ئه‌ڤرۆنيوز:
سه‌رۆكێ ليستا پارتى ديموكراتى كوردستان بۆ هه‌لبژارتنێن خۆلا پێنجێ يا په‌رله‌مانێ كوردستانێ ئه‌ڤرۆ دوشه‌مبى 17/9/2018 دچارچۆڤێ بانگه‌شا ليستا 183 يا پارتى ديموكراتى كوردستان ل ده‌ڤه‌را قه‌ره‌داخ ل پارێزگه‌ها سلێمانيێ، راگه‌هاند، ئه‌و كه‌س وحزبا داخوازا ڤه‌گه‌راندنا ده‌ستهه‌لاتا قۆرخكرى ل هه‌ولێرێ بۆ سلێمانيێ دكه‌ت، بلا جارێ ده‌ستهه‌لاتێن قۆرخكرى يێن سلێمانيێ بده‌ته وى لايه‌نێ سه‌ركه‌فتى دهه‌لبژارتنێن جڤاتا پاريزگه‌ها سلێمانيێ دا ( كو مه‌ه‌رم پێ بزاڤا گۆرانه) .
هێمن هه‌ورامى، سه‌رۆكێ ليستا پارتى ديموكراتى كوردستان بۆ هه‌لبژارتنێن خۆلا پێنجێ يا په‌رله‌مانێ كوردستانێ گۆت ژى” پێدڤيه كوردستان ببيته خودان دستووره‌كێ نوو كو بشێن پرۆسێن سياسى وديموكراتى رێكبێخين، دستووره‌ك بۆ ب دووماهى ئينانا وان بزاڤێن دخوازن ئێكگرتنا ئاخا كوردستانێ بێخنه مه‌ترسيێ”.
هه‌ورامى به‌رسڤا ئاخڤتنين قوباد تاله‌بانى، سه‌رۆكێ ليستا ئێكه‌تى نيشتمانى كوردستان بۆ هه‌لبژارتنێن په‌رله‌مانێ كوردستانێ دا وحێبه‌تيا خوه دياركر كو چاوان دشێن به‌حسێ ڤه‌گه‌راندنا ده‌ستهه‌لاتا قۆرخكرى بكه‌ن، دده‌مه‌كى دا وان ب خوه ده‌ستهه‌لات ل سلێمانيێ يا قۆرخكرى.
هێمن هەورامی گۆت ژى” ئه‌م وه‌كو خه‌لكه‌كێ دى نينين سۆزێن ناڤه‌رۆكا وان به‌تال بده‌ين وتنێ بۆ ده‌نگێن هه‌لبژارتنان سۆزێن نه‌راست بده‌ين، پارتى حزبا به‌رپرسياره‌تيێ يه”.
رۆهنكر ژى” پارتى حزبا سه‌رانسه‌رى كوردستانێ يه وناوچه‌كه‌ريێ ره‌ت دكه‌ت”.
هێمن هه‌ورامى دبه‌رسڤا بانگه‌شا قوباد تاله‌بانى دا راگه‌هاند” پێدڤيه نه‌يارێن پارتى فێر ببن كو دژايه‌تيا پارتى وفێل ل پارتى چو نه‌چاند وچو ناچينيت ژى، پارتى دڤێت پارێزگه‌ها سلێمانيێ يا ئاڤه‌دان بيت وبازارێ وێ يێ باش بيت، نه‌كو ب ده‌ستێ قۆرخكاريا ڤى بالى وبالێ هه وڤێ بنه‌مالێ وبنه‌مالا هه بناليت”.
گۆت ژى” هنده‌ك كه‌س دبێژن ده‌ستهه‌لاتا قۆرخكرى دێ ژ هه‌ولێرێ ڤه‌گه‌رينن، ل ده‌ف مه سه‌يره خه‌لكه‌ك روو هه‌بيت ڤێ ئاخڤتنێ بكه‌ن، بلا جارى ئه‌و بچن ده‌ستهه‌لاتا قۆرخكرى يا دناڤ سلێمانيێ دا بۆ وى لايه‌نى ڤه‌گه‌رينن كو دهه‌لبژارتنێن جڤاتا پارێزگه‌ها سلێمانيێ ب سه‌ركه‌فتى ونه‌هێلاى ئه‌و ده‌ستهه‌لاتا وێ پارێزگه‌هێ وه‌ربگرن، بلا جارێ بچن كێشێن ناڤمال وناڤ بال وناڤ حزبا خوه چاره‌سه‌ر بكه‌ن، پاشى به‌حسێ چاره‌سه‌ركرنا كێشێن كوردستانێ بكه‌ن، كه‌سێن نه‌شێن كێشێن دناڤخوه دا چاره‌سه‌ر بكه‌ن، رۆژانه باله‌ك وكێشه‌ك هه‌بيت، چاوان دێ شێن كێشا كوردستانێ چاره‌سه‌ركه‌ن.
هێمن هه‌روامى ل دووماهيا په‌يڤا خوه بۆلايه‌نگرێن پارتى راگه‌هاند” ئه‌م سۆزێن ناڤه‌رۆك به‌تال ونه‌راست بۆ خه‌لكى ناده‌ين وئه‌م حزبا به‌رپرسياره‌تيێ نه وسۆزه‌كێ ناده‌ين كو بجهنه‌ئينين، چونكى كوردستان ژمه هه‌موويان مه‌زنتره”.
ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ راگه‌هاند، نيڤرۆيا ئه‌ڤرۆ بيڤه‌له‌رزه‌كێ ب هێزا 3.4 ل دووڤ بيڤه‌رێ رێخته‌ر يێ جيهانى ل سلێمانيێ دا.
دياركر ژى” ئه‌و بيڤه‌له‌رز ب كووراتيا 7 كيلۆمه‌تران ودووريا 40 كيلۆمه‌تران ل سه‌نته‌رێ چيايێ ئه‌زمه‌ر روودا”.
خوياكر ” بيڤه‌له‌رزا رووداى ب دووريا 60 كيلۆمه‌تران ل ويستگه‌ها بيڤه‌له‌رزان ل قه‌زا ده‌ربه‌نديخان هه‌ست پێ هاته كرن”.
ئه‌ڤرۆ نيوز:
گولستان باقی نھێلی بەربژارا ژمارە 84 سەر ب لیستا 183 یا پارتی دیموکراتی کوردستان بۆ رۆژنامەیا ئەڤرۆ بەرنامەیێ کارێ خوە دیارکر و تەکەزکر، ئەگەر ھات و باوەری پێ ھاتە دان و بوو نوونەرا وان د پەرلەمانی دا دێ بزڤا کەت ژبۆ خوەشکرنا ژیانا ھاولاتیێن دەڤەرێ و دیار کر، راستە کارێ پەرلەمانی دەرکرن وراستڤەکرنا یاسایانە و چاڤدێری کرنا کارێ حکومەتێ یە لێ ب دیتنا وێ ئەرکێ ھەر پەرلەمانتارەکێ ئەوە پتر نێزیکێ خەلکی بیت و ئاریشەیێن وان بزانین و خوە لێ بکەتە خودان ، وگۆت: ( ژبەر ڤێ ئەگەرێ دێ بەردەوام دناڤ جەماوەری دا بم ژبۆ دەست نیشانکرنا کێماسیان و گەھاندنا وان دخازیا بۆ لایەنێن پەیوەندیدار ژ پێخەمەت چارەسەرکرنا وانا ).
ئاشکرا کر، کو وێ نەڤێت چ سوزێن بێ بنەما بدەت و نەشێت ب جە بینت ، و تەکەز کر، کو باشترین کارێ ئەو پێ راببیت بەردەوامی پێدانا وێ راستگویێ یە دناڤبەرا وێ و خەلکی دا.
ھەروەسا ناڤھاتیێ خویاکر، کو دێ کار کەن ژ بوخوەشکرنا ژیان و دایک و زارۆیێن بێ سەمیان و کرێکار و گۆت: ( دێ کار کەین ژ بۆ دانانا یاسایێن گونجایی ب مەرەما زێدەتر گەشەپێدانا بھایێ مرۆڤایەتیێ بۆ دروستکرنا تاکو جڤاکەکێ بەرھەمھێنەر و دێ ھەولدەین بیمە وگرنتی کرنا ساخلەمی و سامانێ وەلاتیان ب یاسا بھێتە رێکخستن و بیما ساخلەمیێ بھێتە دابینکرن بۆ ھاولاتیێن توشی نەخوشیێن شیر پەنجێ ونەخوشیێن دومدرێژ بووین ).
ناڤھاتیێ ئەویەک ژی دیارکر، کو دێ پشتەڤان بیت بۆ دانانا سندوقێن ھاریکاریان بۆ ئافرەتێن جودابوویی و دایکێن بێ ھەڤژین و ڤەکرنا بنگەھێن داھێنانێ و شیاندنێن تایبەت بۆ ئافرەتان د چوارچوڤێ سەکتەرێن جڤاکی و دیسان کارا کرنا یاسایا بەرھنگاربوونا توندوتیژیێ و دابینکرنا سەنتەر وجھێن گونجایی تر و دابینکرنا ھاریکاریێن مادی بۆ وان ئافرەتێن کو توشی ھەر جورە توندو تیژیەکێ دبن.
و تەکەز کر، کو ئەو وەک ئەندام پەرلەمانەکا دەڤەرا ئامێدیێ دێ ئێک ئەولەویاتێن کارێ وان بزاڤێ کەن ئەو گوندێن چەندین جاران توشی وێرانرکرنێ و ئەنفالان وسوتنێ بووین خەلکێ وانا بھێنە قەرەبوکرن وگوندێن وانا جارەکا بھێنە ئاڤەدانکرن وگۆت: (و ئەز سوزێ دەم ب قەدەر وێرەکیا پێشمەرگەی و خووینا شەھیدان پارێزڤانێ مافێ پێشمەرگەیان و خێزانێن شەھیدان بم و دێ بزاڤێ کەین بۆ ب دەست ڤە ئینانا مافێن گەنجان دابینکرنا دەرفەتێن کاری بۆ گەنجان و پێشخستنا سیستەمێ پەروەردێ و کەرتێ گەشت و گوزارێ و پاراستنا ژینگەھێ و دادپەوەریێ بەرقرارکەین).
گولستان نھێلی ئەو یەک ژی خویاکر، ئەڤرۆ کوردستان یا قوناغەکا ھەستیار دا دەرباز دبیت لەورا پێدڤیە لسەر ھەموو وەلاتیان ب گیانەکێ بەرپرسیارانە و ب گرنگی ڤە بەشداریێ د ڤان ھەلبژارتنان دا بکەن و گۆت: ( وان کەسان ھەلبژێرن یێن بەردەوام د خزمەتا بالا یا خەلکی و وەلاتی دا بن و ب دیتنا من ھەر تاکەکێ ڤی جڤاکی قەستا سندوقێن دەنگدانێ بکەت و بۆ گرنتی بوونا ئایندەکێ باشتر دێ دەنگی دەتە لیستا 183).
گولستان باقی نھێلی ژ دایکبووبا سالا 1984 یا گوندێ گوھەرز سەر ب دەڤەرا نھێلێ ل ناحیا دێرەلۆک ، قەزا ئامێدیێ یە، و ل گەل خێزانا خوە ل سالا 1988 دەربەدەرێ تورکیا و ئیرانێ بوویە و پشتی ل سالا 1993 ڤەگەریای دەست ب خواندنا خوە کریە و ل سالا 2008 باوەرناما بکالوریوس ب زانستێن کیمیایی ب دەست ڤە ئینایە و ھەر دھەمان سال دا تا نوکە وەک ماموستا ل ئامادەیا نھێل کار دکەت و بەشداری د چەندین خولێن رەوشەنبیری و پێگەھاندنێ دا کریە.
ئه‌ڤرۆ نیۆز،عه‌زیز هه‌ورامی
ل كارناما ليستا 183 پارتى ديموكراتى كوردستان دبوارێ زه‌لاليا كه‌رتێ په‌ترۆلێ دا هاتيه كو پارتى كاردكه‌ت بۆ وێ چه‌ندێ ل حوكمه‌تا داهاتى يا هه‌رێما كوردستانێ زێده‌تر كار ل سه‌ر بوارێ زه‌لاليا كه‌رتێ په‌ترۆلێ ژ ده‌رئينان وفرۆشتن بۆ رايا گشتى به‌لاڤ بكه‌ت وپه‌ره‌پێدانێ ب بوارێ په‌ترۆلێ وغازێ بده‌ت.
بێوار خنسی، بسپۆڕی بوارێ په‌ترۆلێ گۆت” حوكمه‌ته‌كا ب هێز يا پالپشت ب په‌رله‌مانێ كوردستانێ، پێدڤيه بۆ چار سالێن داهاتى كاربكه‌ن بۆ بجهئينانا قانوونا 22 يا سالا 2017 بۆ دانانا 10 ده‌زگه‌هێن تايبه‌ت ب به‌رهه‌مئينان وفرۆشتن وزه‌لاليا داهاتى، كو هه‌ر ده‌زگه‌هه‌ك ژ وان يێ تايبه‌تمه‌نده ب بواره‌كێ په‌ترۆلا كوردستانێ”.
بێوار خنسی گوت ژى” بۆ وێ چه‌ندێ بشێين دكه‌رتێ په‌ترۆلێ ژ به‌رهه‌مئينان وهنارده‌كرن وفرۆشتنێ دسه‌ركه‌فتى بين، مه پێدڤى ب حوكمه‌ته‌كا ب هێز يا سه‌قامگيره كو ب هه‌ڤپشكى ل گه‌ل په‌رله‌مانى كاربكه‌ن بۆ به‌ر ب پێشڤه‌برنا كه‌رتێ په‌ترۆلێ ل كوردستانێ”.
پارتى ديموكراتى كوردستان دكارناما بانگه‌شا هه‌لبژارتنێن په‌رله‌مانێ كوردستانێ دا، خاله‌كا گرنگ بۆ باده‌كا په‌ترۆلێ، زه‌لاليه‌ت تێدايه، خنسى ل دۆر ڤێ چه‌ندێ دبێژيت” كارناما ليستا 183 يا پارتى ديموكراتى كوردستان دبوارێ په‌ترۆلێ وغازێ دا خالێن گرنگ يێن تێدا هه‌ين كو ب جهئينانا وان خالان، پارتى ل چار سالێن داهاتى دێ پێنگاڤێن باش دبوارێ زه‌لاليا كه‌رتێ په‌ترۆلێ ل كوردستانێ به‌ر ب پێش هاڤێت”.
وى بسپۆرێ په‌ترۆلێ ووزێ گۆت ژى” حوكمه‌تا هه‌رێما كوردستانێ شيايه تاراده‌كێ باش ب رێيا كۆمپانيا ديلۆيت، به‌رهه‌مئينان وفرۆشتنا په‌ترۆلێ وداهاتێ وێ زه‌لال بكه‌ت”.
دياركر ژى” يا گرنگه ل خۆلا پێنجێ يا داهاتى يا په‌رله‌مانێ كوردستانێ، په‌رله‌مانتارێن شاره‌زا دبوارێ په‌ترۆلێ وغازێ هه‌بن، تاكو لژنا په‌ترۆلێ وغازێ لژنه‌كا زيره‌ك وب شيان بيت”.
ئه‌ڤرۆنيوز:
قايمقاميا قه‌زا ناڤه‌ندا هه‌ولێرێ راگه‌هاند، ل ده‌مه‌كێ نێزيك 100 پاسێن مۆدێرن ژ باژێرێ دۆسلدۆرف يێ ئه‌لمانى دێ گه‌هنه باژێرێ هه‌ولێرێ كو بێ به‌رامبه‌ر ژلايێ حوكمه‌تا ئه‌لمانى ڤه بۆ هه‌رێما كوردستانێ هاتينه پێشكێشكرن وهه‌موو ب گازوايلێ كاردكه‌ن.
قايمقاميا ناڤبرى د به‌رپه‌رێ خوه ل سه‌ر تۆرا جڤاكى يا فه‌يسبووكى به‌لاڤكر” ئه‌ڤ گرێبه‌سته ژلايێ پارێزگه‌رێ هه‌ولێرێ نه‌وزاد هادى وسه‌رۆكێ باژێرڤانيا دۆسلدۆرف هاتيه ئيمزاكرن وتنێ يا تايبه‌ته ب باژێرێ هه‌ولێرێ ڤه”.
ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ راگه‌هاند، سيسته‌مێ كه‌شوبايێ ده‌ريا ناڤه‌رسات كاريگه‌ريا راسته‌وخوه ل سه‌ر سه‌قايێ هه‌رێما كوردستانێ وده‌ڤه‌رێ يا هه‌ى، ل گه‌ل زێده‌بوونا نزمه‌پاله‌په‌ستۆيێ ده‌ريا ناڤه‌راست باران بارين ژى بۆ سه‌ر وان ده‌ڤه‌ران دێ كه‌ڤنه بن كاريگه‌ريا وێ چه‌ندێ.
دياركر ژى” بلندبوونا پلێن گه‌رمێ به‌ر ب ده‌ريا ناڤه‌راست ب 2 هه‌تا 3 پله‌يان دده‌مێ نوكه دا ل ماوێ سالێن 1982 هه‌تا 2012، ئه‌ڤ بلندبوونه دپلێن گه‌رمێ نه‌هاتيه تۆماركرن”.
كه‌شناسيا هه‌رێمێ ئاماژه دا، بلندبوونا پلێن گه‌رمێ ل ده‌ريا ناڤه‌راست دێ بيته ئه‌گه‌رێ نه جهگيريێ دسه‌قايێ ده‌ريا ناڤه‌راست دا وپاشى دێ بۆ ده‌ڤه‌رێن دى هێت، ل گه‌ل بلندبوونا پلێن گه‌رمێ، دێ هه‌لم زێده بيت وباران بارين ژى دێ زێده بيت ل گه‌ل له‌هى وبريسيێن زۆر.
راگه‌هاند ژى” پێشبينيا زێده‌بوونا باران بارين وله‌هيێ ئه‌گه‌ره‌كێ ب هيزتره ب تايبه‌تى ل گه‌ل دروستبوونا ديارده‌يا (نينۆ) كو نوكه ل ده‌ستپێكا دروستبوونێ دايه”.
ئه‌ڤرۆ نیوز، نه‌وزاد هلۆرى:
هنده‌ك كه‌سێن نه‌نياس رابووینه ب شكاندنا كێلى و دیوارێن گۆرێ دیرۆكنڤیسێ كورد (ئه‌مین زه‌كى به‌گ) ل سه‌نته‌رێ باژێرێ سلێمانیێ.
ئاوات حسامه‌ددین ، چاڵاكڤان ل سلێمانیێ بو ئه‌ڤرۆ نیوز گۆت: (چه‌ند كه‌سه‌كێن نه‌نياس رابووینه ب شكاندنا كێلى و دیوارێن گۆرێ دیروكنڤیسێ ناڤدار و ناڤدارێ كورد ئه‌مین زه‌كى به‌گ دناڤ گۆرستانا سه‌یوان ل ناڤه‌ندا باژێرێ سلێمانیێ ).
زێده‌تر گۆت: (ئه‌مین زه‌كى به‌گ ئێك بوو ژ دیرۆكنڤیس و كه‌سانێن شاره‌زا و خزمه‌ته‌كا زۆر بۆ دیروكا كوردان كریه و ئه‌و كه‌سێن گۆرێ وى شكاندى، ب مرنا وى ژى د ترسن، بێگومان ئه‌و كه‌سانێن ساده نه‌بووینه يێن ئه‌و گۆره تێكداى، به‌لكو كه‌سانێن خودان شیان بووینه، ژبه‌رڤێ چه‌ندێ داخوازێ ژجهێن شوله‌ژێ دكه‌ین دووڤچوونێ ل سه‌ر ڤى بابه‌تى بكه‌ن و ئه‌نجامده‌ران ب توندترین شێوه سزا بده‌ن).
ب گۆره‌ى پێزانينان ژبلى گۆرێ ناڤبرى ، گۆرێن چه‌ند كه‌سایه‌تیێن دى ژى هاتینه خراپكرن و تێكدان.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ دوشه‌مبى 17/9/2018 ل گه‌ل به‌رپرس ونوونه‌ر وسكرتێر وئه‌ندامێن نڤيسينگه ورێكخراوێن سه‌ر ب نڤيسينگه‌ها ناڤه‌ندى يا رێكخراوێن جه‌ماوه‌رى وپيشه‌يى يا پارتى ديموكراتى كوردستان كۆمبوو.
سه‌رۆك بارزانى دوێ كۆمبوونێ دا رۆناهى خسته سه‌ر ره‌وشا سياسى يا هه‌رێما كوردستانێ وعيراقێ وده‌ڤه‌رێ وقۆناغا پشتى ريفراندۆمێ وخيانه‌تا 16 ئوكتۆبه‌رێ وئه‌نجامێن وي خيانه‌تێ ل سه‌ر ژيانا خه‌لكێ كوردستانێ، هه‌روه‌سا ئاماژه ب هه‌لبژارتنێن په‌رله‌مانێ عيراقێ كر كو گه‌له‌ك لايه‌نان خوه به‌رهه‌ڤ كربوو كو ژئه‌نجامێ وان هه‌لبژارتنان هه‌لوه‌رينا پارتى ببينن، به‌لێ سه‌ره‌راى هه‌موو گرفتان، ب هيمه‌ت وخۆراگريا ئه‌ندام ولايه‌نگرێن پارتى، پارتى ل سه‌ر ئاستێ عيراقێ وهه‌رێما كوردستانێ بوو حزبا هژمار ئێك.
دياركر ژى كو وه‌لاتيێن عيراقێ ل هه‌لبژارتنێن په‌رله‌مانێ عيراقێ ئه‌و سه‌رۆچاڤێن شۆفينى سزادان يێن دژى مافێن گه‌لێ كوردستانێ وريفرادۆمێ راوه‌ستيا بوون وئه‌وژى به‌لگه‌كێ ب هێزه كو خه‌لكێ عيراقێ نه‌هجێ شۆفينيه‌تێ ره‌ت دكه‌ن.
ل دۆر هه‌لبژارتنێن 30 ئه‌يلوولێ، سه‌رۆك بارزانى ئاماژه كر كو هنده‌ك لايه‌نان دخواست به‌روڤاژى بريارا ده‌زگه‌هێن هه‌رێمێ وئيرادا خه‌لكى، هه‌لبژارتنان پاشبێخن، به‌لێ پێداگيريا پارتى بوو ئه‌گه‌رێ وێ چه‌ندێ هه‌لبژارتن ل ده‌مێ خوه دا بهێنه ئه‌نجامدان.
سەرۆك بارزانی ئومێدی ئەوەیشی خواست كە بە هیمەتی جەماوەر و لایەنگران و تێكۆشەرانی پارتی، پارتی دیموكراتی كوردستان سەركەوتن بە دەست بهێنێت و ئەو سەركەوتنەیش بۆ ئەوە بەكار بێت كە پارتی بتوانێ چاكسازیی بنەڕەتی لە هەموو بوارەكانی ژیانی سیاسی و ئابووری و ئیداریی هەرێمی كوردستان بكات.
ل دۆر پرۆسا سياسى ل عيراقێ، سه‌رۆك بارزانى خۆياكر كو نوكه دانوستاندن دهێنه كرن بۆ دامه‌زراندنا جڤاته‌كا بلند يا سياسه‌تين ستراتيژى كو لايه‌نێ كوردستانى ژى تێدا پشكدار بيت، ئه‌وژى بۆ رێگرتنێ ل سه‌رهلدانا تاكره‌ويێ دحوكمرانيێ دا وپێدڤيه بريارێن ستراتيژى ژوێ جڤاتێ بهێنه ده‌ركرن.
سه‌رۆك بارزانى دياركر كو ئه‌و واقعێ نوكه ل كه‌ركووكێ هه‌ى يێ سروشتى نينه وجهێ قبوولكرنێ نينه وكه‌ركووك ژى باژێره‌كه بۆ پێكڤه‌ژيانێ دناڤبه‌را پێكهاتان، به‌لێ مساوه‌مه ل سه‌ر ناسناما كوردستانيبوونا كه‌ركووكێ ناهێته كرن وبريارا بايكۆتكرنا هه‌لبژارتنان ل كه‌ركووكێ ژلايێ پارتى ڤه بۆ وێ چه‌ندێ بوو كو داپێدانێ ب واقعێ سه‌باندنا له‌شكرى ل وى باژێرى نه‌كه‌ين.
لەبارەی پڕۆسەی سیاسیی عێراقیش سەرۆك بارزانی جەختی لەوە كردەوە كە پێویست لەبارەی بارودۆخی كەركووك و ناوچەكانی تریشەوە سەرۆك بارزانی ئەوەی دووپات كردەوە كە ئەو واقیعەی ئێستا لە كەركووك هەیە واقعێكی ناسرووشتییە و قابیلی قبوڵ نییە و كەركووكیش شارێكە بۆ پێكەوەژیان و تەبایی لەنێوان پێكهاتەكان بەڵام مساوەمە لەسەر ناسنامەی كوردستانیبوونی كەركووك ناكرێت و بڕیاری بایكۆتكردنی هەڵبژاردنی لە كەركووك لە لایەن پارتییەوە بۆ ئەوە بوو كە دان بە واقعی سەپاوی سەربازی لەو شارە نەنێین.
ئه‌ڤرۆ نیۆز،عه‌زیز هه‌ورامی
پشتى كاره‌ساتا 16 ئوكتۆبه‌رل وڤه‌كێشانا هێزا پێشمه‌رگێ كوردستانێ، سريه‌كا ليوا سێ يا هه‌ڤپشك يا وه‌زاره‌تا پێشمه‌رگه دێ ڤه‌گه‌ريته خانه‌قينێ ول سه‌ر سێ ده‌ڤه‌رێن وێ دێ هێته به‌لاڤكرن.
شێخ جه‌عفه‌ر شێخ مسته‌فا به‌رپرسێ لقێ 15 يێ پارتى ديموكراتى كوردستان ل خانه‌قينێ خانه‌قینێ بۆ ئه‌ڤرۆ نیۆز ڕاگه‌یاند” سريه‌كا ليوا سێ يا هه‌ڤپشك يا وه‌زاره‌تا پێشمه‌رگه ل ناڤ باژێرێ خانه‌قينێ هاته به‌لاڤكرن”.
وه‌لاتيێن باژێرێ خانه‌قينێ پشتى 16 ئوكتۆبه‌را سالا بۆرى، چه‌ندين جاران ب رێيا ياداشت ومانگرتنێ داخوازا ڤه‌گه‌راندنا هێزا پێشمه‌رگه‌ى بۆ خانه‌قينێ وچوونا ميليشيان بۆ ده‌رڤه‌ى باژێرى كو شيانێن پاراستنا وه‌لايتان نينه كربوو.
شێخ جه‌عفه‌ر بۆ ئه‌ڤرۆنيوز دبێژيت” به‌لاڤبوونا هێزا پێشمه‌رگه‌ى ل ناڤ باژێرێ خانه‌قينێ گه‌له‌ك يا گرنگه بۆ وێ چه‌ندێ ئيمناهيا باژێرى بپارێزيت، چونكى ڤالاتيه‌كا ئه‌منى يا مه‌زن ل باژێرى هه‌بوو”.
ل دۆر وێ چه‌ندێ ئه‌و هێزا پێشمه‌رگه‌ى ئه‌وا چوويه دناڤ خانه‌قينێ دا، دێ لڤێنێ كه‌ت ل ده‌مێ روودانێن نه‌خوازراو دا، به‌رپرسێ لقێ 15 يێ پارتى گۆت” چوونا پێشمه‌رگه‌ى بۆ ناڤ باژێرێ خانه‌قينێ بۆ داگرتنا وێ ڤالاتيا ئه‌منى يا وى باژێرى يه وئه‌ڤ چه‌نده دێ وره‌يێن مه‌زن ده‌ته خه‌لكێ خانه‌قين”.
سه‌باره‌ت چاوانيا رێككه‌فتنێ بۆ ڤه‌گه‌راندنا هێزا پێشمه‌رگه‌ى بۆ باژێرێ خانه‌قين، وى به‌رپرسێ پارتى ئاماژه كر” لايه‌نێ كوردى رێككه‌فتن ل گه‌ل فه‌رمانده‌يا ئۆپه‌راسيۆنێن پارێزگه‌ها ديال كريه بۆ ڤه‌گه‌راندنا پێشمه‌رگه‌ى بۆ باژێرێ خانه‌قين”.
گۆت ژى” ئه‌و هێزا پێشمه‌رگه‌ى دێ ل سێ جهێن گرنگ يێ خانه‌قينێ هێنه به‌لاڤكرن ئه‌وژى ده‌ڤه‌رێن (مێخاك وپشت مه‌لبه‌ندێ ئێكه‌تيێ ل خانه‌قين ول ئۆتێلا سه‌رئه‌لوه‌ن) كو سێ جهێن هه‌ستيارن ول سه‌ر هه‌موو باژێرى دزالن، ئه‌ڤرۆ ژى دبيت هێزه‌كا دى ژ ليوايا سێ يا هه‌ڤپشك ب سه‌ر وه‌زاره‌تا پێشمه‌رگه ڤه بهێته دناڤ خانه‌قينێ دا وهێزه‌كا پێشمه‌رگه‌ى دێ چيته ده‌ڤه‌را به‌ختيارى ژى.
نيشاندان