ئه‌ڤرۆ نيوز:
حوكمه‌تا عيراقێ بۆ ڤه‌كرنا رێيا كه‌ركووك – هه‌ولێر دانانا خاله‌كا گۆمركى ل سه‌ر ڤێ رێ وه‌كو مه‌رج دياركريه، به‌لێ حوكمه‌تا هه‌رێما كوردستانێ ڤى مه‌رجێ به‌غدا ره‌ت دكه‌ت.
گه‌ره‌كا دى يا دانوستاندنان د ناڤبه‌را حوكمه‌تا عيراقێ و هه‌رێما كوردستانێ دا بۆ ڤه‌كرنا رێيا كه‌ركووك – هه‌ولێر ل ده‌ڤه‌را پردێ يا كه‌ركووكێ ب رێڤه چوو.
هه‌ر چه‌نده به‌رپرسێن هه‌ردولا ئاماژه ب وێ چه‌ندێ دكهن كو دانوستاندن ب ره‌نگه‌كێ باش و ئه‌رێنى ده‌رباز بوونه و ب رێژا 70% ل سه‌ر ڤى بابه‌تى رێكه‌فتن هاتيه كرن، به‌لێ ب گۆره‌يى پێزانينێن ئه‌ڤرۆ نيوز مه‌رجێ به‌غدا بۆ دانانا خاله‌كا خوه يا گۆمركى ل سه‌ر رێيا كه‌ركووك – هه‌ولێر بوويه رێگرى ل هه‌مبه‌ر ڤه‌كرنا ڤێ رێ.
ئارمانجا به‌غدا ژ دانانا وێ خالا گۆمركى يا ل سه‌ر رێيا كه‌ركووك – هه‌ولێر ئه‌وه كو ب رێيا وێ خالا گۆمركى باجێ بێخيته سه‌ر وان كه‌لوپه‌لێن ژ هه‌رێما كوردستانێ بۆ ده‌ڤه‌رێن دى يێن عيراقێ دچن.
رۆژانه ب تنێ ژ به‌رهه‌مێن په‌له‌وه‌رى يێن كوردستانێ 100 هزار مريشك و نێزيكى مليۆن هێكان و ژماره‌كا زۆر يا ئاليكێ په‌له‌وه‌ران ژ هه‌رێما كوردستانێ بۆ باژێر و باژێركێن ناڤه‌راست و باشوورى عيراقێ دهێنه ره‌وانه‌كرن.
ژ ده‌سپێكا ئه‌ڤ ساله دو رێكه‌فتن د ناڤبه‌را هه‌ولێر و به‌غدا دا بۆ رێكخستنا گۆمركان هاتينه ئيمزا كرن.
ب گۆره‌يى خالا شه‌شێ يا رێكه‌فتنا دويێ، دڤێت خالێن گۆمركى يێن د ناڤبه‌را هه‌ردو لايان دا، ب تايبه‌ت گۆمركا سه‌فره بهێنه راكرن، به‌لێ نها به‌غدا د ده‌مێ نێزيكبوونا ڤه‌كرنا رێيا كه‌ركووك – هه‌ولێر دا داخوازا ڤه‌گوهاستنا وێ خالا گۆمركى بۆ پردێ دكه‌ت.
پشتى بوويه‌رێن 16ى ئوكتۆبه‌را 2017ێ رێيا كه‌ركووك – هه‌ولێر هاتيه گرتن.
رێيا كه‌ركووك – هه‌ولێر سه‌ره‌رايى وێ چه‌ندێ كو رێيه‌كا سه‌ره‌كيه د ناڤبه‌را هه‌ولێر و سلێمانيێ دا، رێيه‌كا ستراتيژى يا بازرگانى يا ده‌ڤه‌رێن ناڤه‌راستى عيراقێ يه.
هه‌تا نها هه‌ولێر و به‌غدا بۆ ڤه‌كرنا ڤێ رێيا ستراتيژى يا بازرگانى پێنج جاران هه‌ڤديتن كرينه، به‌لێ زێده‌بارى وان روونشتنان و هه‌ردولا به‌حس ل باشبوونا كۆمبوونان دكهن، هێشتا رێيا كه‌ركووك – هه‌ولێر نه‌هاتيه ڤه‌كرن.
نيشاندان
