ئەڤرۆ نیوز ، زنار تۆڤی:

سەرۆکێ تیمێ نەتەوەیێن ئێکگرتی بۆ ھاریکاریا عیراقێ راگەھاند، دبیت هەتا جەژنا قوربانی حوکمەتا نوو یا عیراقێ بھێتە پێکئینان.

یان کوپیچ د روونشتنا خوە یا دوماهیێ دا ل جڤاتا ئاسایشا نێڤدەولەتی دیارکریە، کو دەلیڤەکا مەزن ھەیە کو لێڤەگەرێ مەزنێ شیعان عەلی سیستانی کارتێکرنێ ل ھزرا ھێزێن سیاسی یێن عیراقی بکەت، هەروەسا داخواز ژی ژ حەیدەر عەبادی کریە کو بەردەوامیێ بدەتە سیاسەتا خوە یا ئاسایکرنا پەیوەندیان ل گەل وەلاتێن جیران و ب تایبەت عەرەبستانا سعوودیێ و وەلاتێن کەنداڤی.

یان کۆبیچی گۆت ژی: پێکئینانا حوکمەتا عیراقێ یا ھەڤدەمە ل گەل خوەنیشاندانێن پارێزگەھێن باشۆر و ناڤەراستا عیراقێ، کو خوەنیشاندەران نامەیەکا ب ھێز ئاراستەی حوکمەتێ کریە و داخوازا چاکسازیان و بەرھنگاربوونا گەندەلیێ ژێ کریە.

دیارکریە ژی، دبیت هەتا جەژنا قوربانی حوکمەتا نوو بھێتە پێکئینان، ھیڤی ژی خواستیە کو ئالیێن سەرکەفتی بگەھنە قۆناغا دوماهیێ یا دانوستاندنێن پێکئینانا حوکمەتێ و هەروەسا پێدڤیە حوکمەتا نوو یا عیراقێ داخوازیێن عیراقیان بجھبینیت.

ئه‌ڤرۆ نیوز:
به‌رپرسه‌كێ ئیرانێ ئه‌ڤرۆ په‌شیمانی هه‌مبه‌ری رێگرییا ته‌هران بۆ پارچه‌بوونا ئیراقێ نیشان دا.
عه‌بدوللا ره‌مه‌زانزاده‌، په‌یڤدار و سكرتێرێ به‌رێ یێ حكومه‌تا ئیرانێ ئه‌ڤرۆ گۆت: پێدڤی بوو ئیرانێ رێ ل پارچه‌بوونا ئیراقێ نه‌گرتبا.
ره‌مه‌زانزاده  ئاشكرا كر كو وی به‌ری نها ژی ئه‌و یه‌ك گۆتبوو و هه‌مان هه‌لوه‌ست هه‌بوو.
ناڤهاتی ئه‌و یه‌ك وه‌ك كارڤه‌دانه‌ك هه‌مبه‌ری داخویانیێن په‌یڤدارێ حكومه‌تا ئیراقێ ده‌ربری كو پێگیرییا ئیراقێ هه‌مبه‌ری سزایێن ئه‌مریكا ل سه‌ر ئیرانێ دیاركربوو.
ره‌مه‌زانزاده كوردێ رۆژهه‌لاتێ كوردستانێ یه‌ و هه‌روه‌سا ده‌مه‌كی پارێزگه‌رێ پارێزگه‌ها كوردستان بوو و شیره‌تكارێ وه‌زاره‌تا ناڤخۆ یا ئیرانێ بوو، ژبه‌ر پشته‌ڤانیا وی بۆ بزاڤا چاكسازیخوازێن ئیرانی ل سالا 2009ێ رێ پێ نه‌هاتبوو دان خوه‌ د هه‌لبژارتنان دا به‌ربژار بكه‌ته‌ ڤه‌.

ئەڤرۆ نیوز ، زنار تۆڤی:

کۆمسیۆنا بلندا سەربەخۆ یا ھەلبژارتنان ل عیراقێ د بەیاننامەکێ دا، ئەنجامێن فەرمی و دوماهیێ یێن ب دەست ھژمارتنا دەنگێن ھەلبژارتنێن عیراقێ راگەھاندن.

کۆمسیۆنا بلند یا سەربەخۆیا ھەلبژارتنان د بەیانناما خوە دا، ئەنجامێن فەرمی یێن ب دەست ھژمارتنێ یێن ھەلبژارتنێن پەرلەمانێ عیراقێ ژ ئالیێ جڤاتا دادوەری ڤە ھاتینە ھژمارتن راگەھاندن، لدووڤ بەیانناما وان ب تنێ ل پارێزگەھێن زیقار، نەینەوا، سەلاحەدین، ئەنبار گوھۆرین دناڤ کورسیەکا لیستان دا ھاتیه کرن، ل پارێزگەھا بەغدا ژی کورسیەک ژ لیستەکێ بۆ ئێکا دی ھاتە ھژمارتن.

پشتی ھەلبژارتنێن پەرلەمانێ عیراقێ ل 12 گولانێ هاتینە ئەنجامدان، نەرازیبوونا ھندەک ئالیێن سیاسی، ل پترییا پارێزگەھێن عیراقێ سکالا ل سەر کۆمسیۆنێ ھاتبوونە تۆمارکرن.

ژ بەر نەرازیبوونا گەلەک ئالیێن سیاسی، جڤاتەکا دادوەران ل شوونا کۆمسیۆنێ ژ بۆ ب دەست ھژمارتنێ ل سەر سندۆقێن سکالا هاتینە تۆمارکرن، دەست ب کارببوو، ب بریارا دادگەھا بلند یا فیدرالی ل عیراقێ ژمارەکا سندۆقان ل حەفت پارێزگەھێن عیراقێ ب دەست ھاتبوونە ڤاڤارتن.