ئه‌ڤرۆ نيوز:‏

ئایھان بیلگەن سەرۆکێ فراکسیۆنا ھەدەپێ ل پەرلەمانێ تورکیا د داخۆیانیەکی دا بۆ رۆژناما ‏بیرگوون یا تورکیا راگەھاند کو د کۆمبوونا پارتا وان دا ل باژێرێ وانێ یێ باکورێ کوردستانێ ‏گەنگەشە ل سەر رەوشا نوو یا تورکیا و چاوانیا چارەکرنا پرسا کوردی و ئامادەکاریێن بۆ ‏ھەلبژارتنێن باژێرڤانیان کرینە و گۆت: (بێگۆمان پرسا ھەری گرنگ یا تورکیا پرسا کوردیە و د ‏رەوشا نھا دا ھەموو پرسێن ناڤخوەیی یێن تورکیا ژی ب پرسا کوردی ڤە گرێداینە و بۆ ڤێ چەندێ ‏ژی چارەکرنا پرسا کوردی دێ دیمۆکراسیێ پێشڤە ببەت و پرسا ئێمناھیێ، بێکاریێ و ئاستەنگیێن ‏ل ھەمبەر مافێن مرۆڤی ژی چارە کەت و دێ خزمەتا ئاشتیا جڤاکی کەت).‏

بیلگەنی راگەھاند ژی کو د قۆناغا نوو دا دێ ل پەرلەمانێ تورکیا بزاڤەکا مەزن بۆ گەنگەشەکرنا ‏پرسێن تورکیا کەن و گۆت: (راستە دەستھەلات ب دەنگێ خەلکی ھاتە ھەلبژارتن لێ دەنگێ ‏نەرازیبوونێ د ناڤا جڤاکێ دا گەھشتیە ئاستەکێ بلند).‏

سەرۆکێ فراکسیۆنا ھەدەپێ ل پەرلەمانێ تورکیا راگەھاند ژی کو دەستھەلات دخوازیت ھەموو ‏ئالیێن ئۆپۆزسیۆنێ بێدەنگ بکەت و سیاسەتا ناڤەندی یا تاکەکەسی ل سەر ھەموو جڤاکێ و ئالیێن ‏سیاسی بدەتە برێڤە ببەت و گۆت: (ل ھەمبەر سیاسەتا تاکەکەسی یا ناڤەندی ئەم ژی دخوازین ‏ھەموو پشکێن جڤاکێ د ناڤا خوە دا ئێکگرتی بن و خەباتەکا ھەڤپشک برێڤە ببەن و ب ڤی رەنگی ‏ئەم دشێین د ناڤا گەلان دا ھەماھەنگیەکێ دروست بکەین).‏

ل دۆر ھەلبژارتنێن داھاتی یێن باژێرڤانیان ژی ئایھان بیلگەن سەرۆکێ فراکسیۆنا ھەدەپێ ل ‏پەرلەمانێ تورکیا راگەھاند کو د ھەلبژارتنێن بۆری دا ژی ئاشکرا بوو کو دڤێت ئێمناھیا سندۆقێن ‏دەنگدانێ باش بھێنە پاراستن و دڤێت ئەم ل ھەموو جھەکێ رێکخستنێن خوە ب ھێزتر بکەین دا ‏کو سەرکەڤتنا خوە د ھەلبژارتنێن باژێرڤانیان دا گەرەنتی بکەین و گۆت: (ئارمانجا مە ئەڤە ھژمارا ‏باژێرڤانیێن خوە زێدە بکەین و بۆ ڤێ چەندێ ژی پێدڤیا مە زێدەتر ب گەنگەشە و کۆمبوونێن ‏بەرفرەە ل گەل وەلاتیان ھەیە و ئەم دزانین ب پشتەڤانیا گەلێ خوە دێ شێین سەرکەڤین).‏

ئه‌ڤرۆ نيوز:

شاندەکێ سێ کەسی یێ ئەنجوومەنێ نیشتمانی یێ کوردی ل سووریێ دێ سەرەدانا سعوودیێ کەن و ‏ھاتە زانین کو کارێ سەرەکی یێ ڤێ شاندێ دێ ل گەل ئۆپۆزسیۆنا سووریێ پێکڤە لیژنان ئامادە ‏بکەن کو کارێ ڤان لیژنان ژی ئامادەکرنا دستوورێ نوو یێ سووریێ یە و دێ ل دۆر پرسا کوردی ‏ژی ل گەل بەرپرسێن سعوودیێ و نوونەرێن چەندین وەلاتان ھەڤدیتنان بکەن.‏

ئەندامەکێ سەرکردایەتیا پارتی دیموکراتی کوردستان- سووریا بۆ رۆژناما ئەڤرۆ دیار کر کو ‏شاندەکێ سێ کەسی ژ ئەنجوومەنێ نیشتمانیێ کوردی ل سووریێ کو ژ بەرێزان “ئیبراھیم برۆ- ‏حەواس عەگید و زەھرا محەمەد” پێک دھێن، ئەڤرۆکە دێ د کۆمبوونا ئۆپۆزسیۆنا سووریێ ل ‏سعوودیێ دا پشکدار بن و گۆت: (شاندێ کوردی ب رەنگەکێ فەرمی ھاتیە ڤەخواندن و دێ ل گەل ‏ئۆپۆزسیۆنا سووریێ پێکڤە ژ بۆ ئامادەکرنا دستوورێ نوو یێ سووریێ کار کەن، شاندێ کوردی دێ ‏ل گەل شاندێ دی یێ ئۆپۆزسیۆنا سووریێ ل سعوودیێ لیژێن دستووری دیار بکەن دا ئەڤ لیژنە ب ‏کارێ خوە بۆ ئامادەکرنا دستوورێ نوو یێ سووریێ رابن).‏

فەیسەل ئیسماعیل ئەندامێ سەرکردایەتیا پارتی دیموکراتی کوردستان-سووریا ھەروەسا ئەو یەک ‏ژی دیار کر کو ڤەخواندنا شاندێ کوردی ب رەنگەکێ فەرمی بۆ سعوودیێ ڤێ راستیێ نیشا ددەت ‏کو ھەم سعوودیە وەکو وەلاتەکێ ب ھێز یێ عەرەبی کو کار بۆ چارەکرنا قەیرانا سووریێ دکەت و ‏ھەم ژی ئالیێن دی یێن ئۆپۆزسیۆنا سووریێ ڤێ راستیێ باش دزانن کو بێی کوردان پرسا سووریێ ‏ناھێتە چارەکرن، سعوودیە پشتەڤانیێ ل مافێن کوردان ل سووریێ دکەت و بێگومان ئامادەکرنا ‏دستوورەکێ نوو بۆ سووریێ کو تێدا مافێن کوردان ژی بھێتە گەرەنتی کرن بۆ مە کوردان گرنگە و ‏گۆت: (مە دڤێت وەکو ئەنجوومەنێ نیشتمانی یێ کوردی ل گەل ھەموو ئالیەکێ دانوستاندنان ‏بکەین و بێگومان ئامادەکرنا دستوورێ نوو یێ سووریێ بۆ دیارکرنا چارەنڤیسی کوردان ل سووریێ ‏گرنگە و ھەکە شاندێ کوردی د ئامادەکرنا دستوورێ نوو دا پشکدار بیت دێ شێن گەلەک مافێن ‏کوردان د دستووری دا بچەسپینن، بێگومان ئەو یەک ژی دھێتە زانین کو بێی کوردان دستوورێ نوو ‏یێ سووریێ ناھێتە ئامادەکرن).‏

ناڤبری ئەو یەک ژی دیار کر کو شاندێ کوردی ژ بلی ئامادەکرنا دستوورێ نوو یێ سووریێ دێ ل ‏دۆر پرسا کوردی و مافێن کوردان ل سووریێ ل گەل ئەندامێن ئۆپۆزسیۆنا سووریێ و ھەروەسا ‏نوونەرێن سعوودیێ و وەلاتێن دی ژی دانوستاندنان بکەن و گۆت: (پێدڤی ھەموو ئالیێن کوردی ل ‏سووریێ ل گەل وەلاتێن عەرەبی و وەلاتێن زلھێز دانوستاندنان بکەن دا ئەو پشتەڤانیێ ل مافێن ‏رەوا یێ کوردێن سووریێ بکەن، چونکو ئاشکرایە نھا پرسا سووریێ بوویە پرسەکا جیھانی و بەشار ‏ئەسەد و چەند وەلاتەک نەشێن ب تنێ قەیرانا سووریێ چارە بکەن، ژ بەر ھندێ ژی ھەبوونا ‏پشتەڤانیەکا نێڤدەولەتی بۆ کوردان ل سووریێ گرنگە و ئەم وەکو ئەنجوومەنێ نیشتمانی یێ ‏کوردی ل سووریێ ل سەر ڤان خالان کار دکەین).‏

د دووماھیا ئاخڤتنا خوە دا ژی ناڤھاتی دیار کر کو سەرەدانا شاندێ کوردی دێ سێ رۆژان ڤەکێشیت ‏و دێ ل ھەموو کۆمبوونان دا بەرھەڤ بن و دێ بەرگیریێ ژ مافێن کوردان ل سووریێ بکەن و گۆت: ‏‏(ھەبوونا کوردان د کۆمبوونێن ئۆپۆزسیۆنا سووریێ و کۆمبوونێن دی یێن گرێدایی پاشەرۆژا ‏سووریێ گرنگە و مە دڤێت ھەموو ئەم د ھەموو وان کۆمبوونان دا پشکدار بین و نەھێلین خالێن کو ‏ل دژی مافێن کوردان بن، د دستووری دا بھێنە نڤیسین).‏