ئه‌ڤرۆ نيوز:
ل گرتيگه‌هه‌كا ئوستراليا پێنج په‌نابه‌رێن دو وه‌لاتێن جودا ئاگر به‌ردا خوه.
ئه‌و پێنج په‌نابه‌ر خه‌لكێ وه‌لاتێن ئيران و ئه‌ڤغانستان بوون ب ره‌نگه‌كى چار ئه‌ڤغانى بوون و ئێك ژى ئيرانى بوو، وه‌كو كارڤه‌دان بوون به‌رامبه‌ر ره‌تكرنا مافێ په‌نابه‌ريێ ل وى وه‌لاتى.
ب گۆره‌يى ژێده‌رێن ناڤخۆيى يێن ده‌نگوباسان ساخله‌ميا وان په‌نابه‌ران يا خرابه، 20 كه‌سێن دژى ل وێ گرتيگه‌هێ ژ ئه‌گه‌رێ خرابيا ره‌وشا ساخله‌ميا وى ره‌وانه‌يى نه‌خۆشخانێ هاتينه كرن.
ئەڤرۆ نيوز:
مەم ئەسکەندەر مەم نێروەیی بەربژارێ ھەژمارە(11) ژ لیستا ھەژمارە(183) یا پارتی دیمەکراتی کوردستان بۆ رۆژناما ئەڤرۆ گۆت: سوزێن تایبەت نادەینە خەلکێ خوە بەلکێ ھەکە بووینە ئەندامێن پەرلەمانی ل گەل لیستا خوە مە بەرنامەکێ باش ھەیە بۆ وەرگرتنا خەمێن خەلکێ خوە بۆ گەھاندنا دەست ھەلاتێ.
دێ ھەموو بزاڤا کەین وەک ھەرێما کوردستانێ پێشمەرگە بیتە لەشکرەکێ نشتیمانی و ئێکگرتی و پێشمەرگە ل سەر ئاستێ حزبی و کەسوکی نەمینت، ھەموو بزاڤا دێ کەین قانوونا وبەرھێنانێ ئەڤا ل سالا 2006 دەرچوویی کار بکەین ، پتر بزاڤا بکەین کار پیً بھێـتەکرن کو وبەرھێنەرێن کوردستانێ پتر رۆلێ خوە بینن ھەرێمێ بۆ نموونە ل دھۆکێ فرۆکخانە نینە و ھەکە فرۆکخانە نەبیت وبەرھێ،ەرێن بیانی کێم قەستا پارێزگەھا دھۆکێ دکەن، ب ھاتنا وبەرھێنەرێن بیانی بۆ پارێزگەھێ دێ پتر دەلیڤێن کاری ڤەبن بۆ گەنجان و کەسانێن بێ کار کو رۆلێ خوە بگێرن، کێماسی بەرنامیً قەرزێن بچووک دا ھەیە دێ پەرلەمانی بزاڤا کەین ئەڤ بەرنامە پتر رۆلێ خوە بگێریت و ئەو کێماسیێن خەلکێ مە ل سەر ھەین ب قانوون بھێنە راستڤەکرن، گەلەک گازندە ل سەر ھەنە کو دوڤچوونەکا دروست و چاڤدێری ل سەر بابەتی نەبوویە لەوما بوویە بارگرانیەک بۆ خەلکێ مە.
مەم ئەسکەندەر، بەربژارێ ھەژمارە(11) بۆ پەرلەمانێ کوردستانێ ژ لیستا پارتی دیموکراتی کوردستان دیارکر کو دڤێت ئمتیازاتێن شەھید بوونێ ڤە ئێک لێ بھێن، گۆت: گەنجەک بیتە قوربان بۆ ڤێ ئاخێ و سەرکردەک بیتە قوربان دڤێت ئمتیازاتێن ھەرد وکان پشتی شەھید بوونێ وەک ئێک بن چونکە ژ دەست دانا گیانی بۆ ڤێ ئاخێ دووماھی تشتەک و مەزنترین تشتە خوینا خوە بکەیە قوربانی و پێدڤی یە ئەڤە ژلایێ ئمتیازاتن وەک ئێک سەردەری ل گەل بھێتەکرن ژلایێ حوکمەتێ ڤە.
ئەسکەندەری دیارکر ژی کو لیستا 183 لیستا جەنابێ سەرۆک بارزانی یە و لیستا شەھیدانە، لیستا بارزانیێ بابە کو سەرکێشیا کاروانێ بزاڤا رزگاری خوازا مللەتێ کورد کریە، ئەو لیستە یا کو ل ھەموو ھەلبژارتنان سەرکەفتن ب دەست ڤە ئینایی و بەرنامێ ھەرە باش بەرنامێ وی بوویە، ل ریفراندوما سالا بوری گەلەک داخازی ژ سەرۆکی ل سەر ئاستێ نافخو و دەرڤە و ەلاتێن زلھێز و ھەرێمێ ھاتنەکرن کو ریفراندومێ پاش بێخیت، لێ سەرۆکی دیارکر کو پشکەکن ژڤی خەلکی و گۆتنێن ھەموو ئەڤان وەلاتان رەدکرن دا بێژیتە خەلکێ خوە بەلێ و پارتی درشمەکی بلند ناکەت ھەکە بجە نەئینت.
مەم ئەسکەندەر مەم خەلکێ دەڤەرا نێروە بەربژارێ ھەژمارە(11) ژ لیستا(183) یا پارتی دیموکراتی کوردستان، ل سالا 1980 ژ دایک بوویە، ل سالا 1988 ئاوارەیی تورکیا بوویە ل دەڤەرا موشێ نێشتەجێبوویە ل سالا 1992 ڤەگەریا باشورێ کوردستانێ ل 13 سالیێ قەستا سازیێن خواندنێ کریە، ژ بەر دەردەسەری و رەڤینێ نەشیایە بچیتە خواندنگەھێ و بخوینت، ھەر ھەمان سال قەستا ناڤ رێزێن ئێکەتیا قوتابیێن کوردستانێ کریە وەک ئەندامەکێ کارا رۆلەکێ بەرچاڤ گێرایە و بەردەوام بوویە ل سەر خواندنا خوە نوکە قوتابیێ قوناغا چارێ یە ل کولیژا یاسا و رامیاری پشکا پەیوەندیێن نیڤ دەولەتی ل زانکۆیا نەوروز.
ئه‌ڤرۆ نيوز:
بەرپرسێ پەیوەندی و راگەھاندنێ ل فەرمانگەھا گشتی یا کۆمسیۆنا بلندا سەربەخوەیا ھەلبژارتن و راپرسیان ل پارێزگەھا دھۆکێ دیار کر کو لیژنا مەیدانی یا کۆمسیۆنێ بۆ نەھێلانا سەرپێچیان ئەڤرۆ رۆژا 16/9/2018ێ دێ گەڕیت و دڤێت ھەر ئەڤرۆ پۆستەرێن بەربژاران ژ مەیدانا کوردستان و ئۆڤەرپاسا زاخۆ بھێنە راکرن.
جیھاد حەمید عیسا، بەرپرسێ پەیوەندی و راگەھاندنێ ل فەرمانگەھا گشتی یا کومیسیۆنا بلندا سەربەخوەیا ھەلبژارتن و راپرسیان ل پارێزگەھا دھۆکێ بۆ رۆناما ئەڤرۆ دیار کر کو مۆلەتا بۆ لایەنێن سیاسی ھاتیە دان ب دووماھی ھات و ئەڤرۆ رۆژا 16/9/2018 دێ لیژنا مەیدانی یێن کۆمسیۆنی دەست ب دووڤچوونێ کەن ل وان جە و دەڤەران ھەکە ھات و لایەنێن سیاسی ئەو پۆستەرێن ل جھێن قەدەغەکری ھاتینە داانان رانەکربن دێ دەست ب سزادانێ ھێتە کرن بۆ نموونە ژی دڤێت ھەر ئەڤرۆ پۆستەرێن بەربژاران ژ مەیدانا کوردستان و ئۆڤەرپاسا زاخۆ بھێنە راکرن، چونکی ھەکە نەھێنە راکرن دێ ب سەرپێچی ھێتە تۆمارکرن و گۆت: “بەری ھەوا بانگەشی ژی دەست پێ بکەت ھەموو لایەنیێن سیاسی ھاتبوونە ئاگەھدارکرن کو پۆستەرێن خوە ل جھێن قەدەغەکری نەھەلاویسن”.
ناڤھاتی ئاماژە دا وێ چەندێ کو ل پارێزگەھا دھۆکێ دێ 257 بنگەھێن دەنگدانی ھێنە ڤەکرن کو دبنە ھزار و 482 ویستگەە ل ھەموو جە و دەڤەران و گۆت: “زێدەتر ژ 700 ھزار کەسان مافێ دەنگدانێ ھەیە بۆ ھەلبژارتێن پەرلەمانێ کوردستانێ”.
ژ ئالیێ خوە ڤە ئیسماعیل مستەفا، بەرپرسێ پشکا پەیوەندی و راگەھاندنێ ل سەرۆکاتیا باژێرڤانیا دھۆکێ بۆ رۆژناما ئەڤرۆ دیار کر کو بەری ھەوا بانگەشا ھەلبژارتنان دەست پێ بکەت وان کۆمبوون ل گەل کۆمسیۆنێ و قەوارێن سیاسی ئەنجامدان بوون و رێنما ل سەر ھاتبوونە بەلاڤەکرن ل سەر دیارکرنا جھێن دروست و قەدەغەکری و گۆت: “سەرپێچی ھاتینەکرن ژ بەر ڤێ چەندێ مە نڤسیارەکا فەرمی بۆ کومسیوونێ بلندکریە کو قەوارێن سیاسی ھایدار بکەت بۆ راکرنا ئەوان پۆستەرێن بەربژارێن خوە یێن کو ل جھێن قەدەغەکری ھاتینەدانان وەکو ناڤەندێن جادا و سەر شوستە”.
ناڤھاتی ئاماژە دا وێ چەندێ کو ھەکە بەربژار پۆستەرێن خوە رانەکەن دێ باژێرڤانی راکەت و چو پارێ چو ب رێیا کۆمسیۆنێ دێ ژ ئەوان قەوارە و بەربژاران ھێتە وەرگرتن و گۆت: “رێنما گەھشتبوونە ھەموو بەربژاران ب رێیا قەوارێن سیاسی و ھەر تشتەکێ قەدەغەری ل سەر ھاتبوونە ھایدارکرن، مخابن ھندەک بەربژاران سەرپێچی کرینە، لێ پارێزگەھا ھەولێرێ پتر سەرپێچی کرینە ل سەر رێنمایێن وەزارەتا باژێرڤانیێ”.
ئەڤرۆ نيوز:
لەیلا عەبدلجبار حدو بەربژێرا ژمارە(32) ل سەر لیستا(183) یا پارتی دیموکراتی کوردستان بۆ روژناما ئەڤرۆ دیارکر، پارتی دیموکراتی کوردستان کاردکەت بۆ وێ چەندێ کو کوردستانەکا بھێز دروست بکەت، کو مەبەست پێ پێگەھەکێ بھێز بۆ کوردستانێ دروست بکەت ل ھەمی بواراندا، کو مەبەست پێ جڤاکەکێ تەندروست و ئاڤاکری و ئیماناھیێ پەیداکەت، کو ئەڤە ئارمانجا خەلکی یە پارتی کار ل سەر دکەت.
بەربژێرا ژمارە(32) یا پارتی زێدەتر گۆت کو پارتی خودان رابردوو و مێژویە د دیروکا خوەدا چەندین خەبات و سەرھەلدان و تێکوشین و شورەش کرینە و چەندین دەستکەفت ب دەست خوڤە ئێخستی نە، داعش تێکشاندیە و مللەت شانازیێ ب ڤان دەستکەفت و خەباتا پارتی دکەت، ئەڤەیە بوویە ئەگەر کو پارتی ھەر یا بھێزبیت، چونکی مللەتی ل پشتا پارتی یە و باوەریا ب ھێزو خەباتا وێ ھەی، لەوما پارتی دێ ھەر یا بھێزبیت، چونکی پارتی د بەرژەوەندیا گشتی یا مللەتی دا کاردکەت.
لەیلا عبدلجبار زێدەتر دبێژیت کو ئەم پێدڤی کەسانێن زیرەک و بسپورو خودان رابردووینە کو دەربچن بۆ پەرلەمانی و داکو بشێن خزمەتا خەلکی بکەن و گلە و گازندێن خەلکی بگەھینن، دڤێت ئارمانجا ھەمی بەربژێرا گەھاندنا داخوازی پەیاما خەلکی بیت بۆ ناڤ پەرلەمانی و کارکرن ل سەر وان داخوازیان ب شێوەکێ پراکتیکی.
ل دور پروژێ خوە بۆ پەرلەمانی لەیلایێ گۆت کو پروژێ من وەک تاکە کەس ئەگەر دەربچم، ئارمانجا من دێ ئەو بیت پتر د بوارێ گەنج و ئافرەتادا کاربکەم و گەنج بێ کار نەمینن و دەلیڤێن کاری بۆ زێدەتربن و خەم لێ بھێتە خوارن، چونکی گەنج تەخەکا گرنگە د جڤاکی دا و وەلات یێ دەستێ گەنجادا، ھەردیسا خەمەکێ ل کێم ئەنداما خوم و خزمەتێن وان بەرچاڤ وەرگرم و ھندی ژ شیانێن مندا بیت.
ل داویێ ژی لەیلا عبدلجبار بەربژێرا پارتی دیموکراتی کوردستان بۆ پەرلەمانێ کوردستانێ گۆت من بخۆ شیانێن خوە زێدەکرینە قوناغێن سەخ و دژوار دەرباس کرینە و زەحمەت دیتی یە ھەتا کو من شیا وێ باوەریێ چێکەم حیزبا من باوەریێ ب شیانێن من بینیت، چەندین سالا خزمەت کریە بێ راوەستیان ھەتا گەھشتی مە ڤێ قوناغێ، ئەڤەژی جھێ دلخوشیێ یە بۆ من کو گەھشت بم وی ئاستی حیزب من ھەژی پەرلەمانی بیت، ژ بەر ڤێ چەندێ ھندی شیانێن مندا بیت دێ ھاروکاریا ھاولاتیان کەم و داخوازیێن وان گەھینم.
ئه‌ڤرۆ نيوز:
بەرپرسەکێ بلندێ وەزارەتا پێشمەرگەی ئاشکرا کر کو دەست ب پڕۆسا چاکسازیا د ناڤ وەزارەتا پێشمەرگەی دا ھاتیەکرن و گۆت: “نوکە کار بۆ بجە ئینانا پێنج خالان دھێتەکرن”.
لیوا قارەمان شێخ کەمال، جێگرێ سوپا سالارێ وەزارەتا پێشمەرگەی بۆ رۆژناما ئەڤرۆ دیار کر کو وەزارەتا پێشمەرگەی دەست ب پڕۆسا چاکسازیێ د کەرتێ سەربازی و د ناڤ وەزارەتا پێشمەرگەی دەستپێکریە و بۆ ڤێ مەرەمێ ژی نوکە کار ل سەر پێنج خالێن د ناڤ پڕۆژێ چاکسازیا وەزارەتا پێشمەرگەی دا دھێتەکرن، کو سەرجەمێ وان 37 خالن و بۆ دەمێ پێنج سالان دێ ھێنە بجە ئینان، بەلێ دەستپێکێ وان بڕیاردایە ژ ئەڤان خالان دەست پێ بکەن یێن کو شیانێن بجە ئینانێ ھەین.
ناڤھاتی ئاماژە دا وێ چەندێ کو دچارچوڤێ بجە ئینانا پڕۆسا چاکسازیێ دا دێ یەکەیێن حەفتێ و ھەشتێ ھێنە رێکخستن و ھێنە د ناڤ سیستەمێ وەزارەتێ دا، ھەروەسا باشترکرنا رەوشا ئابووری یا ھێزێن پێشمەرگەی دا، ھەروەسا چەندین گۆھۆڕینێن بەرچاڤ دێ ھێنەکرن بۆ وێ چەندێ ھەرێما کوردستانێ ببیتە خودان ھێزەکا سەردەمیانە یا سەربازی، لێ مخابن قەیرانا دارایی رێگرە ل ھەمبەر بجە ئینانا ھندەک خالێن د ناڤ پڕۆژەی دا، ب تایبەتی ئەڤێن پەیوەندی ب پرسێن دارایی ڤە ھەی.
ئه‌ڤرۆ نيوز:
نوونەرا کوردێن ئێزدی ل جڤاتا پارێزگەھا دھۆکێ و جێگرا سەرۆکێ جڤاتا پارێزگەھا دھۆکێ دیار کر کو ب نڤیسارەکا فەرمی وێ داخوازیێن ئێزدیان بۆ پارێزگارێ دھۆکێ و لقێ ئێکێ پارتی دیموکراتی کوردستان فرێکرینە و دبێژیت: مە داخواز کریە ئێزدی ژ پۆستێن کارگێڕی ل پارێزگەھا دھۆکێ نەھێنە بێ بەھرکرن.
بێریڤان سەلیم شەمۆ، جێگرا سەرۆکێ جڤاتا پارێزگەھا دھۆکێ بۆ رۆژناما ئەڤرۆ ئاشکرا کر کو رێژەکا زۆر ژ ئاکنجیێن پارێزگەھا دھۆکێ ئێزدی نە، ئێزدی وەکو پێکھاتەکێ رەسەن ل دھۆکێ، ژ لایێ خزمەتگۆزاریێن گشتی بۆ دەڤەرێن وان و نەبوونا وان د پۆستێن ئیداری یێن دھۆکێ دا خوە مەغدۆر دبینن و گۆت: “لەورا ب نڤیسار مە داخواز ژ پارێزگارێ دھۆکێ و لقێ ئێکێ پارتی دیموکراتی کوردستان کریە کو گرنگی ب ئێزدیان بھێتەدان، ئێزدی ب تنێ پارتی و مالا بارزان ب خودان و پشتەڤانێ خوە دبینن، لەورا داخوازێ دکەین ئێزدی ژی پۆستێن کارگێری ل پارێزگەھا دھۆکێ وەربگرن، ئەڤە دەمەکە دەست ب گورانکاریێن پۆستێن کارگێڕی ل دھۆکێ ھاتینە کرن و دخوازین ئێزدی ژ ڤان پۆستان نەھێنە بێ بەھرکرن و خوە دناڤ ھەیکەلێ کارگێڕیێ پارێزگەھا دھۆکێ دا ببینن”.
بیریڤان سەلیم ئاماژە دا وێ چەندێ ژی کو ل پارێزگەھا دھۆکێ دەست ب گورانکاریێن کارگێڕی ھاتیە کرن، پێنج ھەتا شەش رێڤەبەر دێ ھێنە گوھۆڕین و گۆت: “ل پارێزگەھا دھۆکێ 12 رێڤەبەریێن گشتی ھەنە، ئەم ئێزدی رێژەکا مەزنین و ئەم د ناڤ ڤان پۆستێن کارگێڕی دا نینین، لەورا مە ژ پارێزگارێ دھۆکێ خواستیە ئێزدی ژی بھێنە دانان و مافێ ئێزدیانە ژ سەرجەمێ 12 رێڤەبەریێن گشتی دو پۆست ھەبن، رەنگە مافێ ئێزدیان پتر ژی بیت، ھەموو رێڤەبەریێن دھۆکێ دێ ھێنە گوھۆڕین، ئەم یێ بزاڤان دکەین ئێزدی ژی ڤان پۆستان وەربگرن”.
ئه‌ڤرۆ نيوز:
بەربژارەکێ ئەرمەن ل پارێزگەھا دھۆکێ دیار کر کو بۆ ھەلبژارتنێن خولا پێنجێ یێن پەرلەمانێ کوردستانێ ھزار کەسێن ئەرمەن مافی دەنگدانێ یێ ھەی.
یروانت نیسان، بەربژارێ ئەرمەنی ل پارێزگەھا دھۆکێ بۆ رۆژناما ئەڤرۆ دیار کر کو شەش کەسێن ئەرمەن بۆ خۆلا پێنجێ یا پەرلەمانێ کوردستانێ خوە بەربژار کرینە و ھەر شەش بەربژار ھەڤرَکیێ ل سەر ب دەستڤەئینانا کورسیکا کۆتا یا پێکھاتێ ئەرمەنان ل پەرلەمانێ کوردستانێ دکەن و گۆت: “د خۆلێن بۆری دا ژی ئەرمەنان کورسیکا کوتا ھەبوو و خزمەتەکا باش بۆ ئەرمەنان ل ھەرێما کوردستانێ کریە، ل ھەرێما کوردستانێ پتر ژ سێ ھزار کەسێن ئەرمەن ھەنە و پتریا وان ل پارێزگەھا دھۆکێ د ئاکنجی نە”.
وی بەربژارێ ئەرمەن ئاماژە ب وێ چەندێ ژی کر کو ئەڤە خۆلا سێیێ یە ئەرمەن ب شێوەکێ فەرمی پشکداریێ د ھەلبژارتنێن پەرلەمانێ کوردستانێ دا دکەن و گۆت: ”ژ سەرجەمێ ھەر شەش بەربژارین ئەرمەن پێنج یێن پارێزگەھا دھۆکێ نە، د کەش و ھەوایەکێ ئازاد دا ھەموو بەربژار یێ پرۆپاکندێ بۆ خوە دکەن، ئەم ب ھیڤینە ل خۆلا پینجێ ژی یا پەرلەمانێ کوردستانێ وەکو خۆلێن بۆری خزمەتا ئەرمەنان بھێتە کرن”.
10 ھزار کەسێن ئەرمەنی نوکە ل عیراقێ دژین و ژ وان ژی سێ ھزار نوکە ل ھەرێما کوردستانێ دژین.
ئه‌ڤرۆ نيوز:
رەوشەنبیرێن کورد ل رۆژھەلاتێ کوردستانێ دیار دکەن کو رەوشا ناڤخوەیی یا ئیرانێ رۆژ ب رۆژێ خراب دبیت و ستراتیژیا ئەمریکا ل ھەمبەر ئیرانێ ھاتیە گوھۆڕین و کار ل سەر گوھۆڕینا سیستەمێ ئیرانێ دھێتە کرن، کورد ھێزەکا کاریگەرن و پێشمەرگێ خوە ھەنە ژ بەر ھندێ ژی نھا ئیران پتر ژ ھەر دەمەکێ ھێرشی کوردان دکەت.
د. وەلی عەبدوللاھی مامۆستایێ زانکۆیێ ل رۆژھەلاتێ کوردستانێ بۆ رۆژناما ئەڤرۆ دیار کر کو ئیران نھا پتر ژ ھەر دەمەکێ تەنگاڤ بوویە د ئاستێ ناڤخوەیی دا مەشروعیەتا خوە ژ دەست دایە، بارێ ئابووری یێ وەلاتی گەلەکێ خرابە و خەلک نەشێن پێدڤیاتێن سەرەکی یێن ژیانێ بۆ خوە دابین بکەن، دەنگێ نەرازیبوونێ د ئاستێ ناڤخوەیی دا بلند بیت و گۆت: (د ئاستێ دەرڤە دا ژی وەکو دیارە ئیران رۆژ ب رۆژێ پتر تەنگاڤ دبیت و وەلاتێن رۆژئاڤایی و ھەتا وەلاتێن وەکو ھندێ و یابانێ کو پەیوەندیێن باش یێن ئابووری ل گەل ئیرانێ ھەبوون نھا ژ ترسا ئەمریکا خوە ژ ئیرانێ دوور دکەن و ژ بەر ھندێ ژی ئیرانێ سەنگا خوە یا جاران ل دەڤەرێ ژ دەست دایە).
ناڤھاتی دیار کر ژی کو ئەمریکا ڤێجارێ دخوازیت رژێما ئیرانێ بگوھۆڕیت، بەری نھا ھەلویستێ ئیرانێ گەلەک جاران د خزمەتا ئەمریکا دا بوو، لێ نھا ئەو یەک نەمایە و ئەمریکی ژی گەھشتینە ڤێ باوەریێ ھەتا ئیران وەکو وەلاتەکێ ئێکگرتی ل رۆژھەلاتا ناڤین بمینیت دێ مەترسیێن خوە ھەبن و ژ بەر ھندێ ژی پارچەبوونا ئیرانێ بوویە پشکەک ژ ستراتیژیا ئەمریکا.
قاسم بەھرامی چاڤدێرێ سیاسی ژی بۆ رۆژناما ئەڤرۆ دیار کر کو ئۆپۆزسیۆنا ئیرانێ گەلەکێ لاوازە و ژ بلی کوردان ھێزێن دی چو کاریگەریا خوە ل سەر ئیرانێ نینن، کورد خوەدان پێشمەرگە نە و دشێن ھەر زوو خوە رێکخستن بکەن، گەلەک جاران بەرپرسێن ئیرانێ بۆ مە گۆتینە ھەکە لاوازی ل تەھرانێ دروست ببیت پارتێن رۆژھەلات دشێن د دەمەکێ کورت دا ب ھزاران گەنجان چەکدار بکەن، ئەو یەک ژی نیشا ددەت کو ترسا سەرەکی یا ئیرانێ ژ ھێزێن کوردی یە و گۆت: (ژ بەر ھندێ ژی رۆژانە گەنجێن مە ل سێدارە ددەن و ڤێ دووماھیێ ژی ھێرشا بارەگایێن پارتێن رۆژھەلات ل باژارێ کۆیە کرن، لێ مانگرتنا کوردان ل رۆژھەلات بەرسڤەکا مەزن دا رژێما ئیرانێ).
ناڤھاتی ئەو یەک ژی دیار کر کو نھا ئیرانێ ھێزەکا مەزن ل سەر سنۆرێ رۆژھەلات و باشورێ کوردستانێ کۆم کریە و دخوازیت ھێرشی بنگەھێن ھێزێن رۆژھەلات ل سەر سنۆری بکەت، ئەو ھەموو بزاڤێن ئیرانێ ژی نیشا ددەن کو دەستھەلاتدارێن تەھرانێ ژ ھێز و ئیرادا کوردان دترسن و ژ بەر ھندێ ژی نھا پتر ژ ھەر دەمەکێ ھێرشی ھێزێن کوردی دکەن و گەنجێن کوردان ل سێدارە ددەن.
فەرھاد رزایی چالاکڤانێ مافێ مرۆڤان ل رۆژھەلاتێ کوردستانێ ژی راگەھاند کو ئیرانێ باوەر نەدکر کو دێ کورد ل رۆژھەلات مانگرتنەکا وەسا مەزن برێڤە ببەن، براستی ژی مانگرتنا ١٣ مەھێ تشتەکێ مەزن بوو و کارتێکرنا خوە ل ھەموو ئیرانێ کر و گۆت: (مانگرتنا ل رۆژھەلاتێ کوردستانێ نیشا دا کو کاریگەریا پارتێن رۆژھەلات ل سەر جڤاکی گەلەک زێدەیە و ژ بەر ھندێ ژی نھا ئیرانێ ھێزەکا مەزن ل سەر سنۆری کۆم کریە و گەفان ل پارتێن رۆژھەلاتێ کوردستانێ دکەت).
ئەڤرۆ نيوز:
ل گۆر راپۆرتەکا رۆژناما واشنتۆن پۆست یا ئەمریکی ھەر چەندە جۆن کێری ل سەر کاری نەمایە لێ پشتی کو ترامپ وەکو سەرۆکێ ئەمریکا دەست ب کاری کری و خوە ژ رێککەفتنا ئەتۆمی یا ل گەل ئیرانێ ڤەکێشای ژی دیسان جۆن کێری ل گەل بەرپرسێن ئیرانێ ل نەرویج و ئەلمانیا کۆمبوون کرینە و پشتەڤانیا خوە بۆ رێککەفتنا ئەتۆمی دیار کریە، ژ بەر ڤێ یەکێ ژی وەزیرێ نھا یێ دەرڤە یێ ئەمریکا مایک پۆمپیۆ توورە بوویە و داخوازا دادگەھکرنا جۆن کێری دکەت.
ئەو یەک د دەمەکێ دایە کو بەری نھا جۆن کێری دیار کربوو وی بەری نھا ژی گەلەک بزاڤ کربوون کو نەھێلیت رێککەفتنا ئەتۆمی یا ل گەل ئیرانێ ژناڤ بچیت، چونکو ئەو یەک د بەرژەوەندیا ئەمریکا دا نینە و مایک پۆمپیۆ د ڤێ دەربارێ دا دیار کر کو جارا ئێکێ یە ل دیرۆکا ئەمریکا تشتەک وەسا روو بدەت، کێری ل سەر کاری نینە و نابیت دەستێوەردانێ د کاروبارێ حوکمەتێ دا بکەت و ئەو یەک شەرمزاریەکا مەزنە بۆ ئەمریکا و دڤێت کێری بھێتە دادگەھکرن.
نيشاندان