ئه‌ڤرۆ نيوز:

مامۆستایێ زانکۆیێ و سیاسەتمەدارەکێ رۆژئاڤایێ کوردستانێ کو نھا ل روسیا ل گەل وەزارەتا دەرڤە ‏یا وی وەلاتی ل دۆر چارەکرنا پرسا کوردی دانوستاندنان دکەت دیار دکەت کو روسیا و ئەمریکا ‏دخوازن کورد ببنە ئێک دا بزانن کا داخوازیێن کوردان چنە و دێ چاوا سەرەدەریێ ل گەل وان بکەن ‏و ھەکە کورد وەکو نھا د ناڤا خوە دا پارچە پارچە بن دێ پشتی چەند مەھێن دی گەلەک دەلیڤێن ‏دیرۆکی ژ دەستێ کوردان چن و وی دەمی کەس چو حسابەکێ بۆ کوردان ناکەت.‏

د. رەزوان بادینی مامۆستایێ زانکۆیێ و سیاسەتمەدارێ سەربخوە یێ رۆژئاڤایێ کوردستانێ کو نھا ل ‏روسیایە و ل دۆر پرسا کوردی ل گەل وەزارەتا دەرڤە یا روسیا دانوستاندنان دکەت د دیدارەکا ‏تایبەت دا ل گەل رۆژناما ئەڤرۆ بەحسێ رەوشا دووماھیێ یا سووریێ و رۆژئاڤایێ کوردستانێ کر و ‏راگەھاند کو رەوشا سووریێ نھا گەلەکێ ئالۆز بوویە، بەری نھا ئەمریکا و تورکیا ل گەل چەندین ‏وەلاتێن دی داخوازا نەمانا بەشاری دکرن لێ نھا ھەڤسەنگی ب تەمامی ھاتنە گوھۆرین و ھەر ‏وەلاتەکێ بەرژەوەندیێن خوە ل سووریێ دڤێت و بابەتێ ئەسەدی وەکو بەرێ گرنگ نینە، ژ بەر ‏ھندێ ژی ھەلویستێ گەلەک وەلاتان ل دۆر چارەکرنا قەیرانا سووریێ ژی وەکو بەرێ نەمایە و ‏ھاتیە گوھۆرین و گۆت: (بۆ روسیا و ئەمریکا یا گرنگ ئەڤە کو بەرژەوەندیێن وان ل سووریێ ‏پاراستی بن و ژ بەر ھندێ ژی ناکۆکیێن مەزن د ناڤبەرا ھەر دو وەلاتان دا ھەنە، چونکو ھەر ئێکێ ‏ژ وان بەرژەوەندیێن خوە دڤێت و ھەتا نھا قەیرانا سووریێ نەھاتیە چارەکرن، لێ نھا چارەسەریا ‏قەیرانا سووریێ بەر ب قۆناغەکا دی ڤە دچیت و ژ بەر ھندێ ژی دھێتە چاڤەرێکرن کو گەلەک ‏تشتێن نوو ل سووریێ روو بدەن).‏

ناڤھاتی د پشکەکا دی یا ئاخڤتنا خوە دا ئەو یەک ژی دیار کر کو یاریا سووریێ ھێشتا ب دووماھی ‏نەھاتیە و دھێتە چاڤەرێکرن کو گەلەک تشت د ڤان چەند مەھێن پێشیا مە دا روو بدەن، ژ بەر ‏ھندێ ژی گرنگە کورد د ناڤا خوە دا ئێکگرتی بن، ھەکە کورد ئێکگرتی نەبن دێ چارەنڤیسێ ‏کوردان ل سووریێ کەڤیتە مەترسیێ دا و گۆت: (ئاشکرایە کو د بابەتێ سیاسەتا نێڤدەولەتی دا ‏دانپێدان ب پەیەدێ ناھێتە کرن و بۆ دبلۆماسیێ نھا ئەنجوومەنێ نیشتمانی یێ کوردی خوەدان ‏رۆلە، ل ئالیێ دی ل رۆژئاڤایێ کوردستانێ ژی وەکو دزانین پەیەدە خوەدان ھێزەکا خوە یا مەزنە، ‏ڤێجا روسیا و ئەمریکا ژی دخوازن کو کورد ببنە ئێک دا ئەو بزانن کا دێ چاوا سەرەدەریێ ل گەل ‏کوردان بکەن، ھەکە نھا کورد نەبنە ئێک دێ مەترسیێن مەزن ل سەر کوردان ل سووریێ ھەبن).‏

مامۆستایێ زانکۆیێ و سیاسەتمەدارێ رۆژئاڤایێ کوردستانێ د پشکەکا دی ئاخڤتنا خوە دا ژی ئەو ‏یەک دیار کر کو دانوستاندنێن پەیەدێ و رژێما سووریێ وەکو خوە ماینە و چو پێشکەفتنێن وەسا ‏ب خوە ڤە نەدیتیە، چونکو رژێما سووریێ بزاڤێ دکەت کوردان ب کێمترین ماف رازی بکەت دا کورد ‏ل سووریێ نەبنە خوەدان ھێزەکا مەزن، دیارە کورد ژی ب ڤێ یەکێ رازی نابن، ژ بەر ھندێ ژی ‏تشتێ دیارە دانوستاندنێن د ناڤبەرا پەیەدێ و رژێما سووریێ ھەتا نھا بێی ئەنجام ماینە.‏

د دووماھیا ئاخڤتنا خوە دا سیاسەتمەدارێ رۆژئاڤایێ کوردستانێ ئەو یەک ژی دیار کر کو نھا ل ‏روسیا ل گەل وەزارەتا دەرڤە ل دۆر چارەکرنا پرسا کوردی دانوستاندنان دکەت و گۆت: (من شەش ‏خال وەکو پێشنیاز داینە وەزارەتا دەرڤە یا روسیا و ئێک ژ ڤان خالان ژی ئەڤە کو من دیار کریە ‏دڤێت د دستوورێ نوو یێ سووریێ دا دانپێدان ب مافێ کوردان بھێتە دان و مافێ کوردان ب ‏دستووری بھێتە گەرەنتی کرن و دڤێت کورد ل رۆژئاڤایێ کوردستانێ بشێن خوە برێڤە ببەن، ‏چونکو ھەتا کورد ل سووریێ نەگەھنە مافێن خوە قەیرانا سووریێ ژی چارە نابیت).‏

ئه‌ڤرۆ نيوز:

بەرپرسێ لژنا ناوچا زۆمار یا پارتی دیموکراتی کوردستان دیارکرکو حەشدا شەعبی دگەل ڤەکێشانا ھێزێن خوە ژ ‏دەڤەرا زومار ل رۆژا 11/8/2018 ھژمارەکا تەرکتور و ترۆمبێلان وگەل وپەلێن ھەمە جۆر دگەل خوە برن‎”.‎

حەسەن خەلو، بەرپرسێ لژنا ناوچا زۆمار یا پارتی دیموکراتی کوردستان دیارکر” ئەڤرۆ 11/8/2018 ل زومار ‏حەشدا شەعبی دۆرین 22 ترۆمبیلان وچەکێ خوە گران وەکو تەنگ وتوپ ژ دەڤەرا زومار ڤەکێشان ول جھێ وان ‏لیوا 72 یا فرقا 15 لەشکری عێراقی ھاتیە جیگرکرن و دگەل ڤەکێشانا ھێزێن خوە، حەشدا شەعبی تەراکتور و ‏ترومبێل دگەل خوە برن و گەھشتە رادەکێ ماتۆر وپەنجەر ودەرگەھێن ھندەک خانیان ژی ژێڤەکرن ودگەل خوە ‏برن‎” .‎

گۆت ژی” ل دووڤ پێزانینان ژی، حەشدا شەعبی ل دەڤەرێ ھندەک خانی ژی ل ڤێ دووماھیی دگەل ڤەکێشانا ‏ھێزێن خوە خرابکرینە وگەلەک مالێن وەلاتیان تالانکرن بتایبەتی ژی ئەو مال تالانکرن یێن نەڤەگەریاینە سەر ‏جھێن خوە، کو دەمێ پێشمەرگێ کوردستانێ ل زومار ئەو خێزان ڤەگەریابوون، لێ پشتی روودانێن 16 ئوکتۆبەری ‏ئەو خێزان دووبارە ئاوارەبووینە ونوکە حەشدا شەعبی خانیێن وان تالانکرن‎”.‎

ژێدەرکێ ل زومار نەخواست ناڤی خۆ ئاشکرا بکەت بۆ ئەڤرۆ دیارکرکو حەشدا شەعبی ل زومار نەمایە وئەڤە چار ‏رۆژن خوە ژ دەڤەرێ ڤەدکێشن ونوکە لەشکری عیراقێ یێ جھێ حەشدا شەعبی دگریت بتایبەتی ژی فرقا 15 لیوا ‏‏72 یا لەشکری عیراقێ ھاتیە زۆمار ودگەل ڤەکیشانا خوە، حەشدا شەعبی گەلەک کەلوپەلێن خەلکی برن وبەر ب ‏سەربازگەھا سپایکر ل پارێزگەھا سەلاحەدین چوون‎.‎

قاسم دربۆ، بەرپرسێ ئوپەراسیۆنێن پێشمەرگەی ل فەرماندەیا شنگال یا پێشمەرگێ کوردستانێ بۆ ئەڤرۆ ‏دیارکرکو حەشدا شەعبی خوە ژ سنۆری دەڤەرا شنگالێ یا ڤەکێشای ونوکە ب تنێ ھێزەکا ئێزدیان یا ب سەر حەشدا ‏شەعبی ڤە ل شنگالێ مایە و ڤەکێشانا حەشدا شەعبی ل دەڤەرێ دێ بیتە ئەگەر خەلک ڤەگەرنە سەر جھێن خوە ‏ورەوشا شنگالێ بەر ب ئارامیێ بچیت‎”.‎

ئاماژە دا وێ چەندێ ژی” بێگومان ڤەکێشانا حەشدا شەعبی ل گۆری رێککەڤتنەکێ یە وئەم داخوازی دکەین ریێا ‏سحێلا ژی بۆ ھاتنوچوونا وەلاتیان بھێتە ڤەکرن ورێ بھێنە خوەشکرن وخەلکێ شنگالێ ڤەگەرنە سەر جھێن خوە ‏ودەست ب ژیانا خوە ل شنگالێ بکەن‎”.‎

ئاشکرا کرکو ئەڤە چەند رۆژن حەشدا شەعبی ھێزێن خوە ژ زومار و رەبیعە و سنۆنی و شنگالێ و رۆژئاڤایێ دیجلە ‏بۆ مووسلێ ڤەدکێشن و نوکە لەشکری عیراقی یێ ل جھێن حەشدا شەعبی دھێتە جھگیرکرن و ھەر دەڤەرەکا حەشدا ‏شەعبی خوە ژی ڤەکێشیت، ئێکسەر لەشکری عیراقی ل وێ جھێ دھێتە جھگیرکرن‎”.‎