ئه‌ڤرۆنيوز:

سه‌رۆك مه‌سعود بارزانى ل دۆر هێرشا ئه‌ڤرۆ شه‌مبيێ 8/9/2018 يا كۆمارا ئيسلامى يا ئيرانى ل سه‌ر باره‌گايێ حزبا ديموكرات ل كويه‌، په‌يامه‌ك به‌لاڤكر.

سه‌رۆك بارزانى دپه‌ياما خوه‌ دا دبێژيت” ب هێرشا ب مووشه‌كان وتوپبارانكرنا كۆمارا ئيسلامى يا ئيرانى بۆ سه‌ر باره‌گايێ حزبا ديموكرات ل باژێرێ كويه‌ گه‌له‌ك يێ نيگه‌ران وخه‌مبارم ب تايبه‌ت كو زيانه‌كا مه‌زن يا گيانى ومادى ل دووڤ خوه‌ هێلا، دده‌مه‌كى دا ڤێ هێرشێ شه‌رمزار دكه‌م، سه‌ره‌خوه‌شيا خوه‌ ئاراسته‌ى كه‌سوكارێن شه‌هيدێن وێ هێرشێ دكه‌م وهيڤيا چاكبوونێ بۆ برينداران دخوازم”.

سه‌رۆك بارزانى دپه‌ياما خوه‌ دا گۆت ژى” داخوازێ ژ هه‌موو لايه‌كى دكه‌م كو هه‌رێما كوردستانێ نه‌بيته‌ مه‌يدانا ململانێ، چونكى هه‌رێمێ ب خوه‌ كێشه‌ وته‌حه‌ديات وگه‌فێن مه‌زن ل به‌رده‌م يێ هه‌ين، ب پێدڤى ژى دزانم بۆ هه‌موو لايه‌كى رابگه‌هينم كو كێشا گه‌لێ كورد ب توندوتيژيێ وكوشتنێ وتوپبارانكرنێ چاره‌سه‌ر نابيت ورێ وشێوازێن ئاشتيانه‌ باشترين چاره‌سه‌رى نه‌ بۆ هه‌موو كێشان”.

ئه‌ڤرۆنيوز:

وه‌زاره‌تا خواندنا بلند وڤه‌كۆلينێن زانستى راگه‌هاند، دێ ب شێوه‌كێ راسته‌وخوه‌ به‌رسڤا پرسيارێن ده‌رچوويێن پۆلا 12 ئاماده‌يى ده‌ين.

وه‌زاره‌تا خواندنا بلند به‌لاڤكر” داخوازێ ژ ده‌رچوويێن پۆلا 12 ئاماده‌يى دكه‌ين هه‌ر پرسياره‌كا هه‌وه‌ هه‌بيت ل دۆر سيسته‌مێن وه‌رگرتنێ (زانكۆلايه‌ن، راسته‌وخوه‌ ب كريديت، پارالێل وئێڤاران) دكۆمێنته‌كێ دا بنڤيسن وسوباهى ئێكشه‌مبى 9/9/2018 ل ده‌مژمێر 12:30 نيڤرۆ ژلايێ (ئارام ئيبراهيم) رێڤه‌به‌رێ ناڤه‌ندا وه‌رگرتنێ به‌رسڤ هێنه‌ دان”.

دياركر ژى، بۆ نڤيسينا پرسيارێن خوه‌، كليكێ ل سه‌ر ڤى لينكێ فه‌يسبووكى بكه‌ن.

ئه‌ڤرۆنيوز:

جێگرێ سه‌رۆكێ لژنا ئاسايشێ وجڤاتێن خوه‌جهى ل په‌رله‌مانێ كوردستانێ راگه‌هاند، پێدڤيه‌ سه‌روه‌ريا ئاخا كوردستانێ يا پاراستى بيت تاكو چو وه‌لاته‌ك نه‌شێت وێ سه‌روه‌ريێ پێشێل بكه‌ت.

نازم هه‌ركى، جێگرێ سه‌رۆكێ لژنا ئاسايشێ وجڤاتێن خوه‌جهى ل په‌رله‌مانێ كوردستانێ گۆت” مخابن عيراق وه‌كو وه‌لات سه‌روه‌ريا خوه‌ يا ژده‌ست داى ونه‌شێت كونترۆلا ئه‌سمانێ خوه‌ بكه‌ت، له‌وما ژبه‌ر وێ چه‌ندێ گرفت بۆ هه‌رێما كوردستانێ دروست بوويه‌ وسه‌روه‌ريا ئاخا هه‌رێمێ ژى دهێته‌ پێشێلكرن، چونكى رۆژانه‌ دبينين ئاخا كوردستانێ دهێته‌ بوردومانكرن ونوكه‌ ژى بوردومان گه‌هشتيه‌ سه‌نته‌رێ باژێران وه‌كو ئه‌وا ئه‌ڤرۆ ل كويه‌ رووداى”.

هه‌ركى بۆ مالپه‌رێ فه‌رمى يێ پارتى ديموكراتى كوردستان گۆت ژى”پێدڤيه‌ هێرش بۆ سه‌ر ئاخا كوردستانێ بهێنه‌ شه‌رمزاركرن، چونكى مه‌ دستوور يێ هه‌ى وپێدڤيه‌ دستوور ئاخا كوردستانێ وعيراقێ ژى بپارێزيت، به‌لێ مخاين كو دستوور ژى نه‌شێت سه‌روه‌ريا وه‌لاتى بپارێزيت، ئه‌ڤه‌ ژى په‌يوه‌ندى ب ده‌ستهه‌لاتا به‌غدا ڤه‌ يا هه‌ى وپێدڤيه‌ وێ ژى هه‌لويست هه‌بيت”.

ناڤبرى داخوازكر كۆمبوونه‌كا ب له‌ز يا په‌رله‌مانێ كوردستانێ بهێته‌ كرن ل دۆر وى بابه‌تى، چونكى كوردستان تووشى مه‌ترسيێ يا بووى وپێدڤيه‌ دانوستاندن ل دۆر ڤێ پرسێ بهێته‌ كرن.

ئه‌ڤرۆ نیۆز،عه‌زیز هه‌ورامی

هژماره‌كا چالاكڤانێن جڤاكى سڤيل ووه‌لاتيان ل پارێزگه‌ها هه‌له‌بجه‌ بۆ به‌خشينا خوينێ بۆ بريندارێن بوردومانا باره‌گايێن هه‌ردو حزبێن ديموكراتا ئيرانێ وديموكراتا كوردستانا ئيرانێ، به‌ر ب باژێرێ كويه‌ ڤه‌ چوون.

مه‌زهه‌ر عه‌لى، چالاكڤانێ جڤاكێ سڤيل بۆ ئه‌ڤرۆنيوز گۆت”  وه‌كو سۆزه‌كا كوردانه‌ ومرۆڤانه، ئه‌م هژماره‌كا چالاكڤان ووه‌لاتيێن پارێزگه‌ها هه‌له‌بجه‌ به‌ر ب باژێرێ كويه‌ ڤه‌ چووينه‌ بۆ به‌خشينا خوينێ بۆ بريندارێن كوردێن رۆژهه‌لات”.