ئه‌ڤرۆنيوز:
ئێكه‌تيا ته‌پا پێ يا جيهانى (فيفا) سێ گۆلپارێز به‌ربژاركرن بۆ هه‌ڤركيێ ل سه‌ر ب ده‌ستڤه‌ئينانا باشترين گۆلپارێز ل جيهانێ بۆ سالا 2018.
هه‌رسێ گۆلپارێز تيبۆ كورتوا گۆلپارێزێ هه‌لبژارتيێ به‌لجيكا ويانا ريال مه‌دريد وكاسبر شمايكا گۆلپارێزێ هه‌لبژارتيێ دانيمارك ويانا ليسته‌ر سيتى يا ئينگليزى وهوگۆ لوريس گۆلپارێزێ هه‌لبژارتيێ فه‌ره‌نسا ويانا توتنهام يا ئينگليزى به‌ربژاركرن بۆ وى ناسناڤى.
ئه‌ڤرۆنيوز:
ژێده‌ره‌كى ژ فايمقاميا قه‌زا به‌رده‌ره‌ش راگه‌هاند، ئه‌ڤرۆ سه‌رۆكێ حوكمه‌تا هه‌رێما كوردستانێ رازيبوون دياركر ل سه‌ر بجهئينانا 30 پرۆژان ل سنورێ قه‌زا به‌رده‌ره‌ش.
حوكمه‌تا هه‌رێما كوردستانێ بريار دايه هه‌موو پرۆژێن راگرتى ژئه‌گه‌رێ قه‌يرانا دارايى جاره‌كادى ده‌ست پێ بكه‌ن ول هه‌ر جهه‌كى پێدڤى ب پرۆژان هه‌بيت بهێنه بجهئينان، ئه‌ڤه ژى ژئه‌گه‌رێ وێ چه‌ندێ يه كو ره‌وشا ئابوورى يا هه‌رێما كوردستانێ باشتر بوويه.
بۆه‌تان بۆتانى، به‌رپرسێ راگه‌هاندنا قايمقاميا قه‌زا به‌رده‌ره‌ش بۆ مالپه‌رێ فه‌رمى يێ پارتى ديموكراتى كوردستان گۆت” ئه‌ڤرۆ سه‌رۆكێ حوكمه‌تا هه‌رێما كوردستانێ، نێچيرڤان بارزانى، رازيبوون دياركريه كو ل سنورێ قه‌زا به‌رده‌ره‌ش 30 پرۆژه بهێنه بجهئينان وهه‌ر ده‌مێ ئه‌و فه‌رمان گه‌هشته ده‌ستێ مه، دێ ده‌ست ب بجهئينانا پرۆژان هێته كرن”.
گۆت ژى” پشكه‌كا مه‌زن يا وان پرۆژان يێن سالێن 2012 و2013 نه كو نه‌هاتينه تمامكرن وپشكه‌كا دى ژى پرۆژێن نوو نه وجۆرێن وان پرۆژان ژى پتر رێك وپرن”.
ئه‌ڤرۆنيوز:
ژێده‌ره‌كى ژ وه‌زاره‌تا به‌رگريا عيراقێ به‌رسڤا داخۆيانيێن ئه‌ڤيگدۆر ليبرمان وه‌زيرێ به‌رگريا ئيسرائيلێ دده‌ت.
وه‌زيرێ به‌رگريا ئيسرائيلێ، ئه‌فيگدۆر ليبرمان، راگه‌هاندبوو كو دبيت ئيسرائيل پێگه‌هێن له‌شكرى يێن ئيرانى دناڤ ئاخا عيراقێ دا بكه‌ته ئارمانج.
دبه‌رامبه‌ر وان داخۆيانيان دا، فه‌رمانده‌كێ بلند يێ له‌شكرێ عيراقێ ل وه‌زاره‌تا به‌رگريێ بۆ كه‌نالێ (روسيا اليوم) يێ رووسى گۆت”به‌زاندنا سه‌روه‌ريا عيراقێ هێلا سوره”.
وى فه‌رماندێ عيراقى گۆت ژى كو وه‌زاره‌تا به‌رگريا عيراقێ چاڤه‌رێ به‌رسڤا فه‌رمى يا فه‌رماندێ گشتى يا هيزێن چه‌كدارێن عيراقێ، حه‌يده‌ر عه‌بادى دكه‌ت.
رۆهنكر ژى” عيراق وه‌لاته‌كێ خودان سه‌روه‌رى يه وله‌شكره‌كێ ب هێز يێ هه‌ى، ئه‌وا ليبرمان به‌حس لێكرى زيانى ب سه‌روه‌ريا عيراقێ دگه‌هينيت وهێلا سوره”.
ئه‌ڤرۆنيوز:
بهايێ ئێك دۆلارێ ئه‌مريكى ئه‌ڤرۆ دوشه‌مبى 3/9/2018 ريكورده‌كێ نوو شكاند وگه‌هشته 12 هزار تۆمه‌نێن ئيرانى وئه‌ڤه دبيته بلندترين بهايێ دۆلارى ل بازارێ نه‌فه‌رمى ئيرانى كو ئالوگۆركرن پێ هاتيه كرن.
مالپه‌رێ ( بى بى سى) يێ بريتانى به‌لاڤكر” ئه‌ڤرۆ ئێك دۆلارێ ئه‌مريكى ل بازارێ ئازاد ل ته‌هرانێ ب زێده‌تر ژ 12 هزار تۆمه‌نان مامه‌له پێ هاته كرن وئه‌ڤه‌ژى بۆ جارا ئێكێ يه دديرۆكا ئيرانێ دا بهايێ دراڤێ وێ ب وێ رێژێ بهێته خوار”.
ئه‌ڤرۆنيوز:
هنده‌ك ده‌زگه‌هين راگه‌هاندنێ يێن عيراقى ئه‌ڤرۆ دوشه‌مبى 3/9/2018 ژزارده‌ڤێ ژێده‌ره‌كى ژ ليستا فه‌تح ، به‌لاڤكربوو كو ئێكگرتوو ئيسلامى كوردستان وبه‌ره‌يێ توركمانى په‌يوه‌ندى ب رێزێن هه‌ڤپه‌يمانيا مالكى وعامرى كريه، به‌لێ موسه‌نا ئه‌مين په‌رله‌مانتارێ ئێكگرتوو ل په‌رله‌مانێ عيراقێ ئه‌و ده‌نگوباسه ره‌تكر.
موسه‌نا ئه‌مين ب ده‌زگه‌هێن راگه‌هاندنێ يێن ئێكگرتوو ئيسلامى گۆت” هه‌تا نوكه مه رێككه‌فتن ل گه‌ل چو لايه‌نه‌كى نه‌كريه بۆ چوونێ دناڤ هه‌ڤپه‌يمانيه‌كێ دا و چو راستى بۆ وان ده‌نگوباسان نينه كو فراكسيۆنا ئێكگرتوو ئيسلامى چوبيته دناڤ هه‌ڤپه‌يمانيا مالكى دا”.
گۆت ژى” وه‌كو هه‌ر چار لايه‌نێن ئێكگرتوو- گۆران – هه‌ڤپه‌يمانى ژبۆ ديموكراسيێ ودادپه‌روه‌ريێ وكۆمه‌لا ئيسلامى ددانوستاندنان داينه ودێ پێكڤه بريارێ ده‌ين كا دێ پشكداريێ ل گه‌ل چ هه‌ڤپه‌يمانيه‌كێ كه‌ين”.
ئه‌ڤرۆنيوز:
ل دووڤ وى ژڤانێ كۆمسيۆنا بلند يا هه‌لبژارتن وراپرسيێ ل هه‌رێما كوردستانێ دياركرى بۆ ده‌ستپێكرنا بانگه‌شا هه‌لبژارتان بۆ هه‌لبژارتنێن په‌رله‌مانێ كوردستانێ كو رۆژا چارشه‌مبى 5/9/2018 يه، لايه‌نێن سياسى ل هه‌رێمێ دشێن ل وێ رۆژێ ده‌ست ب هه‌وا هه‌لبژارتنان بكه‌ن.
ل دووڤ ئامارێن كۆمسيۆنا هه‌لبژارتنان وراپرسيێ، 31 قه‌وارێن سياسى دێ پشكداريێ دهه‌لبژارتنێن په‌رله‌مانێ كوردستانێ دا كه‌ن ب 709 به‌ربژاران وپێكهاتێن مه‌سيحى وئه‌رمه‌نى وتوركمانان 64 به‌ربژار يێن هه‌ين.
هه‌لبژارتنێن په‌رله‌مانێ كوردستانێ دێ ل 30 ڤێ هه‌يڤێ هێنه ئه‌نجامدان.
ئه‌ڤرۆنيوز:
ئه‌ڤرۆنیۆز، عه‌زیز هه‌ورامی
رێڤه‌به‌ريا ئاسايشا شاره‌زۆرێ درۆهنكرنه‌كێ دا كو كۆپيه‌ك بۆ ئه‌ڤرۆنيوز هاتيه هنارتن، تێدا هاتيه، هێزێن ئاسايشا سيروان پشتى ل رێيا دناڤبه‌را ناحيا سيروان وقه‌زا سه‌يد سادق بازگه‌يه‌كا ده‌مكى ددانن، دوى ده‌مى دا ماتورسيكله‌ك كو سێ وه‌لاتى ل سه‌ر بوون، ل نێزيك مه‌فره‌زێ چانته‌كێ دهاڤێژن وبزاڤا ره‌ڤينێ دكه‌ن، به‌لێ هيزێن مه ل بنكێ ئاسايشا سيروان شيان هه‌رسێ كه‌سان ده‌سته‌سه‌ر بكه‌ن وپاشى ده‌ركه‌فت ئه‌و چانتا هاڤێتى ئاميره‌كێ ديتنا شوونواران تێدابوو.
دوێ رۆهنكرنێ دا هاتيه ژى” ب فه‌رمانا دادوه‌رێ ڤه‌كۆلينا ئاسايشا شاره‌زۆرێ ول دووڤ مادا( 62 شوونوار )، دۆسێيا ڤه‌كۆلينێ بۆ هاته ڤه‌كرن وهاته هنارتن بۆ دادگه‌هێ، ڤۆكۆلين ژى يا به‌رده‌وامه.
ئه‌ڤرۆنيوز:
ئێكه‌تيا ته‌پا پێى يا نێڤده‌وله‌تى (فيفا) سێ راهێنه‌ر به‌ربژاركرن بۆ وه‌رگرتنا ناسناڤێ باشترين راهێنه‌ر ل جيهانێ بۆ سالا 2018.
هه‌ردو راهێنه‌رين فه‌ره‌نسى زه‌ينه‌دين زێدان وديدێه ديشامب ويێ كرواتى زلاتكۆ داليتش هاتينه به‌ربژاركرن بۆ باشترين راهێنه‌رێ جيهانێ بۆ سالا 2018.
ديشامبى سه‌ركێشيا هه‌لبژارتيێ فه‌ره‌نسا كربوو بۆ بده‌ستڤه‌ئينانا ناسناڤێ قاره‌مانيا جيهنى ل مونديالا رووسيا 2018، داليتش يێ كرواتى ژى هه‌لبژارتيێ كرواتيا گه‌هاندبوو ياريا دووماهيا مونديالا رووسيا 2018 بۆ جارا ئێكێ دديرۆكا كرواتيا دا. زێنه‌دين زێدان ژى راهێنه‌ري به‌رێ يێ ريال مه‌دريد سه‌ركێشيا وێ يانێ كربوو بۆ ب ده‌ستڤه‌ئينانا خۆلا قاره‌مانێن ئورۆپا بۆ جارا سيێ ل دووڤ ئێك.
برياره ل رۆژا 24/9/2018 ل له‌نده‌ن ناڤێ باشترين راهێنه‌رێ جيهانێ ل 2018 ژلايێ ئێكه‌تيا نێڤده‌وله‌تى يا ته‌پا پێ بهێته راگه‌هاندن.
ئه‌ڤرۆنيوز:
ئێكه‌تيا ته‌پا پێى يا نێڤده‌وله‌تى (فيفا)، ئه‌ڤرۆ دوشه‌مبى 3/9/2018 ليستا دووماهيێ يا به‌ربژارێن ب ده‌ستڤه‌ئينانا ناسنامێ باشترين ياريكه‌رێ جيهانى ل سالا 2018 به‌لاڤكر,
د وێ ليستێ دا ناڤێن ڤان ياريكه‌ران يێ تێدا:
1-كريستيانۆ رونالدۆ ياريكه‌رێ هه‌لبژارتێ پورتۆگال ويانا يوڤه‌نتوس
2- لوكا مودريتش ياريكه‌رێ هه‌لبژارتيێ كرواتيا ويانا ريال مه‌دريد
3- محه‌مه‌د سه‌لاح ياريكه‌رێ هه‌لبژارتيێ مسرێ ويانا لێڤه‌رپۆل
فيفايێ حه‌فت به‌ربژارێن دى دوورخستن ژوان يێ ئه‌رجه‌نتينى ليونێل ميسى ياريكه‌رێ به‌رشه‌لونا ويێ فه‌ره‌نسى ئه‌نتوان گريزمان ياريكه‌رێ ئه‌تله‌تيكۆ مه‌دريد وهه‌لبژارتيێ فه‌ره‌نسا.
ئه‌ڤرۆنيوز:
هێمن هه‌ورامى، ئه‌ندامێ سه‌ركردايه‌تيا پارتى ديموكراتى كوردستان ل دۆر ئالايێ كوردستانێ وريفراندۆمێ به‌رسڤا وه‌زيرێ ده‌رڤه‌يێ ئيرانێ دده‌ت.
هێمن هه‌ورامى دبه‌رپه‌رێ خوه ل سه‌ر تۆرا جڤاكى يا فه‌يسبووكى به‌لاڤكر” ل رۆژا 2/9/2018 ل به‌رده‌م په‌رله‌مانێ وه‌لاتێ خوه، وه‌زيرێ ده‌رڤه‌يێ ئيرانێ، محه‌مه‌د جه‌واد زه‌ريف، ل دۆر ئالايێ كوردستانێ، چه‌ند بابه‌ته‌ك تێك هه‌لكرن، گه‌له‌ك جاران خه‌لكێ نه‌شاره‌زا وبه‌رچاڤ ته‌نگ وكين ددل دا، داخۆيانى وده‌ربرينێن بێ سه‌روبه‌ر دده‌ن وكه‌س لێ ناگريت”.
گۆت ژى” به‌لێ جهێ حێبه‌تيێ يه مه باوه‌رنه‌دكر، وه‌زيرێ ده‌رڤه‌يێ ئيرانێ كو ب كه‌سه‌كێ دبلوماتكار وئه‌كاديمى وب رێز يا ناڤداره، وان جۆره داخۆيانى وئاخڤتنان ژێ گوهلێبين”.
هێمنى خوياكر” دانانا ئالايێ كوردستانێ بۆ هه‌ر كورد وكوردستانيه‌كى، جهێ سه‌ربلندى وشانازيه‌كا مه‌زنه، ل دۆر وێ چه‌ندێ كو سه‌رێ خوه بۆ ئالايێ كوردستانێ نه‌چه‌مانديه د رێ وره‌سمێن ئينانا ته‌رمێ رحمه‌تى مام جه‌لالى، به‌رى هه‌ر تشته‌كى پێدڤى بوو وه‌زيرێ ده‌رڤه‌يێ ئيرانێ زانيبا، هه‌موو پێرابوونێن رێ وره‌سمێن ئينانا ته‌رمێ مام جه‌لالى، بنه‌مالا وى ژى به‌رپرس بوو، نه سه‌رۆك بارزانى”.
زێده‌تر دبێژيت” سه‌باره‌ت ريفراندۆمێ، مافه‌كێ سروشتى يه هه‌ر ملله‌ته‌ك دچارچۆڤێ برياردانێ ل مافێ چاره‌نڤيسى ب شێوه‌كێ ئاشتيانه وديموكراسيانه وكاره‌كێ دروست وره‌وايێ گه‌لێ كوردستانێ بوو، هه‌كه يا شاش بايه، گه‌لێ كوردستانێ ب 93% ده‌نگ ب به‌لێ بۆ سه‌ربخوه‌يا كوردستانێ نه‌ددا، ئه‌وا شاش ئه‌وبوو، دژايه‌تيا وێ پرۆسا ئاشتيخواز وديموكراسيانه يا گه‌لێ كوردستانێ بوو”.
هێمن هه‌ورامى دبه‌رسڤا خوه دا بۆ وه‌زيرێ ده‌رڤه‌يێ ئيرانێ دبێژيت” هه‌رچه‌نده، ساله‌ك ل سه‌ر ريفراندۆمێ يا بۆرى و يا سه‌يره ل ڤى ده‌مى، بيرا وه‌زيرێ ده‌رڤه‌يێ ئيرانێ دهێت وبه‌حسێ ڤى بابه‌تى د ڤى ده‌مى دا بكه‌ت وب ڤى شێوه‌ى وده‌ربرينا هه‌لويستێ نه‌ره‌وا يێ هوسا به‌رامبه‌ر خه‌لكێ كوردستانێ، ب پشت راستى ڤه كێشێن ناڤخوه‌يى يێن ئيرانێ چاره‌سه‌ر ناكه‌ت وئه‌م ل وێ باوه‌رێ نه‌بووين گوه ل ڤان جۆره داخۆيانى وده‌ربرينا بين ژ وى”.
نيشاندان