ئەڤرۆ

ئەندامەكا پەرلەمانێ كوردستانێ ژ فراكسیۆنا پارتی دیموكراتی كوردستان ڕاگەهاند، ئەوێن بایكۆتا كۆمبوونێن جڤاتا وەزیرێن هەرێما كوردستانێ كری، بەرپرسیارەتیا مەزن ل سەر ملێ وانە، ل هەموو وەلاتەكی ژی هەكە ئالیەك، یان كەسەك ژ كارێ خوە یێ حكومی یێ ڕازی نەبیت دەست ژ كاری بەردەت و بایكۆتێ ناكەت.
لیزا فەلەكەدین كاكەیی، ئەنداما پەرلەمانێ كوردستانێ ژ فراكسیۆنا پارتی و ئەنداما جڤاتا ناڤەندی یا پارتی دیموكراتی كوردستان گوت» ئەركێ سەرەكی یێ وان ئەوە بڕڤرن بۆ جڤاتا وەزیران و كار بكەن».
لیزایێ گوت ژی» ئەم وەكو پارتی دیموكراتی كوردستان د ڕژدین ل سەر ئەنجامدانا هەلبژارتنێن پەرلەمانێ كوردستانێ، نێچیرڤان بارزانی، سەرۆكێ هەرێما كوردستانێ ڕۆژا ئەنجامدانا هەلبژارتنان یا دیاركری و مەسرور بارزانی سەرۆكێ حوكمەتا هەرێما كوردستانێ بەرهەڤیێن تمام یێن دەستپێكرین بۆ وێ چەندێ حوكمەت ڕێكاران بگریتەبەر بۆ ئەنجامدانا هەلبژارتنێن پەرلەمانێ كوردستانێ د ژڤانێ خوە یێ دیاركری دا».
هەروەسا گوت» بۆ پارتی تاكە بژاردە ئەنجامدانا هەلبژارتنایە، بەلێ مە پێخوەشە هەموو ئالی پێكڤە ڕێكبكەڤن و هەلبژارتنان بهێنە ئەنجامدان، چونكە پرۆسەیا هەلبژاتن گرەنتیا پاراستنا قەوارەیێ هەرێما كوردستانێ یە و پرۆسەیەكا دیموكراسیە كو بەردەوام هەرێما كوردستانێ شانازی پێكریە و پێدڤیە د ژڤانێ خوە دا بهێنە ئەنجامدان».
ئەوژی بەرچاڤكر» ڕاستە د ڕەوشەكا هەستیار داینە، بەلێ چاوان د دەمێن بۆری دا ڕوو ب ڕوویێ قەیرانان بووینە و نوكە ژی ئەڤ ڕەوشەدێ دەرباز بیت، وەلاتیان پشتڕاست دكەین كو حوكمەتا هەرێما كوردستانێ و ب تایبەتی پارتی دیموكراتی كوردستان ژ بەرپرسیارەتیێ نا ڕەڤیت و دێ بەرپرسیارەتیێ هەلگریت، ئەوێن بایكۆتا كۆمبوونێن جڤاتا وەزیران كری، هەكە ئەڤرۆ د خەما خەلكی دابن بلا بزڤرنە جڤاتا وەزیران و هەموو تشتەك ب دانوستاندنێ چارەسەری بۆ دهێتە دیتن».
لیزا فەلەكەدین دیاركر ژی» ئەەڤ ڕەوشا هاتیە پێش مخابن ڕەوشەكا نالەبارە ل هەرێما كوردستانێ هەتا نوكە، بەلێ د بێ ئۆمێد نابین، پارتی و ئێكەتی دو هێزێن سەرەكی نە و وان بۆریەكێ پڕ شانازی هەیە ب تایبەتی پارتی، وان هەموو قەهرەمانان ژ پێخەمەت ڤێ قەوارەی گیانێ خوە بەخشی و شەهیدبوون».

ئەڤرۆ

سەرۆك مەسعود بارزانی ل سالڤەگەرا تۆپبارانكرنا زانكۆیا سلێمانیێ و باژێرێ قەلادزێ پەیامەك بەلاڤكر و تێدا دبێژیت» ئەو كارەسات ستەمەكا مەزن و بەرپەڕەكێ دی یێ درندییا ڕژێما بەعس بوو بەرانبەر گەلێ كوردستانێ».
سەرۆك مەسعود بارزانی د پەیاما خوە دا دبێژیت» هێز و ئیرادەیا گەلێ كوردستانێ ژ فرۆكە و ناپالمان ب هێزتربوو و ل دووماهیێ ئیرادەیا كوردستانێ ل سەر ستەمێ و داگیركاریێ دا ب سەركەفت».

ئەڤرۆ

نێچیرڤان بارزانی، سەرۆكێ هەرێما كوردستانێ ل سالڤەگەرا 49 یا تۆپبارانكرنا زانكۆیا سلێمانیێ و باژێرێ قەلادزێ، پەیامەك بەلاڤكر و تێدا ڕاگەهاند» ب ئارمانجگرتنا زانكۆیا سلێمانیێ و باژێرێ قەلادزێ، بزاڤەكا دی یا نەزۆك یا ڕژێما بەعس بوو بۆ شكاندنا ئیرادەیا خەلكی و بزاڤا ڕزگاریخوازا كوردستانێ».
سەرۆكێ هەرێما كوردستانێ د پەیاما خوە دا دبێژیت» ل سالڤەگەرا 49 سالیا تۆپبارانكرنا زانكۆیا سلێمانیێ و باژێرێ قەلادزێ، ب ڕێز ڤە بیرئینانا شەهید و قوربانیێن وێ تاوانا ڕژێما بەرێ یا ئیراقێ دكەین. سەرێ ڕێزێ ل بەردەم گیانێ وان یێ پاقژ د چەمینین وسلاڤان بۆ خێزان و كەسوكارێن وان یێن سەربلند د هنێرین».
گۆت ژی» ب ئارمانجگرتنا زانكۆیا سلێمانیێ و باژێرێ قەلادزێ، بزاڤەكا دی یا نەزۆك یا ڕژێمێ بوو بۆ شكاندنا ئیرادەیا خەلكی و بزاڤا ڕزگاریخوازا كوردستانێ، بەلێ شەهیدكرنا قوتابی و مامۆستایێن زانكۆیێ و خەلكێ سڤیل یێ قەلادزێ، ورەیێن زێدەتر ب گیانێ بەرهنگاربوونا گەلێ كوردستانێ بەخشی و ل سەر داخوازیێن خوە یێن ڕەوا و خەباتێ بۆ ئازادیێ زێدەتر بەردەوام بوو».
ل دووماهیا پەیاما خوە گوت» د ڤێ هەلكەفتێ دا هەموو پشتەڤانیەكێ بۆ داخوازیێن خەلكێ نیشتمانپەروەرێ قەلادزێ و پشدەر دووپات دكەین و پێدڤیە ژ هەموو ڕوویەكی ڤە زێدەترخزمەتا وێ دەڤەرێ بهێتە كرن. دەڤەرا پشدەر بەردەوام كەلها شۆڕەش و سەرهلدانێن كوردستانێ بوو و ژ پێخەمەت ئازادیێ دا خودانا گەلەك شەهید و قوربانیێن مەزنە».

ئەڤرۆ

سەرۆكێ حوكمەتا هەرێما كوردستانێ، مەسرور بارزانی ڕاگەهاند، ب ڕێز ڤە بیرئینانا شەهیدێن قەلادزێ و هەموو شەهیدێن گەلێ كوردستانێ دكەین.
ل سالڤەگەرا هەردو كارەساتێن تۆپبارانكرنا باژێرێ قەلادزێ ل سالا 1974 و گوللەبارانكرنا سەرهلدانا 1982، مەسرور بارزانی، سەرۆكێ حوكمەتا هەرێما كوردستانێ د پێگەهێ خوە یێ تایبەت دا ل سەر تۆرا جڤاكی یا تویتەری دبێژیت» ب ڕێز ڤە بیرئینانا شەهیدێن قەلادزێ و هەموو شەهیدێن گەلێ كوردستانێ دكەین» هەروەسا گوت» بەردەوام ل بیرا مەنە».
دهێتە زانین ل 24/4/1974 فرۆكەیێن ڕژێما بەعس باژێرێ قەلادزێ و زانكۆیا سلێمانیێ ل وی باژێری تۆپبارانكرن و د ئەنجامدا 163 كەس شەهید بوون كو 9 كەس ژوان قوتابیێن زانكۆیێ بوون و نێزیكی 300 كەسان ژی برینداربوون.
ل سالا 1982 ل دەمێ بیرئینانا 24 نیسانێ و وێ تۆپبارانكرنێ، خەلكێ قەلادزێ دژی ڕژێما بەعەس سەرهلدا و ڕژێمێ دەست دڕێژی ب گوللەیان لێكر و دئەنجامدا دو كەس شەهیدبوون و پێنج كەسێن دی ژی برینداربوون.

ئەڤرۆ

هەولێر، قائید میرۆ

بڕیارە جڤاتا نوونەرێن ئیراقێ دەست ب كۆمبوونان بكەت بۆ پەسەندكرنا پڕۆژە قانوونا بودجەیا گشتی یا ئیراقێ، پەرلەمانتارەكێ پارتی دیموكراتی كوردستان ژی دبێژیت، پشتی پەسەندكرنێ قانوونا بودجەی دێ چیتە سەرۆكایەتیا كۆماری بۆ ئیمزا سەرۆك كۆماری و ل ڕۆژنامەیا فەرمی هێتە بەلاڤكرن بەلێ نێزیكی دو مەهـان دێ پێچن، لەوڕا ژی حوكمەتا ئیراقێ بڕیاردایە ٤٠٠ ملیار دیناران وەكو قەر بدەتە هەرێما كوردستانێ بۆ بەلاڤكرنا مووچێ فەرمانبەران.
شێروان دوبەردانی، ئەندامێ جڤاتا نوونەرێن ئیراقێ ژ فڕاكسیۆنا پارتی دیموكراتی كوردستان بۆ ڕۆژنامەیا (ئەڤرۆ) گۆت»بەری جەژنا ڕمەزانێ خواندنا دویێ بۆ پڕۆژە قانوونا بودجێ گشتیێ ئیراقێ هاتیەكرن و بڕیارە ل چەند ڕۆژێن داهاتی وەزیر و پارێزگار بهێنە گازیكرن بۆ جڤاتا نوونەرێن ئیراقێ لدۆر پڕۆژە قانوونا بودجێ گشتیێ ئیراقێ و دووڤدا دێ خواندنا سیێ ژئالیێ جڤاتا نوونەران ڤە بۆ پڕۆژە قانوونا بودجەی هێتەكرن و هێتە پەسەندكرن، پێشبینیێ دكەین هەتا سێ حەفتیێن دی پەسەندكرنا قانوونا بودجەی ڤەكێشیت و پشتی پەسەندكرنێ ژی دێ پڕۆژە قانوونا بودجەی هێتە هنارتن بۆ سەرۆك كۆماری و پشتی ئەوژی ئیمزایێ ل سەر دكەت دێ ل ڕۆژنامەیا فەرمی هێتە بەلاڤكرن و كەڤیتە د بیاڤێ بجهئینانێ دا».
شێروانی گۆت ژی» پڕۆژە قانوونا بودجەیا ئەڤسالە مەزنترین پڕۆژە قانوونە، چونكە تنێ بۆ ئەڤسالە نینە بەلكو بودجە بۆ سێ سالان دێ هێتە پەسەندكرن و سالانە ئاریشەیا گیرۆبوونا پڕۆژە قانوونا بودجەی نامینیت وەكو سالێن بۆری هەر جار چەند هەیڤەكا ڤەكێشیت، لەوڕا ئەم د وێ باوەریێ داینە دێ بیتە ئێك ژ قانوونێن مەزن یێن بودجەی ل ئیراقێ بۆ سێ سالێن بهێن».
ناڤبری ئاماژە كر» ژ بەر كو ڕێكارێن پەسەندكرنا پڕۆژە قانوونا بودجەی دێ گیرۆبن و دبیت هەتا دو مەهێن دی قانوونا بودجەی نەكەڤیتە د بیاڤێ بجهئینانێ دا حوكمەتا ئیراقێ بڕیاردایە ٤٠٠ ملیار دیناران وەكو قەر بدەتە حوكمەتا هەرێما كوردستانێ بۆ بەلاڤكرنا مووچێ فەرمانبەران بۆ هەیڤا نیسانێ، ئەو پارە ژی وەكو قەر دێ هێتە هەژمارتن ل سەر هەرێما كوردستانێ، پشتی قانوونا بودجەی دهێتە پەسەندكرن دێ ئەو پارە ژ پشكا هەرێما كوردستانێ هێتە ڤەگەڕاندن، چونكی دەمێ مەهەكێ یە هەرێما كوردستانێ پرۆسەیا هنارتنا پەترۆلێ بۆ ژ دەرڤە ڕاگرتیە وپێدڤیە حوكمەتا ئیراقێ هاریكاریا هەرێما كوردستانێ بكەت بۆ بەلاڤكرنا مووچێ فەرمانبەران، هەردەمێ قانوونا بودجەی هاتە بجهئینان ئەڤە هەرێما كوردستانێ دێ پشكا خوە یا بودجەی وەرگریت و مووچێ فەرمانبەران وەك بەرێ د دەمێ خوە دا هێتە بەلاڤكرن و ئەم گەلەك د گەشبینین پشتی ڕێككەفتنا د ناڤبەرا مەسرور بارزانی، سەرۆكێ حوكمەتا هەرێما كوردستانێ و محەمەد شیاع سۆدانی، سەرۆكێ حوكمەتا ئیراقا فیدرال لدۆر پەترۆلێ و بودجەی دێ هێشتا ڕێككەفتن و نێزیكبوون هەبن بۆ چارەسەركرنا ئاریشەیێن دی ژی».

ئەڤرۆ

عەزیز هەورامی

پشتی خیانەتا 16 ئۆكتۆبەرێ بەردەوام ئەرەبێن هاوردە شەڕی ب كوردێن دەڤەرێن كوردستانی یێن دەرڤەی ئیدارەیا هەرێما كوردستانێ دفرۆشن و ئاخا وان داگیردكەن. هێزا پێشمەرگەی و سەركردایەتیا كوردی، هوشداری دایە و دبێژین ڕێكێ ب ستەم و ب ئەرەبكرنا ئاخ و خەلكێ كوردستانێ نادەین، ئەندامەكێ كورد ل جڤاتا نوونەرێن ئیراقێ دبێژیت، دێ ئاخڤتن ل گەل ئالیێن ئیراقی هێتە كرن و ڕێك ب ئەرەبكرنا گوندێ پەلكانە ناهێتە دان.
شوان كەلاری، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان بۆ ڕۆژنامەیا ئەڤرۆ گوت» ئەرەبێن هاوردە ل گوندێ پەلكانە غەدرێ ل كوردان دكەن، هێزێن حەشدا شەعبی ژی هاریكاریا وان دكەن، نە سەركردایەتیا سیاسی یا كوردی و نە خەلكێ ڕەسەن یێ وی گوندی و نە پەرلەمانتارێن كورد ژی ل بەغدا ڤێ چەندێ قبوول دكەن، ئەگەر ژی بجهنەئینانا مادەیێ 140 یێ دەستوورێ ئیراقێ یە، پەلكانە گوندەكێ كوردنشینە و هیچ دەمەكی غەدركرن ل خەلكێ مە ژ ئالیێ ئەرەبێن هاوردە ڤە قبوول ناكەین».
پەرلەمانتار شوان كەلاری زێدەتر گۆت» پشتی بێهنڤەدانا جەژنا ڕەمەزانێ دێ پێرابوونێن قانوونی دەست پێكەین و دێ مە ل گەل جێگرێ سەرۆكێ جڤاتا نوونەرێن ئیراقێ ئاخڤتن هەبیت هەروەسا ل گەل ئالیێن دی یێن پەیوەندیدار».
شوانی خویاكر ژی» سەركردایەتیا كوردی ژی ڕاستەوخوە ل سەر ڤێ پرسێ ل گەل سەرۆكایەتیا حوكمەتا ئیراقێ دێ ئاخڤیت و یا ل سەر هێلێ و ڕێكێ نادەین غەدر ل خەلكێ پەلكانە بهێتە كرن، ل دەمێ دەستهەلاتا بەعسیان ستەمەكا مەزن ل خەلكێ گوندێ پەلكانە هاتیە كرن و بۆ تێكدانا دیموگرافیا گوندی كورد ژێ دهاتنە دەركرن و ئەرەب ل جهێن وان ئاكنجی دكرن و پشتی ژناڤچوونا ڕژێما بەعس ئەرەبان ب خوە دزانی كو ئاخا وی گوندی یا داگیركری لەوما ئەو گوند چۆلكر بەلێ پشتی خیانەتا 16 ئۆكتۆبەرا 2017 دووبارە ئەرەبێن هاوردە و حەشدا شەعبی دەست ب داگیركاریێ كر».
ناڤبری ئەوژی گوت» حوكمەتا نوكە یا ئیراقێ ب سەرۆكایەتیا محەمەد شیاع سۆدانی هیچ سیاسەتەكا ئاشكرا بۆ ب ئەرەبكرنێ نینە، گرۆپێن حەشدا شەعبی و هندەك خەلكێ شۆفینی و ژ دەرڤەی قانوونێ دخوازن د ناڤبەرا هەولێرێ و بەغدا دا نەخوەش بكەن و كێشەیان د ناڤبەرا خەلكێ دەڤەرێ دا دروست بكەن».
دیاركر ژی» نوكە پەیوەندیێن مە ل گەل بەغدا دباشن و دخوازین ب ڕێكا قانوونێ وان كێشەیان چارەسەر بكەین، كوردان ب درێژیا دیرۆكێ گیانێ خوە كریە قوربانی بۆ ئازادیێ، پێشمەرگە داكۆكیێ ژ ئاخا كوردستانێ دكەت، برگەیەكا كارنامەیا حوكمەتا محەمەد شیاع سودانی ئەوە كو مادەیێ 140 یێ دەستووری بهێتە بجهئینان و بودجە بۆ بهێتە دابینكرن، حالەتا ساخلەم نوكە ئەوە ب قانوون ل گەل سەرۆك وەزیرێن ئیراقێ كارنامە و دەستوور بهێتە بجهئینان، بەلێ هەر كەسێ ستەمێ ل خەلكێ گوندێن كوردستانێ بكەت ب پشتڕاستی ڤە پێشمەرگە یێ بەرهەڤە سنۆرەكی بۆ دەستدرێژیان دانیت».
ل دووماهیێ گوت» دەمێ سنۆرەك بۆ خەلكێ ستەمكار دهێتە دانان د ڕەڤن، دەمێ زانی وەلاتیێن كورد یێن خەلكێ گوندێ پەلكانە ستەمێ قبوول ناكەن و ب ڕێكا قانوونێ و هێزێ دێ بەرهنگاری وان بن، پتریا وان چوون و پەلكانە بجهـ هێلا و كێمەك یێن ماین چونكە ئەو ل بەردەم هێزێ و قانوونێ د ڕەڤن».

ئەڤرۆ

سەرۆك وەزیرێن ئیراقێ ڕاگەهاند، دابینكرنا مووچەیێ مووچەخۆرێن هەرێما كوردستانێ ئەركێ سەرەكی یێ حوكمەتا ئیراقێ یە و د پێگیرین ب ڤێ چەندێ.
دوهی دوشەمبی 17/4/2023 محەمەد شیاع سودانی، سەرۆك وەزیرێن ئیراقێ گوت» ئەڤرۆ كۆمپانیا (سۆمۆ) ل گەل بكڕێن پەترۆلی دێ گرێبەستەكێ ئیمزاكەن و د ڤێ حەفتیێ دا دێ دەست ب هنارتنا پەترۆلا هەرێما كوردستانێ هێتە كرن».
سەرۆك وەزیرێن ئیراقێ گوت ژی» دابینكرنا مووچەیێ مووچەخۆرێن هەرێما كوردستانێ ئەركێ سەرەكی یێ حوكمەتا ئیراقێ یە. ئەم د پێگیرین ب دابینكرن و پێدانا مووچەی ب مووچەخۆرێن هەرێما كوردستانێ».
سودانی ئاماژەكر» بۆ هنارتنا پەترۆلا هەرێما كوردستانێ تنێ بابەتێ تەكنیكی مایە و دێ نامە هێتە ئاراستەكرن بۆ حوكمەتا توركیا و دێ هنارتنا پەترۆلێ دەستپێكەت».
سەبارەت بهایێ دینارێ ئیراقی ل بەرامبەر دۆلاری، سودانی گوت» د دەمێ چەند حەفتیێن داهاتی دا دێ بهایێ دیناری ل بەرامبەر دۆلاری زێدەتر بلند بیت».

ئەڤرۆ

گرۆپێ سیاسەتا ئیراقێ، كو ژ كۆمەكا شارەزایێن سیاسی و ئابۆری ل سەر ئاستێ ڕۆژهەلاتا ناڤین پێكدهێت، ڕاپۆرتەك ل سەر حوكمەتا هەرێما كوردستانێ و حوكمەتا ئیراقێ سەبارەت دەستپێكرنا هنارتنا پەترۆلێ بەلاڤكر و تێدا باس ل وێ چەندێ كریە كو ڕێككەفتنا پەترۆلی د ناڤبەرا هەرێما كوردستانێ و حوكمەتا ئیراقێ دا دێ بیتە ئەگەرێ ڤەژاندنا زێدەتر یا ئابۆرێ هەرێما كوردستانێ.
د ڕاپۆرتا گرۆپێ سیاسەتا ئیراقێ دا هاتیە» هەرێما كوردستانێ د بوارێ وزێ دا خودانا دەزگەه و دەستهەلاتەكا جهگیرە و شیانێن هەین ل گەل بەغدا ب هەڤپشكی وی كەرتی بڕێڤە ببەت».
ڕاپۆرتا گرۆپا سیاسەتا ئیراقێ ل بن ناڤێ بڕیارا دادگەها پاریس و ڕێككەفتنا هەرێما كوردستانێ و بەغدا و رەنگڤەدانێن وێ، باس ل وێ چەندێ كریە كو هەرێما كوردستانێ د بوارێ كەرتێ وزەی دا دەزگەه و دەستهەلاتەكا جهگیر و شیانێن هەین ل گەل بەغدا ب هەڤپشكی وی كەرتی بڕێڤەببەن، كو ئەڤە ژی خالەكا گرنگە.
هەر د وێ ڕاپۆرتێ دا هاتیە» پێدڤیە بەغدا هەولێرێ وەكو هەڤپشكەكا یەكسان یەكسان ب هەژمێریتو سەركەفتنا بڕیارا دادگەها پاریس وەكو چەك بكارنەئینیت».
هەروەسا ئاماژەكریە» ڕێككەفتنا سەرۆك وەزیرێن هەرێما كوردستانێ مەسرور بارزانی و سەرۆك وەزیرێن ئیراقێ محەمەد شیاع سودانی ئەنجامێ بزاڤێن ژێرانە یێن وانە بۆ ب دووماهی ئینان ب ناكۆكیێن درێژخایەنێن وزێ، دشیاندایە ڕێككەفتن ببیتە هۆكارەك بۆ یەكخستنا بزاڤێن هەردو سەرۆك وەزیران د بوارێ وزێ دا».
سەبارەت ئەنجامێن ڕاگرتنا هنارتنا پەترۆلا هەرێما كوردستانێ، گرۆپا سیاسەتا ئیراقێ ئاشكراكریە كو ئیتالیا یا نیگەرانە ژ ڕاگرتنا هنارتنا پەترۆلا هەرێما كوردستانێ و هەكە ڕەوش ب وی شێوەی بەردەوام بیت، دێ مەترسی ل سەر ئاسایشا وزێ ل ئیتالیا دروست بیت».
گرۆپا سیاسەتا ئیراقێ ئەوژی بەرچاڤكر» هەكە بەغدا و هەرێما كوردستانێ ب خواستەكا باش ڕێككەفتنا پەترۆلی بجهبینن، دبیت ببیتە ئەگەرێ ڤەچاندنا زێدەتر یا ئابۆری هەرێما كوردستانێ و بلندكرنا باوەریێ د كەرتێ وزێ دا».
ل دۆر بڕیارا دادگەها پاریس، ڕاپۆرتا گرۆپا ناڤبری ئاماژە ب وێ چەندێ كریە كو، ئیراقێ ب شێوەیەكێ ڕێژەیی داوا بریە، ئەوژی تنێ د بوارێ باركرنا پەترۆلێ دایە و ب سەركەفتنەكا باش ناڤئینایە، ئەوژی بەرچاڤكریە د دەمەكی دا توركیا ڕێزێ ل بڕیارا دادگەها پاریس دگریت، ڕامانا وێ ئەو نینە كو پەسەند دكەت.

ئەڤرۆ

سەبارەت پەیوەندی و هەماهەنگیێن لەشكرێ ئیراقێ و هێزا پێشمەرگەی و پێكئینانا لیوایێن هەڤپشك د ناڤبەرا هەردو ئالیان دا، نوونەرێ حوكمەتا هەرێما كوردستانێ ل فەرماندەیا هێزێن هەڤپشك یێن ئیراقێ ڕادگەهینیت، پشتی دەستبكاربوونا محەمەد شیاع سۆدانی وەكو سەرۆك وەزیران و فەرماندەیێ گشتی یێ هێزێن چەكدار ل ئیراقێ، پەیوەندیێن لەشكرێ ئیراقێ و پێشمەرگەی د ئاستەكێ بلند دانە، هەروەسا دیاركر ژی: یەكەیێن 70 و 80 نەماینە.
عەبدولخالق تەلعەت، نوونەرێ حوكمەتا هەرێما كوردستانێ ل فەرماندەیا هێزێن هەڤپشك یێن ئیراقێ، گوت» پەیوەندی و هەماهەنگی د ناڤبەرا لەشكرێ ئیراقێ و هێزا پێشمەرگێ كوردستانێ، د ئاستەكێ بلند دانە، لەوما هەر بڕیارەك كو ل ئاستێ سەربازی یان ئەمنی دهێتە دان، ب ئاگەهداری و بەرهەڤبوونا نوونەرێ حوكمەتا هەرێما كوردستانێ و نوونەرێ هێزا پێشمەرگێ كوردستانێ دهێتە دان».
نوونەرێ حوكمەتا هەرێما كوردستانێ ل فەرماندەیا هێزێن هەڤپشك یێن ئیراقێ دیاركر ژی» لەشكرێ ئیراقی ل دەڤەرێن كوردستانی یێن ل دەرڤەی ئیدارا هەرێما كوردستانێ، نەشێت بێی هێزا پێشمەرگەی كونترۆلا ڕەوشا ئەمنی بكەت».
خویاكر» مەترسی ل سەر وان دەڤەرێن كو ڤالاتیا ئەمنی تێدا هەی، هێشتا یێن ماین و ب دووماهی نەهاتینە، چونكە داعشی هێشتا دشێت ل وان دەڤەران خوە ڤەشێریت، هەڤشێوەیێ چیایێ قەرەچووخ، حەمرین و كەركووك و تكریت».
هەروەسا دووپاتكر» هەبوونا حەشدا شەعبی و پۆلیسێن فیدرالی ل وان دەڤەرێن كو ب ڤالاتیا ئەمنی د بەرنیاسن، گرفتان دروست دكەت».
عەبدولخالق تەلعەت هیڤی ژی خواستن كو بودجەیا گشتی یا ئیراقێ بهێتە پەسەندكرن و شایستەیێن دارایی یێن وەزارەتا پێشمەرگەی و جهگیركرنا مووچەیێ هەردو لیوایێن هەڤپشك بهێتە پەیداكرن، كو دەڤەرێن ڤالاتیێن ئەمنی دێ پێ هێنە پڕكرن». بەرچاڤكر ژی كو ب پەسەندكرنا بودجەیێ گشتی یێ ئیراقێ بۆ سالا 2023 دێ پتریا كێشەیێن دارایی یێن هێزا پێشمەرگەی ب دووماهی هێن .
ل دۆر هێزێن 70 و 80، گوت» هێزێن 70 و 80 نەماینە، بەلكو یێن بووینە فیرقا ئێك و فیرقا دوو سەر ب سەرۆكایەتیا ئەركان ل وەزارەتا پێشمەرگەی».