ئەڤرۆ

عەزیز هەورامی

پشتی خیانەتا 16 ئۆكتۆبەرێ بەردەوام ئەرەبێن هاوردە شەڕی ب كوردێن دەڤەرێن كوردستانی یێن دەرڤەی ئیدارەیا هەرێما كوردستانێ دفرۆشن و ئاخا وان داگیردكەن. هێزا پێشمەرگەی و سەركردایەتیا كوردی، هوشداری دایە و دبێژین ڕێكێ ب ستەم و ب ئەرەبكرنا ئاخ و خەلكێ كوردستانێ نادەین، ئەندامەكێ كورد ل جڤاتا نوونەرێن ئیراقێ دبێژیت، دێ ئاخڤتن ل گەل ئالیێن ئیراقی هێتە كرن و ڕێك ب ئەرەبكرنا گوندێ پەلكانە ناهێتە دان.
شوان كەلاری، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان بۆ ڕۆژنامەیا ئەڤرۆ گوت» ئەرەبێن هاوردە ل گوندێ پەلكانە غەدرێ ل كوردان دكەن، هێزێن حەشدا شەعبی ژی هاریكاریا وان دكەن، نە سەركردایەتیا سیاسی یا كوردی و نە خەلكێ ڕەسەن یێ وی گوندی و نە پەرلەمانتارێن كورد ژی ل بەغدا ڤێ چەندێ قبوول دكەن، ئەگەر ژی بجهنەئینانا مادەیێ 140 یێ دەستوورێ ئیراقێ یە، پەلكانە گوندەكێ كوردنشینە و هیچ دەمەكی غەدركرن ل خەلكێ مە ژ ئالیێ ئەرەبێن هاوردە ڤە قبوول ناكەین».
پەرلەمانتار شوان كەلاری زێدەتر گۆت» پشتی بێهنڤەدانا جەژنا ڕەمەزانێ دێ پێرابوونێن قانوونی دەست پێكەین و دێ مە ل گەل جێگرێ سەرۆكێ جڤاتا نوونەرێن ئیراقێ ئاخڤتن هەبیت هەروەسا ل گەل ئالیێن دی یێن پەیوەندیدار».
شوانی خویاكر ژی» سەركردایەتیا كوردی ژی ڕاستەوخوە ل سەر ڤێ پرسێ ل گەل سەرۆكایەتیا حوكمەتا ئیراقێ دێ ئاخڤیت و یا ل سەر هێلێ و ڕێكێ نادەین غەدر ل خەلكێ پەلكانە بهێتە كرن، ل دەمێ دەستهەلاتا بەعسیان ستەمەكا مەزن ل خەلكێ گوندێ پەلكانە هاتیە كرن و بۆ تێكدانا دیموگرافیا گوندی كورد ژێ دهاتنە دەركرن و ئەرەب ل جهێن وان ئاكنجی دكرن و پشتی ژناڤچوونا ڕژێما بەعس ئەرەبان ب خوە دزانی كو ئاخا وی گوندی یا داگیركری لەوما ئەو گوند چۆلكر بەلێ پشتی خیانەتا 16 ئۆكتۆبەرا 2017 دووبارە ئەرەبێن هاوردە و حەشدا شەعبی دەست ب داگیركاریێ كر».
ناڤبری ئەوژی گوت» حوكمەتا نوكە یا ئیراقێ ب سەرۆكایەتیا محەمەد شیاع سۆدانی هیچ سیاسەتەكا ئاشكرا بۆ ب ئەرەبكرنێ نینە، گرۆپێن حەشدا شەعبی و هندەك خەلكێ شۆفینی و ژ دەرڤەی قانوونێ دخوازن د ناڤبەرا هەولێرێ و بەغدا دا نەخوەش بكەن و كێشەیان د ناڤبەرا خەلكێ دەڤەرێ دا دروست بكەن».
دیاركر ژی» نوكە پەیوەندیێن مە ل گەل بەغدا دباشن و دخوازین ب ڕێكا قانوونێ وان كێشەیان چارەسەر بكەین، كوردان ب درێژیا دیرۆكێ گیانێ خوە كریە قوربانی بۆ ئازادیێ، پێشمەرگە داكۆكیێ ژ ئاخا كوردستانێ دكەت، برگەیەكا كارنامەیا حوكمەتا محەمەد شیاع سودانی ئەوە كو مادەیێ 140 یێ دەستووری بهێتە بجهئینان و بودجە بۆ بهێتە دابینكرن، حالەتا ساخلەم نوكە ئەوە ب قانوون ل گەل سەرۆك وەزیرێن ئیراقێ كارنامە و دەستوور بهێتە بجهئینان، بەلێ هەر كەسێ ستەمێ ل خەلكێ گوندێن كوردستانێ بكەت ب پشتڕاستی ڤە پێشمەرگە یێ بەرهەڤە سنۆرەكی بۆ دەستدرێژیان دانیت».
ل دووماهیێ گوت» دەمێ سنۆرەك بۆ خەلكێ ستەمكار دهێتە دانان د ڕەڤن، دەمێ زانی وەلاتیێن كورد یێن خەلكێ گوندێ پەلكانە ستەمێ قبوول ناكەن و ب ڕێكا قانوونێ و هێزێ دێ بەرهنگاری وان بن، پتریا وان چوون و پەلكانە بجهـ هێلا و كێمەك یێن ماین چونكە ئەو ل بەردەم هێزێ و قانوونێ د ڕەڤن».

ئەڤرۆ

سەرۆك وەزیرێن ئیراقێ ڕاگەهاند، دابینكرنا مووچەیێ مووچەخۆرێن هەرێما كوردستانێ ئەركێ سەرەكی یێ حوكمەتا ئیراقێ یە و د پێگیرین ب ڤێ چەندێ.
دوهی دوشەمبی 17/4/2023 محەمەد شیاع سودانی، سەرۆك وەزیرێن ئیراقێ گوت» ئەڤرۆ كۆمپانیا (سۆمۆ) ل گەل بكڕێن پەترۆلی دێ گرێبەستەكێ ئیمزاكەن و د ڤێ حەفتیێ دا دێ دەست ب هنارتنا پەترۆلا هەرێما كوردستانێ هێتە كرن».
سەرۆك وەزیرێن ئیراقێ گوت ژی» دابینكرنا مووچەیێ مووچەخۆرێن هەرێما كوردستانێ ئەركێ سەرەكی یێ حوكمەتا ئیراقێ یە. ئەم د پێگیرین ب دابینكرن و پێدانا مووچەی ب مووچەخۆرێن هەرێما كوردستانێ».
سودانی ئاماژەكر» بۆ هنارتنا پەترۆلا هەرێما كوردستانێ تنێ بابەتێ تەكنیكی مایە و دێ نامە هێتە ئاراستەكرن بۆ حوكمەتا توركیا و دێ هنارتنا پەترۆلێ دەستپێكەت».
سەبارەت بهایێ دینارێ ئیراقی ل بەرامبەر دۆلاری، سودانی گوت» د دەمێ چەند حەفتیێن داهاتی دا دێ بهایێ دیناری ل بەرامبەر دۆلاری زێدەتر بلند بیت».

ئەڤرۆ

گرۆپێ سیاسەتا ئیراقێ، كو ژ كۆمەكا شارەزایێن سیاسی و ئابۆری ل سەر ئاستێ ڕۆژهەلاتا ناڤین پێكدهێت، ڕاپۆرتەك ل سەر حوكمەتا هەرێما كوردستانێ و حوكمەتا ئیراقێ سەبارەت دەستپێكرنا هنارتنا پەترۆلێ بەلاڤكر و تێدا باس ل وێ چەندێ كریە كو ڕێككەفتنا پەترۆلی د ناڤبەرا هەرێما كوردستانێ و حوكمەتا ئیراقێ دا دێ بیتە ئەگەرێ ڤەژاندنا زێدەتر یا ئابۆرێ هەرێما كوردستانێ.
د ڕاپۆرتا گرۆپێ سیاسەتا ئیراقێ دا هاتیە» هەرێما كوردستانێ د بوارێ وزێ دا خودانا دەزگەه و دەستهەلاتەكا جهگیرە و شیانێن هەین ل گەل بەغدا ب هەڤپشكی وی كەرتی بڕێڤە ببەت».
ڕاپۆرتا گرۆپا سیاسەتا ئیراقێ ل بن ناڤێ بڕیارا دادگەها پاریس و ڕێككەفتنا هەرێما كوردستانێ و بەغدا و رەنگڤەدانێن وێ، باس ل وێ چەندێ كریە كو هەرێما كوردستانێ د بوارێ كەرتێ وزەی دا دەزگەه و دەستهەلاتەكا جهگیر و شیانێن هەین ل گەل بەغدا ب هەڤپشكی وی كەرتی بڕێڤەببەن، كو ئەڤە ژی خالەكا گرنگە.
هەر د وێ ڕاپۆرتێ دا هاتیە» پێدڤیە بەغدا هەولێرێ وەكو هەڤپشكەكا یەكسان یەكسان ب هەژمێریتو سەركەفتنا بڕیارا دادگەها پاریس وەكو چەك بكارنەئینیت».
هەروەسا ئاماژەكریە» ڕێككەفتنا سەرۆك وەزیرێن هەرێما كوردستانێ مەسرور بارزانی و سەرۆك وەزیرێن ئیراقێ محەمەد شیاع سودانی ئەنجامێ بزاڤێن ژێرانە یێن وانە بۆ ب دووماهی ئینان ب ناكۆكیێن درێژخایەنێن وزێ، دشیاندایە ڕێككەفتن ببیتە هۆكارەك بۆ یەكخستنا بزاڤێن هەردو سەرۆك وەزیران د بوارێ وزێ دا».
سەبارەت ئەنجامێن ڕاگرتنا هنارتنا پەترۆلا هەرێما كوردستانێ، گرۆپا سیاسەتا ئیراقێ ئاشكراكریە كو ئیتالیا یا نیگەرانە ژ ڕاگرتنا هنارتنا پەترۆلا هەرێما كوردستانێ و هەكە ڕەوش ب وی شێوەی بەردەوام بیت، دێ مەترسی ل سەر ئاسایشا وزێ ل ئیتالیا دروست بیت».
گرۆپا سیاسەتا ئیراقێ ئەوژی بەرچاڤكر» هەكە بەغدا و هەرێما كوردستانێ ب خواستەكا باش ڕێككەفتنا پەترۆلی بجهبینن، دبیت ببیتە ئەگەرێ ڤەچاندنا زێدەتر یا ئابۆری هەرێما كوردستانێ و بلندكرنا باوەریێ د كەرتێ وزێ دا».
ل دۆر بڕیارا دادگەها پاریس، ڕاپۆرتا گرۆپا ناڤبری ئاماژە ب وێ چەندێ كریە كو، ئیراقێ ب شێوەیەكێ ڕێژەیی داوا بریە، ئەوژی تنێ د بوارێ باركرنا پەترۆلێ دایە و ب سەركەفتنەكا باش ناڤئینایە، ئەوژی بەرچاڤكریە د دەمەكی دا توركیا ڕێزێ ل بڕیارا دادگەها پاریس دگریت، ڕامانا وێ ئەو نینە كو پەسەند دكەت.

ئەڤرۆ

سەبارەت پەیوەندی و هەماهەنگیێن لەشكرێ ئیراقێ و هێزا پێشمەرگەی و پێكئینانا لیوایێن هەڤپشك د ناڤبەرا هەردو ئالیان دا، نوونەرێ حوكمەتا هەرێما كوردستانێ ل فەرماندەیا هێزێن هەڤپشك یێن ئیراقێ ڕادگەهینیت، پشتی دەستبكاربوونا محەمەد شیاع سۆدانی وەكو سەرۆك وەزیران و فەرماندەیێ گشتی یێ هێزێن چەكدار ل ئیراقێ، پەیوەندیێن لەشكرێ ئیراقێ و پێشمەرگەی د ئاستەكێ بلند دانە، هەروەسا دیاركر ژی: یەكەیێن 70 و 80 نەماینە.
عەبدولخالق تەلعەت، نوونەرێ حوكمەتا هەرێما كوردستانێ ل فەرماندەیا هێزێن هەڤپشك یێن ئیراقێ، گوت» پەیوەندی و هەماهەنگی د ناڤبەرا لەشكرێ ئیراقێ و هێزا پێشمەرگێ كوردستانێ، د ئاستەكێ بلند دانە، لەوما هەر بڕیارەك كو ل ئاستێ سەربازی یان ئەمنی دهێتە دان، ب ئاگەهداری و بەرهەڤبوونا نوونەرێ حوكمەتا هەرێما كوردستانێ و نوونەرێ هێزا پێشمەرگێ كوردستانێ دهێتە دان».
نوونەرێ حوكمەتا هەرێما كوردستانێ ل فەرماندەیا هێزێن هەڤپشك یێن ئیراقێ دیاركر ژی» لەشكرێ ئیراقی ل دەڤەرێن كوردستانی یێن ل دەرڤەی ئیدارا هەرێما كوردستانێ، نەشێت بێی هێزا پێشمەرگەی كونترۆلا ڕەوشا ئەمنی بكەت».
خویاكر» مەترسی ل سەر وان دەڤەرێن كو ڤالاتیا ئەمنی تێدا هەی، هێشتا یێن ماین و ب دووماهی نەهاتینە، چونكە داعشی هێشتا دشێت ل وان دەڤەران خوە ڤەشێریت، هەڤشێوەیێ چیایێ قەرەچووخ، حەمرین و كەركووك و تكریت».
هەروەسا دووپاتكر» هەبوونا حەشدا شەعبی و پۆلیسێن فیدرالی ل وان دەڤەرێن كو ب ڤالاتیا ئەمنی د بەرنیاسن، گرفتان دروست دكەت».
عەبدولخالق تەلعەت هیڤی ژی خواستن كو بودجەیا گشتی یا ئیراقێ بهێتە پەسەندكرن و شایستەیێن دارایی یێن وەزارەتا پێشمەرگەی و جهگیركرنا مووچەیێ هەردو لیوایێن هەڤپشك بهێتە پەیداكرن، كو دەڤەرێن ڤالاتیێن ئەمنی دێ پێ هێنە پڕكرن». بەرچاڤكر ژی كو ب پەسەندكرنا بودجەیێ گشتی یێ ئیراقێ بۆ سالا 2023 دێ پتریا كێشەیێن دارایی یێن هێزا پێشمەرگەی ب دووماهی هێن .
ل دۆر هێزێن 70 و 80، گوت» هێزێن 70 و 80 نەماینە، بەلكو یێن بووینە فیرقا ئێك و فیرقا دوو سەر ب سەرۆكایەتیا ئەركان ل وەزارەتا پێشمەرگەی».

ئەڤرۆ

نێچیرڤان بارزانی و پاپایێ فاتیكانێ دوپاتیێ ل ئاشتیێ و برایەتیێ و پێكڤەژیانێ دكەن

سەرۆكێ هەرێما كوردستانێ، نێچیرڤان بارزانی د سەرەدانا خوە دا بۆ ئیتالیا چەندین دیدار و كۆمبوون ل گەل بەرپرسێن وی وەلاتی ئەنجامدان و بەری وان دیداران ل گەل پاپا فرانسیس پاپایێ فاتیكانێ كۆمبوو.
سەرۆكێ هەرێما كوردستانێ د تویتەكێ دا بەلاڤكر» پاپا فرانسیس دووپاتی ل گرنگیا پاراستنا ئاشتیێ و برایەتیێ دناڤبەرا گەلێ ئیراقێ دا كر، من ژی دووپاتی ل پێگیریا خوە ب بەردەوامیدانێ ب پێشڤەبرنا ئاشتیێ و پێكڤەژیانێ ل كوردستانێ، ئیراقێ و دەرڤە ژی كر».
سەرۆك وەزیرێن ئیتالیا بۆ نێچیرڤان بارزانی: دێ د بەردەوام بین د پشتەڤانیا ئیراقێ و هەرێما كوردستانێ دا

سەرۆكێ هەرێما كوردستانێ پشتی ل گەل جۆرجیا میلۆنی، سەرۆك وەزیرێن ئیتالیا كۆمبووی ، د تویتەكێ دا بەلاڤكر» ل كۆمبوونا خوە دا ل گەل سەرۆك وەزیرێن ئیتالیا، مە پێگیریا خوە ب زێدەتر بەرفرەهكرنا پەیوەندیان دووپاتكر و مە سوپاسیا ئیتالیا ژی ك بۆ پشتەڤانیا وێ بۆ هەرێما كوردستانێ و ئیراقێ د دەمێن دژوار دا».
د وێ دیدارێ دا، میلۆنی بەردەوامیا پشتەڤانیا ئیتالیا بۆ ئیراقێ و هەرێما كوردستانێ دووپاتكر و پەیوەندیێن وەلاتێ خوە ل گەل ئیراقێ و هەرێما كوردستانێ ب جهێ گرنگیا ئیتالیا هەژمارت.

ئیتالیا دێ ئاستێ نوونەرایەتیا خوە ل هەرێما كوردستانێ بلند كەت

د زنجیرە كۆمبوونێن خوە دا ل ئیتالیا، نێچیرڤان بارزانی، سەرۆكێ هەرێما كوردستانێ ل گەل ئەنتۆنیۆ تایانی، وەزیرێ دەرڤەیێ ئیتالیا كۆمبوو و تێدا هەردو ئالیان ل دۆر بهێزكرنا پەیوەندیێن ئیتالیا ل گەل ئیراقێ و هەرێما كوردستانێ و دەلیڤەیێن كار و بەرئێنانا ئیتالی ل ئیراقێ و هەرێمێ و بەرفرەهكرنا هاریكاریا هەڤپشك ب تایبەتی د بوارێ ئابۆری و وزێ دا دانوستاندن كرن، وەزێرێ دەرڤەیێ ئیتالی ڕاگەهاند كو وەلاتێ وی دێ ئاستێ نوونەرایەتیا خوە ل هەرێما كوردستانێ ژ قونسۆلخانە بۆ قونسۆلخانەیا گشتی بلندكەت.

سەرۆكێ جڤاتا پیران ل ئیتالیا: سوپاسیا هەرێمێ دكەین كو ل شوونا جیهانێ ل بەراهیا شەڕێ دژی تیرۆرێ بوو

سەرۆكێ هەرێما كوردستانێ د بەردەوامیا سەرەدانا خوە دا بۆ ئیتالیا ل گەل ئینیازیۆ لارووسا، سەرۆكێ جڤاتا پیران ل ئیتالیا كۆمبوو و سەرۆكێ هەرێمێ سوپاسیا وی وەلاتی كر بۆ هاریكاری و پشتەڤانیێ ل ئیراقێ و هەرێمێ ل شەڕێ دژی داعشێ دا.
ژئالیێ خوەڤە، سەرۆكێ جڤاتا ئیتالیا سوپاسی و پێزانینا وەلاتێ خوە بۆ هەرێما كوردستانێ و ڕۆلێ پێشمەرگەی د شكاندنا داعشێ دا دەربری و گوت» ئەم سوپاسیا هەوە دكەین كو ل شوونا جیهانێ هوون ل ڕێزا بەراهیا شەڕێ دژی تیرۆرێ دا بوون».
ناڤبری پەیوەندیێن وەلاتێ خوە ل گەل ئیراقێ و هەرێما كوردستانێ ب گرنگ هەژمارت و دووپاتی ل سەر بەردەوامیا پێشڤەبرنا پەیوەندیان و هاریكاریا هەڤپشك كر.

سەرۆكێ پەرلەمانێ ئیتالیا: پێدڤیە گەلێ كوردستانێ شانازیێ بخوە بكەت

سەرۆكێ هەرێما كوردستانێ ل ڕۆما ل گەل لۆرێنزۆ فۆنتانا، سەرۆكێ پەرلەمانێ ئیتالیا كۆمبوو و سەرۆكێ هەرێمێ خواستا پێشڤەبرن و بهێزكرنا زێدەتر یا پەیوەندیان د هەموو بواراندا ل گەل ئیتالیا دووپاتكر و سەرۆكێ پەرلەمانێ ئیتالی ژی دووپاتی ل گرنگیدانا وەلاتێ خوە ب پەیوەندیان ل گەل ئیراقێ و هەرێما كوردستانێ كر، هەروەسا ب پێزانین ڤە باس ل ڕۆلێ پێشمەرگەی د شكاندنا داعشێ دا و ڕۆلێ هەرێمێ ب گشتی د حەواندن و پاراستنا ئاوارەیان ب تایبەتی ئاوارەیێن مەسیحی كر و ل دۆر ڤێ چەندێ گوت» پێدڤیە گەلێ كوردستانێ شانازیێ ب خوە بكەت».

ئەڤرۆ

سەرۆكێ هەرێما كوردستانێ، نێچیرڤان بارزانی د سالڤەگەرا تاوانا ئەنفالێ دا، پەیامەك بەلاڤكر و تێدا دبێژیت» د سالڤەگەرا 35 یا تاوانێن ئەنفالێ كو ڕژێما بەرێ یا ئیراقێ ل سالا 1988 بەرامبەر خەلك و ئاخا كوردستانێ ئەنجامداین، ب ڕێز ڤە بیرا خوە ل زێدەتر ژ 182 هزار شەهیدێن ئەنفالێ دئینین، سەرێ ڕێزێ بۆ گیانێ وان یێ پاقژ د چەمینین و سلاڤ بۆ خێزان و كەسوكارێن وان یێن سەربلند».
گوت ژی» پێدڤیە حوكمەتا ئیراقێ كەسوكارێن ئەنفالكریان ژ هەموو ڕوویەكی ڤە قەرەبوو بكەت و بڕیارا دادگەها بلند یا تاوانان ل ئیراقێ بجهبینیت كو ئەنفال ب جینۆساید و تاوانا دژی مرۆڤایەتیێ و تاوانا شەڕی هەژمارتی.ل هەرێما كوردستانێ ژی هەر چ دشیاندابیت باشتر خزمەتا وان بهێتە كرن و گرنگیا زێدەتر پێ بهێتە دان» .
نێچیرڤان بارزانی ئاماژەكر» قەوارەیێ دەستووری یێ هەرێما كوردستانێ، بەرهەمێ خەباتا سەدان هزار شەهیدێن تاوانێن وەكو ئەنفال و كیمیابارانكرن و قوربانیدانا گەلێ كوردستانێ یە، ب ڤێ هەلكەفتێ بلا ب ئێكڕێزی و تەبایی و كارێ هەڤپشك بۆ پاراستنا دەستكەفت و مافێن مە، ڕێزێ ل گیانێ شەهیدان بگرین».
سەرۆكێ هەرێمێ گوت ژی» دڤێت هەموو بزاڤان بكەین تاكو ئەنفال ل سەر ئاستێ نێڤدەولەتی ژی زێدەتر ب جینۆساید بهێتە نیاسین و چو جاران ل هیچ جهەكی ل جیهانێ تاوانەكا وەسا دووبارە نەبیتەڤە».

ئەڤرۆ

سەرۆكێ حوكمەتا هەرێما كوردستانێ، مەسرور بارزانی د سالڤەگەرا 35 یا تاوانێن ئەنفالێ پەیامەك بەلاڤكر و تێدا هاتیە» ب دلەكێ پڕ ژ خەم و كۆڤانێ، بیرئینانا شەهید و قوربانیێن تاوانێن ئەنفالێ دكەین كو ئێك ژ درندەترین شێوازێن جینۆسایدێ دژی گەلێ كورد و كوردستانیان، بەری 35 سالان ڕژێما بەعس ب چەند قۆناغێن جودا، ب هزاران خەلكێ سڤیل و بێتاوان یێن گوند و دەڤەرێن جودا یێن كوردستانێ دەستەسەركرن و ل بیابانێن باشوور و ناڤەراستا ئیراقێ بن ئاخكرن و چارەنڤیسێ پشكەكا مەزن ژ وان هەتا نوكە یێ دیار نینە».
هەروەسا گوت» تاوانا ئەنفالێ، جینوسایدەكا درندانە بوو نەكو تنێ دژی گەلێ كوردستانێ، بەلكو دژی هەموو بهایێن مرۆڤایەتی و ئەخلاقی بوو، كو مخابن ئەنجامێن هەمەلایەنە یێن ڤێ تاوانا هۆڤانە، هەر یێن ماین».
ل دووماهیێ گوت» د ڤێ بیرئینانا خەمگین دا، كو پشكەكە ژ زنجیرە تاوانێن كو بەرامبەر گەلێ كوردستانێ هاتینە ئەنجامدان، داخواز ژ حوكمەتا ئیراقێ دكەین ئەرك و بەرپرسیارەتیا ئەخلاقی و دەستووری یا خوە بجهبینیت و زیاندار و مالبات و كەسوكارێن ستەملێكریێن دەستێ ڕژێما بەرێ یا ئیراقێ، ب شێوەكێ هەژی قەرەبوو بكەت و هاریكاریا حوكمەتا هەرێما كوردستانێ بكەت بۆ وێ چەندێ ب شێوەیەكێ باشتر، بشێت خزمەتا كەسوكارێن سەربلندێن شەهیدان بكەت».

جڤاتا وەزیران لژنەیەكا ڤەكۆلینێ ل دۆر ڕوودانێن فرۆكخانەیا سلێمانیێ پێك دئینیت
ل دووماهی كۆمبوونا جڤاتا وەزیرێن هەرێما كوردستانێ، مەسرور بارزانی سەرۆكێ حوكمەتا هەرێمێ دلتەنگیا حوكمەتا هەرێمێ ل دۆر ڕوودانێن فرۆكخانەیا نێڤدەولەتی یا سلێمانیێ دەربری و دووپاتكر كو حوكمەتا هەرێمێ هێرشا ل سەر فرۆكخانەیا سلێمانیێ و هەر پشكەكێ ژ هەرێما كوردستانێ شەرمزار دكەت، دیاركر ژی: حوكمەتا هەرێمێ ئاگەهداری وان كار و لڤینێن ل فرۆكخانەیا سلێمانیێ دهێنە كرن نینە ول دەرڤەی قانوونێن بەركارێن حوكمەتا هەرێمێ نە و نابیت حوكمەتا هەرێمێ ئاگەهداری وان كار و لڤینان نەبیت، دیاركر ژی ئەم ب هەموو شێوەیەكی ل گەل وەلاتیێن خوەشتڤی یێن سلێمانیێ نە و نابیت ئەو باجا وان ڕوودانان بدەن. پشتی دانوستاندنێ جڤاتا وەزیران بڕیار دا حوكمەتا هەرێمێ لژنەیەكا ڤەكۆلینێ و دووڤچوونێ و دەركرنا ڕاستان بۆ ڕوودانێن فرۆكخانەیا سلێمانیێ پێك بینیت.

مەسرور بارزانی، سەرۆكێ حوكمەتا هەرێما كوردستانێ پشتی باران و لەهیێن ڕۆژا پێنجشەمبیا بۆری ل چەندین دەڤەرێن هەرێمێ ڕووداین، پەیوەندی ب پارێزگەرێن (هەولێر، سلێمانیێ، دهۆك و هەلەبجە) كر. ب گۆڕەی بەیاننامەیەكا حوكمەتا هەرێمێ، سەرۆكێ حوكمەتێ پارێزگەر ڕاسپاردن كو هەموو بزاڤێن دەزگەهێن حوكمەتێ بكاربینن بۆ ب هاوارچوونا وەلاتیان و پێشكێشكرنا هاریكاریێن پێدڤی بۆ زیانداران. هەروەسا ئاماژەكر كو سەرۆكێ حوكمەتێ سوپاسیا پارێزگاران كر بۆ وان پێرابوونێن گرتینە بەر بۆ كێمكرنا كاریگەریا نەرێنی یا ئەگەرێ لەهیان و بەرهەڤیێن وان ل دۆر وێ چەندێ.