ئەڤرۆ نيوز:
سەرۆک وەزیرێن عیراقێ دێ سەرەدانا ئەنقەرە و تەھرانێ کەت و سزایێن ئەمریکا ل سەر ئیرانێ داناین، ل گەل بەرپرسێن وان وەلاتان گەنگەشە کەن.
حەیدەر عەبادی حەفتیا بھێت دێ سەرەدانا ئەنقەرە کەت و ل گەل مەزنە بەرپرسێن وی وەلاتی، بەحسێ پەیوەندیێن بازرگانی کەت، پشتی سەرەدانا ئەنقەرە، دێ چیتە تەھرانێ، لێ ئاژانسا فارس یا نووچەیان ژ زارێ بەھرام قاسمی، پەیڤدارێ حوکمەتا ئیرانێ دیار کریە، تەھرانی زانیاری ل سەر سەرەدانا عەبادی نینن.
ئەڤرۆ نيوز:
بریکارێ بەرێ یێ وەزارەتا دارایی ل عیراقێ راگەھاند، رەوشا ئابووری ل ھەرێما کوردستانێ بەر ب باشتر یا چوی و ھەکە دەستەیا وەبەرھێنانێ بھێتە ئەلکترۆنیکرن، دێ گەلەک کۆمپانیێن بیانی ھێنە ھەرێما کوردستانێ.
فازل نەبی بۆ مالپەرێ فەرمیێ پارتی دیمۆکراتی کوردستان گۆت” فەرمانبەرێن ھەرێما کوردستانێ بلا دپشت راست بن ئێدی حوکمەتا ھەرێما کوردستانێ دشێت بەردەوام و د ژڤانێ خوە دا مووچەی بەلاڤ بکەت، چونکو بەغدا بەردەوام کۆژمێ 317 ملیار دیناران دێ ھنێریت و بھایێ پەترۆلێ یێ بلند بووی، ھەروەسا بەرھەمئینانا پەترۆلا ھەرێمێ ژی یا زێدەبووی و داھاتێ ناڤخوەیی ژی یێ ھەی، لەوما ئێدی کێشا مووچەی نامینیت”.
ل دۆر ئینانا زێدەتر کۆمپانیێن بیانی بۆ ئەنجامدانا وەبەرھێنانێ ل ھەرێما کوردستانێ، فازل نەبی گۆت” پێدڤیە حوکمەتا ھەرێمێ دو پێنگاڤان ب ھاڤێژیت، ھاریکاریا وەبەرھێنەرێن ناڤخوەیی بکەت و وەبەرھێنەرێن بیانی ژی پالدەت بھێنە ھەرێمێ بۆ ئەنجامدانا کارێن وەبەرھێنانێ، ئەڤ چەندە ژی ب رێیا چەند پێنگاڤان دھێتە کرن وەکو دەستەیا وەبەرھێنانێ بھێتە ئەلکترۆنیکرن بۆ وێ چەندێ کۆمپانیا بشێن ب ساناھی مۆلەتێ وەرگرن، چونکو ژبەر گەلەک پێرابوونان، دەمێ زۆر دڤێت تاکو مۆلەتێ وەرگرن، بەلێ ھەکە بھێتە ئەلکترۆنیکرن، وی دەمی کۆمپانی ب ساناھی دێ مۆلەتێ وەرگرن، ھەروەسا دانا پارچێن ئەردی بۆ پرۆژێن وان یێن وەبەرھێنانێ”.
ئەڤرۆ نیوز ، زنار تۆڤی:
ب گۆتنا وەلاتیێن عیراقی کۆمارا ئیسلامی یا ئیرانێ دینارێ عیراقی یێ سەختە دهنێریتە بازارێن عیراقێ.
د تۆرێن جڤاکی دا وەلاتیێن عیراق چەند وێنە بەلاڤە کڕینە، کو دهێتە گۆتن ل دەروازێن سنووری دەست ب سەر دینارێ سەختە و مادێن هۆشبەردا هاتیە گرتن.
هەروەسا وەکو دیار نان ل ئیرانێ هاتیە هاوردە کرن بۆ عیراقێ، بەلێ ل دەروازێن سنووری پشکنین بۆ وی نانی کریە و دەرکەفتیە کو دینارێ چاپکری یێ سەختە و مادێ هۆشبەر تێدا هاتیە ڤەشارتن.
وەلاتیێن عیراقی گۆتیە، ئەڤ بزاڤێن ئیرانێ بۆ گوهۆرینا وان دینارێن سەختەیە ب دۆلاری و برنا وی پارەی بۆ ئیرانێ، ب مەبەستا کێمکرنا دەرهاڤێژێن نەرێنی یێن سزایێن ئەمریکا ل سەر وان.
ب ئەگەرێ سزایێن ئەمریکا، ئابووریێ ئیرانێ بەرەف بارەکێ گەلەک خراپ ڤە چوویە و تومەنێ وی وەلاتی بهایێ خوە ژ دەست دایە، ب شێوەکێ کو بهایێ 100 دۆلار گەهشتیە پتری ئێک ملیۆن تومەن.
ئەڤرۆ نيوز:
شارەزایەکێ قانوونی یێ عیراقی راگەھاند، پەسەندکرنا ئەنجامێن ھەلبژارتنان 21 رۆژ بۆ دڤێن کو پێدڤیە دزی دەمێ دا بریارا پەسەندکرن بھێتە دەرکرن وئاماژە دا نابیت ئەنجامێن دووماھیێ یێن ھەلبژارتنان بھێنە پەسەندکرن بێ بدووماھی ھاتنا ھەردو قۆناغێن سکالا وتانان.
تارق حەرب بۆ رۆژناما ئەڤرۆ گۆت” نابیت دادگەھا فیدرالی یا عیراقی ئەنجامێن دووماھیێ یێن ھەلبژارتنێن جڤاتا نوونەرین عیراقی پەسەند بکەت، تاکو ھەردو قۆناغێن سکالا وتانێن بەربژارێن دوان ھەلبژارتنان دا ب سەرنەکەفتین کو دێ ھێنە پێشکێشکرن بۆ کۆمسیۆنا بلند یا ھەلبژارتنان ل عیراقێ ب دووماھی نەھێن”.
گۆت ژی” پشتی کۆمسیۆنا بلند یا ھەلبژارتنان ل عیراقێ ئەنجامێن خوە یێن تایبەت ب سکالایێن بەربژاران ڤە دراگەھینیت، ل وی دەمی وان ماف یێ ھەی تانێ ل وان ئەنجامان ل دەف لژنا دادوەری بدەن”.
خویاکر ژی” پشتی دەرکرنا بریارا لژنا دادوەری ل دۆر تانان، لیست دێ ھێنە ھنارتن بۆ دادگەھا فیدرالی یا بلند ل عیراقێ ژبۆ پەسەندکرنا ئەنجامێن دووماھیێ یێن ھەلبژارتنان وئەڤ پرۆسە 15 رۆژان ڤەدکێشیت، ھەکە مفا ژحەفتیا جەژنا قوربانی بھێتە وەرگرتن، بەلێ ھەکە مفا ژوان رۆژێن جەژنێ نەھێتە وەرگرتن ئەو پرۆسە دێ 21 رۆژان ڤەکێشیت تاکو ئەنجامێن دووماھیێ یێن ھەلبژارتنان دھێنە پەسەندکرن”.
دەستەیا دادوەری ئەوا ھاتیە راسپاردن ب رێڤەبرنا کۆمسیۆنا بلند یا ھەلبژارتنان ل عیراقێ، ل رۆژا پێنجشەمبیا بۆری ب دووماھی ھاتنا پرۆسا ھژمارتنا دەنگێن ھەلبژارتنا جڤاتا نوونەرێن عیراقێ ل ھەموو پارێزگەھێن عیراقێ، راگەھاندبوو.
ئه‌ڤرۆ نيوز:
بەرپرسێ لژنا ناوچا زۆمار یا پارتی دیموکراتی کوردستان دیارکرکو حەشدا شەعبی دگەل ڤەکێشانا ھێزێن خوە ژ دەڤەرا زومار ل رۆژا 11/8/2018 ھژمارەکا تەرکتور و ترۆمبێلان وگەل وپەلێن ھەمە جۆر دگەل خوە برن”.
حەسەن خەلو، بەرپرسێ لژنا ناوچا زۆمار یا پارتی دیموکراتی کوردستان دیارکر” ئەڤرۆ 11/8/2018 ل زومار حەشدا شەعبی دۆرین 22 ترۆمبیلان وچەکێ خوە گران وەکو تەنگ وتوپ ژ دەڤەرا زومار ڤەکێشان ول جھێ وان لیوا 72 یا فرقا 15 لەشکری عێراقی ھاتیە جیگرکرن و دگەل ڤەکێشانا ھێزێن خوە، حەشدا شەعبی تەراکتور و ترومبێل دگەل خوە برن و گەھشتە رادەکێ ماتۆر وپەنجەر ودەرگەھێن ھندەک خانیان ژی ژێڤەکرن ودگەل خوە برن” .
گۆت ژی” ل دووڤ پێزانینان ژی، حەشدا شەعبی ل دەڤەرێ ھندەک خانی ژی ل ڤێ دووماھیی دگەل ڤەکێشانا ھێزێن خوە خرابکرینە وگەلەک مالێن وەلاتیان تالانکرن بتایبەتی ژی ئەو مال تالانکرن یێن نەڤەگەریاینە سەر جھێن خوە، کو دەمێ پێشمەرگێ کوردستانێ ل زومار ئەو خێزان ڤەگەریابوون، لێ پشتی روودانێن 16 ئوکتۆبەری ئەو خێزان دووبارە ئاوارەبووینە ونوکە حەشدا شەعبی خانیێن وان تالانکرن”.
ژێدەرکێ ل زومار نەخواست ناڤی خۆ ئاشکرا بکەت بۆ ئەڤرۆ دیارکرکو حەشدا شەعبی ل زومار نەمایە وئەڤە چار رۆژن خوە ژ دەڤەرێ ڤەدکێشن ونوکە لەشکری عیراقێ یێ جھێ حەشدا شەعبی دگریت بتایبەتی ژی فرقا 15 لیوا 72 یا لەشکری عیراقێ ھاتیە زۆمار ودگەل ڤەکیشانا خوە، حەشدا شەعبی گەلەک کەلوپەلێن خەلکی برن وبەر ب سەربازگەھا سپایکر ل پارێزگەھا سەلاحەدین چوون.
قاسم دربۆ، بەرپرسێ ئوپەراسیۆنێن پێشمەرگەی ل فەرماندەیا شنگال یا پێشمەرگێ کوردستانێ بۆ ئەڤرۆ دیارکرکو حەشدا شەعبی خوە ژ سنۆری دەڤەرا شنگالێ یا ڤەکێشای ونوکە ب تنێ ھێزەکا ئێزدیان یا ب سەر حەشدا شەعبی ڤە ل شنگالێ مایە و ڤەکێشانا حەشدا شەعبی ل دەڤەرێ دێ بیتە ئەگەر خەلک ڤەگەرنە سەر جھێن خوە ورەوشا شنگالێ بەر ب ئارامیێ بچیت”.
ئاماژە دا وێ چەندێ ژی” بێگومان ڤەکێشانا حەشدا شەعبی ل گۆری رێککەڤتنەکێ یە وئەم داخوازی دکەین ریێا سحێلا ژی بۆ ھاتنوچوونا وەلاتیان بھێتە ڤەکرن ورێ بھێنە خوەشکرن وخەلکێ شنگالێ ڤەگەرنە سەر جھێن خوە ودەست ب ژیانا خوە ل شنگالێ بکەن”.
ئاشکرا کرکو ئەڤە چەند رۆژن حەشدا شەعبی ھێزێن خوە ژ زومار و رەبیعە و سنۆنی و شنگالێ و رۆژئاڤایێ دیجلە بۆ مووسلێ ڤەدکێشن و نوکە لەشکری عیراقی یێ ل جھێن حەشدا شەعبی دھێتە جھگیرکرن و ھەر دەڤەرەکا حەشدا شەعبی خوە ژی ڤەکێشیت، ئێکسەر لەشکری عیراقی ل وێ جھێ دھێتە جھگیرکرن”.
ئه‌ڤرۆ نيوز:
پشتی ھژمارتنا دەنگان ب دەست 10 ئافرەت ل سەر ئاستێ عیراقێ ھاتنە دیارکرن کو بێ کۆتا ب سەرکەفتینە، شیان ھەڤرکیێ ب ئینانا دەنگان ل گەل زەلامان بکەن،ژسەرجەمێ ھەر 10 ئافرەتان (5) سەر ب پارتی دیموکراتی کوردستان (4) ئێکەتیا نشتیمانی یا کوردستانی (1) لیستا النصر، ھەر پێنچ ئافرەتێن پارتی، سێ ل پاریزگەھا دھۆکێ نە (وەسفیا محەمەد شێخو) (1891) دەنگ، (دالیا فەرھاد حاجی) (15203) دەنگ، (ڤیان سەبری) (21479) دەنگ، دو ئافرەتێن پارتی ل ھەولێرێ ژی ب ھەمان شێوە (مەیادە محەمەد) (14975) دەنگ (ھەدار زبێر عەبدۆللا) (22261)دەنگ، چار ئافرەتێن سەر ب ئێکەتیا نشتیمانی کوردستان ڤە (جوان ئیحسان) (28157) دەنگ، (بلیسا جەبار فەرمان) (26941) دەنگ، (ئارزو محمود خدر) (18608) دەنگ، (ئەلماس فازل) (14840) دەنگ، ژ لیستا النصر یا حه‌یدەر عەبادی سەرکێشیێ دکەت (ماجدە عەبدال لەتیف) (55184) دەنگ ب دەست ڤە ئیناینە.
خالد ئەحمەد، بەرپرسێ نڤیسینگەھا ھەلبژارتنان ل لقێ ئێک بۆ رۆژناما ئەڤرۆ گۆت” پارتی شانازیێ ب ھندێ دکەت کو بۆ دو خۆلان دھەلپژارتنێن جڤاتا نوونەرێن عیراقێ دا ل پارێزگەھا دھوکێ ئافرەت دلیستا پارتی ب کۆتا سەرناکەڤن، بەلکو دگەل زەلاما بەریکانێ دکەن و ب مافێ خوە سەر دکەڤن، د ھەلبژارتنێن ۲۰۱٤ ێ دو ئافرەت و یێن ۲۰۱٨ێ سێ ئافرەت دلیستا پارتی بتنێ دبازنێ دھۆکێ دا بێ کۆتا سەرکەفتن، د ھەلبژارتنێن ۲۰۱٨ دا ل سەرانسەری عیراقێ ۱۰ ئافرەت بێ کۆتا سەرکەفتینە ژ وان پێنچ دلیستا پارتی دانە. ئەڤە وێ دگەھینیت، پارتی وەکو مەزنترین پارتا سەرکەفتی دھەلبژاتێن عیراقێ دا، ب مەزنترین و رەسەنترین پارتا دیموکرات ژی ل سەرانسەرێ عیراقێ دھێتە ھژمارتن کو کار بۆ ئاڤاکرنا جڤاکەکێ سڤیل و دیموکرات دکەت و شانازیێ ب ھشیاری و شارستانیا خەلکێ خوە دکەت کو ل سەر ئاستێ عیراقێ جھێ ھێڤیێ و چارەسەریێ یە”.
گۆت ژی” پشتی ڤاڤارتنا دەنگان ب دەستی ب دووماھی ھاتی، دەنگێن پارتی وەکو خوە مان و چو جوداھی دروست نەبوو، مخابن ئەم چاڤەرێ بووین دەنگێن پارتی زێدەبن تایبەت ل پارێزگەھا نەینەوا ، بەلێ دوبارە نەھژمارتنا دەنگێن ئاواران دکەمپا دان بۆ ئەگەرێ سوتنا دەنگێن ۱۹۷ سندوقێن دەنگدانا مەرجدار بتنێ ل پارێزگەھا دھۆکێ کە تێرا ھندێ ھەبوون ۱ــ۲ کورسیان بۆ پارتی زێدەبکەت”.
دیارکر ژی”ب تنێ ل پارێزگەھا نەینەوا پێک گوھۆرینا بەربژارەکێ پارتی ب کۆتا ئافرەتان ھات پشتی ئافرەتەک د لیستەکا دی سەرکەفتی، ل دەسپێکێ ھاتبوو راگەھاندن کو پارتی دگەل ھژمارتنا ب دەستی یەـ چونکی پارتی ژ دەنگێن خوە پشت راست بوویە و پارتی مەغدور بوویە د ھژمارتنا ئەلکترونی دا، ژبەرکو پارتی مستھدف بوو ژ لایێ کۆمسیۆنا ھەلبژارتنێن عیراقێ و حوکمەتا عیراقی و لایەنێن سیاسی عیراقی و دەولەتێن ھەرێمی ڤە، لێ ئیرادا خەلکێ کورستانێ ل ئاستێ بەرپرسیارەتیا خوە یا دیروکی بوو کو وەنەکر ئارمانجا نەحەزان بدەستڤە بھێت ، جێگیربوونا دەنگێن پارتی ئەو سەلماند کو دەنگێن پارتی د راستەقینەبوون و ھەموو پروپاگندێن نەرازیا دبێ بنەما بوون”.
ئاشکراکر ژی کو کو قانوونا ھەلبژارتنان یا کوردستانێ و یا عیراقێ جوداھی ھەیە و یا ھاریکارنەبیت و ھژمارا بەربژارێن زەلام یێن ھەموو لیستا پترن و کوردستان ئێک بازنەیە، سەرەرایی خۆلا بۆری دو ئافرەتان ھەڤرکی ل گەل زەلامان کر و بێ کۆتا دەربازبوون، پشت راستین دڤێ خۆلێ ژی دا دێ ئافرەت بەریکانا زەلامان کەن و دەنگدەرێ پارتی بێ جوداھی دەنگی دەتە زەلام و ئافرەتان ل دووڤ شیان و ئاستێ وان.
ئەڤرۆ نيوز:
سەرۆکێ تیمێ نەتەوێن ئێکگرتی بۆ ھاریکاریا عیراقێ راگەھاند، حوکمەتا نوو یا عیراقێ د دەمەکێ نێزیک دا دێ ھێتە پێکئینان.
یان کوپیچ د روونشتنا خوە یا دووماھیێ دا ل جڤاتا ئاسایشا نێڤدەولەتی دیارکریە، کو دەلیڤەکا مەزن ھەیە لێڤەگەرێ مەزنێ شیعان عەلی سیستانی کارتێکرنێ ل ھێزێن سیاسی یێن عیراقی بکەت، ھەروەسا داخواز ژی ژ حەیدەر عەبادی کریە کو بەردەوامیێ بدەتە سیاسەتا خوە یا ئاسایکرنا پەیوەندیان ل گەل وەلاتێن جیران، ب تایبەت سعوودیێ و وەلاتێن کەنداڤی.
کۆبیچی ئاشکرا ژی کر کو دبیت ھەتا جەژنا قوربانی حوکمەتا نوو بھێتە پێکئینان، ھیڤی ژی خواستیە کو ئالیێن سەرکەفتی بگەھنە قۆناغا دووماھیێ یا دانوستاندنێن پێکئینانا حوکمەتێ و گۆت:(پێدڤیە حوکمەتا نوو یا عیراقێ داخوازیێن عیراقیان بجھبینیت).
شێخان،بارزان مزووری:
،بەرپرسێ پەیوەندی و راگەهاندنا رێڤەبەریا هاتنوچوونا پارێزگەها دهوكێ، ئازاد تاها بۆ ئەڤرۆ نیوز دياركر كو ئه‌ڤ شه‌ڤه ل دەمژمێر 9:30 ل سەر رێيا سەرەكیا شێخان بۆ كۆمەلگەها چرە ل نێزیك كۆمەلگەها مەهەت يا سەر ب قەزا شێخان ڤە، ترومبێلەك ژ جورێ فورد بارهەلگر وەرگەریا ود ئەنجامدا شوفێر بریندار دبیت وپشتی هاتيه ڤەگۆهاستن بۆ نەخوه‌شخانا شێخان یا گشتی گیانێ خو ژ دەست دا وته‌رمێ وى بۆ نوشداریا داد ل دهۆكێ هاته ڤەگوهاستن ،
گۆت ژى، ئەو ترومبێلا وەرگەریاى یا توركی بۆ وشوفێرێ گیانێ خو ژ دەست دای ب رەگەز تورك بوو .
ئاماژه دا كو زيانێن مه‌زن ژى گه‌هشتينه وێ ترومبێلا بارهه‌لگر ژبه‌ركو يا باركرى بوو.
ئه‌ڤرۆنيوز:
ل گوندێ تۆسورانى ل ناحيا ناوده‌شت، كچه‌ك ژئه‌گه‌رێ بكارئينانا فاسێ وفلاشى بۆ شووشتنا ناڤمالێ تووشى ته‌نگه نه‌فه‌سێ دبيت وپاشى گيانێ خوه ژده‌ست دده‌ت.
راپۆرتێن نوشدارى، ل دووڤ كوردستان تى ڤى، دياركر كو سيهێن وێ كچى ژئه‌گه‌رێ تێكهه‌لكرنا فاسێ وفلاشى ره‌ش بوون ورزى بوون ودئه‌نجامدا گيانێ خوه ژده‌ست دا.
نيشاندان