ئه‌ڤرۆنيوز:
ژێده‌ره‌كى ژ وه‌زاره‌تا دارايى وئابوورى بۆ ئه‌ڤرۆ نيوز ژڤانێ به‌لاڤكر مووچێ خانه‌نشينێن له‌شكرى ومه‌ده‌نى دياركر.
ل دووڤ وى ژێده‌رى، خانه‌نشينێن له‌شكرى دێ ل رۆژا شه‌مبيێ رێككه‌فتى 17/8/2018 مووچێن خوه وه‌رگرن ول رۆژا 18/8/2018 دێ خانه‌نشينێن مه‌ده‌نى مووچێن خوه وه‌رگرن.
ئاماژه دا ژى كو برياره ل هه‌ردو رۆژێن چارشه‌مبى 15/8/2018 وپێنجشه‌مبى 16/8/2018 هه‌موو وه‌زاره‌تێن ماين وزێره‌ڤانى وجڤاتا ئاسايشێمووچێن خوه وه‌ربگرن.
ئەڤرۆ نیوز،باسم قاسم شنگالی
ئێڤاريا ئه‌ڤرۆ سێشه‌مبى 14ی تەباخا 2018ێ ل بن درووشمێ(قڕ وفەرمان نه‌شێن ئێزدی و ئێزدیاتیێ وبه‌رزه بكه‌ن) بیرەوەریێن تراژیدیێن ئێزدیان یێن هەیڤا تەباخێ ل كۆمەلگەها شاریا هاتنە ساخكرن.
تایێن بنگه‌هێ لالش يێ ره‌وشه‌نبيرى وجڤاكى ل سنوونێ و شاریا و گرۆپێ دەنگێ خورتێن شنگالێ، ئەڤرۆ ل هۆلا لالش ئێك ل دەمژمێر 6ی ئێڤاری ئاهەنگەكا ماتەمینی بۆ ساخكرنا بیرەوەریێن تراژیدیێن كۆكوژیا گرعزێر و سیبا شێخدرێ و گوندێ كۆچۆ گێرا،ب به‌رهه‌ڤبوونا هژمارەكا كەسایەتی و بەرپرسێن دامودەزگەهێن حزبی و میری و كەسوكارێن قوربانیان.
ل بەراهیێ وەك رێزگرتن بۆ گیانێ جانگۆریێن شنگالێ، به‌رهه‌ڤبوويان خۆلەكەكێ راوه‌ستان ،پاشی شەمالك لسەر گیانێ قوربانیان هاتن هەلكرن، ددووڤ دا چەند پەیڤ ژبال به‌رهه‌ڤبوويان ڤە هاتنە خواندن و تێدا تەكەزى ل سەر رزگاركرنا گرتیێن د دەستێ رێكخراوا تیرۆرستیا داعشێ دا و ئاڤەدانكرنا شنگالێ و ڤەگەراندنا ئاواران بۆ سەر مال و حالێ خوه كرن.
پاشى كورتە فلمەك ل سەر وان كۆمكوژی و فەرمانێن بسەرێ ئێزدیان هاتین هاتە پیشاندان.
دپەنەلەكی دی دا چەند هەلبەست ژلایێ كۆمەكا هەلبەستڤانێن شنگالێ ڤە ل دۆر بیرەوەریێن تراژیدیێن كۆمكوژیا گرعزێر و سیبا شێخدرێ و گوندێ كۆچۆ هاتنە خواندن.
ل دووماهيا ئاهەنگا ماتەمینی پێشانگەهەكا وێنێن بیرەوەریێن تراژیدی يێن ب سەرێ ئێزدیان هاتین هاتە پیشاندان.
بەری چەند سالان تیرۆرستان هژمارەكا ترومبێلێن مینرێژكری ب خەلكێ سڤیل یێ گرعزێر و كۆمەلگەها سیبا شێخدری ڤە پەقاندن،دئەنجام دا هەزارەها كەس بوونە قووربانی هەتا نۆکە ژی خەلكێ بریندارێ وێ كۆمكوژیێ یە،تێدا چەندین كەس هاتنە كوشتن وپەككەفتی بوون،
ل رۆژا15/8/2014ێ رێكخراوا تیرۆرستیا داعش گوندێ كۆچۆ دوورپێچكر و پتر ژ 1700 كەسێن ئێزدی ژ هەردو رەگەزان دەستەسەركرن و ل نێزیكی 22گۆرێن بكۆم دا گولەبارانكرن و هەتا نۆکە ژی هژمارەكا وەلاتیان دبێ سەروشوونن.
ئه‌ڤرۆنيوز:
ژێده‌ره‌كى ژ گه‌نجينا هه‌رێما كوردستانێ دياركر كو پارێ پێدڤى بۆ مووچه‌ى يێ هه‌ى وهه‌تا رۆژا دوشه‌مبيا داهاتى 20/8/2018 دێ مووچێ هه‌موو مووچه‌خۆران هێته به‌لاڤكرن.
وى ژێده‌رى زێده‌تر بۆ باسنيوز گۆت” مووچێ خانه‌نشينان ژى دێ هێته به‌لاڤكرن”.
ژێده‌ره‌كى ژ لقێ هه‌ولێرێ يێ به‌نكا ناڤه‌ندى يا عيراقى ژى ئاشكراكر كو حوكمه‌تا عيراقى 317 مليار دينار يێن مووچێن فه‌رمانبه‌رێن هه‌ريما كوردستانێ يێن هنارتين ويێن گه‌هشتين.
ئەڤرۆنيوز، سالار دۆسكی:
بەرپرسێ نڤسینگەها رزگاركركرنا ره‌ڤانديێن ئێزدی دیاركر كو سوباهى چارشه‌مبى 15/8/ 2018 ل باژێرێ هەولێرێ دێ ئێكەم كونفرانسێ جینوسایدا ئێزدیان هێتە گرێدان كو سالانە دێ هێته ئه‌نجامدان.
حسێن قائیدی، بەرپرسێ نڤسینگەها رزگاركرنارەڤاندیێن ژن و كچێن ئێزدی بۆ ئەڤرۆنيوز گۆت” كونفرانسێ جینوسایدا ئێزدیان دێ بۆ ده‌مێ رۆژەكێ بیت و چەندین بابەتێن ل سەر جینوسایدا ئێزدیان ژلایێ بسپۆر و ئەو كەسێن ئەڤ كارەساتە ب چاڤێن خوە دیتی دێ هێنە بەحسكرن و شرۆڤەكرن”.
ناڤبری دياركر كو ب درێژی بابەت دێ هێتە شرۆڤەكرن و بەحسكرن و كار دێ هێتەكرن ئەڤ جینوسایدە ل سەر ئاستێ نێڤده‌وله‌تى بهێتە ناساندن.
ئەڤرۆنيوز ، سالار دۆسكی:
ب مەرەما رێكخستنا رەوشا ساخلەمیێ ل رۆژێن جەژنا قوربانی دا، قايمقاميا قه‌زا دهۆك ل گەل چەندین سازیێن پەیوەنديدار پشتی ئەنجامدانا كۆمبوونەكێ چەندین رێنمایێن ساخلەمی و قانوونی دەركرن.
عادل ئەنوەر محەمەد، بەرپرسێ هۆبا ساخلەمیا گشتی ل ڤیتێەرنەری یا دهۆكێ بۆ ئەڤرۆنيوز گۆت” ئه‌ڤرۆ سێشه‌مبى 14/8/2018 كۆمبوونەك ل گەل قایمقامێ قەزا دهۆكێ، سازیێن پەیوەنديدار هاتيه كرن ب مەرەما بەرهەڤی بۆ رۆژێن جەژنا قوربانی، رێكخستنا سەربرخانێن ئاژەلی بۆ دابینكرنا گوشتەكێ ساخلەم بۆ وەلاتیان ل بن چاڤدێریا ڤیتێەرنەریا دهۆكێ ل رۆژێن جەژنێ”.
عادلى ئەو ژی گۆت” ل هەر چار رۆژێن جەژنێ هه‌موو سەربرخانێن پارێزگەهێ دێ دخزمەتا وەلاتیان دابن، دیسا هەر كەسەكێ دڤێت رێنمایێن ساخلەمیێ یان هەر كارەكێ پێدڤی ب وەرگریت، دشێت پەیوەندیێ ب هژمارا ته‌له‌فۆنى ( 07504277660 ) يا تیمێن مە بكەت و دێ خزمەتا وی هێتەكرن، ديسا تیمەك دێ دووڤچوونێ ل مەیدانێن په‌زى دولبێ و بێسرێ كەت”.
ناڤبری ئەو ژی گۆت”پترحەزدكەین خەلكێ مە قەستا سەربرخانان بكەت و تەرشێ وان ل سەربرخانان بهێتە سەربرین”.
ديسا خواست ژی بەرمایكێن پشتی سەربرینا پەزی هەموو دكیسەكێ نایلۆنی یێ رەش دا بهێنە كۆمكرن و بۆ جهەكێ تایبەت بهێنە ڤەگۆهاستن.
گۆت ژى” پێشبینی دكەين ل رۆژانێن جەژنێ هەتا 14 هزار ته‌رش وكه‌ال بهێنه سه‌ربرين”.
ئه‌ڤرۆنيوز:
سه‌رۆكێ كۆمسيۆنا بلند يا سه‌ربخوه يا هه‌لبژارتن وراپرسيان ل هه‌رێما كوردستانێ، هندرين محه‌مه‌د ئه‌ڤرۆ سێشه‌مبى 14/8/2018 راگه‌هاند، به‌رهه‌ڤى دبه‌رده‌وامن بۆ هه‌لبژارتنێن په‌رله‌مانێ كوردستانێ، تۆمارا ده‌نگده‌ران دده‌مێ نووبوونێ دايه ونوكه ژى فه‌رمانبه‌رێن سه‌ر سندووقان دهێنه دامه‌زراندن وبه‌رهه‌ڤيێن لوجيستى دبه‌رده‌وامن ول قۆناغا دووماهيێ يه.
گۆت ژى” ده‌مه‌كێ كێم يێ ماى بۆ نووكرنا تۆمارا ده‌نگده‌ران وداخوازێ ژوه‌لاتيان دكه‌ين سه‌ره‌دانا ناڤه‌ندێن تۆماركرنێ بكه‌ن وپشتى ب دووماهى هاتنا ده‌مى ژى وه‌لاتى تنێ دشێن بچن ناڤێن خوه ببينن كا دێ ل كيرێ ده‌نگێن خوه ده‌ن، چو پێرابوونه‌كا دى ناهێته ئه‌نجامدان”.
دياركر ژى” به‌رهه‌ڤى يێن ددوماهى قۆناغ دا بۆ هه‌لبژارتنان وبۆ دامه‌زراندنا 42 هزار كارمه‌ندان ژى دكارێن خوه دبه‌رده‌وامين وهه‌موو پێدڤيێن لوجيستى ب رێيا كۆمپانيێن تايبه‌ت دێ دابين كه‌ن، هه‌روه‌سا 95% كارێ هووربينى كرنێ دناڤێن به‌ربژاران دا يێ ب يێ هاتيه ئه‌نجامدان ول ڤان نێزيكان دێ ئه‌نجام هێنه راگه‌هاندن وداخواز دكه‌ين به‌ربژار وقه‌وارێن سياسى پێگيريێ ب رێنمايێن كۆمسيۆنێ بكه‌ن”.
برياره هه‌لبژارتنێن په‌رله‌مانێ كوردستانێ ل 30 ئيلۆنا 2018 بهێنه ئه‌نجامدان.
ئەڤرۆ نیوز،ھەژار مەعروف:
پشتی دەستەیا کارگێریا یانا جەویە ب فەرمی ھەڤبەستا راھێنەرێ ھەلبژارتیێ عیراقێ باسم قاسم ئیمزاکری ل گەل ستاڤێ وی کو کارگێریا وێ یانێ ب فەرمی داخوازی ژ راھێنەرێ کورد و کورێ باژێرێ دھۆکێ سەردار محەمەد کر بۆ وەرگرتنا پوستێ راھێنەریا شیانێن لەشی بۆ وەرزێ ٢٠١٨-٢٠١٩.
یانا جەویە ئەوا ل ھەردو وەرزێن ٢٠١٦-٢٠١٧-٢٠١٧-٢٠١٨ شیای ناسناڤێ قارەمانیا کاسا ئێکەتیا ئاسیا یا تەپا پێ ب دەستخوڤە بینت و بۆ پاراستنا ناسناڤێ خوە یێ سێ ب فەرمی ھەڤبەست ل گەل راھێنەرێ ھەلبژارتیێ عیراقێ باسم قاسم ئیمزاکری یە و راھێنەرێ ناڤبری ژی ستاڤێ خوە دەست نیشانکریە ئەوژی پێکھاتیی نە ژ ئەحمەد خزەیەر ھاریکارێ راھێنەر و ھاشم خەمیس راھێنەرێ گولچیا و سەردار محەمەد راھێنەرێ شیانێن لەشی لێ راھێنەرێ کورد سەردار محەمەد داخوازا لێبورینێ ژ کارگێریا یانێ خواست کو نەشێت بەردەوامی ب دەتە کارێ خوە ل باژێرێ بەغدا بۆ ماوێ ئێک سال .
سەردار محەمەد د داخویانیەکا تایبەت دا بۆ ئەڤرۆ نیوز دیارکر ئەو سوپاسیا کارگێریا یانا جەویە و ھەردیسان راھێنەرێ بەرنیاس باسم قاسم کەت بۆ ھەلبژارتنا ئەوی بۆ پوستێ راھێنەریا شیانێن لەشی ل یانا جەویە لێ ژبەر چەند ئەگەرێن خێزانی ئەو نەشێت بۆ ماوێ سالەکێ ب تمامی ل باژێرێ بەغدا بژیت ھەردیسان ئەوی بەری نوکە ژی ل وەرزێن بوری ژ بەر ھەمان ئەگەر ھەڤبەستێن یانێن زەورا و نەفت وەست و مینا رەتکر بوو.
ھەژی گوتنێ یە سەردار محەمەد ئێک ژ بەرنیاسترین راھێنەرێن شیانێن لەشی یە ل سەر ئاستێ وەلاتێ عیراقێ ھەردیسان کارکریە ل گەل چەندین یانێن نافخوی و کەنداڤی راھێنەریا یانا زەورا ھەولێر زاخۆ ل خۆلا عیراقێ کریە ھەردیسان راھێنەریا یانێن ئیتحاد و عەجمان یێن ئیماراتی کریە و ھەلبژارتیێ ئولومپی و ھەلبژارتیێ ئێکێ عیراقێ
ئەڤرۆ نیوز، نیوار محەمەد سەلیم:
بڕیارە سوبەھی ئێڤاری ل پانۆراما ئازادیێ ل دھۆکێ چل رۆژیا ھۆنەرمەند و باشنڤیس زیرەک ژ لایێ سەندیکا ھۆنەرمەندان و کۆمەلا باشنڤیسان ڤە بھێتە ساخکرن.
باشنڤیس عادل، سەرۆکێ تایێ دھۆکێ یێ کۆمەلا باشنڤیسێن کوردستانێ بۆ ئەڤرۆ نیوز گۆت: “سوبەھی ل دەمژمێر 6:30ی ئێڤاری ل ھۆلا نالبەند ل پانۆراما ئازادیێ، دێ چل رۆژیا وەغەرکرنا ھۆنەرمەند و باشنڤیس زیرەک ھێتە گێران”.
زێدەتر گۆت: “فلمەکێ دێکیومێنتی دێ ل سەر ژیانا وی ھێتە نیشاندان و پاشان ژی پەیڤەکا ھەڤپشک یا سەندیکا ھۆنەرمەندان و کۆمەلا باشنڤیسان دێ ژ لایێ دلشاد محەمەد سەعید ڤە ھێتە خواندن ل گەل پەیڤەکێ ژی ب ناڤێ بنەمالا وی کو دێ ژ لایێ مالباتا وی ڤە ھێتە خواندن”.
دا زانین ژی کو باشنڤیس حکمەت و جەمیل زکری دێ بەحس ل ھندەک بیرھاتنێن خوە یێن ل گەل خودێ ژێ رازی کەن.
ئاماژە ب وێ چەندێ ژی کر کو ھندەک شەمالک ژی دێ ھێنە ھەلکرن و مەتالەک ژی دێ ژ لایێ کۆمەلا وان ڤە وەکو دیاری پێشکێشی خێزانا وی ھێتە کرن.
باشنڤیس عادل گۆتژى: “ل دووماھیێ ژی سیڤەرێ کوڕێ وی سترانەک یا ب بابێ خوە چێکری، دێ ل وێرێ بێژیت”.
ئیسماعیل عەبدولقادر یێ بەرنیاس ب باشنڤیس زیرەک ژ ئەگەرێ نەخۆشیەکا گران ل 1ی تیرمەھا 2018ێ ل باژێرێ دھۆکێ چوو بەر دلۆڤانیا خودێ.
ناڤبری ئێک ژ ھۆمەرند و باشنڤیسێن بەرنیاسێن پارێزگەھا دھۆکێ بوویە ل ماوێ بۆری و شوون تبلێن وی د واری ھۆنەر و باشنڤیسێ دا د دیارن.
ئه‌ڤرۆ نيوز:
رێڤه‌به‌ريا هاتنوچوونا پارێزگه‌ها دهۆكێ ل قه‌زا زاخۆ راگه‌هاند كو ئه‌وان پشكا دانا سزايێن سه‌ر ترۆمبێلان ب قست خسته كارى.
د راگه‌هاندنه‌كێ دا كو رێڤه‌به‌را هاتنوچوونا زاخۆ به‌لاڤكريه، تێدا ئاگه‌هداريا هه‌موو شوفێران دكه‌ت كو هۆبا تۆماركرنا پشكا دانا سزايان “غرامات” ل سه‌ر ترۆمبێلان ب قست هاته ڤه‌كرن، هه‌ر وه‌لاتيه‌كێ بڤێت سزايێ ل سه‌ر ترۆمبێلا خوه بده‌ت دشێت ب ره‌نگێ قست د ماوێ ساله‌كێ دا بده‌ت.
ئەڤرۆ نیوز:
تلەڤزیۆنا سومەریە نیوز ل سەر زارێ ژێدەرەکێ ئەمنی راگەھاند کو ئەبۆ بەکر بەغدادی سەرکردێ رێکخراوا داعش ژ ئەگەرێ ھێرشەکا ئەسمانی ل ھەیڤا خزیرانا بۆری یێ بریندارە.
ڤی ژێدەرێ نەخواستی ناڤێ خوە دیار بکەت گۆت: “ھێزێن ئەسمانیێن عیراقێ ل ھەیڤا خزیرانا بۆری کۆمبوونەکا سەرکردێن داعش ل سوریێ بۆردۆمان کر و د ئەنجام دا، ھژمارەکا وان سەرکردێن ئامادە بوویی ھاتنە کوشتن و بریندار بوون.
سومەریە نیوز ل سەر زارێ ژێدەرێن ئەمنی راگەھاندیە کو ئەبۆ بەکر بەغدادی د ناڤا وان دا بریندار بووینە و نەشێن بەردەوامیێ ب چالاکیێن خوە بدەن.
وی ژێدەری ناڤێ چەند کەسان ئاشکەرا کریە کو بچنە جھێ بەغدادی کو ھندەک ژ وان نە عیراقی نە و ژ وان ژی ئەبۆ عوسمان تونسی، بەلێ عیراقیێن ناڤا داعش ژ دژواری دژی ھەلبژارتنا وانن.
نيشاندان