ئه‌ڤرۆ نيوز
برياره سوبه هه‌ردو مه‌كته‌بێن سياسى يێن پارتى ديموكراتى كوردستان و ئێكه‌تيا نيشتيمانيا كوردستان، ل هه‌ولێرێ كۆم ببن و به‌حسێ كارنامه‌كا هه‌ڤپشك يا پشكداريكرنێ د حوكمه‌تا نوو يا عيراقێ دا بكه‌ن.
سه‌عدى ئه‌حمه‌د پيره په‌يڤدارێ مه‌كته‌با سياسى يا ئێكه‌تيا نيشتيمانيا كوردستانێ دياركر كو ئه‌ڤ هيڤى خوازن هه‌موو پارتێن سه‌ركه‌فتى د هه‌لبژارتنان دا پشكدارى كومبوونێ ببن بۆ وێ يه‌كێ ئێكرێزيا ناڤ مالا كوردى تێك نه‌چيت و بشێن پێكڤه وێ كارنامێ دانن.
ئه‌ڤرۆنيوز:
رێڤەبەرێ گشتيێ باژێرڤانیێن پارێزگەها دهۆكێ ئاشكراكر كو سێ باژێرڤانیێن دی ل پارێزگەها دهۆكێ دێ هێنەڤەكرن و ب ڤێ چه‌ندێ دێ هژمارا باژێرڤانیان ل پارێزگەهێ گه‌هيته 50 باژێرڤانى.
هەڤال ئەحمەد سەعید، رێڤەبەرێ گشتیێ باژێرڤانیێن پارێزگەها دهۆكێ بۆ رۆژناما ئه‌ڤرۆ دیاركر كو ل دووڤ قانوونێ هەر دەڤەرەكا رێژا ئاكنجیێن وێ گەهشتنە سێ هزار كەسان ماف هەیە باژێرڤانیەكێ دروست بكەن و داخواز بكەن دا ل دووڤ رێنما خزمەتا وێ دەڤەرێ ژ هەر روویەكێ خزمەتگوزاری ڤە بهێتەكرن.
هەڤالی ئەو ژی گۆت: ل ڤێ دووماهیێ سێ باژێرڤانی كەفتینە كاری ئه‌وژى (كەلەك، بریفكا، زێلكان) باژێرڤانیا بریفكا ل ناحیا كانی ماسێ ڤەبوویە، لێ هێشتا نە كەفتیە كاری فەرمانبەر و سەرۆكێ باژێرڤانی و بارەگا نینە ، باژێرڤانیا زێلكان د بەرنامەی دایە بهێتەڤەكرن.
ئه‌ڤرۆنيوز:
بەرپرسێ تیمێن رەشاندنێ ل رێڤەبەریا کاروبارێن خوەپاراستنا ساخلەمیێ ل دھۆکێ دیارکر کو ھەوا رەشاندنا مژبەردانا ئێڤاریان ل ھەموو جهـ و دەڤەران دەستپێکریە د گەل ٢٠ کەمپێن ئاواره و پەنابەران.
نو‌عمان داود عەباس، بەرپرسێ تیمێن رەشاندنێ ل رێڤەبەریا کاروبارین خوەپاراستنا ساخلەمیا دھۆکێ بۆ (نوش نیوز) دیارکر کو مفایەکێ مەزن دڤێ رەشاندنێ دا يا هه‌ى ژبۆ بەرھەنگاریا پێشیان كو رێژا پێشێا گەلەک کێم دکەت ودبيته ئەگەر کونترۆل ل سەر نەخوه‌شیا مەلاریێ بھێتە کرن، ئەڤ ھەولێن رەشاندنێ پتر بۆ کونترۆلکرنا ئێشا مەلاریێ دھێنە کرن.
گۆت ژى: “سالێ دو جاران ئەڤ ھەوێن رەشاندنێ دھێنە ئەنجامدان ئەو ژی ل ھەیڤا چار ژ ھەموو سالان دۆرێن نيڤا هه‌يڤێ ژ ھەموو سالەکێ و نيڤا هه‌يڤا ئيلۆنێ ژ ھەموو سالەکێ، چونکى ل ڤان دەمێن سالێ پێشی قەستا خانی و جھێن ئاکنجیبوونا وەلاتیان دکەن”.
ئاشکرا کر کو پتر دەرمانێ سولڤاک دھێتە بکارئینان بۆ بەرھەنگاریا پێشیان، “ژ بەر ساخلەمیا وەلاتیان نەشێين ل جھەکی گەلەک جاران دەرمانی ب رەشینین”.
ھەروەسا ل تاخ و گەرەکێن ئاکنجیبوونێ رەشاندنا دەرمانى ب تایبەتی ژ بەر پێشیان دھێتە کرن ل ناڤ پێشمەرگەی، رەشاندنا دەرمانی ژ بەر دووپشک و مێش و سیسریکا و گەلەک جۆرین دی یێن مێش و مۆرا ھەتا نها ٤٢٤ ساترێن پێشمەرگەی و ٩١١ ژورێن نڤستنێ یێن پێشمەرگێ قەرەمان ل سەنگەرێن بەرەڤانیێ و ٨٤٠ کەپرێن پێشمەرگەی و ١٤٨٧ خالێن زیرەڤانیێ یێن ھاتینە رەشاندن.
ئه‌ڤرۆنيوز:
ژێده‌ره‌كێ له‌شكرى يێ عيراقى راگه‌هاند، 60 ترومبێلێن تژى چه‌كدارێن داعشێ ب هه‌موو جۆرێن چه‌كى ڤه ژ سووريێ هاتن دناڤ ئاخا عيراقێ دا.
نه‌قيب (سه‌عه‌د موسه‌وى) ژ فه‌رمانده‌يا ئۆپه‌راسيۆنێن نه‌ينه‌وا بۆ ئاژانسا ئه‌نادۆل يا توركى گۆت” ل دووڤ وان پێزانينێن گه‌هشتينه ژۆرا ئۆپه‌راسيۆنێن نه‌ينه‌وا، به‌حس ل وێ چه‌ندێ دكه‌ن كو 60 ترومبێلێن تژى ژ چه‌كدارێن داعشێ ژ سووريێ هاتينه دناڤ ئاخا عيراقێ دا ل نيزيك قه‌زا به‌عاج يا سه‌ر ب پارێزگه‌ها نه‌ينه‌وا ڤه”.
وى ئه‌فسه‌رێ عيراقى گۆت ژى” وى كاروانێ چه‌كدارێن داعشێ هه‌موو جۆرێن چه‌كى دگه‌لدا بوون وخوه بۆ كرياره‌كا تيرۆرستى يا گه‌له‌ك مه‌زن به‌رهه‌ڤكريه”.
دياركر” هێزێن عيراقى يێن كه‌فتينه دحاله‌تا ئاماده‌باشيێ دا وخوه بۆ هه‌ر جۆره هێرشه‌كا چه‌كدارێن داعشێ به‌رهه‌ڤكريه”.
ئه‌ڤرۆنيوز:
سه‌رۆك مه‌سعود بارزانى، ئه‌ڤرۆ چارشه‌مبى 11/7/2018، په‌يامه‌كێ هه‌ڤخه‌ميێ ئاراسته‌ى كه‌سوكارێن قوربانيێن روودانا شه‌ڤا بۆرى ل باژێرێ سنه ل رۆژهه‌لاتا كوردستانێ هنارت.
سه‌رۆك بارزانى دپه‌ياما خوه دا دبێژيت” مخابن شه‌ڤا بۆرى ژ ئه‌نجامێ ئاگر كه‌فتنێ ل پاسه‌كا نه‌فه‌ر هه‌لگر ل باژيرێ سنه، هژماره‌كا وه‌لاتيان بوونه قوربانى وهژماره‌كا دى ژى بريندار بوون”.
سه‌رۆك بارزانى گۆت ژى” ئه‌و روودانا دلته‌زين وگيان ژده‌ستدانا وه‌لاتيێن باژيرێ سنه، ئه‌م هه‌موو خه‌مبار كرين وهه‌ڤسۆزى وسه‌ره‌خوه‌شيا خوه ئاراسته‌ى كه‌سوكارێن قوربانيێن روودانێ وخه‌لكێ خوه‌شتڤيێ باژێرێ سنه دكه‌م وهه‌ڤپشكێ خه‌ما وانم وهيڤيا چاكبوونێ بۆ برينداران دخوازم”.
دهێته زانين دوهى سێشه‌مبى 10/7/2018، پاسه‌كا نه‌فه‌رهه‌لگر وترومبێله‌كا بارهه‌لگر كو پترۆل تێدابوو ل باژێرێ سنه لێكدا ودئه‌نجامدا پاسا نه‌فرهه‌لگر ب تمامى سوت و13 كه‌سان گيانێ خوه ژده‌ست دا و7 كه‌س ژى برينداربوون.
ئه‌ڤرۆنيوز:
فرۆكه‌كا له‌شكرى يا ئيرانى يا سه‌ر ب هێزێن ئه‌سمانى يێن ئيرانى ڤه ل پارێزگه‌ها به‌لوجستان ل رۆژهه‌لاتێ ئيرانێ كه‌فته خوار ودو كه‌س برينداربوون.
مه‌حمود رزا، رێڤه‌به‌رێ بنگه‌هێ ره‌وشێن هاوارهاتنێ ل ئيران شه‌هر بۆ ته‌له‌ڤزيۆنا حكومى يا ئيرانى گۆت” فرۆكه‌كا مه‌شق وراهێنانێ يا سه‌ر ب هێزێن ئه‌سمانى يێن ئيرانى ڤه ل ده‌ڤه‌را چاباهار ل پارێزگه‌ها به‌لوجستان كه‌فت ودو كه‌س بريندار بوون”.
ئه‌ڤرۆنيوز:
پشتى ڤه‌گۆهاستنا كريستيانۆ رونالدۆ بۆ يانا يوڤه‌نتۆس يا ئيتالى، ياريكه‌ره‌كێ دى يێ ريال مه‌دريد هاته ڤه‌گوهاستن بۆ يانه‌كا ئه‌لمانى.
يانا بوروسيا دورتموند يا ئه‌لمانى، ئه‌ڤرۆ چار شه‌مبى 11/7/2018 ڤه‌گۆهاستنا ياريكه‌رێ ريال مه‌دريد (ئه‌شره‌ف حه‌كيمى) يێ 19 سالى بۆ ناڤ رێزێن خوه راگه‌هاند.
ئه‌ڤرۆنيوز:
سه‌رتراشه‌كى ل دهۆكێ دياركر كو ديارده‌كا نوو يا په‌يدا دبيت ئه‌وژى سپى كرنا پرچى يه كو به‌رى نوكه ئه‌ڤ چه‌نده نه‌بوو ودبێژيت هه‌يڤانه ئه‌ز سه‌رێن چه‌ندێن گه‌نجان ب بۆياخێ سپى دكه‌م.
عيماد محيه‌دين، سه‌رتراشه ل تاخێ شاخكێ بۆ (ئه‌ڤرۆنيوز) دبێژيت” ئه‌ڤه نێزيكى شه‌ش هه‌يڤانه مۆدێله‌كا نوو يا ده‌ركه‌فتى ئه‌وژى هنده‌ك گه‌نج ده‌مێ دهێنه ده‌ف من ل سه‌رتراشخانێ داخواز دكه‌ن پرچێ وان بۆ سپى بكه‌م، ئانكو ئه‌و ب خوه گه‌نجن به‌لێ ستايلێ خوه وه‌كو وه‌كو كه‌سێن مه‌زنتر ژژيێ خوه ديار دكه‌ن”.
عيمادى زێده‌تر گۆت” ئه‌ڤ مۆدێله يا ژ وه‌لاتێ كوريا هاتى وگه‌نجێن مه ئه‌ڤ چه‌نده يا ژ تۆرێن جڤاكى وه‌رگرتى كو هنده‌ك ژوان داخوازێ دكه‌ن بۆياخا سپى ل پرچێن وان بده‌م، هنده‌ك داخواز دكه‌م هه‌موو پرچێ وان سپێ بكه‌م وهنده‌ك ژى دخوازن پشكه‌كا پرچێ وان سپى ببيت، يێن هه‌ين ژى داخواز دكه‌ن داڤه‌كێ يان چه‌ند داڤێن پرچێ خوه سپى بكه‌ن، به‌لێ پتريا ئه‌وێن دهێن داخواز دكه‌ن هه‌موو پرچێ وان سپى بكه‌م”.
ل دۆر جۆرێن وان بۆياخێ، گۆت” به‌رى نوكه بۆياخا سپى بۆ پرچى ل دهۆكێ نه‌بوو، ره‌نگێن دى هه‌بوون، به‌لێ ره‌نگى سپى نه‌بوو، پشتى چه‌ندين گه‌نج هاتين وداخوازا به‌ياخكرنا پرچێ خوه ب ره‌نگێ سپى كرى، من بۆياخا سپى بۆ خوه په‌يدا كريه، ئه‌وژى جۆرێ بۆياخێ ژى ب هه‌يڤان دمينيت، ديسا مه كرێم ژى يا هه‌ى كو تنێ رۆژه‌كێ پرچ سپى دمينيت وپاشى دزڤريت بۆ ره‌نگێ خوه يێ به‌رێ”.
گۆت ژى” هندى من ديتى ئه‌وێن دهاتن داخوازا ره‌شكرنا پرچێن خوه دكر، به‌لێ من ژنوو ديت كو هنده‌ك دهێن داخوازا سپيكرنا پرچێن خوه دكه‌ن”.
سه‌باره‌ت ژيێ وان كه‌سێن داخوازا سپيكرنا پرچێن خوه دكه‌ن، عيمادى گۆت” هه‌موو گه‌نجن دهێن وێ داخوازيێ دكه‌ن، چونكى يێن دى ئه‌وێن پرچێن وان سپى دهێن داخوازا ره‌شكرنا پرچێ خوه دكه‌ن”.
ل دۆر جارا ئێكێ گه‌نجه‌ك هاتى وداخوازا سپيكرنا پرچێ خوه كرى، دبێژيت” ب راستى بۆ من گه‌له‌ك يا سه‌ير بوو، ده‌مێ بۆ جارا ئێكێ گه‌نجه‌ك هاتيه دسه‌رتراشخانێ ڤه به‌رى چه‌ند هه‌يڤێن كێم وداخواز ژ من كرى پرچا وى ب بۆياخێ سپى بكه‌م، ئه‌ز حێبه‌تى مام ژ داخوازيا وى، چونكى من هه‌تا وێ رۆژێ ژى نه‌دزانى بۆياخا سپى بۆ پرچى يا هه‌ى، به‌لێ پشتى مه دووڤچوون بۆ وى بابه‌تى كرى مه زانى كو ژ تۆرێن جڤاكى يا هاتيه ديتن كو هنده‌ك گه‌نجێن كورى كرێمه‌كێ وبۆياخه‌كێ ژى بۆ سپيكرنا پرچێ خوه بكاردئينن و ل تۆرێن جڤاكى به‌لاڤ كريه وئه‌ڤ چه‌نده گه‌هشتيه ڤێرێ ژى”.
گۆت ژى” پشتى چه‌ندين گه‌نج هاتين ئه‌و داخوازيه ژ مه كرى، مه بۆ خوه كرێم وبۆياخێن پرج سپيكرنێ ئينان”.
ئاماژه دا” هه‌رچه‌نده هه‌تا نوكه ئه‌و ستايله گه‌له‌ك به‌لاڤ نه‌بوويه دناڤ گه‌نجان دا، به‌لێ هه‌يڤانه هه‌تا 10 كه‌سان ژى ئه‌ز پرچێ وان سپى دكه‌م ورادێ كێم ژى دگه‌هيته پێنج گه‌نجان “.
ئه‌ڤرۆنيوز:
جێگرێ سه‌رۆكێ په‌رله‌مانێ كوردستانێ، جه‌عفه‌ر ئيبراهيم، ئه‌ڤرۆ چارشه‌مبى 11/7/2018 پێشوازى ل هوزانڤانا مه‌غربى يا ب ره‌گه‌ز ئه‌مازيغى مه‌ليكه مه‌زان كر.
جێگرێ سه‌رۆكێ په‌رله‌مانێ كوردستانێ خوه‌شحاليا خوه دياركر ب سه‌ره‌دانا دۆستا گه‌لێ كوردستانێ وستايشا رۆلێ وێ كر دپشته‌ڤانيا دۆزا ره‌وا يا گه‌لێ كوردستانێ وه‌كو ده‌نگه‌كێ بلند يێ مرۆڤايه‌تيێ وراستگوييێ هژمارتوگۆت” ئه‌م شانازيێ ب هه‌ر دۆسته‌كێ وه‌كو هه‌وه دكه‌ين كو پشته‌ڤانى ل گه‌لێ كوردستانێ وئارمانج وهيڤيێن گه‌لێ مه دكه‌ن، هه‌روه‌سا شانازيێ ب هه‌وه دكه‌ين وه‌كو هێمايێ هه‌ست وويژدانا مرۆڤايه‌تيێ ودادپه‌روه‌ريێ وقه‌بولكرنا هه‌ڤدو”.
جه‌عفه‌ر ئيبراهيم ئاماژه ب گيانێ برايه‌تى وپێكڤه‌ژيانێ ل كوردستانێ كر وراگه‌هاند” هيڤيێن مه دچارچۆڤێ مافێن ره‌وا وبۆچوونێن هه‌ڤپشك ژى يێن مه يا هه‌ى بۆ ئاڤاكرنا جڤاكه‌كێ ديموكراسى وهشياريا گه‌لێ كوردستانێ فاكته‌ره‌كێ سه‌ره‌كى بوو بۆ رزگاركرنێ ژكێشه ته‌جه‌دياتێن زۆر كو روو ب روو بووينێ”.
ژلايێ خوه‌ڤه، مه‌ليكه مه‌زان، خوه‌شحاليا خوه ب سه‌ره‌دانا هه‌رێما كوردستانێ دياركر وگۆت” گه‌لێ كوردستانێ هه‌ژى هه‌موو جۆره پشته‌ڤانيه‌كێ يه ل هه‌موو جيهانێ، چونكێ ملله‌ته‌كێ مرۆڤ دۆست وسه‌ربلنده وبه‌رگريێ ژ مافێن مرۆڤى وئاراميێ وخوه‌شگوه‌زه‌رانيێ وئێكسانيێ دكه‌ت”.
مه‌زان، هيڤى خواستن گه‌لێ كوردستانێ ب زووترين ده‌م ب مافێن خوه شاد ببيت وئێدى تووشى نه‌هامه‌تيێ وجينۆسايدێ وسياسه‌تين شوفينى نه‌بيت”.
جێگرێ سه‌رۆكێ په‌رله‌مانى، لۆگۆيێ په‌رله‌مانێ كوردستانێ وه‌كو ديارى پێشكێشى مه‌ليكه مه‌زان كر ووێ ژى لۆگۆيه‌كێ ده‌ربرينێ ژ گه‌لێ ئه‌مازيغى دكه‌ت پێشكێشى په‌رله‌مانێ كوردستانێ كر.
ئه‌ڤرۆنيوز:
به‌رى نيڤرۆيا ئه‌ڤرۆ چارشه‌مبى 11/7/2018، هێزا پێشمه‌رگێ كوردستانێ ئۆپه‌راسيۆنه‌ك ب هه‌ڤپشكى ل گه‌ل هه‌ڤپه‌يمانان ل سه‌ر چه‌كدارێن داعشێ ل چيايێ قه‌ره‌چۆخ ل ميحوه‌رێ مه‌خموور- گوێر ئه‌نجامدا.
د وێ ئۆپه‌راسيۆنا پێشمه‌رگه‌ى، ل دووڤ كوردستان تى ڤى، مه‌زنه تيرۆرسته‌كێ داعشێ هاته كوشتن وهژماره‌كا له‌شێن دى يێن چه‌كدارێن داعشێ كه‌فتنه ده‌ستێ هێزێن پێشمه‌رگه‌ى.
نيشاندان