاکی بێ جوداھی یا ھەی، وەکو ‏بەربژارەکێ لیستا 183، د چارچوڤێ وێ کارنامێ دا دێ خزمەتێ کەت، لێ دێ ‏بزاڤێ کەت پتر وان پرۆژە قانوونان بەرھەڤ بکەت کو باشترین خزمەت پێشکێشی ‏تەخا کریکار، ھەژار، کەسوکارێن شەھیدان و زیندانیێن سیاسی بھێتە کرن و ‏دبێژیت: خزمەتکرنا گەل و وەلاتی ب دلسۆزی بۆ من مەزنترین سەرمایەیە. ‏

عیسا سلێمان نسری، بەربژارێ ھژمار 54 ل سەر لیستا 183 یا پارتی بۆ رۆژناما ‏ئەڤرۆ خویا کر، ئەو دێ بزاڤێ کەت پرۆژە قانوونێن د خزمەتا گشتی دا بھێنە ‏پەسەندکرن، دیسا ل دووڤ وێ دەستھەلاتا پەرلەمانتاری ھەی دووڤچوونا ب ‏جھئینانا وان کەت و گۆت: “بەری نوکە گەلەک قانوونێن باش ھاتینە ‏پەسەندکرن، لێ نەھاتینە ب جھئینان یان وەزارەتێن تایبەتمەند رێنمایێن پێدڤی ‏ل بەر رۆناھیا وان دەرنەئێخستینە، لەو ل گەل ھەڤالێن خوە یێن پەرلەمانتار دێ ‏کار کەم کو ئەو قانوونە بھێنە ب جھئینان، دیسا ھندەک پرۆژە قانوون ھەنە، ‏پێدڤیە ھندەک راستڤەکرن ل سەر بھێنە کرن کو دگەل ژیانا نوکە بگونجن، ب ‏تایبەتی یا تەخا کیم دەرامەتان”. ‏

گۆتژی: “پلان و بەرنامێن پارتی و قوربانیدانا جەماوەرێ وێ وە کریە کو ‏کوردستان یا بھێزبیت، بۆ داھاتی ژی ھەکە مە بڤێت پێگەھێ کوردستانێ بھێزتر ‏لێ بھێت، فەرە خەلک دەنگی بدەنە لیست و بەربژارێن پارتی، ژ بەرکو بھێزبوونا ‏پارتی بھێزبوونا کوردستانێ یە، بەری نوکە ژی یا ھاتیە سەلماندن کو ھەر جھێ ‏پارتی لێ بیت ئارامی، خزمەتگۆزاری و ئاڤەدانی یا لێ ھەی”. ‏

عیسا سلێمان نسری، بەربژارێ ھژمار 54دبێژیت: ئەم ل قوتابخانا پارتی فێربوینە ‏کو خزمەتا وەلاتیان ب دلسۆزی بکەین، لەو چو سۆزێن مەزن نادەمە دەنگدەرێن ‏خوە کو بزانم نەشێم بجە بینم، لێ سۆزێ ددەم ب ھەموو شیانێن خوە کار بۆ ب ‏دەستڤەئینانا ماف و بەڕژەوەندیێن وەلاتیێن خوە بکەم، چونکو خزمەتکرنا ‏خەلکی و قوربانیدان ل نک من کارەکێ پیرۆزە.‏

ئەڤرۆ نيوز:‏

بژار خالد عزێر کۆچەر، بەربژارێ ھژمارە 3 ل سەر لیستا 183 یا پارتی ‏دیموکراتی کوردستان بۆ رۆژناما ئەڤرۆ دیار کر کو وی چو بەرنامێن کەسایەتی بۆ ‏پەرلەمانێ کوردستانێ نینن، چونکی پارتی دیموکراتی کوردستان د ھەموو ‏قووناغان دا شیایە بەرنامەکێ باش و تەڤگر بدانیت کو دگەل کەتواری ب گۆنجیت ‏و گۆت: “ئەز ژی بەربژارم ل سەر لیستا 183 یا پارتی دیموکراتی کوردستان ژ ‏بەر ڤێ چەندێ ئەو بەرنامێ پارتی بۆ خۆلا نوو یا پەرلەمانی دانایی ھەکە ھات و ‏من باوەریا خەلکی ب دەست ڤە ئینا و چوومە پەرلەمانی دێ ئەو بەرنامێ من ژی ‏بیت و ئەز ئامرازم بۆ وێ چەندێ بشێم د چارچوڤێ ڤی بەرنامەیی دا خزمەتا ‏خەلکی بکەم”.‏

ناڤھاتی ئاماژە دا وێ چەندێ کو پێدڤیە بەربژار د وێ چەندێ بگەھیت کو ‏دەستھەلات بۆ خزمەتکرنا جڤاکان یا ھاتیە دانان و ئەوێن د ڤێ دەستھەلاتێ دا ‏نوونەراتیا خەلکی دکەن دڤێت خوە ژ خزمەتا خەلکی ڤەدەر نەکەن، بەرۆڤاژی بۆ ‏خەلکی ب سەلمینن کو ئەو خزمەتکارێن خەلکی نە و گۆت: “ھەکە ھات و من ‏باوەریا خەلکی ب دەست خوە ڤە ئینا و چوومە پەرلەمانی ژ کارێن من یێن ‏دەستپێکێ کو د ھزرامن دایە ل پەرلەمانی بکەم دێ دانانا دەستوورەکی بیت بۆ ‏ھەرێما کوردستانێ ژ بەر کو مە دەستوور نینە مە ڤالاھیا قانوونی یا ھەی، ‏ھەروەسا دێ کارکەم بۆ وێ چەندێ کو بابەتێن نەدادپەروەری د مووچێ شەھیدان ‏و پێشمەرگان دا و زێدەگاڤیان بھێنە چارەکرن ژ بەر کو ھەتا کەنگی ئەڤ بادەکە ‏دێ ب ڤی شێوەیی مینیت، سەرەرایی ڤێ چەندێ دێ بزاڤێ کەم دەلیڤێن کاری بۆ ‏تەخا گەنجان بھێنە دیتن”.‏

ل دووماھیێ بەربژارێ ھژمارە 3 ل سەر لیستا 183 یا پارتی دیموکراتی ‏کوردستان گۆت: “ئەز دبێژمە ھەموو خەلکی پەرلەمان جھێ دانانا قانوونایە ژ ‏بەر ڤێ چەندێ ئەوێ قانوونێ د دانیت پێدڤیە قانوونزان بیت و پێدڤیە خەلک ‏ژی دەنگێ خوە بدەنە ئەکادمیێت قانوونێ داکو بشێن دەستووری بدانن و ھەکە ‏ھات و من باوەریا خەلکی ب دەست خوە ڤە ئینا و چوومە پەرلەمانی سۆزێ دەم ‏نوونەرەکێ راستەقینە و راستگۆ و دلسۆز بم بۆ ڤی خەلکی و ئاخا پیرۆزا ‏کوردستانێ”. ‏

بژار خالد عزێر کۆچەر، بەربژارێ ھژمارە 3 ل سەر لیستا 183 یا پارتی ‏دیموکراتی کوردستان ژ دایکبوویێ سالا 1988ێ یە باوەرناما ماستەرێ ب قانوونا ‏دەستووری ھەیە.‏

ئەڤرۆ نيوز:‏

بەربژارێ پارتی دیموکراتی کوردستان یێ ھژمارە (61) ل سەر ‏لیستا (183)، کو برایێ شەھیدێ فەرماندە محەمەد سالح ‏محەمەد سلیم، دبێژتیت ئەم ل سەر بەرنامەکێ ئاینێ و حەزێکرنا ‏وەلاتی ھاتینە پەروەردەکرن، ڤیانا وەلاتی و پاراستنا پیروزیێن ‏نەتەوەی ژ فەرمودێن پیرۆز و راسپاردێن ئاینێ ئیسلامێ مە ‏وەرگرتینە. ‏

مەلا ئیحسان رێکانی ھەروەسا گۆت: ل بەراھیا ھەموو ‏کاروبەرنامێن دێ خزمەتکارێ پێشمەرگەی و خێزانێن سەر ‏بلندێن شەھید و بریندارێن شەرێ داعشێ و تیرۆرا ھزری بم، ‏ھەر چیا ژ دەستێن مە بھێت بۆ خوشکرنا ژیان و ژیارا وان ئەم ‏خەمساریێ ناکەین. ‏

بەربژارێ پارتی دیموکراتی کوردستان ھەروەسا دیارکر، ب دیتنا ‏مە چو حزب و ئالی وەکی پارتی دیموکراتی کوردستان نەشیاینە ‏بەرەڤانیێ ژ ئاخا پیرۆزا کوردستانێ بکەن، لەورا ئەز دبێژمە ‏ھەموو خەلکێ خوە ل پارێزگەھا دھوکێ و سەرانسەری ‏کوردستانێ ژی، دەنگێ تە ئەمانەتە و باش بزانە دێ وی ‏ئەمانەتی چەوا بکارئینی و دەیە کێ؟، کێ بەرەڤانی ژ ئاخا و ‏نامیس و روومەتا مە کوردان کریە، ب زەندوباسکێن پێشمەرگەی ‏و پارتی نەبوون؟، ب دلەکێ پڕ بیرو و باوەر ھەرنە سەر سندوقێن ‏دەنگدانێ و ڤێ ژبیر نەکەن. ‏

مەلا ئیحسان بەربژارێ ھژمارە (61) ھەروەسا گۆت: گەلەک ‏دژاتیا ناڤێ پارتی و سەنگا پارتی و بەربژارێن پارتی، ئەڤەژی ‏بتنێ وێ ئێکێ و وێ راستیێ دیار دکەت، پارتی رێیا راستەقینەیا ‏کاروانێ کوردینیێ یە و ھەلگرا ئالایێ سەربخوەیا دەولەتبوونێ ‏یە، و دوست دوژمن یێن ھەرێمی و وەلاتێن بیانی ژی بتنێ حسابان ‏بۆ پارتی دکەن. ‏

مەلا ئیحسان رێکانی ل دووماھیا گۆتنا خوە دبێًژیت، ھەکە ‏خەلکێ منێ خۆشتڤی ئەم ب ھەژی دەنگ و باوەریا خوە زانین، دێ ‏کارەێ ھەرە گرنگێ من پارستن و بەرەڤنیکرنا ژ ئاخا پرۆزا ‏کوردستانێ بیت و خوشکرنا ژین و ژیارا مللەتێ مەیێ ماندی بووی ‏کو ھەژی ژیانەکا باشتر و خزمەتێن ھەژیتر بۆ بھێنە ‏پێشکێشکرن. ‏

ئەڤرۆ نیوز ، زنار تۆڤی:

موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن: کو د روودانەکا ترافیکێ دا وەلاتیەکێ گیانێ خوە ژ دەستدا.

ناڤهاتی زێدەتر گۆت:دوهی چارشه‌مبی رێكه‌فتی ٢٠١٨/٩/٢٦ ل ده‌مژمێر٦:٣٠ مه‌غره‌ب ل سەر جادا سه‌ره‌كی یا دناڤبه‌را پارێزگه‌ها دهوك بۆ قه‌زا شێخان دا و ل گه‌لیێ دێركێ روودانه‌ك روودایه‌ ژ جورێ لێدان، کو ترۆمبێله‌كا كرێ ژ جۆرێ تۆیۆتا كرۆلا خوە ل كه‌سه‌كی دایه‌ و هەروەسا وی كه‌سی گیانێ خوە ژ ده‌ست دایه‌.

ئه‌ڤرۆنيوز:

جولين لوبيتيجى، راهێنه‌رێ يانا ريال مه‌دريد به‌حسێ وێ شكه‌ستنا مه‌زن يا يانا خوه‌ ل به‌رامبه‌ر يانا ئه‌شبيليا دخۆلا ئيسپانى دا دكه‌ت كو ب ئه‌نجامێ 0-3 هاتبوو دوراندن.

لوبيتيجى بۆ رۆژناما (ماركا) يا ئيسپانى دبێژيت” يانا ئه‌شبيليا گه‌له‌ك يا باشتر بوو ژ مه‌ ويا هه‌ژى وێ سه‌ركه‌فتنێ بوو”.

گۆت ژى” ل گێمێ ئێكێ يێ ياريێ مه‌ فشار نه‌خسته‌ سه‌ر ئه‌شبيليا، له‌وما ‌ دو گۆلێن ب له‌ز ل سه‌ر مه‌ هاتنه‌ تۆماركرن”.

گۆت ژى” ل گێمێ دويێ ئه‌م نێزيك بووين ژ گۆلكرنێ، به‌لێ مه‌ چو گۆل نه‌كرن”.

ديسا گۆت” د وێ ياريێ دا ئه‌م  د‌باش نه‌بووين و ئه‌شبيليا گه‌له‌ك يا باشتربوو ژمه‌”.

ئه‌ڤرۆنيوز:

يانا به‌رشه‌لونا د  ياريه‌كا گه‌را شه‌شێ ژ خۆلا ئيسپانى يا ته‌پا پێى، ئه‌ڤرۆ چارشه‌مبى 26/9/2018 ل ده‌رڤه‌ى ياريگه‌ها خوه‌ تووشى دوراندنه‌كا نه‌چاڤه‌رێكرى بوو ل به‌رامبه‌ر يانا ليجانيس ب ئه‌نجامێ 1-2.

يانا به‌رشه‌لونا ل خۆله‌كا 12 ب رێيا كوتينيۆى ب گۆله‌كێ پێشكه‌فت وب ڤى ئه‌نجامى گێمێ ئێكێ ب دووماهى هات.

ل ده‌ستپێكا گێمێ دويێ ول هه‌ردو خۆله‌كێن 52 و 53 يانا ليجانيس دو گۆل ل سه‌ر ئيك تۆماركرن ويارى ب ڤى ئه‌نجامى ب دووماهى هات.

ب ڤى ئه‌نجامى به‌رشه‌لونا هه‌ر ما ل رێزا ئێكێ ب 13 خالان ويانا ليجانيس هاته‌ رێزێ 17 ب چار خالان كو ئه‌ڤ سه‌ركه‌فتنه‌ دبيته‌ يا ئێكێ ليجانيس د ڤێ خۆلێ دا تۆمار دكه‌ت پشتى 4 دوراندنان ووه‌كهه‌ڤيه‌كێ.

ئەڤرۆ نیۆز :رەمەزان هەرنی

ب هەلكەفتا سالرۆژا رێفراندۆما سەربخوه‌یا كوردستانێ‌ ل قەزا سۆران پیشانگەهەك هاتە ڤەكرن.

هەژار حەكیم، خودان ئیمتیازو سەر نڤیسەرێ‌ رۆژناما سەربخوه‌یی بۆ ئەڤرۆ نیۆز گۆت” پێدڤیە ئەم هەموو هەلگرێن درووشمێ‌ كاروانێ‌ سەربخوه‌یێ‌ بین بۆ كوردستانێ‌ كو چو جاران ب دووماهی ناهێـت بچووكترین بەرسڤ ژی بۆ پلانێن دوژمنان و خیانەتكاران، من پێشانگەهەك ڤەكر كو ژ 25 فوتوۆیان پێك دهات كو ل دەمێ‌ بانگەشەیا رێفراندۆمێ‌ من گرتبۆن ودەربرینێ ژ سەربخوه‌یا كوردستانێ‌ دكر كو سەربخوه‌یێ‌ ئارمانجە ودێ‌ هەر گەهینێ‌”.

هەژارى گوت ژی”ئارمانجەكا دی رێزگرتن بۆ ل وه‌ستيانا سەركرداتیا سیاسی يا كوردستانێ‌ بۆ پرۆسا رێفراندۆمێ‌ پشت راستيێ‌ ددەین كو كاروانێ‌ سەربخوه‌یێ‌ ب دووماهی نەهاتیە هەتا كورد مابن ب دووماهی ناهێت ،ل داهاتی ژی دا دێ‌ كارێن خوه‌بەخش ل بوارێ‌ میدیایێ‌ و نەتەوی بەردەوامبين ،پێشمەرگە ب چەكێ‌ خوە ل سەنگەرا ئەز ب قەلەمێ‌ خوە ، ئەگەر 25 هزار جارێن دی ریفراندوم بهێتە كرن دەنگێ‌ مە بەلێ‌ یە بۆ سەربخوه‌یا كوردستانێ”‌.

ئه‌ڤرۆنيوز:

وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ راگه‌هاند، بۆ چو كۆمه‌ل ورێكخراوان نينه‌ باوه‌رناما فه‌خرى ببه‌خشن وهه‌ر كۆمه‌له‌ك ورێكخراوه‌ك ڤى كارى ئه‌نجام بده‌ت، دێ روو ب روويێ قانوونێ كه‌ين.

عه‌باس ئه‌كره‌م، په‌يڤدارێ وه‌زاره‌تا خواندنا بلند وڤه‌كۆلينێن زانستى گۆت” ده‌مه‌كه‌ رێكخراوه‌ك ب ناڤێ فورات بۆ ئاشتيا جيهانى ل هه‌رێما كوردستانێ، باوه‌رناما دكتۆرايا فه‌خرى دبه‌خشيت، ل ڤێرێ بۆ رايا گشتى رادگه‌هينين ڤێ رێكخراوێ ژ دوور ونێزيك په‌يوه‌ندى ب وه‌زاره‌تا مه‌ڤه‌ نينه‌”.

گۆت ژى” ڤێ رێكخراوێ مافێ وێ چه‌ندێ نينه‌ باوه‌رناما دكتۆرايا فه‌خرى ببه‌خشيت، تنێ دشێت دچارچۆڤێ كارێ رێكخراوه‌يى خه‌لات وباوه‌رنامێن رێزلێنانێ ببه‌خشن”.

ئاماژه‌ كر” به‌خشينا دكتۆرايا فه‌خرى كارێ داموده‌زگه‌هێن ئه‌كاديمى يه‌ كو تنێ وه‌زاره‌تا خواندنا بلند ئه‌و مافێ هه‌ى ڤێ باوه‌رنامێ ببه‌خشيت”.

په‌يڤدارێ وه‌زاره‌تا خواندنا بلند دياركر” وه‌زاره‌تا مه‌ ل به‌رامبه‌ر به‌لاڤكرنا باوه‌رناما ب ناڤێ دكتۆرايا فه‌خرى، دێ كارمه‌ندێن رێكخراوێ روو ب روويێ قانوونێ كه‌ت وسكالايا قانوونى دێ ل سه‌ر تۆماركه‌ت”.

website security
WP Facebook Auto Publish Powered By : XYZScripts.com