ئه‌ڤرۆنيوز:
نيڤرۆيا ئه‌ڤرۆ ئێكشه‌مبى 22 تيرمه‌ها 2018 ل هه‌رێما كوردستانێ وعيراقێ بيڤه‌له‌رزه‌ك ب هێزا 5:9 پله ل دووڤ بيڤه‌رێ رێخته‌ر روودا.
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ راگه‌هاند” ل ده‌مژمێر 1:07 خۆله‌ك نيڤرۆيا ئه‌ڤرۆ بيڤه‌له‌رزه‌ك ل رۆژهه‌لاتا كوردستانێ هاته تۆماركرن ل ده‌ڤه‌را تازه‌ئاباد ل كه‌رماشان ب كووراتيا 5:7 كيلۆمه‌تر و ب هێزا 5:9 پله ل دووڤ بيڤه‌رێ ريخته‌ر ول پتريا باژێرێن كوردستانێ هه‌ست پێ هاته كرن وچو زيان ددوڤ دا نه‌بوون”.
شێلادزێ ، نه‌وزاد هلۆرى:
بلندبوونا پلێن گه‌رمێ بوویه ئه‌گه‌ر كو رێژه‌یه‌ك ژ مێشێن شێلادزێ بمرن و مێشه‌ڤانه‌ك ژى دده‌ت دیاركرن كو هه‌كه بوردومانا فروكێن توركیا نه‌بایه ، نها ئه‌و دا ل زوزانێن ده‌ڤه‌را نێروه‌ورێكان مێشان بخودان كه‌ن.
مێشه‌ڤان ” خه‌لیل بێسه‌بى” بۆ ئه‌ڤرۆ گۆت: (ژئه‌گه‌را بوردومانێن فروكێن توركیا بۆ ده‌ڤه‌را نێروه‌ورێكان و جهێن هوین و زوزان، ئه‌م نه‌شێن مێشێن خوه ببه‌ینه ده‌ڤه‌رێن خوه و نه‌چارین هه‌ر ل مال بخودان بكه‌ين و خودانكرنا وان ل مال ژبلى كو كارتێكرنێ ل رێژه‌یا كێمبوونا هنگڤینى دكه‌ت ،دهه‌مان ده‌م دا دبیته ئه‌گه‌ر كو ژبه‌ر بلندبوونا پلێن گه‌رمێ مێشێن مه بمرن، ئه‌ڤه زێده‌بارى وێ یه‌كێ كو به‌شه‌كێ زور ژ مێشێن مه ژبه‌ر زۆربوونا تۆز و كارتێكرنێن ژینگه‌هێ ل ده‌ڤه‌رێ ژى دمرن).
زێده‌تر گۆت: (پێدڤیه جهێن شوله‌ژێ كار بكه‌ن ل سه‌ر وێ یه‌كێ كو ده‌ڤه‌رێن مه ئارام بن داكو ئه‌و ژى بشێن مێشێن خوه ببه‌ن جهێن هوین و خوه‌ش ، به‌روڤاژى رۆژ بۆ رۆژێ مێشێن مه دێ مرن و نها رۆژانه هزاران مێش ژبه‌ر بلندبوونا پلێن گه‌رمێ دكه‌ڤنه ئه‌ردى و دمرن و كارتێكرنه‌كا زور ل سه‌ر مێشێن مه دكه‌ت).
مێشه‌ڤانێ ناڤبرى د درێژاهیا ئاخڤتنێن خوه‌دا دیاركر ژى كو هه‌تا نها حوكمه‌ت و لایه‌نێن شوله‌ژێ چو جۆرێن هاریكاریان بۆ وان نه‌كرینه و گۆت ژى: (هه‌كه حوكمه‌ت چو هاریكاریان نه‌كه‌ت و بوردومانا فرۆكان به‌رده‌وام بیت و مێش ب مێشه‌ڤان ڤه نامینن، و مێش دێ دگه‌رمان دا مرن و مێشه‌ڤان ژى د قه‌هران دا ، ژبه‌رڤێ گرنگه ب زووترین ده‌م هاریكاریا مێشه‌ڤانان بهێته‌كرن داكو بشێن ل سه‌ر كارێن خوه به‌رده‌وام بین و باشترین هنگڤین پێشكێشى خه‌لكى بكه‌ین، و نها ئه‌م رێژه‌یه‌كا زۆر یا هنگڤینى َخوه دووباره بۆ مێشان دكه‌ینه خوارن داكو نه‌مرن).
ل سنوورێ ناحیا شێلادزێ نێزیكێ 50 مێشه‌ڤان هه‌یه و سالانه زێده‌تر ژ 10 ته‌نێن هنگڤینى به‌رهه‌مدئینن ، و هنگڤینێ ده‌ڤه‌رێ ب هنگڤینه‌كێ سافى و ئه‌سلى دهێته نیاسین، پرانیا هنگڤینى هه‌ر ل ده‌ڤه‌رێ ژى دهێته فروتن.
ئەڤرۆ نیوز، نەوزاد ھلۆری:
بەری نیڤرویا ئەڤرۆ ل سەر رێیا گشتی یا ھاملتون دناڤبەرا ناحیا خەلیفان و سپیلکی ، ژ ئەنجامێ لێکدانا سێ ترومبێلان 11 کەس برینداربوون.
دڤی واریدا دلاوەر لەتیف بەرپرسێ پەیوەندی و راگەھاندنا رێڤەبەریا ھاتنوچۆنا دەڤەرا سوران بۆ ئەڤرۆ نیوز گۆت: (بەری نیڤرویا ئەڤرۆ ژ ئەنجامێ لێکدانا سێ ترومبێلان لسەر رێیا گشتی یا ھاملتون دناڤبەرا ھەردوو ناحیێن خەلیفان و سپیلکی ، 11 کەس برینداربوون).
زێدەتر گۆت: (ھەموو بریندار بو نەخۆشخانا تەنگاڤیان ل ھەولێر ھاتینە رەوانەکرن و بریا بەشەک ژ برینداران گرانە، و ئەگەرا روودانێ ژی دزڤریت بو پێگیرنەبوونا شوفێران ب رێنمایێن ھاتنوچۆنێ).
ب گورەی داتایێن رێڤەبەریا ھاتنوچۆنا دەڤەرا سوران د شەش ھەیڤێن ئەڤ سالەدا ژ ئەنجامێ 50 روودانێن ھاتنوچۆنێ 13 کەسان گیانێ خوە ژ دەستدایە و 70 کەسێن دن ژی برینداربووینە.
ئه‌ڤرۆ نيوز، نيوار محه‌مه‌د سه‌ليم:
رێڤەبەریا خۆپاراستنا ساخلەمیێ یا سەر ب رێڤەبەریا گشتی یا ساخلەمیا پارێزگەها دهۆکێ روونکرنەک ل دۆر بەلاڤبوونا چەند وێنەیان بەلاڤکریە و رەت دکەن کو چو راستی بۆ وان وێنان هەبیت.
هۆبا مەلاریێ ل رێڤەبەریا خۆپاراستنا ساخلەمیێ یا سەر ب رێڤەبەریا گشتی یا ساخلەمیا پارێزگەها دهۆکێ د روونکرنەکا تایبەت دا بۆ نوش نیوز راگەهاند کو ل رۆژێن بۆری ل گەلەک تۆڕێن جڤاکی دا وێنێن هندەک کێزان بەلاڤ بووینە کو دبنە ئەگەرێ نەخۆشیێن پیستی و خونبەربوونێ، بەلێ پشتی گەلەک نموونێن ڤان گەهشتینە مە ژ کەمپێن گەویلان، مام رەشان، خانکێ ل گەل سەنگەرێ تلسقوف دیار بوو ئەڤان کێزان چو پەیوەندی ب کرنیان ڤە نینە.
هۆبا مەلاریێ ئاشکەرا کریە ژی کو ئەڤە کێزەکا چاندنێ یە ژ جورێ polydrusus و چ زیان ل سەر مرۆڤان نینن.
هەر ب گۆرەیی ڤێ روونکرنێ ئەو وێنێ هاتیە بەلاڤکرن یێ نەخۆشیەکا پیستی یە ب ناڤێ Bullous Pemphigoid و وێ کێزێ چو پەیوەندی پێڤە نینە.
ئەڤرۆ نيوز:
بڕیارە حوکمەتا ھەرێما کوردستانێ ب رێیا چەند کۆمپانیان دەست ب تمامکرنا رێیا سەرەکیا دھۆک – ھەولێر بکەت کو د ناڤ وەلاتیان دا ب رێیا گۆپالە یا بەرنیاسە و بەرپرسەکێ وەزارەتا ئاڤەدانکرێ ژی دیار کر کو ئەڤ رێیە یا نێڤدەولەتی یە و دێ ب ستاندارتێن جیھانی ھێتە دروستکرن.
نەوزاد ھادی، پارێزگارێ ھەولێرێ ل دۆر دەستپێکرنا پرۆژێ جۆتسایدێ دھۆک – ھەولێر دیار کر کو رێیا سەرەکی یا دھۆک – ھەولێر کو ب رێیا گۆپالە یا بەرنیاسە ب دو قووناغان دێ ھێتە چێکرن، قووناغا ئێکێ ژ سەنتەرێ باژێرێ ھەولێرێ بۆ گۆپالە و سەر زیێ مەزن، قووناغا دویێ ژی ژ پارێزگەھا دھۆکێ بۆ سەر زیێ مەزن و بۆ مالپەرێ فەرمیێ پارتی دیموکراتی کوردستان گۆت: “نوکە وەزارەتا ئاڤەدانکرنێ یا بزاڤان بۆ وێ چەندێ دکەت کو دەست ب چێکرنا پرۆژێ جۆتسایدێ ھەولێر – دھۆک بھێتەکرن”.
ناڤھاتی ئاماژە دا وێ چەندێ کو چێکرنا رێیا ناڤبری نەھاتیە راوەستاندن، بەلێ ژ بەر کو پرۆژە دێ ب قەر ھێتە بجھئینان ھندەک رێکار د پێدڤینە ژ بەر ڤێ چەندێ وەزارەتا ئاڤەدانکرنێ یا بزاڤان دکەت پرۆژە ب تمامی بکەڤیتە کاری و دووماھیێ ب ڤی پرۆژەی بینن”.
بەری نوکە زانا عوزێر، رێڤەبەرێ گشتی یێ پلاندانانێ ل وەزارەتا ئاڤەدانکرنێ یا حوکمەتا ھەرێما کوردستانێ بۆ مالپەرێ فەرمی یێ پارتی دیموکراتی کوردستان دیارکربوو کو ئەڤ رێیە یا نێڤدەولەتی یە و دێ ب ستاندارتێن جیھانی ھێتە دروستکرن.
ئەڤرۆ نيوز:
پەرلەماتارەکێ لیستا زەر ل پەرلەمانێ کوردستانێ دیار کر، ھەکە ھەلبژارتنێن پەرلەمانێ کوردستانێ د دەمی َخوە دا بھێنە ئەنجامدان و دەمێ پەرلەمانی نەھێتە درێژکرن گەلەک پڕۆژە دێ کەڤنە خۆلا بھێت یا پەرلەمانی و دبێژیت: پێشبینی دھێتە پڕۆژێ چاکسازیێ ل خۆلا بھێت بھێتە پەسەندکرن.
شوان ئەحمەد، پەرلەمانتارێ لیستا زەر ل پەرلەمانێ کوردستانێ بۆ رۆژناما ئەڤرۆ گۆت: “ژ بەر نەبونا دەمێ پێدڤی و کارێ زۆری پەرلەمانی پڕۆژە قانوونا چاکسازیێ رەنگە ل خۆلا بھێت یا پەرلەمانێ کوردستانێ بھێتە پەسەندکرن، پڕۆژە قانونوا چاکسازیێ د بەڕژەوەندیا گشتی دایە و پێدڤیە ب رژدی کار ل سەر بھێتە کرن”.
وی پەرلەمانتارێ لیستا زەر ل پەرلەمانێ کوردستانێ گۆتژی: “پەیرەوێ ناڤخوە بڕیار ھاتیەدان ل ڤێ خۆلێ بھێتە تەمامکرن و پەسەندکرن، بەلێ پڕۆژێ چاکسازیێ حوکمەت یا بەرھەڤ نەبوو، پاشی پەرلەمانی ژی بارێ حوکمەتێ گرانکر، حوکمەتێ راگەھاند ھەکە پڕۆژێ چاکسازیێ بھێتە پەسەندکرن، مووچێ فەرمانبەران ھەیڤانە بێ پاشکەفت دێ ھێتە بەلاڤکرن”.
ناڤبری تەکەز ژی کر، ئەڤ دەمێ ژ کارێ پەرلەمانی مای و ھەکە کار ل سەر پڕۆژە قانوونا چاکسازیێ بھێتە کرن دێ ھێتە پەسەندکرن و دووماھیک پێ ھێت و گۆت: “ئەز پێشبینی دکەم پڕۆژێ چاکسازیێ بکەڤیتە خۆلا نوو یا پەرلەمانێ کوردستانێ ھەکە ھەلبژارتن د دەمی َخوە دا بھێنە ئەنجامدان و دەمێ پەرلەمانێ کوردستانێ نەھێتە درێژکرن”.
ئەڤرۆ نيوز:
بەرپرسێ لقێ 12 ێ پارتی دیموکراتی کوردستان ئاشکراکر، ئەم پشت راستین ل گوری ئەنجامێن پرانیا راپرسیا ھژمارا دەنگ و کورسیێن پارتی زێدەتر بن، و پارتی دیموکراتی کوردستان بەرھەڤیێن تەمامکرینە بۆ ھەلبژارتنێن پەرلەمانێ کوردستانێ، کو بریارە ل 30 ێ ئیلونا ئەڤسالە بھێنە کرن، و پێشبینی دکەین کورسی و دەنگێن پارتێ زێدەتر بن ل گوری وان دەنگێن پارتی بۆ ھەلبژارتنێن عیراقێ ب دەست ڤەئینای، وەک پارتی بۆ لیستا ژمارە 183 ھەمو بەرھەڤی دووماھیک ئیناینە و چاڤەرێ روژا دەستنیشانکرنا ھەوا دکەین، ل ھەموو ھەلبژارتنان پێدڤیە ترس ل سەختاەکاریێ ھەبیت، رەنگە ئەو ساختەکاریا ل دەستا دھێتە کرن جودا بیت ل وێ ساختەکاریا کو بەرنامە بۆ ھاتیە دارشتن، و ب ھژمارێن ئەلیکترونی دھێتە کرن، ل گەل ھەموو لایەنا ئەم ل سەر خەتین بۆ وێ چەندێ ھەلبژاردنێن 30 ێ ئیلونێ بێ ئاریشەو دزین و تەزویرکرنا دەنگا برێڤە بچن کو ھەلبژاردنێن نافخویێن ھەرێما کوردستانێ نە، پێدڤیە ب پاقژی و دور ل سەختەکاریێ برێڤەبچیت .
بەسام عەلی بەرپرسێ لقێ 12 ێ پارتی دیموکراتی کوردستان بۆ روژناما ئەڤرۆ گوت : ھەر ھێزەکا سیاسی ل دەستپێکا بانگەشەیا ھەلبژارتنا بەرنامەیێ خوە بۆ چوار سالا دیاردکەت ئەم چاڤەرێ دکەین کارنامەیا پارتی بۆ چوار سالێن دی کو دێ بیتە کارنامەیا بانگەشەیا ھەلبژارتنا دێ بیتە پشکەکا مەزن بۆ حوکمەتا داھاتیا عیراقێ ئەم پشت راستین دێ کارنامەکا تژی بەرژوەندیا گشتی بیت ، ل سنورێ پارێزگەھا سلێمانیێ و ھەلەبجە پارتی 18 کاندید ھەنە 5 ژوان ئافرەتن لسەر جەمێ 100 بەربژار ، ھەموو دەما پارتی ل ھەلبژارتنا وێستگەھێن دی 30 % ئافرەت پشکدارن، ل سنورێ پارێزگەھا ھەلەبجە ھەتا نوکە ھەلبژاردنێن جڤاتا پارێزگەھێ نەھاتینە کرن، مخابن لایەنێن سیاسی رێک نەکەفتن کو جڤاتا پارێزگەھا ھەلەبجە دەست بکاربیت، ھیڤدارین وەک پارتی ل گەل ھەلبژاردنێن جڤاتێن پارێزگەھێن ھەرێمێ ھەلبژاردن بۆ جڤاتا پارێزگەھا ھەلەبجە ژی بھێنە کرن وەک بازنەیەکێ سەربەخو.
ئەڤرۆ،باسم قاسم شنگالی
ئەڤرۆ شەمبی 21/7/2018 ل کۆمه‌لگەها دۆهلا ل باکورێ قەزا شنگالێ گەنجەکی خوە کوشت
ئەحمەد شەرەف، کور مامێ وی گەنجی بۆ ئەڤرۆنيوز دا گۆت” ئەڤرۆ پشتی نیڤرۆ ل کۆمه‌لگەها دۆهلا ل باکورێ قەزا شنگالێ کورێ مامێ من (حازم نەزیر حەواس) كو ژيێ وى 20 سالن، خوه كوشت”.
گۆت ژى” هەتا نۆکە ئه‌گه‌رێن خوه‌كوشتنا وى يێ ديار نينه”.
ئه‌ڤرۆ نيوز:
شوره‌ش حه‌سه‌ن رێڤه‌به‌رێ راگه‌هاندن و په‌يوه‌نديان ل كۆمسيونا بلندا سه‌ربخوه‌يا هه‌لبژارتن و راپرسيێن هه‌رێمێ راگه‌هاند، ب تنێ چوار رۆژ يێن ماين و هه‌تا نوكه چو ليسته‌كا سه‌ره‌كى يا كوردستانێ ناڤێن به‌ربژێرێن خوه پێشكێش نه‌كرينه.
برياره 30 ئه‌يلولا ئه‌ڤ ساله هه‌لبژارتنێن په‌رله‌مانێ كوردستانێ ده‌ست پێ بكه‌ن و ل گۆر تومارێن ده‌ستپێكى سێ مليون و 88 هزار و 642 كه‌سان مافێ ده‌نگدانێ يێ هه‌ى.
ئه‌ڤرۆ نیوز، نه‌وزاد هلۆرى:
رێڤه‌به‌ریا كاروبارێن شه‌هید و ئه‌نفالكریێن بارزان دیاركر كو ئه‌و دێ ب هه‌ڤكاریا داموده‌زگه‌هێن میرى یێن ده‌ڤه‌را بارزان دێ سالرۆژا جینوسایدا بارزان ل گوندێ بارزان ساخ كه‌ن.
رێبوار ره‌مه‌زان بارزانى، رێڤه‌به‌رێ كاروبارێن شه‌هید و ئه‌نفالكریێن بارزان بۆ ئه‌ڤرۆ نیوز گۆت: (رێڤه‌به‌ریا كاروبارێن شه‌هید و ئه‌نفالكریێن بارزان ب هه‌ڤكاریا داموده‌زگه‌هێن حكومى يێن ده‌ڤه‌رێ و وه‌زاره‌تا شه‌هید وئه‌نفالكريان دێ جینوسایدا بارزانیان ل سه‌ر گورستانا جینوسایدكریان ل گوندێ بارزان ساخ كه‌ت)
زێده‌تر گۆت: (دچارچۆڤێ ساخكرنا سالرۆژا جینوسایدا بارزانیان دێ كۆمه‌كا چالاكیان هێنه ئه‌نجامدان و هه‌ر نها ده‌ست ب به‌رهه‌ڤیان دهێته‌كرن و ل رۆژا 31/7/2018 دێ چالاكى هێته ئه‌نجامدان)
دهێته زانین كو ل 31/7/1983 رژێما به‌عس د پلانه‌كا دارشتى دا 8000 هزار بارزانى ده‌سته‌سه‌ركرن و پاشى بۆ باشوورێ عیراقێ ڤه‌گوهاستن و ب ساخى بن ئاخكرن و هه‌تا نها بتنێ رووفاتێن نێزیكێ 600 كه‌سان هاتینه زڤراندن و سالانه ب مه‌ره‌ما بلند راگرتنا بيره‌وه‌ريا وان، چالاكى لسه‌ر گورستانا جینوسایدا بارزانیان دهێنه ئه‌نجامدان.
نيشاندان