ئه‌ڤرۆنيوز:
سكرتێرێ گشتيێ به‌رێ يێ نه‌ته‌وێن ئێكگرتى، كۆفى عه‌نان دژيێ 80 ساليێ دا وه‌غه‌ركر.
ده‌زگه‌هێن راگه‌هاندنێ يێن جيهانى به‌لاڤكر، ئه‌ڤرۆ شه‌مبيێ 18/8/2018 كۆفى عه‌نان سكرتێرێ گشتيێ به‌رى يێ نه‌ته‌وێن ئێكگرتى دژيێ 80 ساليێ دا ل ژئه‌گه‌رێ نه‌خوه‌شيه‌كێ ل نه‌خوه‌شخانه‌كا پايته‌ختێ سويسرا (بيرن) وه‌غه‌ركر.
كۆفى عه‌نان ئێكه‌مين ره‌ش پيشت بوو گه‌هشتيه پۆستێ سكرتێرێ گشتيێ نه‌ته‌وێن ئێكگرتى كو دناڤبه‌را سالێن 1997 – 2001 د وى پۆستى دا بوو.
ناڤبرى دبنه‌ره‌ت دا خه‌لكێ وه‌لاتێ غانا يه ل ئه‌فريقيا، هه‌لگرێ خه‌لاتێ نۆبل يێ ئاشتيێ يه.
ئه‌ڤرۆنيوز:
پشكا هاتنوچوونا قه‌زا زاخۆ درۆهنكرنه‌كێ دا ئاگه‌هداريا شوفيران دكه‌ت لدۆر دانانا كاميره‌كا چاڤدێريێ,
درۆهنكرنا پشكا هاتنوچوونا قه‌زا زاخۆ دا هاتيه” ژبۆ به‌رژه‌وه‌نديا گشتى وكێمكرنا روودانێن ترافيكى، ئاگه‌هداريا هه‌موو شوفێران دكه‌ين، ل رۆژا شه‌مبى 18/8/2018 دێ رابين ب دانانا كاميرێن چاڤدێريا له‌زاتيا ترومبێلان (رادار) ل جادا پێشمه‌رگه هه‌ر ژ حسه‌ن ئاڤا هه‌تا ئۆڤه‌ر پاسا سه‌رێ گوندكى
ئەڤرۆ نیوز ، زنار تۆڤی:
وەسا بریارە کو بەری جەژنا قۆربانێ رێیا کەرکۆک هەولێر بهێتە ڤەکرن و پۆلیسێن فیدرال یێن حوکمەتا عیراقێ ژی ئەڤ نووچە پشتراست کریە، هەروەسا ژ ئەنجامێ وێ كۆمبوونا دناڤبەرا هەردو شاندێن کوردستانێ و عیراقی دا هاتیە کرن، بریار هاتیە دان کو خاله‌كا هه‌ڤپشك یا سه‌ربازی و ئێکا گۆمركی ژی بهێنه ڤەكرن و دێ ب هه‌ڤپشكی د ناڤبه‌را هه‌ولێر و به‌غدا دا هێنه برێڤه‌برن.
د هەمان دەمدا پۆلیسێن فیدرال یێن حوکمەتا عیراقێ راگەهاندیە، کو پشتی رێککەفتنا دناڤبەرا وان و حوکمەتا هەرێمێ دا هاتیە کرن، ئەڤە ماوێ چەندین رۆژانە ده‌ست ب دانانا پرا ئاسنی یا پردێ هاتیه كرن و بەری جەژنا قۆربانێ دێ ب دووماهی هێت و ب ئاماده‌بوونا به‌رپرسێن حكومی یێن هه‌رێمێ و به‌غدا دێ هێته ڤه‌كرن و وەلاتی دشێن هاتنوچوونێ د ڤێ رێکێ را بکەن، دیسا گۆتیە ژی دێ پرا کۆنکریتی هێتە دانان.
ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن : کو د روودانەکا هاتنوچوونێ دا ل دهۆکێ پێنج کەس بوونە قۆربانی.
ناڤهاتی زێدەتر ئاشکرار کر: ل شەڤا ١٨⁄٨⁄٢٠١٨ ل دەمژمێر ١:٣٠ شەڤ ل سەر جادا بارزان ل باژێرێ دھۆکێ و ل ترافیک لایتا مینی مارکیتێ روودانەکا هاتنوچوونێ روودایە دناڤبەرا چار ترۆمبێلان دا و د ئەنجامدا ژنەکێ گیانێ خوە ژ دەستدایە و چار کەسێن دیتر ژی ب گرانی برینداربووینە و هاتینە رەوانەکرن بۆ نەخۆشخانێ، کو هەموو ئەندامێن ئێک خێزانێ نە.
ئه‌ڤرۆنيوز:
نوشداره‌كێ تایبەتمەندێ نشتەرگەریێن گشتی دیارکر کو نەخوه‌شیا باوەسیرێ نەرەحەتیەكا زۆر بۆ خۆدانێ وێ چێدكه‌ت و گه‌له‌ك كه‌س تووشی ڤێ گرفتێ دبن، چەندین رێيێن خوه پاراستنێ بۆ ڤێ نەخوه‌شیێ ژى يێن هه‌ين.
عه‌دنان ئاكره‌يى، نوشدارێ تایبەتمەندێ نشتەرگەریێن گشتی ل نەخوه‌شخانا گۆلان ل ئاکرێ بۆ نوش نیوز گۆت ، چه‌ندين رێيێن خوه پاراسنێ ژ باواسيرێ يێن هه‌ين وه‌كو:
• خوارنێن زه‌نگین ب مادێن فایبه‌ری ئانكو ڕیشالان زێده بخوه: وه‌كو فێقی و سه‌وزەواتێن تازه، وپاقلەمەنی و تووڤێن ته‌واو (حبوب كاملة) كۆ مەبەستا مه ئەو تووڤێن تیڤل پێڤه
• گه‌له‌ك ڤەخوارنا ئاڤێ: داكۆ پیساتی رۆهنتر لێ بهێت و جهێ دەستاڤێ نه ئێشيت.
• كێمكرنا خوارنێن تیژ و ترشی و بهاراتان.
• خوه دووربێخه ژ روونشتنێ یان ڕاوه‌ستیانێ بۆ دەمێن درێژ (دڤێت جهێ خوه بگۆهۆری ده‌م بۆ دەمی)
• پابەندبوون ب ده‌مێن چوونا توالیتێ هەرده‌مێ مرۆڤ ته‌نگاڤ ببیت (ئانكۆ نابیت بهێته گیرۆكرن).
• خو دوورخستن ژ نەریتێ خوه گڤاشتنێ ده‌مێ تۆ دچیه توالیتێ دا (هێدی خوه ڤالاكەی)،هه‌ناسێ نه‌ڕاگره ل ده‌مێ خوه ڤالاكرنێ.
• پیته‌دان ب پاقراگرتنا جهێ ده‌ستاڤێ
• بكارئینانا توالێتێن رۆژهەلاتی ل جهێ توالێتێن رۆژئاڤايی
• هه‌لنەگرتنا بارێن قورس، ده‌مێ هه‌لدگری هه‌ناسێ دیسان نه‌ڕاگره
• ئه‌نجامدانا وه‌رزشێ فاكته‌رەكێ گرنگه بۆ خوه پاراستنێ
• بۆ ژنێن دوگیان نڤستن ل سەر لایێ چه‌پێ (داكۆ فشارا ل سەر دەمارا سه‌ره‌كی یا خوینێ كێمتر بیت)
ئه‌ڤرۆنيوز:
پۆليسێ ئيسرائيلى، ئه‌ڤرۆ ئه‌ينيێ 17/8/2018 ڤه‌كۆلين ل گه‌ل سه‌رۆك وه‌زيرێن ئيسرائيلێ بنيامين ناتانياهۆ كر ل دۆر كێشه‌كا گه‌نده‌ليێ وڤێ چه‌ندێ ژى مانا وى دپۆستێ خوه دا خستيه دمه‌ترسيێ دا.
ده‌زگه‌هێن راگه‌هاندنێ يێن ئيسرائيلى به‌لاڤكر” سپێده‌يا ئه‌ڤرۆ ئه‌ينيێ پۆليس هاتن مالا ناتانياهۆى ژبۆ ئه‌نجامدانا ڤه‌كۆلينێ دگه‌لدا دكێشه‌كا به‌رتيل خوارنێ دا يا گرێداى كۆمپانيا بيزيك كو مه‌زنترين كۆمپانيا گه‌هاندنێ يه ل ئيسرائيل”.
ڤه‌كۆلين ل دۆر وێ چه‌ندێ دهيته كرن كا ئايا ناتانياهۆ بزاڤ كريه رامالينا رۆژنامه‌ڤانى يا ئه‌رێنى ل مالپه‌رێ ( والا) يێ ده‌نگوباسان بده‌ستڤه‌بينيت ، كو ئه‌و مالپه‌ر يێ (شائول ئيلوفيتش) يه سه‌رۆكێ كۆمپانيا بيزيك، ل به‌رامبه‌ر هنده‌ك خزمه‌ت وئاسانكاريێن حكومى كو وان ئاسانكاريان مفايێ ب سه‌دان مليۆن دۆلاران گه‌هانديه كۆمپانيا ناڤبرى.
ئه‌ڤرۆنيوز:
پۆليسێن ئه‌لمانيا سێ په‌ناهندێن سوورى ده‌سته‌سه‌ركرن، كو ل پشكدارى د شه‌ره‌كێ مه‌زن دا ل مه‌يدانه‌كا باژێرێ (ماگديبۆرگ) ل ويلايه‌تا ساكسۆنيا كربوو.
راديۆيا “میتل دۆیتچه ڕۆندفۆنگ” يا ئه‌لمانى به‌لاڤكر” شه‌ره‌ك دناڤبه‌را 30 كه‌سان دا روودا كو دناڤ واندا كورد وسوورى هه‌بوون”.
دوى شه‌رى دا، چه‌قۆ وزنجير ودار هاتنه بكارئينان وتێدا زه‌لامه‌كێ دژيێ 44 ساليێ دا ب گرانى بريندار بوو، پاشى هاته ڤه‌گۆهاستن بۆ نه‌خوه‌شخانێ وژمه‌ترسيێ هاته قورتالكرن.
پشتى شه‌رى، پۆليسان پێنج گۆمانلێكرى ده‌سته‌سه‌ركرن وفه‌رمانا ده‌سته‌سه‌ركرنێ بۆ سێ كه‌سێن دژيێ 18 و19 و21 دا هاته ده‌ركرن، كو هاتينه تۆمه‌تباركرن ب بزاڤا كوشتنێ ودروستكرنا مه‌ترسيێ وپاشى دو گۆمانلێكريێن دى هاتن ئازادكرن.
ئه‌ڤرۆ نیوز:
ب هه‌لكه‌فتا (16) ی ته‌باخێ سال روژا دامه‌زراندنا پارتی دیموكراتی كوردستان و بورینا (72) سالان ل خه‌باتا بێ راوه‌ستیانا پارتی، ل باره‌گایێ لقێ ئێكێ پارتی سه‌ربه‌ست تروانشی به‌رپرسێ لقێ هه‌ڤدیتنه‌ك دگه‌ل (72) خێزانێن شه‌هیدان سازكر و تێدا هاریكاریێن ده‌راڤی ل سه‌ر هژمارا ناڤبری یا خێزانێن شه‌هیدان پارڤه‌كرن.
ل ده‌ستپێكا هه‌ڤدیتنا خو دگه‌ل خێزانێن شه‌هیدان، سه‌ربه‌ست تروانشی ب هه‌لكه‌فتا (16) ی ته‌باخێ سال روژا دامه‌زراندنا پارتی دیموكراتی كوردستان پیروزباهی ل خێزانێن شه‌هیدان كرن و دیاركر ئه‌م سه‌ربلندین ل سالڤه‌گه‌را دامه‌زراندنا پارتی دا، د خزمه‌تا كه‌س و كارێن وان قه‌هره‌مانان دا بیت یێن پارتی گه‌هاندیه ڤێ روژێ.
دیڤدا به‌رپرسێ لقێ دا زانین پارتی وه‌كو پێتڤی یه‌كا نه‌ته‌وه‌یی، سیاسی بو دوزا ره‌وایا ملله‌تێ كورد هاته دامه‌زراندن و ل پێناڤا ئارمانجێن نه‌ته‌وه‌یی و پاراستنا ئاخ و كه‌رامه‌تا عه‌رد و خه‌لكێ كورستانێ پارتی ب هزاران گه‌نجێن ڤی وه‌لاتی ب وی شێوه‌یی په‌روه‌رده كرینه كو ئاماده‌یی هه‌ر جوره قوربانیدانه‌كێ بن و ئه‌ڤرو ژی هین سه‌رفه‌رازن ژبه‌ركو سایه‌ی خوینا زه‌لام و كورێن هه‌وه یێن شه‌هید ئه‌ڤرو هه‌رێما كوردستانێ ئارامه و كوردستان یا پاراستی یه و خودان ده‌ستكه‌فت و دیروكن.
ژلایێ خوڤه خێزان و كه‌س و كارێن شه‌هیدان خوشحالییا خو ده‌ربرین ب هه‌لكه‌فتا (16)ی ته‌باخێ و سوزدان ل سه‌ر رێبازا بارزانیێ نه‌مر و شه‌هیدێن خو به‌رده‌وام بن ل سه‌ر خه‌بات و قوربانیدانێ ژپێخه‌مه‌ت پاراستنا كیانێ هه‌رێما كوردستانێ و ده‌ستكه‌فتێن وێ
نيشاندان