ئه‌ڤرۆنيوز:
بۆ جارا ئێكێ دديرۆكا خوه دا هه‌لبژارتيێ عيراقێ يێ ته‌پا پێ ئه‌ڤرۆ ئه‌ينيێ 3 ته‌باخا 2018 گه‌هشته باژێرێ رام الله يێ فلستينى بۆ ئه‌نجامدانا ياريه‌كا هه‌ڤالينى ل گه‌ل هه‌لبژارتيێ فلستينێ.
برياره سوباهى ل ده‌مژمێر 5 ئێڤارى هه‌ردو هه‌لبژارتيێن عيراقێ وفلستينێ ل ياريگه‌ها (فه‌يسه‌ل ئه‌لحوسه‌ينى) ل رام الله وێ ياريا هه‌ڤالينى ئه‌نجام بده‌ن.
ئەڤرۆنیۆز، سالار دۆسكی:
ب بەرهەڤبوونا وەزیرێ كاروبارێن شەهید و ئەنفالكریان ل حوكمەتا هەرێما كوردستانێ، وپارێزگەرێ دهۆكێ ب وەكالەت و چەندین بەرپرسێن حزبی و حكومی و ئەندامێن پەرلەمانێن كوردستانێ و عیراقێ، ئەڤرۆ ئه‌ينيێ 3/8/2018 ل هۆلا كونفرانسان ل زانكۆيا دهۆكێ كارەساتا شنگالێ هاتە ساخكرن..
پارێزگەرێ دهۆكێ ب وەكالەت ووەزیرێ شەهیدان و ئەنفالكریان و كچەكا ئێزدی یا ژ دەستێ داعشێ قورتال بووی پەیڤێن خوە پێشكێشكرن و بەحسێ ڤێ بیرهاتنێ هاتەكرن و رۆلێ حوكمەتا هەرێمێ و خەلكێ پارێزگەها دهۆكێ بلند هاتە نرخاندن و خواستن ئەو كچێن نوكە ژێر دەستێ داعشێ بهێنە قورتالكرن و ئەڤ كارەساتە ب جینوساید بهێتە نیاسین و حوكمەتا هەرێمێ پتر رۆلێ خوە بگێریت بۆ چارەسەكرنا ڤان كچ و ژنێن رزگاربوویی ژلایێ دەروونی ڤە.
پاشى چەندین برگێن هونەری هاتنە پێشكێشكرن وەكو ستران و تابلویێن هونەری و پارچە مۆزیكە كو ژلایێ كۆمەكا هونەرمەندێن شنگالێ و دەڤەرێ ڤە هاتبوونە بەرهەڤكرن.
ئەڤرۆ نیوز ،باسم قاسم شنگالێ
ئەڤرۆ ل ئۆسترالیا ل باژێرێ ئەدمیرال سالڤەگەرا کۆمکوژیا ئێزدیان ئەوا ل رۆژا3ى ته‌باخا 2014ێ ژلایێ رێكخراوا تيرۆرستيا داعشێ ڤە د هێرشا ل سه‌ر قه‌زا شنگالێدا هاتيه ئه‌نجامدان و تاوانێن دژى مرۆڤايه‌تيێ د ده‌رهه‌قێ ئێزديان دا ئه‌نجام داین هاته ساخكرن.
ئەڤرۆ ئه‌ينيێ 3 ته‌باخا 2018 ل باژێرێ ئەدمیرال ل ئۆسترالیا کۆمکوژیا ئێزدیان ب چەندین چالاکيێن جورە جور و نیشاندانا دو کورتە فلمان کو ئێك ژ وان بناڤێ (کەزەب) کو بەرهەمێ تیپا گرعزێر یا هۆنەری بو ویێ دى ژ دەرهینانا نەوزاد شێخانی بوو کو هاتبوونە چێکرن دسەر وێ تاوانێ .
ئەڤرۆ نیوز ، زنار تۆڤی:
ل ئه‌مریكا فیستیڤالەکا نێڤدەولەتی یا تایبه‌ت ب كورته فلمان دێ ب فلمەکێ ده‌رهێنه‌رێ گەنجێ كورد جبرائیل ئه‌بۆ‌بەكر هێتە ڤەکرن.
د دیدارەکێدا ده‌رهێنه‌رێ كورد جبرائیل ئەبۆبەکر بۆ ئەڤرۆ نیوز گۆت: ل ئه‌مریكا دێ فیستیڤالەکا نێڤدەولەتی ب ناڤێ فیستیڤالا کورتە فلمێن پاییزێ كو تایبه‌ته ب كورته فلمان دێ ل 13.9.2018 هێتە گێران و بانگهێشتنامه‌کا فه‌رمی بۆ من هاتیە بۆ هندێ کو ل وێ فیستیڤالێ ئامادە ببم.
جبرائیلی دیارکر ژی: ئەو فیستیڤالە دێ ب فلمێ و یێ ب ناڤێ (ئایلان) ده‌ست ب كارێن خوە کەت و فلمێ وی دێ هەڤرکیا برنا خه‌لاتێ وێ فیستیڤالێ کەت.
دەرهێنانا فلمێ ئایلان ژ لایێ ده‌رهێنه‌رێ كورد جبرائیل ئه‌بۆبه‌كر ڤه هاتیە ئه‌نجامدان و ئۆمێد رۆژ ی كارێ مۆزیكێ بۆ ڤی فلمی كریه و كارێ گرافیكێ و دیزاینا فلمی ژ لایێ ئالان رۆژبه‌یانی ڤە هاتیە کرن.
ناڤهاتی ئاشکراکر ژی: ل ڤان نێزیکان دێ کورتە فلمەکێ دی چێکەت و هەروەسا د ماوێ ئەڤان دو هەیڤان دا فلمێ ئایلان پشکداری د 22 فیستیڤالێن جیهانی دا کریە و شەش خەلاتێن جیهانی وەرگرتینە و دیسا ل وەلاتێ ئیتالیا خەلاتێ باشترین فلمێ فیستیڤالێ ب دەستڤە ئینایە.
ئه‌ڤرۆ نيوز:
پشتی كو به‌لگێن ده‌ربارێ په‌یوه‌ندیا ئیرانێ ب بوویه‌را 11ى ئیلۆنێ كه‌فتنه ده‌ستێ دادگه‌ها بریتانیا، مالباتێن قوربانیێن وێ بوویه‌رێ داخواز دكه‌ن به‌ریتانیا سزايان بده‌ته به‌ر ته‌هرانێ و پشكێن وێ ل وه‌لاتێ خوه بلۆك بكه‌ت.
ئاژانسا رۆیته‌رز د نووچه‌یه‌ك دا به‌لاڤكر، پشتی ب ده‌ستكه‌فتنا به‌لگه‌يان ده‌رباره‌يى پشتگری و هاریكاریا دارایی یا ئیرانێ ژبۆ رێكخستنا تيرۆریستى یا قاعیده كو ئه‌نجامده‌را بوویه‌رێ بوو، مالباتێن قوربانیێن بوویه‌را 11ى ئیلونێ داخواز دكه‌ن دادگه‌ها وی وه‌لاتی ئیرانێ سزا بده‌ت و پشكێن وێ ل بریتانیا ب راوه‌ستینيت.
دادگه‌هێ بڕیار قه‌بوول كر و پشكێن ئیرانێ ل بریتانیا و وێلز كو دكه‌ڤنه باشوورێ وه‌لاتى بلۆك دكه‌ت، نه‌شێت ئێدی قه‌رزان ل بانكێن وه‌لاتێ خوه وه‌ربگريت، د ده‌مه‌كێ دا كو ئیران دبن فشاره‌ك و ئالۆزیه‌كا ئابووری يا مه‌زن دا‌یه.
ناتاشا هاریسن پارێزه‌را تایبه‌ت ب بوویه‌رێ ڤه راگه‌هاند ئه‌گه‌ر دادگه‌ها نیۆیۆرك بشێت بڕیارێ ل قانوونا دادگه‌ها بلند یا بریتانیا بده‌ت، بڕیارا بلۆككرنا ئیرانێ ل بریتانیا دێ هێته بجهئينان.
هه‌ڤده‌م به‌رپرسه‌كێ ئیرانی راگه‌هاندیه كو ئه‌و ژبۆ راوه‌ستاندنا بڕیارا دادگه‌هێ دێ گاڤێن پێدڤى گرنه به‌ر.
ئه‌ڤرۆ نيوز:
نێچيرڤان بارزانى سه‌رۆك وه‌زيرێن هه‌رێما كوردستانێ د په‌يامه‌كێ دا ب هه‌لكه‌فتا چارساليا كاره‌ساتا كۆمه‌لكوژى و ره‌ڤاندنا ب هزاران ئێزديان ژ لايێ داعش ڤه، ديار دكه‌ت كو دێ به‌رده‌وام بن ل سه‌ر رزگاركرن و پووته‌دان ب رزگاركرنا ئه‌وان ره‌ڤانديێن هه‌تا نوكه نه‌هاتينه رزگاركرن و د به‌رزه نه.
دايه زانين ژى كو ئه‌و دێ گرنگيێ ده‌نه باشتركرنا كاودانێن ژيانا وان. د هه‌مان ده‌م ژى دى دا داخواز دكه‌ت حوكمه‌تا فيدرالا عيراقێ ب زوورى كاودانێن ده‌ڤه‌ران شنگال ئاسايى بكه‌ت و ب ئه‌ركێ خوه يێ ئاڤه‌دانكرنا ده‌ڤه‌رێ ب جهـ بينيت، داخواز ژ كۆمه‌لگه‌ها نێڤده‌وله‌تى دكه‌ت كو ئه‌و كۆمه‌لكوژى ب ره‌نگه‌كێ فه‌رمى ب جينوسايد بهێته ناساندن و پشكدار بن د باشتركرنا ژيانا خه‌لكێ شنگال دا.
ئه‌ڤه ژى ده‌قێ په‌ياما نێچيرڤان بارزانى سه‌رۆك وه‌زيرێن هه‌رێما كوردستانێ يه:
پەیامی ساڵیادی کۆمەڵکوژی و ڕفاندنی ئێزدییان
ئەمڕۆ ساڵیادی کۆمەڵکوژییەکی دیکەی ئێزدییانە لەلایەن ڕێکخراوی تیرۆریستیی داعشەوە. ئەو کۆمەڵکوژییە وەک یەکێک لە دڕندانەترین کۆمەڵکوژییەکانی سەدەی بیستویەک کەوتە مێژووی گەلی کوردستان و مرۆڤایەتییەوە.
لەو ھێرشەدا بۆ سەر دەڤەری شنگال 1293 کەسی سیڤیلی دەڤەری شنگال شەھید کران، ھەروەھا 6417 ئێزدیش ڕفێندران کە زۆربەی زۆریان منداڵی کچ و ئافرەتن و 2745 منداڵیش بێ دایکوباوک بوون. دەیان پەرستگەی ئێزدییان وێران کران و تا ئێستا 69 گۆڕی بەکۆمەڵ دۆزراونەتەوە. ئەوانە و چەندین ئامار و بەڵگەی دیکە بەسن بۆ ئەوەی پەرلەمان و حکوومەتی عێراق و کۆمەڵگەی نێودەوڵەتی بە بڕیارێکی تایبەت دان بە جینۆسایدی ئێزدییاندا بنێن.
حکوومەتی ھەرێمی کوردستان بەردەوام دەبێت لە بەجێگەیاندنی ئەرکی خۆی لە پاراستنی ئێزدییان و ھاوکاریکردنی زیاتری ئاوارەکانی دەڤەری شنگال، ھەروەھا نووسینگەی تایبەتیمان بەردەوام دەبێت لە کارکردن بۆ ڕزگارکردنی ڕفێندراوان کە تا ئێستا نیوەیان ڕزگار کراون و تا ڕزگارکردنی ھەموو خوشک و برا ئێزدییە ڕفێندراوەکانمان ناوەستین. حکوومەتی ھەرێمی کوردستان بەپێی تواناکانی ھەوڵی باشکردنی ژیانی ئاوارەکانی دەڤەری شنگال دەدات کە چەند ساڵە لە دۆخێکی ناخۆشی ئاوارەییدا دەژین.
لەو ڕۆژە خەمناکەدا بە پێویستی دەزانین حکوومەتی فیدرالیی عێراق دەستبکات بە ئاساییکردنەوەی بارودۆخی دەڤەری شنگال و بەجێگەیاندنی ئەرکی خۆی لە ئاوەدانکردنەوەی ناوچەکە و دابینکردنی خزمەتگوزارییەکان بۆ ئەوەی ئاوارەکان بتوانن بە شێوەیەکی ئاسایی بگەڕێنەوە سەر زێدی باب و باپیرانیان.
ھەروەھا داوا لە دەوڵەتانی ئەندام لە ھاوپەیمانیی دژی داعش و کۆمەڵگەی نێودەوڵەتی بەگشتی دەکەین بەشدار بن لە ئاوەدانکردنەوەی دەڤەری شنگال و باشکردنی ژیانی خەڵکی ئەو ناوچەیە کە جینۆسایدکردن و لێکەوتەکانی و خراپیی گوزەران، ژیانی ئەوانی تەواو ناخۆش کردووە. ئاوەدانکردنەوە و باشکردنی ژیانی خەڵکی دەڤەری شنگال ئەرکێکی ھاوبەش و ھەمەلایەنەیە.
لەم ڕۆژەدا سەری ڕێز بۆ قوربانیان و گیانی پاکی ئەو پێشمەرگە قارەمانانە دادەنوێنین کە لەپێناو ڕزگارکردنی شنگالدا شەھید بوون و تێکشکاندنی داعش لە کوردستان و عێراق و ناوچەکەدا لە شنگالەوە دەستیپێکرد.
نێچیرڤان بارزانی
سەرۆک وەزیرانی ھەرێمی کوردستان
3/8/2018
ئه‌ڤرۆنيوز:
كونگرێسێ ئه‌مريكى بودجا له‌شكرێ ئه‌مريكى په‌سه‌ندكر ودناڤ بودجه‌ى دا پرۆژێ قانوونا هاريكاريا پێشمه‌رگه‌ى ب گۆژمێ 365 مليۆن دۆلاران تێدايه.
بودجا له‌شكرێ ئه‌مريكى بۆ سالا 2019 كو دبيته 716 مليار دۆلار، ژلايێكونگرێسێ ئه‌مريكى ڤه هاته په‌سه‌ندكرن كوژناڤ وێ بودجى گۆژمێ 850 مليۆن دۆلار بۆ عيراقێ هاتيه ته‌رخانكرن ژوان 365 مليۆن دۆلار بۆ پێشمه‌رگه‌ى.
دهێته زانين ل بودجا له‌شكرێ ئه‌مريكى يا سالا 2017 گۆژمێ 415 مليۆن دۆلار بۆ پێشمه‌رگه‌ى هاتبوو ته‌رخانكرن وئه‌و پاره ژى راسته‌وخوه ب هه‌رێما كوردستانێ هاتبوو دان.
ئه‌ڤرۆ نیوز، نه‌وزاد هلۆرى:
ده‌ڤه‌را به‌رێ گاره‌ى ل قه‌زا ئامێدیێ ئێكه ژ وان ده‌ڤه‌رێن كوردستانێ كو ناڤ و ده‌نگیه‌كا تایبه‌ت هه‌یه بو هه‌بوونا هه‌موو جۆرێن ده‌رامه‌ت و خودانكرنا ته‌رش و كه‌والى و هه‌بوونا هژماره‌كا زۆر یا مێشێن هنگڤینى یێن خومالێ و چیایى، وه‌لاتیه‌كێ ده‌ڤه‌رێ دیار دكه‌ت كو سالانه هه‌تا 200 مێشێن هنگیڤنى ل چیایى دهێنه دیتن و ب بهایه‌كێ گران دهێته فروتن.
سه‌گڤان به‌رگاره‌ى، وه‌لاتيه‌كێ به‌رێ گاره‌يه ل چه‌ند روژێن بۆرى مێشه‌كا هنگڤینى ل وێ ده‌ڤه‌رێ دیتیه و 16 كیلۆیێن هنگڤینێ ئه‌سلى و سرۆشتى تێدا ده‌رئینان، بۆ ئه‌ڤرۆ نیوز گۆت: (ده‌ڤه‌را به‌رێ گاره‌ى ژ وان ده‌ڤه‌رێن كوردستانێ يه كو زۆرترین مێشێن هنگڤینى یێن سرۆشتى و چیایى تێدا هه‌نه و سالانه هژماره‌كا زۆر یا مێشان دهێنه دیتن و هنگڤینێ وان دهێته ده‌رئینان و ب بهایێن گران ژى دهێنه فروتن).
زێده‌تر گۆت: (سالانه ل به‌رێ گاره‌ى هه‌تا 200 مێشێن هنگڤینى دهێنه دیتن و هه‌ر مێشه‌ك ژ وان مێشان دناڤبه‌را چار بۆ 20 كیلۆیێن هنگڤینى تێدایه و كیلۆ دناڤبه‌را 70 بۆ 120 هزار دیناران دهێته فرۆتن و بكرێن وان ژى زۆرن).
ناڤبرى دیاركر ژى كو پتريا ئه‌و كه‌سێن هنگڤینێ چیایى دكرن بۆ نه‌خوه‌شیان بكاردئینن و گۆت ژى: (هنگڤینێ چیایى ژبلى كو يێ ساخله‌مه و بۆ نه‌خوه‌شیان دهێته بكارئینان و ره‌نگ و شێوێ وى يێ جوانه ، د هه‌مان ده‌م دا تامه‌كا خوه‌ش و جودا ژ هنگڤینێ مێشان ل مال هه‌یه ئه‌وێ كو ژلایێ مرۆڤان دهێـته خودانكرن ، ژبه‌ركو پتريا مێشه‌ڤانان شه‌كرێ بكاردئینن و دشاره‌زا نینن د خودانكرنا وان دا ، ئه‌ڤه سه‌ره‌راى كو چو ژ وان مێشه‌ڤانان مێشێن خوه نابه‌ن ده‌ڤه‌رێن چیایى و زۆزانان، نها ده‌ڤه‌را به‌رێ گاره‌ى ژبه‌ر هه‌بوونا سرۆشت و زوزان و گل و كولیلكان ل پتريا وه‌رزێن سالێ ب هه‌بوونا مێشان ب ناڤوده‌نگه و گه‌له‌ك مێش ژى هه‌نه كو ناهێنه دیتن ژلایێ وه‌لاتیان ڤه و هنده‌ك ژى دجهێن ئاسێ و زه‌حمه‌ت دانه ودیتنا وان یا ب ساناهى نينه).
نه‌زیر چاربوتى ئه‌و ژى وه‌لاتیه‌كێ به‌رێ گاره‌یه دیاركر كو برینا مێشێن هنگڤینى ل چیایى شاره‌زایه‌كا باش پێدڤێت داكو كارتێكرن ل ژینگه‌هێ نه‌هێته‌كرن و بۆ ئه‌ڤرۆ نیوز گۆت: (بۆ برینا مێشێ مرۆڤ پێدڤى ب داس و بڤر دبيت و نها ژى هنده‌ك جاران ماتورێن داران دهێنه بكارئینان، و ئه‌و كه‌سێن مێشا دبرن ب چو شێوه‌یان نابیت دارێ ببرن، به‌لكو دڤێت دارێ كون بكه‌ن و هنگڤینى بینن ده‌رێ و دارێ وه‌كو خوه بهێلن و پشتى ساله‌كێ دار بخوه دێ وه‌كو به‌رێ لێ هێت ڤه).
زێده‌تر گۆت: (ئه‌ڤ ساله نێزیكێ 10 مێشێن به‌رهه‌مدار من و هنده‌ك هه‌ڤالێن خوه ل چیایى دیتینه و هنگڤینه‌كێ باش و ئه‌سلى و ب تام و خوه‌ش لێ ده‌رئینایه و هه‌موویێ ژى دفرۆشینه خه‌لكى و كیلۆ هه‌تا 120 هزار دیناران ژى دهێته فرۆتن و گه‌له‌ك داخوازى ل سه‌ر هه‌یه).
سه‌گڤانى دیاركر ژى كو ژبه‌ر مه‌ترسیا فرۆكێن توركیا، وه‌لاتى نه‌شێن ل هه‌موو ده‌ڤه‌را به‌رێ گاره‌ى بگه‌ریێن بۆ كۆمكرنا هنگڤینێ سرۆشتى و گۆت: (پێدڤیه ئه‌و كه‌سێن ب مه‌ره‌ما لێگه‌ریان و كۆمكرنا هنگڤینێ سرۆشتى قه‌ستا چیایى دكه‌ن ، زێده‌بارى كو دڤێت د شاره‌زابن ژ روویێ هاتنوچوون و گه‌ریانێ دا، دهه‌مان ده‌م دا دڤێت خودان وژدان و ره‌وشته‌ك بلند بن و ب چو شێوه‌یان ژینگه‌هێ تێك نه‌ده‌ن، ژبه‌ركو پشكه‌ك ژ خه‌لكى نه شاره‌زانه و رادبن ب رینا داران و ئاگربه‌ردانێ كو ئه‌ڤ یه‌ك ژى تشته‌كێ نه‌رێنى یه و كارتێكرنێ ل ژینگه‌هێ و مێشان دكه‌ت).
ب گۆره‌ى ئاخڤتنێن وى وه‌لاتى پشكه‌ك ژ وه‌لاتیان پشتى برینا مێشێ و ده‌رئینانا هنگڤینى، مێشان بخوه ژى دئینن مال و دفرۆشن یان ب خودان دكه‌ن كو ئه‌ڤ چه‌نده ژى كاره‌كێ گرنگ و به‌رهه‌مداره.
ئه‌ڤرۆنيوز:
رێڤه‌به‌ريا هاتنوچوونێ ل پارێزگه‌ها دهوكێ درۆهنكرنه‌كێ دا بۆ وه‌لاتى وشوفێران ل باژێرێ دهۆكێ به‌حسێ پلانا خوه بۆ هاتنوچوونا ترومبێلان ل گه‌ليێ دهۆكێ ل رۆژێن بێهنڤه‌دان وئه‌ينى دكه‌ت.
رێڤه‌به‌ريا ناڤبرى ئاگه‌هداریا هه‌موو شوفێر وه‌لاتیان دكه‌ت ژبه‌ركو قه‌ره‌بالغه‌كا مه‌زن ل گه‌لیی دهوكێ په‌یدا دبیت ب تایبه‌ت ل رۆژێن بهێنڤه‌دان و ئه‌ینی و شه‌مبیان ، ژبۆ به‌رژه‌وه‌ندیا گشتی بریار هاته دان هه‌موو رۆژێن ئه‌ینی وشه‌مبى ل ده‌مژمێژ 4 ئیڤاری هه‌كه قه‌ره‌بالغ بیت ژ مفره‌قا گوندێ باجلوری هاتن بۆ ترومبێلان بۆ ناڤ گه‌لیی دهۆكێ و ناڤ سه‌نته‌رێ باژێری دێ هیته گرتن، ئانكو هاتن بۆ باژێرێ دهۆكی نینه، به‌روڤاژی دڤێت ب رێيا مفره‌قا بێسرێ را بهێته دهۆكێ .
دياركر ژى ، سه‌باره‌ت ترومبێلێن باسێن گه‌شتیاران، دڤێت بهێنه راوه‌ستاندن ل پاركا به‌رامبه‌ر كۆمپانیا چرانی وهه‌كه بچنه ده‌ڤه‌را قارقاراڤا، دڤێت ب رێيا مفره‌قا بێسرێ را بچن.
ئه‌ڤرۆ نیوز، نه‌وزاد هلۆرى:
گه‌نجه‌كێ مه‌سیحى كو ئاكنجیێ گوندێ تیشه‌مبيكێ يه ل ده‌ڤه‌را به‌روارى بالا ل ناحیا كانى ماسێ، ئه‌ڤه چه‌ند ساڵه وه‌كو ئاسنگه‌ر كاردكه‌ت، رابوویه ب چێكرنا چه‌ندین شێوازێن جوان و سه‌رنجراكێش یێن مه‌قلێن په‌لا بۆ بژارتنا كوشتى، وه‌كو ئه‌و دده‌ت دیاركرن كو مه‌قلێن وى بووینه جهێ سه‌نجراكێشا گه‌شتیاران و ژ وى دكرن.
مارادونا گورگیس، ئه‌و گه‌نجه بۆ ئه‌ڤرۆ نیوز گۆت: (نێزیكێ هه‌شت سالایه وه‌كو ئاسنگه‌ر هه‌ر ل مال كاردكه‌م و هه‌تا نها من چه‌ندین جۆر و شێوازێن كارێ ئاسنگه‌ریێ كرینه، پشتى كو هژماره‌كا مه‌زن یا گه‌شتیاران د وه‌رزێ هاڤینێ دا قه‌ستا ده‌ڤه‌را به‌روارى بالا كرى ، پێدڤى ب بژارتنا كوشتى دبوون ، ئه‌ڤ چه‌ندێ بوویه ئه‌گه‌ر كو ئه‌ز هزر د درۆستكرنا چه‌ندین شێوازێن جوان و سه‌رنجراكێش یێن چێكرنا مه‌قلێن په‌لا بۆ گوشت بژارتنێ).
زێده‌تر گۆت: (مه‌قلێن من بووینه جهێ سه‌رنجراكێشا گه‌شتیاران و ده‌ما قه‌ستا ده‌ڤه‌رێ دكه‌ن بۆ خوه دكرن و دبه‌ن، هنده‌ك ژى ژلایێ خودانێن خارنگه و كافیتریا و چایخانان دهێنه كرین وپتريا وان ژى ئه‌ز هه‌ر ل گوندى و ل سه‌ر جادا گشتى و مال د فروشم).
مارادوناى دیاركر ژى كو بهایێ هه‌ر ئێك ژ وان ب گۆره‌ى مه‌قلێ دهێته گوهۆرین، به‌لێ ب شێوه‌یه‌كێ گشتى دناڤبه‌را 70 هزار دینار بۆ 100 هزار دینارانه و گۆت: (ژبلى كارێ ئاسنگه‌ریێ ئه‌ز چو كارێن دى ناكه‌م، دیسان ژبلى چێكرنا مه‌قلا ئه‌ز چه‌ندین كارێن دى یێن ئاسنگه‌ریێ دكه‌م و ب ڤێ رێ داهاتیه‌كێ بۆخوه په‌یدا دكه‌م).
نيشاندان