ئه‌ڤرۆ نيوز:
بەربژارەکێ پارتی دیموکراتی کوردستان بۆ پەرلەمانێ کوردستانێ دیارکر کو پێدڤی یە گوتارا ئاینی ل کوردستانێ بھێتە رێکخستن ، و دبەرامبەر ژی دا پێکڤە ژیانا ئاینی و نەتەوەی ل کوردستانێ بھێتە بھێزکرن.
مەلا سەعید گولی بەربژارێ پارتی دیموکراتی کوردستان بۆ پەرلەمانێ کوردستانێ ل سنوورێ لقێ 8ێ پارتی بۆ ئەڤرۆ گۆت: (پارتی دیموکراتی کوردستان ھەر ل دەستپێکا دامەزراندنا خوە ب رابەراتیا بارزانی نەمر رێزەکا تایبەت و گرنگ دایە ئاینێ پیرۆزێ ئیسلامێ و خزمەت و خەباتەکا مەزن ژی بو کریە ، و بەرچاڤترین نموونە ژی ل سالێن حەفتێیان ئێکەتیا زانان دامەزراند داکو ب شێوازەکێ باشتر خزمەتا ئاینێ پیروزێ ئیسلامێ بکەت).
زێدەتر گۆت: (ھەر چەندە بەرنامێ پێکڤە ژیانا ئاینی و نەتەوەیی ل کوردستانێ ب ھێزە، بەلێ د بەرنامێ لیستا پارتی دایە کو پێکڤە ژیانا ل کوردستانێ ھەیی ب شێوازەکێ باشتر ب ھێز بکەت، و دیسان گوتارا ئاینی ب شێوازەکێ زانستی و سەردەمانە رێکبێخیت، ب تایبەتی ژ دەست تێوەردانێن حزبی و سیاسی، و ب رێیا گوتارا ئاینی و ماموستایێن گوتارخوین پەیاما درۆست بگەھینیت ، و دیسان ماموستایێن ئاینی لسەر بنەمایەکێ زانستی و ئەکادیمی پێبگەھینیت ب تایبەتی ل ناڤەندێن زانکو و پەیمانگەھان ، و ھەردیسان ئێک ژ گرنگترین کارێن کو ل کوردستانێ ئەوە کو رێز ل ھرۆڤبوون بھێتەگرتن ژ بەرکو خودایێ مەزن ب دوو پەیامان سەرەدەری ل گەل عەردی دکەت کو ئەو ژی پەیامەک تایبەتە ب ھەموو مروڤان و ئێک ژی تایبەتە ب خودان باوەران).
بەربژارێ پارتی د درێژاھیا ئاخفتنێن خودا دیارکر ژی کو دجیھانێ دا زور گروپ و حزب ھەنە بو بەرژەوەندیێن خوە ئیسلامێ بکاردئینن و کریارێن تیرورستی و توندرەوی پێ دکەن و زێدەتر گۆت: (بو رووبرووبوونا تیرورستی و فکرا تیروری مە وەکو کوردستان پێدڤی ب کەسانێن زانا و شارەزا ھەیە ، و پارتی وەکو ھێزەکا سەرەکی ل کوردستانێ د ھەردوو روویێن چەکی و فکری دا رووبروویێ فکرا تیروری دبیت، و دیسان د بەرنامێ من دایە ئەگەر بچمە پەرلەمانی لسەر بابەتێ پێکڤە ژیانا ئاینی و نەتەوەی کار بکەم، و کار بو ڤەکرنا ناڤەندێن ئاینی بکەم و دیسان کار بو رێکخستەکا زێدەتر و خزمەتەکا باشتر بو کەس و کارێن شەھید و ئەنفالکریان و پێشمەرگێن قارەمان و تەخا گەنجان ژی بکەم).
نيشاندان
