ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ پلا گه‌رمێ ل پارێزگه‌هێن هه‌رێما كوردستانێ يا ئه‌ڤرۆ وسوباهى به‌لاڤكرن.
رێڤه‌به‌ريا ناڤبرى ئاماژه دا كو پلا گه‌رمێ ئه‌ڤرۆ ئه‌ينيێ 31/8/2018 ل پاريزگه‌ها دهۆكێ دێ 41 بيت.
دياركر ژى كو پلا گه‌رمێ ل دهۆكێ سوباهى شه‌مبيێ 1/9/2018 دێ 40 بيت.
ئه‌ڤرۆنيوز:
دادگه‌ها ڤه‌كۆلينا به‌غدا – ده‌ستپاكى، فه‌رمانا ده‌سته‌سه‌ركرنا سه‌رۆكێ هه‌ڤپه‌يمانيا ميحوه‌رێ وه‌ته‌نى يێ عيراقى خه‌ميس خه‌نجه‌ر ده‌ركر.
ل دووڤ بريارا هژمار 288 ل رۆژا پێنجشه‌مبى 30/8/2018 ب ئيمزايا دادوه‌ر محه‌مه‌د ئيبراهيم هاتيه ده‌ركرن، فه‌رمان ل هه‌موو هيزێن پۆليسان هاتيه كرن كو ل هه‌ر جهه‌كێ هه‌بن خه‌ميس فه‌رحان خه‌نجه‌ر ئه‌لعيساوى سه‌رۆكێ هه‌ڤپه‌يمانيا ميحوه‌رێ وه‌ته‌نى يێ عيراقى ده‌سته‌سه‌ر بكه‌ن.
خه‌ميس خه‌نجر ل دووڤ مادێن 430 و431 ژقانوونا سزايێن عيراقى ژلايێ دادگه‌ها ڤه‌كۆلينێن به‌غدا يا ده‌سته‌يا ده‌ستپاكيێ فه‌رمانا ده‌سته‌سه‌ركرنێ بۆ هاتيه ده‌ركرن.
ئه‌ڤرۆنيوز:
ئه‌ڤرۆ ئه‌ينيێ 31/8/2018 ئاگر به‌ربوو چيايێ سه‌فين وهه‌تا نوكو تيمێن به‌رگريا شارستانى مژوولى كونترۆلكرنا ئاگرى نه.
ل ده‌مژمێر 7:30 سپێده‌يا ئه‌ڤرۆ ئه‌ينيێ، ل دووڤ كه‌نالێ كوردستان 24، ئاگر به‌ربوو چيايێ سه‌فين ل سنورێ شه‌قلاوه وتيمێن ئاگر ڤه‌مراندنێ بزاڤا كونترۆلكرنا ئاگرى دكه‌ن.
دياركر ژى كو هه‌تا نوكه ئاگر نه‌هاتيه كونترۆلكرن ورووبه‌ره‌كێ مه‌زن ژ زه‌ڤيێن وه‌لاتيان هاتينه سوتن.
وه‌ليد محه‌مه‌د،رێڤه‌به‌رێ به‌رگريا شارستانى يا شه‌قلاوه بۆ كه‌نالێ ناڤبرى گۆت” ل سپێدێ هاتينه ئاگه‌هداركرن ل دۆر وى ئاگرى كو به‌ربوويه پشت ئۆتێلێن VIP وئاڤاهيێ كه‌ڤن يێ قايمقاميا شه‌قلاوه وتيمێن مه ب له‌ز چوونه جهێ روودانێ بۆ كونترۆلكرنا ئاگرى”.
ل دۆر ئه‌گه‌رێ به‌ربوونا ئاگرى گۆت” هنده‌ك ره‌ز وباخ ل بنارێ چيايێ سه‌فين يێ هه‌ين وگه‌مان يا هه‌ى كو خودانێن وان ره‌زان ل ده‌مێ پاقژكرنا ره‌زێن خوه، يان هنده‌ك كه‌س ل نێزيك وى چياى ئاگر به‌ردابيت، به‌لێ ڤه‌كۆلين يا به‌رده‌وامه”.
ئه‌ڤرۆنيوز:
فرۆكێن توركى ئه‌ڤرۆ ئه‌ينيێ 31/8/2018 چيايێ مه‌تينا وگوندێ ره‌شاڤى ونێزيك كومه‌لگه‌ها هيتوت ل سنورێ قه‌زا ئامێديێ توپ بارانكرن.
ژێده‌ره‌كى ژ وێ ده‌ڤه‌رێ بۆ ئه‌ڤرۆنيوز گۆت” به‌رى نيڤرۆيا ئه‌ڤرۆ فرۆكێن توركى چه‌ندين ده‌ڤه‌رێن ب سه‌ر قه‌زا ئامێديێ ڤه توپ بارانكرن”.
گۆت ژى” هه‌ر ئێك ژ گوندێ ره‌شاڤێ ب سه‌ر ناحيا دێره‌لوكێ ڤه وده‌ڤه‌ره‌كا نێزيك ژ كومه‌لگه‌ها هێتوتێ توپ بارانكرن”.
خوياكر ژى” چو زيانێن گيانى ب وه‌لاتيێن ده‌ڤه‌رێ نه‌كه‌فتن، به‌لێ ئاگر ب پيش وپاوانى كه‌فت وزيان ژى گه‌هشتنه ره‌زێن وه‌لاتيێن وێ ده‌ڤه‌رێ”.
ئەڤرۆ نیوز ، زنار تۆڤی:
بەری پەرلەمانێ عیراقێ دەست ب ئێکەم کۆمبوونا خوە بکەت، وەسا بریاره سوبەهی شەمبیێ 1ئیلۆنا 2018 شانده‌كێ هەڤپشک یێ پارتی دیموكراتی كوردستان و ئێكه‌تیا نشتیمانی یا کوردستانێ سه‌ره‌دانا به‌غدا بكه‌ن، دێ پەیاما خوه یا پشكداریێ د حوکمه‌تا نوو یا عیراقێ دا، گەهیننە هەموو ئالیێن سیاسی ل بەغدا.
ئەو شاندێ پارتی و ئێکەتیێ یێ سەرەدانا بەغدا دکەت دێ هەڤپشک بیت و شاندێ پارتی دێ ب سه‌رۆكاتیا فازل میرانی سكرتێرێ مه‌كته‌با سیاسی یا پارتی بیت و شاندێ ئێکەتیێ دێ ب سەرۆکاتیا مه‌لا به‌ختیار به‌رپرسێ ده‌سته‌یا كارگێری یا مه‌كته‌با سیاسی یا ئێكه‌تیێ بیت، دیسا د وان کۆمبوونان دا شاندێ هەڤپشک دێ ل به‌غدا ل گه‌ل هەڤپەیمانیا سائیرون و نه‌سر و حیكمه و وه‌ته‌نیه کۆم بیت، د وان دیتن و کۆمبوونان دا دێ شاندێ هەڤپشک هه‌لویستێ خوه ل دۆر پشكداریا کوردان د حوکمه‌تا نوو دا گه‌هیننە وان هەموو لایەنان.
وەسا بریارە ژی کو ئەو شاندێ هەڤپشک یێ پارتی و ئێكه‌تیێ ل گه‌ل هه‌ڤپه‌یمانیێن ده‌وله‌تا قانوونێ و فه‌تح ژی كۆمبیت و پێكئینانا حوکمه‌تا نوو و مه‌رجێن كوردان یێن پشكداریێ د وان کۆمبوونان دا گۆتوبێژ بكه‌ن.
ئەڤرۆ نیوز ، زنار تۆڤی:
هادی عامری سەركردێ هەڤپەیمانیا فەتح كو ئێكە ژ دو بەرەیێن سەرەكی یێن ركابەر بۆ پێكئینانا حوکمەتا نوو یا عیراقێ، د دیدارەکێ دا ل گەل نوونەرێ سەرۆكێ ئەمریكا دا گۆتیە، هەر حوکمەتەکا ئەمریكا پێك بینیت دێ د ماوێ دو هەیڤان دا روخینن.
هەروەسا ل گەل نێزیكبوونا وادێ ئێكەم روونشتنا خولا نوو یا پەرلەمانێ عیراقێ کو بریارە ل 3 ئیلۆنا داهاتی بهێتە ساز کرن، گفتوگۆیێن هێزێن عیراقی بۆ پێكئینانا مەزنترین فراكسیۆن و حوکمەتا نوو چرتر دبیت، هەڤدەم جموجۆلا ئەمریكا و ئیرانێ دڤی باریدا ب رێیا گڤاشتنێ ل سەر هێزێن دیتر بۆ چوونە پال بەرەیێ لایەنگرێن خوە زێدەتر دبیت.
نڤێسینگەها عامری بەیاننامەک بەلاڤە كریە و تێدا هاتیە، کو هادی عامری ئەمیندارێ گشتی یێ رێكخراوا بەدر و سەرۆكێ هەڤپەیمانیا فەتح چاڤ ب برێت ماكگۆرك نوونەرێ سەرۆكێ ئەمریكا کەفتیە، د وێ دیدارێدا عامری دەستێوەردانێن ئەمریكا د پرسا پێكئینانا حوکمەتا نوو یا عیراقێ رەتکریە و دووپات كریە كو هەکە ئەمریكا یا مکور بیت کو هەر حوکمەتەکا عیراقی ژلایێ وان ڤە بهێتە پێكئینان ئەو دێ د ماوێ دو هەیڤان وێ حوکمەتێ روخینن.
ئەڤرۆ نیوز ، زنار تۆڤی:
هەڤپەیمانیا دەولەتا قانوونێ یا نوری مالكی ئاشكرا كریە کو ئیمزایا لایەنێن پشکدار یێن كوتلا مەزن یا ئامادەیە و رۆژا دوشەمبی دێ راگەهینن.
سەعد مەتلەبی سەركردە د هەڤپەیمانیا دەولەتا قانوونێ راگەهاندیە کو كوتلا مەزن د بەرژەوەندیا هەردو هەڤپەیمانێن دەولەتا قانوونێ و و فەتحێ و حزبێن كوردی و سونیان ئێکلا بوویە.
هەروەسا گۆتیە، چەند رێکارێن هەنە راگەهاندنا كوتلا مەزن گیروکریە، لێ ئیمزایا هێزێن پشکدار یا ئامادەیە.
دیسا ل رۆژا دوشەمبی دێ ئێکەم روونشتنا پەرلەمانێ نوو یێ عێراقێ برێڤەچیت، دهێتە چاڤەرێکرن کو دڤێ روونشتنێ دا کوتلا مەزن بهێتە راگەهاندن، بۆ هندێ کو كاندیدێ سەرۆك وەزیران دیاری بكەن و بهێتە راسپاردن بۆ پێكئینانا حوکمەتا نوو.
ئه‌ڤرۆنيوز:
ئه‌ڤ شه‌ڤه جاره‌كادى خوه‌نيشانده‌رين بهسرا چوونه سه‌ر جاده‌يان وده‌ست ب خوه‌نيشادانان كر وه‌كو ده‌ربرينا نه‌رازيبوونێ ژى ده‌ست ب داخستنا جاده‌يان كر.
ژئه‌گه‌رێ نه‌بوونا خومه‌تگزاريان وزێده‌ربوونا دياردا گه‌نده‌ليێ، ل ده‌ستپێكا هه‌يڤا ته‌مووزا بۆرى خوه‌نيشادانان ل بهسرا ده‌ستپێكر وپاشى به‌رفه‌رهتر لێ هاتن وهه‌موو پاريزگه‌هێن شيعه نشين ڤه‌گرتن، ئه‌ڤ شه‌ڤه ژى خوه‌نيشانده‌ران ل چه‌ند ده‌ڤه‌رێن باژێرێ بهسرا وگه‌رمه عه‌لى وجاده‌يا په‌روه‌رده ده‌ستپێكر.
خوه‌نيشانده‌ران ل ده‌ستپێكێ داخوازا خزمه‌تگوزاريێن ئاڤێ وكاره‌بێ وپێدڤيێن نه‌خوه‌شخانه‌يان وچه‌ندين داخوازيێن دى هه‌بوون، ژبلى نه‌هێلانا گه‌نده‌ليێ وبه‌رتيلێوخرابيا بارێ ئه‌منى.
دبه‌رامبه‌ر دا، حوكمه‌تا كاربه‌رێكه‌را حه‌يده‌ر عه‌بادى ب هاريكاريا ميليشيێن حه‌شدا شه‌عبى ب گوله‌يان وئاڤا گه‌رم به‌رسڤا خوه‌نيشانده‌ران ددا وژئه‌گه‌ري وێ چه‌ندێ ب سه‌دان خوه‌نيشانده‌ر بوونه قوربانى.
ئه‌ڤرۆنيوز:
وه‌زاره‌تا ده‌رڤه يا ئه‌مريكا رۆهنكرنه‌ك ل دۆر په‌يوه‌نديا ته‌له‌فۆنى دناڤبه‌را سه‌رۆك مه‌سعود بارزانى ومايك پۆمپيۆ وه‌زيرێ ده‌رڤه يێ ئه‌مريكا به‌لاڤكر وراگه‌هاند، به‌حسێ پێكئينانا حوكمه‌تا عيراقى يا نوو كريه.
د رۆهنكرنا وه‌زيراتا ده‌رڤه يا ئه‌مريكى دا هاتيه” وه‌زيرێ ده‌رڤه مايكل پۆمپيۆ دوهى ل گه‌ل مه‌سعود بارزانى سه‌رۆكێ به‌رێ يێ هه‌رێما كوردستانێ وسه‌رۆكێ پارتى ديموكراتى كوردستان ئاخڤت بۆ دانوستاندنێ ل دۆر پێشهاتێن عيراقێ وده‌ڤه‌رێ ب به‌رفره‌هى، پۆمپيۆى دووياتكر كو پێكئينانا حوكمه‌تا عيراقى يا نوو پرۆسه‌كا عيراقى يه ودڤێت ب گۆره‌ى خشتێ ده‌مێ دستوورى ب رێڤه‌بچيت وره‌نگڤه‌دانا خواستا ده‌نگده‌رێن عيراقى بيت”.
دياركر ژى كو وه‌زير پۆمپيۆ دياركر كو ئه‌مريكا هيڤيخوازه حوكمه‌ته‌كا ب هێز ببينيت كو هه‌موو پێكهاتان ب خوه‌ڤه بگريت وخزمه‌تا هه‌موو خه‌لكێ عيراقێ بكه‌ت.
ئه‌ڤرۆنيوز:
ئه‌ڤ شه‌ڤه حه‌يده‌ر عه‌بادى سه‌رۆك وه‌زيرێن عيراقێ بريار دا فالح فه‌ياز ژ پۆستێ سه‌رۆكاتيا ده‌سته‌يا ميليشياتێن حه‌شدا شه‌عبى لابده‌ت
ب فه‌رمانه‌كا حه‌يده‌ر عه‌بادى، سه‌رۆك وه‌زيرێن عيراقێ وفه‌رماندێ گشتيێ هێزێن چه‌كدار ل عيراقێ، فالح فه‌يسه‌ل فه‌هه‌د فه‌ياز ژ هه‌رسێ پۆستێن وى هاته لاده‌ن ئه‌وژى پۆستێن شيره‌تكارێ ئاسايشا نيشتمانى وسه‌رۆكێ ده‌سته‌يا حه‌شدا شه‌عبى وده‌زگه‌هێ ئاسايشا نيشتمانى.
نيشاندان