ئەڤرۆ نیوز، نيوار محه‌مه‌د سه‌ليم:

بەرپرسێ راگەھاندنا رێڤەبەریا گشتی یا پەروەردێ ل پارێزگەھا دھۆکێ راگەھاند کو سوبەھی ئەزموونێن خولا دویێ یێن 9ێ بنەرەت و 12ێ ئامادەیی دێ دەستپێکەن.

ئەحمەد عەبدولا زوبێر، بەرپرسێ راگەھاندنا رێڤەبەریا گشتی یا پەروەردێ ل پارێزگەھا دھۆکێ، بۆ ئەڤرۆ نیوز گۆت: “سوبەھی رۆژا دوشەمبی ئەزموونێن نشتیمانی یێن خولا دویێ بۆ سالا خواندنێ 2017 – 2018 بۆ قووناغێن 9ێ بنەرەت و 12ێ ئامادەیی دەستپێکەن”.

ئاماژە ب وێ چەندێ ژی کر کو ب گۆرەیی خشتێ وەزارەتا پەروەردا حوکمەتا ھەرێما کوردستانێ، ژبلی رۆژا ئەینی ئەزموون دێ رۆژانە ھێنە ھێنە کرن و ل 5ی ئیلۆنا 2018ێ دێ ب دووماھی ھێن.

بەرپرسێ راگەھاندنا رێڤەبەریا گشتی یا پەروەردێ ل پارێزگەھا دھۆکێ دا زانین ژی کو 15 ھزار و 234 قوبابی ل سەر ئاستی بنەرەتی و 29 ھزار و 415 قوتابیێن 12ێ ئامادەیی کو ژ وان 17 ھزار و 470 قوتابی یێن زانستی نە و 11 ھزار و 945 قوتابی یێن وێژەیی نە و ئەڤ ھەموو قوتابیە ل سەر 569 بنگەھێن ئەزموونان ھاتینە بەلاڤکرن.

ئەحمەد عەبدولا زوبێر گۆتژی: “ئامادەکاریێن پێدڤی ھاتینە کرن ژبۆ ئەنجامدانا ڤان ئەزموونان وەکو ھۆلێن ئەزموونان و چاڤدێری و سەرپەرشتیکرنا ئەزموونان ژ لایێ سەرپەرشتیاران ڤە”.

ئه‌ڤرۆنيوز:

سه‌رۆكێ تيما راگه‌هاندنا حه‌جيێن هه‌رێما كوردستانێ ل سعوديێ راگه‌هاند، ل رۆژا 28-8-2018 كاروانێ ئێكێ يێ حه‌جيێن هه‌رێما كوردستانێ دێ زڤريت، هه‌كه‌ فرۆكێن مه‌ د مه‌زن بن، ده‌مێ زڤرينا هه‌موو كاروانان دێ كێمتر بيت.

نه‌به‌ز ئيسماعيل، سه‌رۆكێ تيما راگه‌هاندنا حه‌جيێن كوردستانێ ل سعوديێ گۆت: “برياره‌ ل رۆژا 28-8-2018 كاروانێ ئێكێ يێ حه‌جيێن كوردستانێ ژ وه‌لاتێ سعوديێ بگه‌هيته‌ فرۆكخانا نێڤده‌وله‌تى يا هه‌ولێرێ، پاشى زڤرينا حه‌جيان دێ يا به‌رده‌وام بيت”.

گۆتژى: “هه‌كه‌ فرۆكێن مه‌ دمه‌زن بن، ده‌مێ زڤرينا هه‌موو كاروانێن حه‌جيان دێ كێمتر بيت”.

بۆ حه‌جا ئه‌ڤ ساله‌، پێنج هزار و469 وه‌لاتيێن هه‌رێما كوردستانێ بۆ بجهئينانا فه‌ريزا حه‌جێ سه‌ره‌دانا مه‌كه‌ ومه‌دينه‌ كريه‌، ژوان 600 هه‌تا 700 كه‌سان ب شێوێ بازرگانى يه‌.

ئەڤرۆ نيوز:

پەیڤدارێ دەستەیا گەشتوگۆزارێ ل ھەرێما کوردستانێ دیار کر کو ژ رۆژا 18-8-2018ێ ھەتا 22-8-2018ێ 181 ھزار گەشتیاران سەرەدانا ھەرێما کوردستانێ کریە، لێ ل جەژنا قۆربانی یا سالا بۆری 145 ھزار گەشتیاران سەرەدانا جھێن گەشتیاری یێن ھەرێمێ کربوو و گۆت: “د ڤان دو سالان دا رێژا ھاتنا گەشتیاران بۆ ھەرێما کوردستانێ 24% زێدەبوویە.

نادر روستی، پەیڤدارێ دەستەیا گەشتوگۆزارێ ل ھەرێما کوردستانێ بۆ روژناما ئەڤرۆ دیار کر کو ئەڤ سالە ل ژێری و ناڤەراستا عیراقێ چو ئاستەنگ ھەمبەر ھاتنا گەشتیاران بۆ کوردستانێ نەبوون، بەلێ ھاتنا گەشتیارێن ئیرانێ و تورکیا بۆ ھەرێما کوردستانێ کێم ببوو ژ بەر کو بھایێ دراڤێ تومەن و لیرەی گەلەک ھاتیە خوار و ئیرانێ باج ل سەر وەلاتیێن خوە زێدەکر ئەوێن گەشتا بۆ دەرڤەی وەلاتی دکەن، لەوڕا رێژەکا گەلەک کێم یا گەشتیارێن ئیرانی د روژێن جەژنێ دا قەستا کوردستانێ کربوو و گۆت: “چەم و رووبارێن کوردستانێ مولکێ وەلاتیانەو پێدڤیە وەلاتی ل گەل سەرمایەداران مفای ژ ڤێ رێژا مەزنا گەشتیارا بینن و جھێن گوزاری دروستبکەن”.

ناڤھاتی خویا کر کو 20% داھاتێ گەشتوگۆزارێ دبیتە پرۆژە و جوانکرن و دروستکرن ل جھێن گشتی، رێڤەبەرێن گەشتوگۆزارێ دشیاندایە مفای ژ وێ رێژی بینن و جھێن گۆزاری باشتر لێ بکەن بۆ وێ چەندێ رێژەکا باشتر یا گەشتیارا سەرەدانێ بۆ بکەن.

ژ ئالیێ خوە ڤە دیدار رەمەزان، رێڤەبەرێ گەشتوگۆزارێ ل قەزا ئاکرێ بۆ رۆژناما ئەڤرۆ دیار کر کو 13 جھێن گەشتیاری ل قەزا ئاکرێ ھەنە و د دەمێ چار رۆژێن جەژنا قۆربانی دا دا پتری 25 ھزار گەشتیاران قەستا جھێن گۆزاری یێن قەزا ئاکرێ کریە و گۆت: “ئەڤ رێژە ل ھەمبەر جەژنێن بۆری زێدەتر لێ ھاتیە و سال بۆ سالێ ھاتنا گەشتیاران بۆ قەزا ئاکرێ دزێدەبوونێ دایە”.

ژ ئالیەکێ دی ڤە حەمید ئەحمەد، بەرپرسێ نڤیسینگەھا گەشتو گۆزاری ل سیلاڤێ بۆ رۆژناما ئەڤرۆ دیار کر کو رێژا ھاتنا گەشتیاران د ڤێ جەژنێ دا گەلەک پتر بوویە ژ جەژنا چوویێ و ھاتنا ڤێ رێژا گەشتیاران یا چاڤەرێ کری نەبوویە و گۆت: “د ڤێ جەژنێ دا پتری 30 ھزار گەشتیاران قەستا سەیرانگەە و ھاڤینگەھێن دەڤەرا ئامێدیێ کریە و پتر ژ ھەر قەزایەکا دی گەشتیار ل دەڤەرا ئامێدیێ دمان و قەستا سیلاڤێ و گەلیێ شێرانە و ئاڤا شین و سەیرانگەھا ڤین و ئاشەوا و ئینشکێ دکرن”.

ئه‌ڤرۆ نيوز:
بڕیارە سوبە رۆژا دوشەمبی مامۆستایێن گرێبەست خوەنیشادانەکێ ل ھەمبەر ئاڤاھیێ جڤاتا سەرۆکایەتیا وەزیرێن ھەرێما کوردستانێ ئەنجام بدەن و تێدا داخوازا دامەزراندنێ بکەن، ئێکەتیا مامۆستایان ژی دبێژیت: ل گورەی قانوونێ پشتی سێ سالان وان مامۆستایان مافێ ھەی ببنە ھەمیشەیی.

د داخویانیەکێ دا مامۆستایێن گرێبەست دیارکریە، پشتی پێنج سال ل سەر گرێبەستا دامەزراندنا وان بۆرین ھێشتا چو بڕیار نەھاتینەدان بۆ دامەزراندنا ھەمیشەیی و داخوازکریە مامۆستایێن گرێبەست ل رۆژا دوشەمبی 27-8-2018 ل ھەمبەر ئاڤاھیێ جڤاتا سەرۆکایەتیا وەزیران بەرھەڤ ببن بۆ ئەنجامدانا خوەنیشادانێ، ژ بەرکو ئەڤە دووماھی دەلیڤەیە مامۆستایێن گرێبەست بشێن دەنگی خوە بگەھیننە حوکمەتا ھەرێما کوردستانێ و داخوازا مافێ خوە یێ قانوونی بکەن، ژ بەرکو ئەڤە چەندین سال بۆرین و گرێبەستێن وان نەبووینە ھەمیشەیی”.

ژ لایێ خوەڤە ژی عەبدولواحد محەمەد، سەرۆکێ ئێکەتیا مامۆستایێن کوردستانێ بۆرۆژناما ئەڤرۆ گۆت: “ئێک ژ داخوازیێن ئێکەتیا مامۆستایان ئەوە کو ھەموو مامۆستایێن گرێبەست ببنە فەرمی و ل گورەی قانوونێ ژی پشتی سێ سال ل سەر ئەنجامدانا گرێبەستا وان دبۆرن، دڤێت ببنە ھەمیشەیی، بەلێ ژ بەر قەیرانا ئابووری و راگرتنا پڕۆسا دامەزراندنا مامۆستایێن گرێبەست ژی ھاتینە راگرتن و د دەمێ خوە دا نەھاتیە ئەنجامدان”.