ئه‌ڤرۆ نيوز:

ژ بەر نەدانا مووچێ کارمەندێن راکرنا گلێشی ل سنوورێ ناحیا دێرەلۆک و شێلادزێ، بۆ ‏ماوێ چەند رۆژەکایە دەست ب مانگرتنێ کریە و ئەڤ یەکە ژی بوویە جھێ گازندا ‏وەلاتیان.‏

ئەندازیار حەمدی محیەددین، سەرۆکێ باژێرڤانیا دێرەلۆکێ بۆ رۆژناما ئەڤرۆ دیار کر، ‏دەمێ چەند رۆژایە کارمەندێن راکرنا گلیشی کو بۆ کۆمپانیەکێ ب گرێبەست کار دکەن، ‏دەست ب مانگرتنێ کریە و کارێ خوە ئەنجام نادەن و گۆت: “ئەڤ کارمەندە سەر ب ‏کۆمپامیا ھیزل ڤە نە و ب گرێبەست ل گەل کار دکەن، دیارە ژ بەر گیرۆبوونا مووچێ وانا ‏ژ لایێ کۆمپانیێ ڤە، وان ژی مانگرتن ژ کارێ خوە کریە، ئەڤ یەکە ژی بوویە جھێ گازندا ‏وەلاتیان و رۆژانە چەندین گازندە دگەھنە مە”.‏

گۆتژی: “ئەم بەردەدوام د پەیوەندیێ داینە بۆ چارەکرنا ڤێ ئاریشێ و د ڤان دو رۆژان دا ‏دێ ئاریشا وانا یا مووچەی ب دووماھی ھێت و ئەو کارمەند ژی دێ دەست ب کارێ راکرنا ‏گلێشی کەنە ڤە”.‏

ئەڤرۆ نيوز:‏

رێڤەبەرێ نەخشەدانانا ئاڤەدانی ل پارێزگەھا دھۆکێ بۆ رۆژناما ئەڤرۆ دیار کر، ژ بەرکو ‏پارکا گشتی یا دھۆکێ، ئێک ژ پڕۆژێن گرنگە بۆ باژێڕێ دھۆکێ، لەو سەرۆکێ حوکمەتا ‏ھەرێما کوردستانێ و پارێزگەرێ دھۆکێ ب فەر دبینن ئەڤ پرۆژە زوو بکەڤیتە د ‏قووناغێن ب جھئینانێ دا و دبێژیت: مە وەکو رێڤەبەریێن پەیوەندیدار دەست ب ‏بەرھەڤکرنا پڕۆژەی کریە و قووناغا ئێکێ کو کۆژاندنا عەردێ پارکێ و قەرەبووکرنا ‏مەلاکایە، د قووناغا دووماھیێ دایە و ل نێزیک ئەو وەلاتیێن ماف د وی عەردی دا ھەی؛ ‏دێ ھێنە قەرەبووکرن.‏

ئەندازیار کوردۆ ئیحسان، رێڤەبەرێ نەخشەدانانا ئاڤەدانی ل پارێزگەھا دھۆکێ ئاشکرا ‏ژی کر، پڕژێ پارکا گشتی یا باژێڕێ دھۆکێ؛ دێ رووبەرەکێ زۆر یێ کەسکاتی دەتە ‏دھۆکێ و گۆت: “پارکا گشتی یا دھۆکێ ل سەر رووبەری نێزیکی 300 دۆنەمێن عەردی ‏دێ ھێتە دروستکرن، ل دووڤ ماستەرپلانێ و بنەمایێن پلانسازیێ یێن زانستی، دیزاین و ‏نەخشەکێ گەلەک باش بۆ ھاتیە دانان کو د کەڤیتە دەڤەرا ئالۆکا و ھەرسێ پشکێن ‏پارێزگەھا دھۆکێ، وەکو دەڤەرێن فەیدیێ و دومیز، دەڤەرا سێمێلێ و دھۆکێ پێکڤە گرێ ‏ددەت و دکەڤیتە سیچگۆشەیا وان”.‏

خویا ژی کر، ئاریشا کۆژداندنا وی عەردێ بۆ پارکێ ھاتیە دەستنیشانکرن ھەبوو کو ‏عەردێ مەلاکا یە، لەو دڤیا ئەو وەلاتیە بھێنە رازیکرن و قەرەبووکرن، داکو ئەو عەردە ‏ببیتە مۆلکێ حوکمەتێ و بشێین کار ل سەر بکەین و گۆت: “مە کۆژاندنا وی عەردی یا ‏داخواز کری و نوکە ئەم ل گەل باژێڕڤانیا دھۆکێ کار دکەین کو قەرەبوویا وی خەلکی ‏پەیدا بکەین و مافێ وان مەلاک و جۆتیارێن ماف د وی عەردی دا ھەی، بھێتە ‏دەستنیشانکرن و بگەھنە مافێ خوە، نوکە ئەم د قووناغا دووماھیێ یا کۆژاندنا عەردی و ‏قەرەبووکرنا وان وەلاتیان داینە یێ ماف د وی عەردی دا ھەی و ل نێزیک دێ ھێنە ‏قەرەبووکرن”.‏

گۆتژی: “ھەموو خزمەتگۆزاری د ناڤ پارکێ دا ھەنە، مینا: جھێن وەرزشی بۆ وەلاتیان، ‏جھێن ھاژۆتنا پایسکلان، کافێ، خوارنگەە، ئۆتێل و مۆتێلێن چار و پێنج ستێر، سیلاڤێن ‏ئاڤێ و برکێن مەزن یێن ئاڤێ و سکرێن بچووک، جھێن بھێنڤەدانان و ل گەل رووبەرەکێ ‏زۆر یێ کەسکاتی و داروباران”.‏

ل دۆر شێوازێ ب جھئینانێ ژی ئەندازیار کوردۆی گۆت: “ژ بەر کو پڕۆژێ پارکا گشتی یا ‏دھۆکێ، پڕۆژەکێ مەزنە و کۆژمەکێ مەزن یێ پارەی بۆ دڤێت، لەو حوکمەت دێ ب رێیا ‏رێڤەبەریێن خوە یێن پەیوەندیار و وەبەرھێنانێ دێ ب جھئینیت، دیسا ئەم دخوازین ‏سەرمایەدار ژی بھێن وەبەرھێنانێ تێدا بکەن”.‏

ئەڤرۆ نيوز: ‏

چاڤدێرەکێ سیاسی ئاشکراکر، پارتی و ئێکەتیێ بۆ دروستکرنا حوکمەتا ‏نوویا عیراقێ قوناغێن باش دەربازکرینە، و ئەڤرۆ ھەتا سوبە دێ بابەت ‏ئێکلا بیت و پێدڤی یە کورد ب عەقلانە سەردەریێ ل گەل قەوارێن ‏سیاسی بکەن.‏

چاڤدێرێ سیاسی، دیندار نەجمان دۆسکی، بۆ رۆژناما ئەڤرۆ گۆت: ژ سالا ‏‏2003 ھەتا نوکە کوردان رۆلێ خوەیێ گرنگ ھەبوو ج د دروستبوونا ‏ھەموو حوکمەتێن عیراقێ و ھەر رۆلەکێ حوکمەتێن عیراقێ گرێدایی ب ‏پشتەڤانیا کوردان بوویە، ھەر دەما کوردان ڤیایە شیاشیە سەرۆک وەزیری ‏ب گوھۆریت، براھیم جەعفەری و مالکی، رۆلێ کوران حوکمەتا عەبادی ‏بۆ کاودانێن نێڤدەولەتی ڤەدگەریت و کورد ل سلێمانیێ بوون و حوکمەتا ‏بەغدا ھاتە پێکئینان و بن گڤاشتنێن ئەمریکا کورد پشکداری حوکمەتێ ‏بوون، بەلێ نوکە ژی کوردان ل عیراقێ پێگەھەکێ بھێز ھەیە، بەلاڤ بوونا ‏مالا شیعی ل سەر دو جەمسەران و کورد و سونە دێ ئێکلاکەن کوتلا ‏مەزن، پێدڤی یە کورد ب عەقلان کاری بکەن و ھندەک گرنتیا ژ ئالیێن ‏سیاسی ل عیراقێ وەربگرن کو سوبە کێشێن کوردی بھێنە چارەسەرکرن، ‏پتر کورد ھزرێ وێ قەوارا سیاسی بکەن ئەوان ل دووڤ چارەسەکرنا کێشە ‏و مافێن کوردان ڤە بھێت.‏

نەجمانی گۆتژی: پێدڤی یە وەک جارا دی حوکمەت نەھێتە دروستکرن و ‏شنوو کورد بچنە دناف دا یان کوتلا مەزن بھێتە پێکئینان و دووڤ دا ‏کورد خوە بدەنە گەل، پێدڤی یە ب کوردان کوتلا مەزن یا دروستکرنا ‏حوکمەتێ بھێتە پێکینان و کورد رۆلەکێ سەرەکی تێدا بگێرن، دا بیتە ‏ئەگەرێ گرنتیا مافێن خەلکێ کوردستانێ.‏

دیندار نەجمان چاڤدێرێ سیاسی، دیارکر کو ھەر قەوارەکێ سیاسی ماف ‏ھەیە ھەڤپەیمانیەکێ دروست بکەت، لێ ھەکە ھەر چار ئالیێن سیاسی ‏نەھێنە ناف ھەپەیمانیا پارتی و ئێکەتی دێ گران سەر راوستیت تایبەت ‏پشتی بەلاڤ بوونا بەیاناما ھەر چار ئالیێن سیاسی بەحسێ ڤەگەراندنا ‏پێشمەرگەی بۆ جھێن ناکوک نەھاتیەکرن، ھەڤپەیمانیا ھەر چار ئالیان یا ‏درەنگ بوو چونکە ھەتا پرۆژێ خوەیێ سیاسی دروست بکەن بۆ بەغدا ‏چونکە چوونا وان بۆ بەغدا ھەر دێ بەحسێ مادێ 140 و بودجێ کەن، ‏بەیاناما خوە دا بەحسێ رێڤەبرنا یا ھەڤپشک کربوو لێ بەحسێ ‏ڤەگەراندنا پێشمەرگەی بۆ دەڤەرێ، مادێ 140 نەکربوو، ھەکە ھەموو ‏کورد نە بنە ئێک ھەڤپەیمانی ژی ل بەغدا پێدڤی یە بۆ کارێن ‏نشتیمانی و ھەلویستێن نشتیمانی رێکخەریەک ھەبین دناڤبەرا ھەموو ‏ئالیێن سیاسی دا، گورەپانا سیاسی یا کوردستانی یا پرت بوویی بووینە ‏سێ چەق، پارتی و ئێکەتی، چار ئالیێن سیاسی، نەوەی نوێ، ھەکە ھەموو ‏ئالیێن کوردی ب ئێک فراکسیۆن چووبانە بەغدا دا پتر مافێن کوردان ب ‏دەست ڤە ئینان و دا پتر سەنگ ھەبیت ل بەغدا، ھەکە ھەر چار ئالیێن ‏سیاسی خوە بدەنە ل گەل پارتی و ئێکەتی باشتر بوویە.‏

دیندار نەجمان ئەو ژی گۆت پارتی و ئێکەتی چووینە دانوستاندێن ‏حوکمەتێ قوناغێن باش برینە و ڤەگەراندنا ھەر چار ئالیێن سیاسی بۆ ‏ناف ڤێ ھەڤپەیمانیێ ب مەرج کو ھەلبژارتنێن کوردستانێ بھێتە ‏پاشخستن، دبینم ھەکە رۆژێن بھێت سەرۆک پەرلەمان و سەرۆک کومار و ‏کوتلێن مەزن ھەموو دروست بن ڤەگەراندنا ھەر چار ئالیان بۆ ‏ھەپڤیەنیا ئێکەتی و پارتی چ گرنگیا خوە نابیت، لێ ھەتا نوکە چ ئالیێن ‏سیاسی داخازا پاشخستنا ھەلبژارتنێن ھەرێما کوردستانێ نەکرینە و ئەڤا ‏دھێتە گۆتن بتنێ راگەھاندنێ دا دھێتە بەحسکرن و پێدڤی یە و گرنگە ‏ھەلبژارتن دەمێ خوە دا بھێنەکر چونکو ئەڤە پرۆسێسەکا دیموکراسی ‏یە و دڤێت دەمێ خوە دا بھێتە ئەنجامدان.‏