ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ ئه‌ڤرۆ ئێكشه‌مبى 12/8/2018 راگه‌هاند، هه‌ر ژسوباهى دوشه‌مبى 13/8/2018 دێ گوهۆرين ب سه‌ر پلێن گه‌رمێ ل هه‌رێما كوردستانێ هێن وره‌وشا كه‌ش وهه‌واى دێ هينتر بيت هه‌مبه‌ركرن ل گه‌ل رۆژێن بۆرى.
رێڤه‌به‌ريا ناڤبرى ئاماژه دا كو سوباهى پلا گه‌رمێ ل پاريزگه‌ها دهۆكێ دێ 39 بيت.
ئه‌ڤرۆ نیۆز، عه‌زیز هه‌ورامانی
رێڤه‌به‌ريا پۆلیسێن پارێزگه‌ها سلێمانيێ بۆ ڕۆژێن جه‌ژنا قوربانى دێ پۆليسێن ژن ل ناڤ باژێرێ به‌لاڤكه‌ن تاكو بشێن دهه‌ر حاله‌ته‌كێ نه‌خوازراو دا كو تووشى ژنان بهێت دهاوارا وان بچن.
رێڤه‌به‌ريا ناڤبرى دراگه‌هاندنه‌كێ دا دياركر” ل گه‌ل نێزيكبوونا جه‌ژنا قوربانى وقه‌ره‌بالغيا ل ناڤ بازارى وجهێن گشتى هه‌ى، ب فه‌رمانا رێڤه‌به‌رێ پۆليسێن سلێمانيێ، هه‌موو پشك وبنگه‌هێن سه‌ر ب رێڤه‌به‌ريێ ڤه دحاله‌تێ ئاماده‌باشيا زێده‌تر دانه”.
دياركر ژى” بۆ وێ مه‌ره‌مێ، هه‌موو پۆليسێن ژن دحاله‌تا ئاماده‌باشيێ دانه ل ناڤ بازارى وجهێن گشتى ب مه‌ره‌ما پاراستنا زێده‌تر يا سامان ومالێن وه‌لاتيان ورێگرتن ل هه‌ر حاله‌ته‌كا دزينا چانتێن ژنان”.
ئه‌ڤرۆنيوز:
كۆمسيۆنا بلند يا سه‌ربخوه يا هه‌لبژارتنان وراپرسيێ ل هه‌رێما كوردستانێ رۆهنكرنه‌ك ل دۆر فه‌رمانبه‌رێن گرێبه‌ست يێ كۆمسيۆنێ به‌لاڤكر..
كۆمسيۆنێ درۆهنكرنا خوه دا راگه‌هاند” سه‌باره‌ت فه‌رمانبه‌رێن گرێبه‌ست وفه‌رمانبه‌رێن هێزێن ئاسايشا ناڤخوه‌يى وپۆليسا وزێره‌ڤانێن هه‌رێمێ (پێشمه‌رگه) وله‌شكر، هه‌ر ده‌نگده‌ره‌كێ رۆژا ده‌نگدانا تايبه‌ت، نابيت ببنه فه‌رمانبه‌رێن گرێبه‌ست ل رۆژا هه‌لبژارتنان ونابيت داخوازيێ پێشكێش بكه‌ن وفۆرمان داگرن، به‌روڤاژى ڤێ چه‌ندێ فۆرمێن وان دێ هێنه لادان ودهه‌ر قۆناغه‌كێ دا ئه‌و بهێته سه‌لماندن، ئه‌و كه‌سه دێ هێنه دوورخستن ودێ پێرابوونێن قانوونى ل به‌رانبه‌ر وان هێنه وه‌رگرتن”.
ئه‌ڤرۆ نیوز، نه‌وزاد هلۆرى:
كومسیۆنا بلند یا هه‌لبژارتن و راپرسیان ل هه‌رێما كوردستانێ رۆژێن بانگه‌شێ بۆ هه‌لبژارتنێن په‌رله‌مانێ كوردستانێ دیاركرن.
كۆمسیۆنێ رۆژا 5/9/2018 وه‌كو ده‌ستپێك بۆ بانگه‌شا هه‌لبژارتنان دياركر كو ل رۆژا 28/9/2018 دێ بانگه‌شه ب دووماهى هێت كو به‌رى ئه‌نجامدانا هه‌لبژارتنان ب 48 ده‌مژمێران بانگه‌شه دێ هێته راوستاندن.
برياره هه‌لبژارتێن په‌رله‌مانێ كوردستانێ ل 30/9/2018 بهێنه ئه‌نجامدان.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ ئێكشه‌مبى 12/8/2018 پێشوازى ل عه‌لى قه‌ره‌داغى ئه‌ميندارێ گشتيێ ئێكه‌تيا جيهانى يا زانايێن موسلمان وسه‌رۆكێ رابيتا ئيسلامى يا كوردى وشانده‌كێ دگه‌لدا كر كو پێكهاتبوون ژ سه‌رۆك وئه‌ندامێن ده‌سته‌يا كارگێرى يا رابيتا ئيسلامى يا كورد.
دديداره‌كێ دا ره‌وشا سياسى ودووماهى پێشهاتێن عيراقێ وده‌ڤه‌رێ وروودانێن پشتى ريفراندۆمێ هاتن به‌حسكرن ودووپاتى ل ره‌وايه‌تيا مافێن گه‌لێ كوردستانێ وره‌تكرنا سه‌پاندنێ ل سه‌ر گه‌لێ كوردستانێ هاته كرن.
هه‌ر ل وێ كۆمبوونێ هه‌ردولا بۆچوونێن خوه ل دۆر هه‌لبژارتنێن هه‌يڤا ئيلۆنا داهاتى وپێدڤيا كاركرنێ ودانانا به‌رنامه‌كى ژلايێ حوكمه‌تا هه‌رێما كوردستانێ ڤه بۆ باشتركرنا ژيانا وه‌لاتيان، ئالوگوركرن.
ئه‌ڤرۆ نیۆز،عه‌زیز هه‌ورامی
دروودانه‌كا پێكدانانا دو ترومبێلان دا ئه‌ڤرۆ ئێكشه‌مبى 12/8/2018 ل سه‌ر رێيا گه‌رميان – سلێمانى، سێ كه‌سان گيانێ خوه ژده‌ست دا.
رێڤه‌به‌ريا هاتنوچوونا گه‌رميان راگه‌هاند” دروودانا پێكدادانا دو ترومبێلێن ژ جۆرێن تويۆتا لاندگرۆزو تويۆتا پيكه‌ب، سێ كه‌سان ژ هه‌ردو ترومبێلان گيانێ خوه ژده‌ست دا”.
دياركر ژى”شۆفێر ونه‌فه‌ره‌كێ تويۆتا لاندگرۆز گيانێ خوه ژده‌ستدان و شوفێرێ تويۆتا پيكه‌ب ژى گيانێ خوه ژده‌ستدا دوێ روودانێ دا”.
خوياكر” ته‌رمێن هه‌رسێ كه‌سان هاتن هنارتن بۆ نوشداريا داد ل سلێمانيێ وڤه‌كۆلين دروودانێ دا يا به‌رده‌وامه”.
ئه‌ڤرۆ نیوز، هه‌ژار مه‌عروف:
ئێکه‌تیا ته‌پا پێ یا کوردستانێ ئه‌ڤرۆ د کومبوونا خوه یا حه‌فتیانه دا ب فه‌رمی ل سه‌ر ده‌ست کارکێشانا نوونه‌رێ پارێزگه‌ها دهۆک و ئه‌ندامێ ئێکه‌تیا ته‌پا پێ ئازاد عه‌جیل رازیبو، هه‌ردیسان ب فه‌رمی ل سه‌ر داخوازیا نوونه‌راتیا لژنه‌یا ئولومپی یا دهۆک رازیبوو کو قاسم سالح وه‌کو نوونه‌رێ نوو یێ پارێرگه‌ها دهۆکێ بهێته ده‌ست نیشانکر ل جهێ ئازاد عه‌جیل ل ئێکه‌تیا ته‌پا پی یا کوردستانێ.
هه‌ردیسان ئێکه‌تیا ته‌پا پێ یا کوردستانێ د کومبوونا خوه ئه‌ڤرۆ دا سوپاسیا ئازاد عه‌جیل کر بۆ خزمه‌تا وی و ماندیبوونا وی ل ماوێ چه‌ند سالێن بوری و داخازا سه‌رکه‌فتنێ بو خواست.
ئەڤرۆ، سالار دۆسكی:
د.عەبدالرزاق حاجی، بەرپرسێ پشكا ساخلەمیێ ل ڤیتەرنەری یا دهۆك بۆ رۆژناما ئەڤرۆ ئاشكراكر كو كۆمپانیێن ئینانا گولكان گەهشتنە 60 كۆمپانیان كو كومپانیێن كاركرنێ بتنێ 42 كۆمپانی نە و هەژمارەك ژی یێ دكاری دا نێزیك دێ دەستیردانێ وەرگرن و هەموو دێ بنە 60 كۆمپانیێن ئینانا گولكان بۆ هه‌رێما كوردستانێ و پارێزگەها دهۆكێ.
د.عەبدالرزاق دياركر كو رێژا ئینانا گولكان ل سەرانسەری هەرێما كوردستانێ ل دووڤ رێژا ئاكنجیبوونێ دهێتەدانان، رێژا پارێزگەها دهۆكێ پێنج هزار سەرێن گولكانە هەیڤانە ، ژبەر هاتنا جەژنا قوربانی و خواستا خەلكی ل سەر گوشتی ئەڤ رێژە هاتیە زێدەكرن بۆ 10 هزار سەرێن گولكی و ئەڤە دێ ل سەربرخانا دهۆكێ هێنە سەرژێكرن.
ئه‌ڤرۆ نيوز، نيوار محه‌مه‌د سه‌ليم:
سه‌رۆكێ جڤاتا پارێزگه‌ها دهۆكێ راگه‌هاند كو بڕيارا ده‌ست ب كاربوونا پێنج رێڤه‌به‌رێن گشتى ل پارێزگه‌ها دهۆكێ ژ جڤاتا وه‌زيرێن هه‌رێما كوردستانێ ده‌ركه‌فت.
فه‌هيم عه‌بدولا حه‌مۆ، سه‌رۆكێ جڤاتا پارێزگه‌ها دهۆكێ د داخۆيانيه‌كا تايبه‌ت دا بۆ ئه‌ڤرۆ نيوز گۆت: “بڕيارا ده‌ست ب كاربوونا هه‌ر پێنج رێڤه‌به‌رێن گشتى يێن پێشتر ژ لايێ جڤاتا پارێزگه‌ها دهۆكێ بۆ جڤاتا وه‌زيران ڤه هاتينه بلندكرن ده‌ركه‌فت و دێ ده‌ست ب كار بن”.
پێشتر جڤاتا پارێزگه‌ها دهۆكێ هه‌ر ئێك ژ ديار به‌حرى ره‌سۆل وه‌كو رێڤه‌به‌رێ گشتى يێ باژێرڤانيان ل پارێزگه‌ها دهۆكێ، كوردۆ ئيحسان عه‌بدولسه‌مه‌د وه‌كو رێڤه‌به‌رێ گشتيێ وه‌به‌رهێنانێ، عومه‌ر عه‌لى تاهر وه‌كو رێڤه‌به‌رێ گشتى يێ په‌روه‌ردێ، شێرزاد حه‌ميد حه‌سه‌ن وه‌كو رێڤه‌به‌رێ گشتى يێ چاڤدێريا جڤاكى و ژيان مسته‌فا تاها وه‌كو رێڤه‌به‌را گشتى يا شه‌هيد و ئه‌نفالكريان په‌سه‌ند كربوون و بۆ جڤاتا وه‌زيران ره‌وانه كربوون ب مه‌ره‌ما ره‌زامه‌نديێ ل سه‌ر ناڤ و پۆستان.
ئه‌ڤرۆ نيوز:
سۆپايێ سوريا ئازاد ب هه‌ڤكاريا توركيا هێزه‌كا له‌شكرى يا نوو دێ دروست كه‌ت بۆ روو ب رووبوونا رژێما به‌شار ئه‌سه‌د.
ئاژانسا رويته‌رز د راپۆرته‌كێ دا به‌لاڤكريه، سۆپايێ سوريايێ ئازاد ل به‌ره هێزه‌كا چه‌كدارى يا نوو دروست بكه‌ت ل ده‌ڤه‌ره‌كا باكوورێ رۆژئاڤايێ سوريا ب ناڤێ “سۆپايێ نشتيمانى” بۆ روو ب رووبوونا سۆپايێ سوريا ب سه‌رپه‌رشتيا رژێما ئه‌سه‌د و چه‌ند هێزێن دى يێن نه‌يار.
ئاژانسێ ئاماژه ب وێ چه‌ندێ ژى كريه كو مه‌ره‌م ب دروستكرنا ئه‌وێ هێزێ پشته‌ڤانيكرنه ژ لايێ توركيا كو پێكهاتيه ژ كۆنترۆلكرنا چه‌ند ده‌ڤه‌رێن بن ده‌ستێ رژێما سوريا و دژاتيكرنا هێزێن سۆريا ديموكرات “هه‌سه‌ده” ژ لايێ هێزێن يه‌په‌گێ سه‌ركرداتى دهێته كرن.
نيشاندان