ئه‌ڤرۆنيوز:

دو وه‌لاتيێن ژ ئه‌گه‌رێ رێگريكرنى ژلايێ باژێرڤانيێ ڤه‌ كو كارێ سه‌رپێچيێ ئه‌نجام نه‌ده‌ن، ته‌قێ‌ ل ئاڤاهيێ باژێرڤانيا ئێك ل هه‌ولێرێ دكه‌ن ودئه‌نجامدا ئيك ژوان هاته‌ ده‌سته‌سه‌ركرن.

ل هه‌ولێرێ، خودان مولكه‌ك ژبه‌ركو سه‌رپێچى ل سه‌ر مولكێ حوكمه‌تێ كربوو، ل سه‌ر تێكدانا وى ملكى ته‌قه‌ ل باژێرڤانيا ئێك دكه‌ت،

نه‌به‌ز عه‌بدولحه‌ميد، قايمقامێ هه‌ولێرێ بۆ مالپه‌رێ كوردستان تيڤى گۆت” ئه‌ڤرۆ كه‌سه‌كى ته‌قه‌ ل باژێرڤانيا ئێك ل هه‌ولێرێ كر ژبه‌ركو ب سه‌رپێچى ل سه‌ر مولكێ حوكمه‌تێ كربوو كو خانيه‌كێ تاخێ ته‌عجيل يێ شوينوارى يه‌، به‌لێ چو زيانێن گيانى ژئه‌گه‌رێ وێ ته‌قێ نه‌بوون”.

گۆت ژى” ئه‌وين ته‌قه‌ ل ئاڤاهيێ باژێرڤانيێ كرى پێشتر خانه‌كێ سه‌رپێچى دروستكربوو وژلايێ باژێرڤانيێ ڤه‌ هاتبوو خرابكرن”.

دياركر” كه‌سه‌ك ب تۆمه‌تا ته‌قه‌كرنێ يێ هاتيه‌ ده‌سته‌سه‌ركرن وب رێيا كاميرێن چاڤدێريێ ل دووڤ كه‌سێن دى ژى دا دچين”.

ئه‌ڤرۆنيوز:

سه‌رۆك وه‌زيرێن هه‌رێما كوردستانێ نێچيرڤان بارزانى ئێڤاريا ئه‌ڤرۆ سێشه‌مبى 24 تيرمه‌ها 2018 پێشوازى ل جه‌نه‌رال سير جۆنز لۆريمه‌ر مه‌زنه‌ راوێژكارێ له‌شكريێ بريتانيا بۆ رۆژهه‌لاتا ناڤه‌راست وجۆن وێلكس باليۆزێ بريتانيا ل عيراقێ ومارتن وار كۆنسۆلێ بريتانيا ل هه‌رێما كوردستانێ كر.

دكۆمبوونه‌كێ دا به‌حسێ ره‌وشا نوكه‌ وپێشهاتێن عيراقێ هاته‌ كرن ودووپاتى ل سه‌ر وێ چه‌ندێ هاته‌ كرن كو پرۆسا سياسى پشتى هه‌لبژارتنان جهێ گرنگيا هه‌موو لايه‌كێ يه‌ وهه‌موو هاريكارێن هه‌ڤدو بن تاكو ب زووترين ده‌م حوكمه‌ته‌كا نيشتمانى بهێته‌ پێكئينان وكێشه‌ وگرفت بهێنه‌ چاره‌كرن.

شاندێ بريتانى به‌رهه‌ڤيا خوه‌ دياركر بۆ هاريكاريا حوكمه‌تا هه‌رێما كوردستانێ دبوارێ چاكسازيێ دا ودووپاتكر كو ئه‌و گرنگيێ ب په‌يوه‌نديێن ل گه‌ل هه‌رێما كوردستانێ دده‌ن.

ژلايێ خوه‌ڤه‌ نێچيرڤان بارزانى سوپاسيا حوكمه‌تا بريتانيا كر بۆ وان هاريكاريێن پێشكێشى هه‌رێما كوردستانێ كرى ب تايبه‌تى دبوارێ ريفۆرمێ ورێكخستنا وه‌زاره‌تا پێشمه‌رگه‌، هه‌روه‌سا پۆخته‌ك ده‌رباره‌ى په‌يوه‌نديێن هه‌ولێرێ وبه‌غدا وچاره‌كرنا كێشان دنابه‌را واندا وپێكئينانا كابينا نوو يا حوكمه‌تا عيراقێ ب شێوه‌كى كو هه‌رێما كوردستانێ رۆلێ به‌رچاڤ تێدا هه‌بيت.

ئه‌ڤرۆنيوز:

رێڤه‌به‌رێ ئاسايشا هه‌ولێرێ راگه‌هاند، مه‌ به‌لگێن ل به‌ر ده‌ست يێن هه‌ين كو ئه‌و كه‌سێن دوهى دناڤ ئاڤاهيێ پارێزگه‌ها هه‌ولێرێ خوه‌ په‌قاندى ب سه‌ر داعشێ ڤه‌ بوون، به‌لێ هه‌ڤالێن وان دژيانێ دا يێن ماين ويێن هاتينه‌ ده‌سته‌سه‌ركرن، به‌رى سێ حه‌فتيان ژى مامۆستايه‌كێ ئايينى ب ناڤێ (مه‌لا ئيسماعيل سوسه‌يى) ژلايێ هێزێن ئاسايشێ ڤه‌ هاتبوو ده‌سته‌سه‌ركرن كو پێشتر ئيمام وخوتبه‌ خوين بوو و ل سه‌ر توندره‌ويێ هاتبوو دوورخستن،

تارق نورى، رێڤه‌به‌رێ ئاسايشا هه‌ولێرێ زێده‌تر بۆ مالپه‌رێ فه‌رميێ پارتى ديموكراتى كوردستان گۆت” دده‌مه‌كێ نێزيك دا دێ ئه‌نجامێ روودانا ئاڤاهيێ پارێزگه‌ها هه‌ولێرێ به‌لاڤكه‌ين وخه‌لكه‌كێ زۆر يێ هاتيه‌ ده‌سته‌سه‌ركرن، به‌لێ دبيت هنده‌ك ژوان چو ل سه‌ر نه‌هێته‌ چه‌سپاندن، ئه‌وێن ده‌ست دناڤ وێ تۆرا تيرۆرستى دا هه‌ى دێ هێنه‌ سزادان وڤه‌كۆلين ژى يا به‌رده‌وامه‌، له‌وما ئامارا ده‌سته‌سه‌ركريان به‌لاڤ ناكه‌ين”.

ناڤبرى ئاماژه‌ ب ده‌سته‌سه‌ركرنا تۆره‌كا تيرۆرستى ل باژێرێ هه‌ولێرێ كر وگۆت” ده‌مێ سێ حه‌فتيانه‌ مه‌لا ئيسماعيل سوسه‌يى هاتيه‌ ده‌سته‌سه‌ركرن ودانپێدان ژى يا كرى كو ل هه‌ولێرێ مژوولى بجهئينانا پيلانه‌كا تيرۆرستى بوو وچه‌ندين چه‌ك ژى دمالا وى دا ده‌ست ب سه‌ردا هاتيه‌ گرتن”.

ل دۆر مه‌لا سه‌ليم شووشكه‌يى، په‌رله‌مانتارێ به‌رێ يێ كۆمه‌لا ئيسلامى، تارق نورى گۆت” مه‌لا سه‌ليم خوه‌ ل سلێمانيێ يا حه‌شارداى وبه‌لگه‌ ل سه‌ر يێن هه‌ين كو داعشه‌”.

گۆت ژى” پێشتر مه‌ پێزانين نه‌بوون كو دێ هێرش ل سه‌ر ئاڤاهيێ پارێزگه‌ها هه‌ولێرێ هێته‌ كرن، به‌لێ ده‌مێ مه‌لا ئيسماعيل سوسه‌يى هاتيه‌ ده‌سته‌سه‌ركرن، مه‌ زانى تشته‌ك يێ ل به‌ر ده‌ستێ وى ودخوازيت پيلانه‌كێ بجهبينيت، پشتى ده‌سته‌سه‌ركرنا وى چه‌ندين چه‌كێن جۆرا وجۆر دناڤ مالا مه‌لا ئيسماعيل دا هاته‌ ده‌ست ب سه‌ردا گرتن، دياره‌ پيلان هه‌بوو وخوه‌ به‌رهه‌ڤ كربوو بۆ ئه‌نجامدانا كرياره‌كا تيرۆرستى”.

دياركر” ل به‌رده‌م دادوه‌رێ ڤه‌كۆلينێ، مه‌لا ئيسماعيل سوسه‌يى دانپێدان كريه‌ كو به‌يعه‌ت دايه‌ داعشێ، هه‌روه‌سا مه‌ پێشتر ژى تۆره‌كا تيرۆرستى هاتبوو ده‌سته‌سه‌ركرن كو په‌يوه‌ندى ب گرۆپێ مه‌لا ئيسماعيلى ڤه‌ هه‌بوو وهاريكاريا داعشێ كربوو”.