سه‌ره‌كى نووترين نووچه

حوكمه‌تا هه‌رێمێ دێ 50 مليۆن دۆلاران بۆ قونته‌رچيان مه‌زێخيت

18/08/2018 21:44

343

ئه‌ڤرۆينوز:

ب ئارمانجا گرنگى دان ب كه‌رتێ وه‌به‌رئێنانێ ل هه‌رێما كوردستانێ، حوكمه‌تا هه‌رێما كوردستانێ دێ گۆژمێ 50 مليۆن دۆلاران بۆ قونته‌رچيان مه‌زێخيت تاكو سيكته‌رێ ئابوورى جاره‌كادى ڤه‌ژاندنێ بخوه‌ڤه‌ ببينيت.

لدووڤ مالپه‌رێ كوردستان تى ڤه‌، ب مه‌زاختنا 50 مليۆن دۆلارێن قونته‌رچيان، دێ جاره‌كادى ده‌ست ب بجهئينانا پرۆژێن نه‌ تمامكرى كه‌ن كو ل ده‌مێن بۆرى سه‌رۆك وه‌زيرێن هه‌رێما كوردستانێ نێچيرڤان بارزانى راگه‌هاندبوو كو دێ ده‌ست ب تمامكرنا پرۆژێن نه‌ تمامكرى هێته‌ كرن.

هه‌روه‌سا حوكمه‌تا هه‌رێمێ برياردايه‌ دئه‌ڤ ساله‌دا چه‌ندين پرۆژێن گرنگ ل هه‌رسێ پارێزگه‌هێن هه‌رێما كوردستانێ بجهبينيت، ژوان تمامكرنا جاده‌يا 120 مترى ل هه‌ولێرێ وتۆنێلا پيرمام وئۆتۆبانێ سلێمانيێ كو 20 خۆله‌كان رێيا دناڤبه‌را سلێمانيێ بۆ پێنجوين نێزيك دكه‌ت، هه‌روه‌سا چه‌ندين پرۆژێن گرنگ ل هه‌ولێرێ ودهۆكێ وسلێمانيێ دێ هێنه‌ بجهئينان.

ئه‌ردۆگان پێشوازيێ ل فازل ميرانى دكه‌ت

18/08/2018 21:28

1331

ئه‌ڤرۆنيوز:

شانده‌كێ پارتى ديموكراتى كوردستان بۆ پشكداريێ دكۆنگرێ شه‌شێ يێ پارتا داد و گه‌شه‌پێدان ( ئاكپارتى) يا ده‌ستهه‌لاتدار ل توركيا، گه‌هشته ئه‌نقه‌ره‌، سكرتێرێ مه‌كته‌با سياسى يا پارتى راگه‌هاند، ئه‌م وه‌كو پارتى تاكه‌ حزبا باشوورێ كوردستانێ بووين هاتينه‌ داخوازكرن بۆ كۆنگرێ پارتا داد وگه‌شه‌پێدانێ.

ئه‌ڤرۆ شانده‌كێ پارتى ديموكراتى كوردستان ب سه‌رۆكاتيا فازل ميرانى سكرتێرێ مه‌كته‌با سياسى وهه‌ر ئێك ژ عه‌لى حسێن به‌رپرسێ مه‌كته‌با په‌يوه‌نديێن كوردستانى وعيراقى وهشيار سيوه‌يلى به‌رپرسێ مه‌كته‌با په‌يوه‌نديێن ده‌رڤه‌ يێن پارتى پشكدارى د كۆنگرێ شه‌شێ يێ پارتا داد و گه‌شپێدان ل ئه‌نقه‌ره‌ بوون.

فازل ميرانى، دكۆنگره‌كێ رۆژنامه‌ڤانى دا ل ئه‌نقه‌ره‌ گۆت” كۆنگرێ ئاكپارتى كۆنگره‌كێ باش بوو ومێهڤانێن زۆر پشكدارى تێدا كر، ئه‌م وه‌كو پارتى ديموكراتى كوردستان ته‌نها حزبا باشوورێ كوردستانێ بووين داخوازناما كۆنگره‌ى بۆ هاتى ومه‌ ژى ب خوه‌شحالى ڤى پشكدارى دوى كۆنگره‌ى دا كر”.

دادگەھێ دەست ب سەر داھاتێ پانزینخانەیا یانا دھۆک دا گرت

18/08/2018 19:20

1074

ئەڤرۆ نیوز، زنار زوبێر:
سێ یاریزانێن یانا دھۆک یا وەرزشی سکالا ل یانا دھۆک تومارکریە و تێدا داخوازا پارێن ھەڤبەسێت خوە یێن سالێن بوری کریە، بەری نوکە ژی دادگەھێ بریارا دەستەسەرکرنا داھاتێ یانا دھۆک کربوو.
د ڤی دەربارەی پارێزەرێ یانا دھۆک یا وەرزشی موسا گەلناسکی تایبەت بۆ ئەڤرۆ نیوز ئاشکرا کر ھەتا نوکە سێ یاریزانان سکالا ل یانا دھۆک یا وەرزشی کریە و داخواز پارێ ھەڤبەستێن خوە کریە ژ یانێ و ھەتا نوکە دادگەھێ ب رێکا جێجەجێکارێ داد داھاتێ پانزینخانەیا یانا دھۆک یا وەرزشی دەستەسەرکریە و کوژمێ ٥٠ ملیۆن دیناران وەک داھاتێ سالانە ژێ وەرگرتیە و داینە یاریزانێ باسکت بۆلا یانا دھۆک یێ بەرێ خورشید جاسم و قەرێن وی خلاس بوینە.
ناڤھاتی ئەو چەندە ژی دیارکر نوکە سێ سکالایێن دی ل سەر یانا دھۆکێ ھەنە ژ وانا یێن کریا شوقەیەکێ یە ئەو ژی ئێکلا بویە بریار د بەرژەوەندیا خودانا ڤێ شوقێ دەرکەفتیە کو کریا وێ ژی یانا دھۆک ئەدا بکەت دیسان ھێشتا سکالایێن دو یاریزانێن دى باسکت بۆلێ ب ناڤێ ئسماعیل و یێ دی یێ تەپاپێ ئاماد ئسماعیل کو ئەو ژی ھێشتا بریارا دوماھیێ دادگەھێ نەدایە بۆ ئەداکرنا پارێن ھەڤبەستێن وان.

ئه‌ردۆگان : چۆكى بۆ ئه‌مريكا نادانين

18/08/2018 17:56

194

ئه‌ڤرۆنيوز:

سه‌رۆكێ توركيا ره‌جه‌ب توركيا ئه‌ردۆگان، دپه‌يڤه‌كێ ‌ دا ل كۆنگرێ حزبا خوه‌ ( پارتا داد وگه‌شه‌پێدان – ئه‌كه‌په‌) ل دۆر سزا وگه‌فێن ئه‌مريكى ل سه‌ر توركيا، راگه‌هاند كه‌سانه‌ك ب سزايێن ئابوورى وهه‌لاوسانێ گه‌فان ل مه‌ دكه‌ن، بۆ وان دبێژين مه‌ ياريا هه‌وه‌ ديت وئه‌ڤه‌ ئه‌رد وئه‌ڤه‌ گه‌ز.

ئه‌ردۆگانى گۆت ژى” مه‌ چۆك بۆ وان نه‌دانايه‌ يێن ب قۆرخكرنا سامانێ جيهانێ سيسته‌مێ خوه‌شگوزه‌رانيێ بۆ خوه‌ داناى وچۆكى ژى نادانين ، مه‌ چۆك بۆ وان نه‌دانايه‌ وچۆكى نادانين كو ب ئاخڤتن وه‌كو هه‌ڤپشكێن ستراتيژى يێن مه‌ خوه‌ نيشان دده‌ن ول گه‌ل هه‌ر پێنگاڤه‌كا خوه‌ بزاڤێ دكه‌ن مه‌ بكه‌نه‌ ئارمانجا خوه‌ يا ستراتيژى”.

شاندەکێ عیراقی دێ سەرەدانا کوردستانێ کەت

18/08/2018 17:36

180

ئەڤرۆ نیوز ، زنار تۆڤی:

سەرکردەکێ باسکێ حکمە یێ کو عەمار حەکیم سەرکرداتیا وی دکەت دیارکریە، کو شاندەکێ پێکهاتی ژ هێزێن سەرکەفتی د هەلبژارتنێن عیراقێ دا د چەند رۆژێن داهاتیدا دێ سەرەدانا هەرێمێ کەن و راگەهاندنا مەزنترین قەوارە دێ ل ڤان نێزیکان بیت.

محەمەد جەمیل مەیاحی سەرکردە ل باسکێ حکمە گۆتیە پرۆژێ زۆرینا سیاسی گەهشتیە قۆناغێن دووماهیێ و وەسا بریارە حکمە، سائیرون، نەسر، وەتەنیە و ئێکەتیا هێزێن عێراقی پێکبهێت و ببنە ئێک قەوارێ مەزن.
گۆتیە ژی ل سەر ئاستێ بلند گفتوگۆ د بەردەوامن بۆ هندێ کو پارتی و ئێکەتی، هەڤپەیمانیا فەتح، تورکمان و مەسیحی ژی بهێنە ناڤ وێ هەڤپەیمانیا نوو.

دیارکر ژی شاندەکێ پێکهاتی ژ نوونەرێن وان پێنج لایەنان ل چەند رۆژێن داهاتیدا دێ سەرەدانا هەرێمێ کەن و دێ ل گەل حزبێن کوردستانی گفتوگۆیێ کەن دەربارەی ڤی بابەتی.

دهێته چاڤەرێ کرن دادگەها فیدرالی ل دەستپێکا هەیڤا ئیلۆنێ دا ئەنجامێن دووماهیێ یێن هژمارتن و جۆداکرنا ب دەست یا دەنگێن هەلبژارتنێن 12 گۆلانێ پەسەند بکەت، هەروەسا پشتی پەسەندکرنا ئەنجامان دێ مەزنترین قەوارە هێتە راگەهاندن و حوکمەتا داهاتی یا عیراقێ دێ هێتە پێکئینان.

مه‌سرور بارزانی ل گه‌ل جێگرێ وه‌زيرێ به‌رگريێ ئه‌مريكا كۆمبوو

18/08/2018 16:48

ئه‌ڤرۆنيوز:

شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى، ل گه‌ل جۆن روود جێگرێ وه‌زيرێ به‌رگريێ ئه‌مريكا بۆ كاروبارێن سياسى ل واشنتون كۆمبوو وهه‌ردو لا به‌حس ل به‌رده‌واميا هه‌ماهه‌نگيا هه‌ڤپشك دناڤبه‌را هيزێن ئێمناهيێ يێن كوردستانێ وپێشمه‌رگه‌ى ل گه‌ل ئه‌مريكا كر.

مه‌سرور بارزانى سوپاسيا ئه‌مريكا كر بۆ پشته‌ڤانيا پێشمه‌رگه‌ى دشه‌رێ دژى داعشێ دا وهه‌ردو لا به‌حسێ شه‌رێ به‌رده‌وامێ تيرۆرێ كر، هه‌روه‌سا رۆناهى خسته‌ سه‌ر گوهۆرينا سروشتى يا شه‌رێ تيرۆرێ وهه‌بوونا ژێده‌رێ هه‌والگيرى وله‌شكرى يێ پێدڤى بۆ به‌رهنگاريا تيرۆرێ.

شيره‌تكارێ جڤاتا ئاسايشا هه‌رێما كوردستانێ ب هوورى به‌حسێ رێيێن ب هيزكرن ورێكخستنا هێزێن پێشمه‌رگه‌ى ژلايێ ئه‌مريكا وهه‌ڤپه‌يمانيا نێڤده‌وله‌تى كر.

دپشمه‌كا دى يا كۆمبوونێ دا، مه‌سرور بارزانى وروود دانوستاندن ل سه‌ر پرۆسا پێكئينانا حوكمه‌تا عيراقێ كر، مه‌سرور بارزانى ل دۆر پێكئينانا حوكمه‌تا عيراقێ يا نوو رۆهنكر، سه‌ركردايه‌تيا كوردستانێ نه‌ پشته‌ڤانيا چو ليست وكه‌سايه‌تيه‌كى بۆ پێكئينانا حوكمه‌تێ دكه‌ت ونه‌ چو لايه‌نه‌كى ژى ره‌ت دكه‌ت، به‌لكو ئارمانجا سه‌ركردايه‌تيا كوردستانێ هه‌ڤپه‌يمانيه‌كه‌ كو دستوورى بجهبينيت وحوكمه‌ته‌ك بهێته‌ پێكئينان ل سه‌ر بنه‌مايێن سازانێ وهه‌ڤسه‌نگيێ وهه‌ڤپشكيێ، حوكمه‌ته‌ك كو به‌رسڤا خواست وداخوازيێن خه‌لكى بكه‌ت.

ب ڤیدیۆ – كۆمپانیا فه‌يسبووكێ گه‌نجه‌كێ دێره‌لوكێ خه‌لات دكه‌ت

18/08/2018 16:20

1069

ئه‌ڤرۆ نیوز، نه‌وزاد هلۆرى:

گه‌نجه‌كێ سه‌نته‌رێ ناحیا دێره‌لوكێ ب ناڤێ (نیهاد میكائیل رێكانى) ژلایێ كۆمپانیا فه‌يسبووكى ب كوژمێ 500 دۆلاران هاته‌ خه‌لاتكرن پشتى كو چاره‌سه‌ریا ئێك ژ كێشه‌یێن فه‌يسبووكى كرى.

نیهادى دیاركر كو ‌وى لینكه‌كێ گرتى یێ فه‌يسبووكى ڤه‌كریه‌ كو دشیاندابوو ب رێیا وى لینكى داتا و پێزانينێن كۆمپانیا فه‌یسبووكى هاتبانه‌ دزین و بۆ ئه‌ڤرۆ نیوز گۆت” من ب رێیا ڤیدیۆیێ هه‌موو قوناغێن چاره‌سه‌ركرنا ‌وى لینكى بۆ كۆمپانیا فه‌يسبووكى هنارتن و پاشى وان به‌رسڤا من دا و 500 دۆلار ژى ب دیارى دانه‌ من،”.

گۆت ژى” هه‌ر چه‌نده‌ گۆژمێ پاره‌ى يێ كێمه،‌ به‌لێ گرنگیا وى د هندێ دایه‌ كو ژ روویێ مه‌عنه‌وه‌ى ڤه‌ زۆر گرنگه‌”.

نيهاد قوتابیێ پشكا زانستێن كومپیوته‌رى يه‌ ل زانكۆیا نه‌ورۆز ل دهۆكێ.

بيڤه‌له‌رزه‌كا ب هێز دێ توركيا هه‌ژينيت وب ده‌هان هزار قوربانى دێ هه‌بن

18/08/2018 15:55

1885

ئه‌ڤرۆنيوز:

سه‌رۆكێ پشكا چاڤدێريا بيڤه‌له‌رزان ل رێڤه‌به‌ريا كاره‌سات وهاوارهاتنێ يا توركى راگه‌هاند، پێشبينيێ دكه‌ين بيڤه‌له‌رزه‌كا ب هيز كو پلا وێ 7،6 بيت ل دووڤ بيڤه‌رێ ريخته‌ر يێ جيهانى كو 8 پله‌يه‌ ل باكوورێ ئه‌نادول وده‌ريا مه‌رمه‌رى ل توركيا روو بده‌ت.

موراد ئورلۆ، سه‌رۆكێ پشكا چاڤدێريا بيڤه‌له‌رزان ل رێڤه‌به‌ريا كاره‌سات وهاوارهاتنێ يا توركى بۆ ده‌زگه‌هێن راگه‌هاندنێ يێن توركى، ژڤانێ وێ بيڤه‌له‌رزا ب هێز ديارنه‌كر، به‌لێ گۆت” پێشبينيێ دكه‌ين 44 هزار ئاڤاهى ل ستانبولێ ژناڤ بچن و26 هزار هه‌تا 30 هزار كه‌س ژى گيانێ خوه‌ ژده‌ست بده‌ن، و 60هزار كه‌س ژى بريندار ببن وزێده‌تر ژ دو مليون و400 هزار كه‌س ژى مال وحالێ وان تێك بچيت”.

وى شاره‌زايێ بيڤه‌له‌رزان گۆت پێشبينى كر ژى تسوناميه‌ك ل توركيا بده‌ت.

دهێته‌ زانين ل 17/8/1999 بيڤه‌له‌رزه‌كێ ب پلا 7،5 ل دووڤ بيڤه‌رێ ريخته‌ر يێ جيهانى ل رۆژئاڤايێ توركيا دابوو دئه‌نجامدا 17 هزار كه‌سان گيانێ خوه‌ ژده‌ست دابوو و 285 هزار خانى وئاڤاهى ژناڤ چبوون.

تاكه‌ ژنا رزگاربوى ژ ئه‌نفالا شكه‌فتا ده‌كان بۆ ئه‌ڤرۆ نیوز دئاخڤیت

18/08/2018 15:15

172

ئه‌ڤرۆ نیوز ، نه‌وزاد هلۆرى:

د رۆژه‌كا وه‌كو ئه‌ڤرۆ دا ل 18/8/1969 هژماره‌كا خه‌لكێ گوندێ ده‌كان د شكه‌فتا ده‌كان دا ژلایێ رژێما به‌عش هاتنه‌ ئه‌نفالكرن كو هژمارا وان 75 كه‌س بوون، كو ژبلى سێ كه‌سان چو كه‌سێن دي ژێ نه‌هاتیه‌ قه‌ره‌بووكرن، پارێزه‌ره‌كێ كه‌یسا ئه‌نفالان ژى دیار دكه‌ت كو هه‌ر كه‌یسه‌كا سزا ل سه‌ر هاتبیته‌ سه‌پاندن مافێ قه‌ره‌بووكرنا مادى ژى يا هه‌ى.

كیڤى ده‌كانى، وه‌لاتیه‌كێ گوندێ ده‌كانه‌ بۆ ئه‌ڤرۆ نیوز گۆت: (د رۆژه‌كا وه‌كو ئه‌ڤرۆ دا ل 18/8/1969 رژێما به‌عس شیا ب هه‌ڤكاریا هنده‌ك جاش و خوه‌ فروشان ده‌ست ب سه‌ر شكه‌فتا گوندێ ده‌كان بگریت و ئاگرى به‌رده‌تێ كو 75 كه‌س ژ ژن و زارۆيان تێدابوون و هه‌موويان بسوژیت ب تنێ چار كه‌س رزگاربوون)

زێده‌تر گۆت: (ژبلى سێ كه‌سان ژ ئه‌نفالكریێن شكه‌فتا ده‌كان ، چو كه‌سێن دى نه‌هاتیه‌ قه‌ره‌بووكرن ژلایێ حوكمه‌تا به‌غدا و حوكمه‌تا هه‌رێمى ڤه‌، ژبه‌رڤێ چه‌ندێ پێدڤیه‌ ئه‌و خه‌لك ژى بهێته‌ قه‌ربووكرن و چه‌ندین ساله‌ خه‌لك چاڤه‌رێ دكه‌ت).

ئێك ژ وان ژنێن كو ژمرنێ رزگاربوى بناڤێ (ئامینا عیسا) بۆ ئه‌ڤرۆ نیوز دياركر كو نه‌خوه‌شترین رۆژ بوو وێ دژیانا خوه‌ دا دیتى و بۆ ئه‌ڤرۆ نیوز گۆت: (ئه‌نفالا گوندێ ده‌كان ، دده‌مه‌كێ دا درۆستبوو كو پێشمه‌رگه‌ ل گوندى هه‌بوون ، به‌لێ ژبه‌ر چه‌ته‌یێن رژێما به‌عس ل گوندى ده‌ركه‌فتن و ئه‌م ژى وه‌كو ژن و زارۆك چوینه‌ شكه‌فتا ده‌كان داكو خوه‌ ب پارێزین، به‌لێ دیاره‌ ب هاریكاریا هنده‌ك خوه‌ فروشان، رژێما به‌عس جهێ مه‌ زانى و هاتن و شكه‌فت سوت و هه‌موو ژن و زارۆك تێدا سوتن و هاتنه‌ ئه‌نفالكرن).

زێده‌تر گۆت: (ل وێ رۆژێ دو زارۆكێن من ژى ل به‌ر چاڤێن من هاتنه‌ سوتن و ئه‌ز ژى ب دژوارى برینداربووم ، به‌لێ ئه‌م چار كه‌س رزگار بووین، مه‌ دڤێت حوكمه‌تا هه‌رێمێ و عیراقێ ژى پشتى ئه‌م ژ مرنێ رزگاربوين مه‌ قه‌ره‌بوو بكه‌ن).

ئه‌یاد ئیسماعیل كاكه‌یى، پارێزه‌رێ خوه‌به‌خشێ كه‌یسێن ئه‌نفالان دیاركر كو هه‌تا دادگه‌هێن سزایى یێن ئه‌نفالان نه‌هێنه‌ سه‌پاندن چو قه‌ره‌بوو نینن و بۆ ئه‌ڤرۆ نیوز گۆت: (پشتى تاوانبارێن ئه‌نفالان دهێنه‌ دادگه‌هكرن ، ل سه‌ر كه‌سوكارێن ئه‌نفالان پێدڤیه‌ سكالایێ تومار بكه‌ن بۆ وه‌رگرتنا قه‌ره‌بوویا مادى و ژسه‌رجه‌مێ 17 كه‌یسێن ئه‌نفالان ب تنێ شه‌ش ژ وانان ب جینوساید هاتینه‌ ناساندن به‌لێ چو ژ وان نه‌هاتینه‌ قه‌ره‌بووكرن).

زێده‌تر گۆت: (ئه‌نفالا شكه‌فتا ده‌كان ژى ئێكه‌ ژ وان 17 كه‌یسا و كه‌یسا گوندێ ده‌كان ب جینوساید هاتیه‌ نیاسین و پێدڤیه‌ لایه‌نێن شوله‌ژێ كارێن جديتر بكه‌ن بۆ كه‌یسێن ئه‌نفالان ، ژ وانان كه‌یسا ئه‌نفالا شكه‌فتا ده‌كان و حوكمه‌تا هه‌رێمێ مینا حوكمه‌تا كوێتێ ماف يێ هه‌ى‌ سزایێن مادی يێن گران ژ حوكمه‌تا عیراقێ وه‌ربگریت، چونكى هه‌مان ئه‌و زیانا گه‌هشتیه‌ خه‌لكێ كوێتێ یا گه‌هشیته‌ خه‌لكێ كوردستانێ ژى).

بریاره‌ ئه‌ڤرۆ شانده‌ك ژ نێزیك سه‌ره‌دانا شكه‌فتا ده‌كان بكه‌ت و رێورسمه‌كێ ب گێريت، گوندێ ده‌كان ئێكه‌ ژ گوندێن سه‌ر ب ناحیا قه‌سروكێ كو دكه‌ڤیته‌ بن چیایێ خێرى و ل سه‌ر رووبارێ خازرى.