ئه‌ڤرۆنيوز:

چه‌ند چه‌كدارێن نه‌نياس ل ده‌مژمێر ئێكێ سپێده‌يا ئه‌ڤرۆ شه‌مبيێ 4 ته‌باخا 2018 دناڤ ترومبێله‌كا ژجۆرێ كورۆلا ته‌قه‌ ل باره‌گايێ لژنا ناوچا رۆژهه‌لات ل سنورێ لقێ چار يێ پارتى ديموكراتى كوردستان ل پارێزگه‌ها سلێمانيێ هاته‌ كرن.

دانا شه‌هيد جه‌زا، ئه‌ندامێ جڤاتا نوونه‌رێن عيراقێ ژ فراكسيۆنا پارتى بۆ كوردستان تى ڤى گۆت” پشتى وێ هێرشا ئێكێ ئه‌وا چه‌ند چه‌كداران ل ده‌مژمێر ئێكێ سپێدێ ئه‌نجامداى، جاره‌كادى وپشتى ده‌مه‌كێ كێم هنده‌ك چه‌كداران بۆ جارا دويێ هێرشه‌كا دى كره‌ سه‌ر باره‌گايێ لژنا ناوچا رۆژهه‌لات، به‌لێ ژبلى زيانێن مادى چو زيانێن گيانى نه‌بوون”.

داناى گۆت ژى” پشتى گه‌هشتنا مه‌ بۆ جهێ روودانێ، هێزێن ئاسايشێ وپۆليس هاتن ئاگه‌هداركرن وهيڤيدارين روويێ راسته‌قينه‌يێ چه‌كداران ژلايێ ده‌زگه‌هێن ئێمناهيێ ڤه‌ بۆمه‌ بهێته‌ ئاشكراكرن كا كينه‌ هێرش كريه‌ سه‌ر باره‌گايێ مه‌”.

ئەڤرۆنیۆز، سالار دۆسكی:

شیرەتكارەكێ‌ بەرێ‌ یێ‌ سەرۆك وەزیرێن عیراقێ‌ دیاركر كو70% داهاتێ‌ عیراقێ‌ ژ بەسرا دهێت وەكو پەترۆل و سنورێ‌ وێ‌ دەرگەهێ‌ مەزنێ‌ عیراقێ‌ یە، هەر دەم ئەوا خوە ب سته‌م لێكرى دبینن و دڤێت رێككەفتنەك هەبیت و مافێ‌ خەلكێ‌ بەسرا ل دووڤ وی داهاتی مافێ‌ خەلكێ‌ وێ‌ پارێزگەهێ‌ بهێتەدان.

عادل بەرواری، شیرتكارێ‌ بەرێ‌ یێ‌ سەرۆك وەزیرێن عیراقێ‌ بۆ ئەڤرۆ نیۆز گۆت: ژ هەرفینا رژێما بەعس هەتا نوكە، سەدر پشتەڤانێ‌ كوردان بوویە و تایبەت سەرۆك بارزانی و گەلەك جاران پێكڤە روونشتینە و گەلەك جاران بارزانی دو هەیڤان ل بەغدا بوويه‌ و دڤیابا وی و سەدری ئێك دو دیتبا، هەردەم سەدری دیاركريه‌ كو كوردان قوربانی دایە و نەتەوا دويێ‌ نە، ژ هەموو فراكسیۆنێن شیعی ئەو پتر نێزیكی كوردان بوویە، هەتا بابەتێ‌ كەركووكێ‌ ژی دژی بۆچوونا كوردان نەبوو، هەر دەم كونترۆلا بەغدا ددەستێ‌ سەدری دا بوویە.

بەرواری ئەو ژی دیاركر كو سەدر پشتەڤانێ حوكمەتەكا ئێكگرتی یە كو ژ هەموو نەتەوه‌ و مەزهەبان پێك بهێت بهێتە ئاڤاكرن. دگه‌له‌ك‌ هەلكەفتنان دا دژی پارچەبوونا عیراقێ‌ بوويه‌ و ل گەل وێ‌ بۆچوونێ‌ نینە ئەمریكا یان بریتانیا یان ئیران دەستكاریێ‌ دكاروبارێن عیراقێ‌ دا بكەت و ئەو ل گەل وێ‌ بۆچوونێ‌ یە خەلكێ‌ عیراقێ‌  ب خوە دەستهەلاتێ‌ وەربگریت.

ناڤبری گۆت ژی: پارتی حزبا سەرەكی یە و نوونەراتیا كوردان دكەت و بێی پارتی چو حوكمەت ل بەغدا دروست نابن و ئێكەتی ژی ب هەمان شێوە و بریتانیا و ئەمریكا مایتێكرنێ‌ دكەت هەتا ل گەل سەدری و عه‌مار حەكیم و ئەڤە جارا ئێكێ‌ یە ئەمریكا ب باشی دبینيت ب زووترین دەم حوكمەت بهێـتە ئاڤاكرن.

عادل به‌روارى گۆت ژى: گەلەك كۆمبوون ل بەغدا هاتنەكرن كو شیعە بگەهنە ئێك، لێ‌ سەدر ل گەل وێ‌ بۆچوونێ‌ نینە كورد یان عەرەبێن سونە بەرامبەر بهێنە پشت گوه هاڤێتن، حزبا دعوە دەمەكی نێزیكی 130 كورسیان هەبوون، به‌لێ نوكە بوویە دو پارچە، نوكە رۆلێ‌ مالیكی بەرامبەر سەدر، هادی عامری، عەبادی یێ‌ لاوازه‌ و يێ چارێ‌ دهێت دهژمارا كورسيان دا  ، بەری هەلبژارتنان ژی عامری و مالكی رێككەفتبوون و پەیوەندیێن باش هەبووینە، بەری نوكە هەر ژێك دووركەفتنەكا دناڤبەرا شیعان دا هاتباكرن، مەرجەعيا بلند يا شيعى‌ مایتێكرن دكر و هەر هەموو دكرنە ئێك ڤە ب وێ‌ مەبەستێ‌ هەر شیعە دەستهەلاتێ‌ بكەن، لێ‌ هەلویستێ‌ مەرجەعیا شیعی نوكە ئەوە  هەموو پێكهاتێن عیراقێ‌ ل دووڤ سەنگا خوە پشكداری حوكمەتا داهاتی یا عیراقێ‌ ببن.

عادل بەرواری ئەو ژی گۆت: سەنگ و گرانیا كوردان یا جاران كو دوه‌م مەزنترین فراكسیۆنن ل عیراقێ‌ سەنگا پارتی و ئێكەتی بوویە، دیسا نەتەوا دويێ‌ یە ژی، گەلەك بزاڤ هاتنەكرن كو ئەڤجارە پارتی جودا و ئێكەتی جودا بچیتە بەغدا، حزبێن دی جودا بچن و گەلەك كورسی نەئیناینە، لێ‌ ئەو هێزا كوردان یا وی دەمی نەمایە و هند كورسی نەئیناینە كو ببنە هەڤرك بۆ پارتی و ئێكەتی و بەرژوەندا گشتی یا مللەتی ئه‌وه‌ هەموو پێكڤە و ب ئێك شاند بچنە بەغدا.

شیرتكارێ‌ بەرێ‌ یێ‌  سەرۆك وەزیرێن عیراقێ‌ ئەو ژی گۆت: ژ بەر بەرژوەندیا مللەتێ‌ كورد هەر دو پارتێن سەرەكی نەچارن ب ئێك هەلویست بچنە بەغدا وەكو پێشتر ئێك شاند بچن.

هەمبەر هژمارتنا دەنگان ب دەستی ژی، ناڤبری گۆت: گەلەك تەزویر ل عیراقێ‌ هاتیەكرن و عەربێن سونە گەلەك پارچە پارچە بووینە و تایبەت نوكە وەك ئێكەتیێ‌ نوكە بوویە چەند پارچە، باوەرناكەم حزبێن شیعی پارتی و ئێكەتی بدەنە لایەكی و ل گەل حزبێن بچووكێن كوردی رێككەفتنا گرێدەن و ئەڤە چێ‌ نابیت.