ئەڤرۆ نيوز:
نێچیرڤان بارزانی سەرۆک وەزیرێن ھەرێما کوردستانێ ئەڤرۆ دێ پشکداری رێورەسمێن سووندخوارنا سەرۆک کۆمارێ نوو یێ تورکیا بیت.
ئەڤرۆ ئێڤاری رێورەسمێن سووندخوارنا رەجەب تەیب ئەردۆغان وەک سەرۆک کۆمارێ وی وەلاتی بۆ پێنج سالێن دی دێ ل کۆچکا سەرۆکاتیا تورکیا ل ئەنقەرە برێڤەچن. نێچیرڤان بارزانی سەرۆک وەزیرێ ھەرێما کوردستانێ ب فەرمی بۆ وان رێورەسمان ھاتیە داخوازکرن و دێ بەرھەڤی سووندخوارنا ئەردۆغانی بیت، کو ھژمارەکا سەرۆک و سەرۆک وەزیرێن وەلاتێن جیھانێ دێ پشکدار بن.
ئه‌ڤرۆ نيوز:
نێزیکی 1200 پێشمەرگێن ژینگەھا دھۆکێ ژ بۆ بەرەڤانیێ ژ ئاخا ھەرێما کوردستانێ کارێ خوە یێ ژنگەھێ بجە ھێلابوون و چوو بوونە بەرۆکێن شەڕی و شەڕ دژی داعش دکرن، لێ نھا جارەکا دی ڤەگەڕیاینە سەر کارێ خوە یێ چاڤدێریا ژینگەھێ.
ئەندازیار محەمەد تاھر بریفکانی، رێڤەبەرێ ژینگەھا دھۆکێ بۆ ئەڤرۆ دیار کر، ئەڤە ماوێ دو سالانە سەرپێچی و زێدەگاڤی ل سەر ژینگەھێ زێدەتر لێ ھاتبوون، چونکو پتریا ئەو پێشمەرگێن چاڤدێریا ژینگەھا دھۆکێ دکرن د شەڕێ دژی رێکخراوا تیرۆرستی یا داعش دابوون، بەلێ نھا ئەو پێشمەرگە ھەموو کو نێزیکی 1200 پێشمەرگەیان بوون ڤەگەڕیاینە سەر کارێ خوە و دەست ب چاڤدێریا ژینگەھێ دکەن.
بریفکانی ئاماژە ب وێ چەندێ ژی کر، د رۆژێن ئێکێ یێن کارێ خوە دا، پێشمەرگێن چاڤدێریا ژینگەھێ دو تۆمەتبار ل ناحیا زاویتە دەستەسەرکرینە کو راببوون ب گرتنا ھژمارەکا کەوان و بۆ دادگەھێ ھاتنە رەوانەکرن.
ژ ئەگەرێ دوکێلا گازا سرۆشتی رەوشا چەندین وەلاتیان تێکچوویە
ئەڤرۆ نیوز ، زنار تۆڤی:
ژ ئەنجامێ دەرخستنا گازا سرۆشتی ل ناحیا چەمانکێ، رەوشا ساخلەمیا چەندین کەسان ل گوندێ گری یێ سەر ب وێ ناحیێ ڤە تێکچوویە و بۆ نەخۆشخانا تەنگاڤیان ل دهۆکێ هاتینە رەوانەکرن.
چەند وەلاتیێن گوندێ گری ل ناحیا چەمانکێ یا سەر ب قەزایا ئامادیێ ڤە، ژ ئەنجامێ دەرئینانا گازا سرۆشتی ژ ئالیێ کۆمپانیەکا دەرخستنا گازا سرووشتی ڤە ل وێ دەڤەرێ تۆشتی بهێن کورتیێ نەخۆشیان بووینە و ژ بەر تێکچوونا رەوشا ساخلەمیا وان، ئەو وەلاتی ژبۆ نەخۆشخانا تەنگاڤیان ل دهۆکێ هاتینە رەوانەکرن.
ئەڤرۆ نیوز ، زنار تۆڤی:
رودان بالایی ئەو کچا کوردا خەلکا باژێرێ دهۆکێ یە، کو نوکە ل گەل خێزانا خوە ل وەلاتێ ئەمریکا دژیت، بۆ جارا ئێکێ یە وەکو کچەکا کوردا گەنج دبیتە نوونەرا عێراقێ ل نەتەوێن ئێکگرتی.
رودان بالایی ژ ئەمریکا بۆ ئەڤرۆ نیوز گوت: من وەک کچەکا کورد بۆ ئێکەم جار نوونەراتیا عێراقێ کریە د 15 مین لوتکەیا نێڤدەولەتی یا گەنجان ل نەتەوێن ئێکگرتی کر، کو بنگەهێ سەرەکی یێ وێ ل باژێرێ نیویۆرکێ ئەمریکی یە.
ناڤهاتیێ گوت ژی: بەری دو هەیڤان من داخوازەک پێشکێشی یۆئێنێ کر، کو ئەز وەک کچەکا گەنج نوونەراتیا عێراقێ بکەم، وان ژی رەزامەندی نیشان دا،لەوما ئێکەم جارە کچەکا کورد پشکداریێ د ڤێ لوتکەیا نێڤدەولەتی یا گەنجان دڵ دکەت، کو 163 گەنجان ژ وەلاتێن جۆدا یێن جیهانێ پشکداری تێدا کریە، ژ سەرجەمێ 193 وەلاتێن جیهانێ، هەروەسا د وێ لوتکێ دا من بەحسێ مافێن مرۆڤان کر و هێرشا داعشێ بۆ سەر کوردستانێ، هەروەسا من بەحسێ کورد و کوردستانێ و رەوشا پەنابەران ل عێراقێ و کوردستانێ کر و دیسا من بەحسێ هێرشا داعشێ بۆ سەر ژن و کچێن کوردێن ئێزدی کر و ئەو دەردەسەری و ئێش و ئازارێن ب سەرێ وان هاتین.
رودانێ گوت ژی: من سەرەدانا کوردستانێ کریە و من دوو سالان ل سلێمانیێ و دومیز دناڤا پەنابەران دا کارکریە، هەروەسا د وێ گۆتارێ دا من بەحسێ پەروەردە و فێرکرنێ کر و من ئاماژە ب هندێ دا، کو نابیت جۆداهی دناڤبەرا نەتەوان دا بهێتە کرن و ئەز ئێکەم کەس بووم، کو من گوتارا خوە ل نەتەوێن ئێکگرتی پێشکێش کری.
ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ، ئه‌ڤرۆ ئێكشه‌مبى 8/7/2018 پێشبينيێن پلێن گه‌رمێ يێن سوباهى دوشه‌مبى به‌لاڤ دكه‌ت.
رێڤه‌به‌ريا ناڤبرى دياركر كو بلندترين پلا گه‌رمێ سوباهى ل هه‌رێما كوردستانێ دێ 42 بيت ل پارێزگه‌ها هه‌ولێرێ.
دياركر ژى پلا گه‌رمێ سوباهى ل پارێزگه‌ها سلێمانيێ دێ 41 بيت و ل پارێزگه‌ها دهۆكێ 40 بيت.
ئەڤرۆ نیوز ، زنار تۆڤی:
ئەڤرۆ ئێکشەمبی 8.7.2018 ل دەمژمێر 6 ئێڤاری دەزگایێ خانی یێ روشەنبیری و راگەهاندنێ پەنەلەکێ ڤەکری ل سەنتەرێ روشەنبیری ل زانکۆیا دهۆکێ بۆ هەرسێ پەرلەمانتارێن کورد ل پەرلەمانێ عێراقێ ئەشواق جاف و سامی ئەتروشی و ماجد شنگالی سازکر و تێدا هەرسێ پەرلەمانتارێن کورد ل پەرلەمانێ عێراقێ بەحسێ چەندین خالان کر.
پەرلەمانتار ئەشواق جاف بەحسێ سەربورا پەیوەندیێن هەرێمێ و بەغدا کر و چەندین خالێن گرنگ بەحسکرن، کو ناڤهاتی ل دو خولان دا ئەنداما پەرلەمانێ عێراقێ بوو.
لدووڤ دا پەرلەمانتار ماجد شنگالی بەحسێ تەوەرێ (دیتنا حوکمەتێن عیراقێ بۆ دەڤەرێن کوردستانی یێن ژ دەرڤەی ئیدارا ھەرێمێ) کر و دیسا بەحسێ مادێ 140 و ئەو ئاریشە د کەڤنە د رێکێ وی مادەی دا و ئەگەرێن بجهنەئینانا وی مادەی بەحسکرن.
هەروەسا دکتۆر سامی ئەترووشی ژی بەحسێ (پاشەرۆژا ھەرێما کوردستانێ د ناڤ کاودانێن دەڤەرێ دا) کر و ب تەسەلی چەندین خال دانە دیارکرن و لدووڤ دا دانوستاندن ژ لایێ بەرهەڤبوویان ڤە هاتە کرن.
ئه‌ڤرۆ نيوز:
شه‌ش لايه‌نێن نه‌رازى، گۆڕان، هاوپه‌یمانى، یه‌كگرتوو، كۆمه‌ڵ، بزاڤا ئیسلامی و شیوعى د راگه‌هاندنه‌كا هه‌ڤپشك دا كو ئاراسته‌ى كومسيونێ كريه دياركريه:هژمارتنا ده‌ستى يا ژماره‌كا كێما سندوقێن ده‌نگان، به‌روڤاژى ياسايى و رێنمايى يه و شه‌رعيه‌تێ دده‌ته پرۆسا ساخته‌كاريێ.
هه‌ر شه‌ش لايه‌نان دياركريه كو پێدڤيه كومسيون ياسايا په‌رله‌مانێ عيراقێ وه‌كو خوه بجه بينيت و بێى چو لادانه‌ك وه‌كو خوه بجه بينيت و هه‌مى سندوقان ب ده‌ست بهژمێرن.
ئەڤرۆ، سالار دۆسكی:
رێڤه‌به‌رێ په‌يوه‌نديێن وەزارەتا ئەوقافێ و كارۆبارێن ئاینی ل حوكمەتا هەرێما كوردستانێ، مه‌ريوان نه‌قشبه‌ندى، بۆ ئەڤرۆ نيوز گۆت: نوكە ل گەل un مژوولین ل وان دەڤەرێن ددەستێ داعش دابوون ل شنگال و زمار چونكى حوكمەتا عیراقێ چو پارە بۆ نووژەنكرنا وان تەرخانەكریە، ب سەدان ملیۆن دينار بۆ جهێن شیعە مەزهەب هاتینە تەرخانكرن.
مەریوان نه‌قشبه‌ندى ئەو ژی گۆت: جهێن كاكەیان ل كەركووكێ هندەك ژلایێ داعشێ ڤە هاتینە ژناڤبرن و هندەك ژلایێ حەشدا شەعبی ڤه كو پێگێری ب رێنمایێن حوكمەتا بەغدا نەكربوون و ئەڤە ژی دچارچؤڤێ دانوستاندێن مە دایە ل گەل un ل كەركووك و سەلاحەدین و دەشتا نەینەوا.
مەریوانی گۆت ژی: نوكە جهێن مه‌زهەبێ شیعی ل دەڤەرێن پێشتر ددەستێ داعش دا يێن دهێنە نووژەنكرن، به‌لێ چ بۆ جهێن ئاینى يێن ئێزدی و كاكەیان ناهێتەكرن، لەوما ئەم ل گەل رێكخراوێن بیانی د دانوستاندنان داینە كو ئەڤ جهه ژی بهێنە نووژەنكرن.
ئه‌ڤرۆ نیوز ، نه‌وزاد هلۆرى:
ب مه‌ره‌ما زێده‌تر هه‌ڤنیاسین و ئه‌نجامدانا چالاكیێن جۆراوجۆر سه‌نته‌ره‌كێ چیاڤانێن هه‌رێما كوردستانێ پشكدارێ ڤیسته‌ڤاله‌كا چیایى ل توركیا بوون.
عه‌لى زوبێر، نوونه‌رێ سه‌نته‌رێ بارزان بۆ ژینگه‌پارێزى و چیاڤانى بۆ ئه‌ڤرۆ نیوز گۆت: (ب مه‌ره‌ما زێده‌تر هه‌ڤنیاسین و پێكڤه كاركرن و ئه‌نجامدانا چالاكیێن جۆراوجۆر و راكێشانا گه‌شتیار و چیاڤانێن وه‌لاتێ توركیا بۆ هه‌رێما كوردستانێ ، ئه‌م وه‌كو سه‌نته‌رێ بارزان بۆ ژینگه پارێزى و چیاڤانى پشكدارێ ڤیسته‌ڤالا چیایان بووین ل توركیا).
زێده‌تر گۆت: (ڤیسته‌ڤال ل باكوورێ كوردستانێ و چیایێن گه‌ڤه‌رێ و ناڤا كه‌ڤیێن به‌فرێ ل ده‌ڤه‌را ساتێ ب رێڤه‌چوو و تێدا نێزیكێ 160 گروپێن چیاڤانى پشكداربوون و بۆ ده‌مێ دو شه‌ڤ و سێ رۆژان ڤه‌كێشا و چه‌ندین برگه و بابه‌ت و چالاكیێن جۆراوجۆر هاتنه ئه‌نجامدان و نیاسینه‌كا زۆر دناڤبه‌را هه‌موو گرۆپان دا په‌یدابوو، دبيت ل داهاتى ئه‌ڤ یه‌ك ببیته ئه‌گه‌ر كو هند گه‌شتیار و چیاڤانێن وه‌لاتێ توركیا و باكوورێ كوردستانێ ژى سه‌ره‌دانا هه‌رێما كوردستانێ و ده‌ڤه‌رێن چیایێن هه‌رێمێ بكه‌ن).
ب گۆره‌ى ئاخفتنێن عه‌لى زوبێر، هه‌كه ڤیسته‌ڤال ل هه‌رێما كوردستانێ بهێنه‌كرن، دێ بینه‌ر و حه‌ژێكه‌رێن زۆر هه‌بن و زێده‌تر گۆت: (ل كوردستانێ چه‌ندین ده‌ڤه‌رێن چیایى و چیایێن بلند يێن هه‌ين و رێژه‌یه‌كا زۆرا به‌فرێ لێ دباریت و گول و گولزار و گیا و بێرمێن ئاڤێ سال ب سال هه‌نه و شیانێن وێ یه‌كێ هه‌نه كو ڤیسته‌ڤالێن مه‌زن بهێنه ئه‌نجامدان و ئه‌ڤ یه‌ك دێ بیته ئه‌گه‌ر كو سه‌رنجا گه‌شتیاران رابكێشت و داهاته‌كێ باش ژى بۆ ده‌ڤه‌رێن هه‌رێما كوردستانێ ده‌ستڤه بهێت).
نيشاندان