دوهی سێشەمبی 9//2024، شاندەكێ مەلبەندێ كەركووكێ یێ ئێكەتی نیشتمانی كوردستان، سەرەدانا بارەگەهێ لقێ كەركووكێ یێ پارتی دیموكراتی كوردستان كر.
پشتی كۆمبوونێ د كۆنگرەیەكێ رۆژنامەڤانی دا، رەوەند مەلا مەحموود، بەرپرسێ مەلبەندێ كەركووكێ یێ ئێكەتی نیشتمانی كوردستان گوت» مە پەیوەندیەكا جدی و باش ل گەل برادەرێن پارتی هەیە و ئەڤرۆ ئەم بۆ پیرۆزباهیا لقێ سێیێ پارتی یێن هاتین و ئەوان ژی ب گەرمی پێشوازیا مە كر».
گوت ژی» سەرەدانا مە یا برایینی و دۆستایەتی بوو و دێ پەیوەندیێن مە د بەردەوام بن».
هەڤدەم محەمەد كەمال، بەرپرسێ لقێ سێ یێ پارتی دیموكراتی كوردستان ل كەركووكێ گوت» ب خێر هاتنا برایێن مە ل مەلبەندێ كەركووكێ یێ ئێكەتی نیشتمانی كوردستان دكەین كو هاتن بۆ پیرۆزباهیێ و مە بڕیار دایە پێكڤە كار بكەین».
بەرپرسێ لقێ سێ یێ پارتی ل كەركووكێ گوت ژی» مە پشتەڤانیا خوە بۆ داخوازیێن ئاكنجیێن تاخێ نەورۆز دیاركر كو ئەو خانی مولكێ وەزارەتا بەرگریا ئیراقێ نینن و ل باژێرێن دی مە هەمان كێشە هەنە و یێن هاتینە چارەسەركرن، لەوما پێدڤیە ل كەركووكێ ژی بهێت چارەسەركرن».

بالیۆزا ئەلمانیا ل ئیراقێ راگەهاند: هێزێن هەڤپەیمانان بۆ پشتەڤانیكرنا حوكمەتا ئیراقێ ل وی وەلاتی نە و ژ پێخەمەت پەیداكرنا سیستەمەكێ ئاسایشێ، كو رێكێ ب حوكمەتێ ددەت ب خوە سەرپەرشتیێ لێ بكەت.
كریستیانا هومان، بالیۆزا ئەلمانیا ل ئیراقێ گوت» هەردەم ژڤانەك بۆ ب دووماهی ئینانا هەبوونا هێزێن نێڤدەولەتی ل وەلاتان هەیە، نوكە ژی ل ئیراقێ گەنگەشە ل سەر پرسێ هەیە».
بالیۆزا ئەلمانیا ل ئیراقێ ئاماژە ب ئەوێ چەندێ كر» هێزێن هەڤپەیمانان ل سەر داخوازیا حوكمەتا ئیراقێ ل ئەوێ وەلاتی نە و پێدڤیە پاراستنا ئەوان هێزان بهێتە گرەنتیكرن».
هەروەسا گوت» بەرسڤا هێرشێن ل سەر بنگەهێن هەڤپەیمانان یا هاتیە دان».
دیاركر ژی» ج ئەوێ باوەرێ دامە بەرپرسیارەتیا حوكمەتا مێهڤاندارە گرەنتیا سلامەتیا هێزێن نێڤدەولەتی و ئەو كەسێن ل ڤێرێ دژین و كاردكەن بكەت، ئەڤە ژی ئەركێ سەرەكیێ حوكمەتا ئیراقێ یە».
بالیۆزا ئەلمانیا ل ئیراقێ سەرنج بۆ ئەوێ چەندێ ژی راكێشا، هێزێن هەڤپەیمانان بۆ پشتەڤانیكرنا حوكمەتا ئیراقێ ل ئەوێ وەلاتی نە بۆ پەیداكرنا سیستەمەكێ ئاسایشێ، كو رێكێ ددەت ب خوە سەرپەرشتیێ بكەت.
ئەڤە د دەمەكی دایە ژ دەستپێكا شەڕێ د ناڤبەرا ئیسرائیلێ و حەماس دا، هێرشێن گرۆپێن چەكدار ل ئیراقێ و سووریێ ل سەر بنگەهێن هەڤپەیمانان و ئەمریكا زێدەبووینە، هەتا نوكە گرۆپێن چەكدارێن شیعی كو خوە ب (موقاوەما ئیسلامی ل ئیراقێ) د دەنە نیاسین، بەرپرسیارەتیا خوە ژ زێدەتر ژ 150 هێرشان ل سەر هێزێن ئەمریكی و هەڤپەیمانان ل ئیراقێ و سووریێ راگەهاندیە.

وەزارەتا بەرگریا ئەمریكا راگەهاند: مە هیچ پلانەك نینە هێزێن خوە ژ ئیراقێ ڤەكیشین و دێ سەرنجا وان یا مەزن ژی ل سەر بەرنامەیێ شكاندنا داعشێ مینیت.
پاتریک رایدەر، پەیڤدارێ وەزارەتا بەرگریا ئەمریكا (پێنتاگۆن) د كۆنفرانسەكێ رۆژنامەڤانی دا دوپاتكر» هێزێن ئەمریكا ل سەر داخوازیا حوكمەتا ئیراقێ ل وی وەلاتی نە».
داخوازیا ڤەكێشانا هێزێن ئەمریكی دناڤ گرۆپێن چەكداری ل ئیراقێ بەر ب زێدەبوونێ یە، ب تایبەتی پشتی ل رۆژا پێنجشەمبیا بۆری 4/1/2024 دو فەرماندەیێن بلند یێن بزاڤا نوجەبا یا سەر ب حەشدا شەعبی ڤە ب ناڤێن (تالب ئەلسەعیدی)، بەرپرسێ لەشكری یێ ئۆپەراسیۆنێن حەشدا شەعبی ل دەوروبەرێن بەغدا و هاریكارێ وی (عەلی نایف) هاتینە كوشتن كو پشتی كێمتر ژ 48 ساتان ژ ئەوێ روودانێ، ئەمریكا ئەنجامدانا هێرشێ ب ستوویێ خوەڤە گرت.
ل رۆژا ئەینیا بۆری 5/1/2024، محەمەد شیاع سۆدانی، سەرۆك وەزیرێن ئیراقێ د پەیڤەكێ دا د رێوڕەسمێ سالڤەگەرا چارێ یا كوشتنا قاسم سلێمانی، فەرماندەیێ بەرێ یێ فەیلەقا قودس یا لەشكرێ پاسدارێن ئیرانێ و ئەبو مەهدی موهەندس، جێگرێ بەرێ یێ سەرۆكێ دەستەیا حەشدا شەعبی، گوتبوو» مژوولی دیاركرنا ژڤانێ دەستپێكرنا دانوستاندناینە بۆ دەركەفتنا هێزێن بیانی ژ ئیراقێ».
پەیڤدارێ وەزارەتا بەرگریا ئەمریكا بێ ئاگەهیا خوە ژ هەر ئاگەهداركرنەكێ ژ ئالیێ حوكمەتا ئیراقێ بۆ ڤەكێشانا هێزێن ئەمریكی ژ ئیراقێ نیشاندا.
ئەمریكا دو هزار و 500 سەرباز ل ئیراقێ و 900 سەرباز ل سووریێ هەنە، ئەو هێزە ل 17 ئۆكتۆبەرا و پشتی گەرمبوونا شەڕێ ئیسرائیلێ و حەماس زێدەتر ژ 120 جاران ب مووشەك و هاونان و فرۆكەیێن بێ فرۆكەڤان ژ ئالیێ ( موقاوەما ئیسلامی) یا شیعی هێرش ل سەر هاتینە كرن.

پارتا سوسیالیست یا کوردستانێ سەبارەت ب هەلبژارتنێن باژێرڤانیان ل تورکیا و باکورێ کوردستانێ داخواز ژ هەموو هێزێن کوردی دکەت کو پێکڤە کار بکەن دا بشێن ب رەنگەکێ بهێز پشکداریێ د هەلبژارتنان دا بکەن، چونکی ئێکەتیا هێزێن کوردستانی ل تورکیا دێ بیتە ئەگەرێ بهێزبوونا پێگەهێ کوردان و ئەو یەک ژ بۆ کوردان گەلەک یا گرنگە.

جڤاتا سەرکردایەتیا پارتا سوسیالیست یا کوردستانێ کۆمبوو و پشتی کۆمبوونێ ژی داخۆیانیەک هاتە بەلاڤکرن و تێدا داخواز ژ هەموو هێزێن کوردی ل تورکیا هاتیە کرن کار بۆ هەلبژارتنێن باژێرڤانیان بهێتە کرن، چونکی ل ٣١ ئادارێ دێ هەلبژارتنێن باژێرڤانیان ل تورکیا و باکورێ کوردستانێ هێنە کرن و هەر ژ نها ڤە هەموو هێزێن دی خوە بۆ هەلبژارتنان بەرهەڤ دکەن، دڤێت هێزێن کوردی ژی دەست ب قۆناغەکا نوو بکەن، وەکو پارتا سوسیالیست مە دڤێت هەموو پارتێن کوردستانی پێکڤە بەرەیەکێ ئاڤا بکەن و وەسا پشکداریێ د هەلبژارتنان دا بکەن، ئەو یەک دێ بیتە ئەگەرێ بهێزبوونا کوردان، چونکی بەرۆڤاژی ڤێ یەکێ دێ دیسان زیان گەهیتە کوردان.
پارتا سوسیالیست یا کوردستانێ ئەو یەک ژی دیار کریە، دڤێت ئەم پێکڤە رۆژا ٣١ ئادارێ وەکو رۆژەکا گرنگ بۆ خەباتا کوردان ببینین، چونکی دەلیڤەکا گرنگە و هەکە کورد خوە بەرهەڤ بکەن دشێن مفایەکا باش ژێ وەربگرن، هەکە هێزێن کوردی پێکڤە بەرەیەکێ ئاڤا بکەن و ب رەنگەکێ بهێز پشکداریێ د هەلبژارتنان دا بکەن ئەو یەک دێ دەلیڤەکا گەلەک گرنگ بیت دا کورد بشێن بەرەڤانیێ ل مافێن خوە بکەن، ژ بەر ڤێ یەکێ ژی وەکو پارتا سوسیالیست ئەو داخواز دکەن بەری هەلبژارتنان وەکو بەرپرسیاریەکا نەتەوەیی هەموو هێزێن کوردی پێکڤە دەست ب دانوستاندنان بکەن و وانان ژ ئەزموونێن بەری نها وەربگرن و وەسا پشکداریێ د هەلبژارتنان دا بکەن.
هەژی ئاماژەپێدانێ یە کو دێ ل رۆژا ٣١ ئادارێ ل تورکیا و باکورێ کوردستانێ هەلبژارتنێن سەرۆکاتیا باژێرڤانیان هێنە کرن و هەر ژ نها ڤە ئاکپارتی و پارتا کۆماری ب هەموو رەنگەکێ یێ کار دکەن دا بشێن سەرۆکاتیا باژێرڤانیێن مەزن یێن تورکیا ب تایبەتی ژی ئستەنبول و ئەنقەرە بدەستڤە بینن، بەرپرسێن ئاکپارتیێ دیار دکەن ئەو ب هەموو رەنگەکێ کار دکەن دا بشێن سەرۆکاتیا هەر دو باژێرێن مەزن یێن تورکیا ئانکۆ ئستەنبول و ئەنقەرە ژ دەستێ پارتا کۆماری دەرخینن و ل هەمبەر دا سەرۆکێ نوو یێ پارتا کۆماری ژی دیار دکەت وان دڤێت د هەلبژارتنان دا رێژەیا دەنگێ پارتا خوە بگەهیننە ٣٥٪ و دربەکا مەزن ل ئاکپارتیێ بدەن، ژ بەر ڤێ یەکێ ژی وان دڤێت ژ بلی سەرۆکاتیا باژێرڤانیا ئەنقەرە و ئستەنبولێ سەرۆکاتیا هندەک ژ باژێرێن دی یێن گرنگ ژی ژ دەستێ ئاکپارتیێ دەرخینن.

سەرۆك مەسعود بارزانی، دوهی پێشوازی ل ئاندریا ناسی بالیۆزێ نوو یێ نەمسا ل ئیراقێ كر.
د دیدارەكێ‌ دا، بالیۆزێ نەمسا خۆشحالیا خۆ ب دیدارا سەرۆك بارزانی دەربڕی و باس ل پەیوەندیێن دیرۆكی یێن گەلێ كوردستانێ و نەمسا و پێشڤەبرنا وان پەیوەندیان ژ لایێ دیپلۆماسی و كەلتووری و ئابووری ڤە كر .
ژ ئالیێ‌ خۆ ڤە، سەرۆك بارزانی پیرۆزباهیا دەستبكاربوونا بالیۆزێ نوو یێ نەمسا كر و هیڤیا سەركەفتنێ بۆ خواست و پێشوازی ل بزاڤێن پێشڤەبرنا پەیوەندیێن د ناڤبەرا هەردو لایان دا ل سەر ئاستێ حكومەتا هەرێما كوردستانێ و حكومەتا فیدرال دگەل حكومەت و گەلێ نەمسا كر.
هەر دوهی، سەرۆك بارزانی پێشوازی ل ئیریك شۆڤالیێ بالیۆزێ فرەنسا ل ئیراقێ كر و د دیدارەكێ‌ دا، باسێ‌ رەوشا سیاسی و ئالۆزیێن ئیراقێ و دەڤەرێ و ڕوودانێن ڤێ دووماهیێ هاتینە پێش، كر.
هەروەسا، هەردو ئالیان تەكەز كر كو پێدڤیە حكومەتا فیدرال پارێزگاریێ ل ئێمناهی و ئاسایشا ئیراقێ بكەت و یاسا سەروەربێت.

سەرۆكێ هەرێما كوردستانێ، نێچیرڤان بارزانی ل دۆر پەیوەندیێن د ناڤبەرا هەرێما كوردستانێ و ئیرانێ دا راگەهاند: پەیوەندیێن مە د باشن و وەكو هەرێما كوردستانێ دخوازین مە پەیوەندیەكا گەلەك باش ل گەل ئیرانێ هەبیت، هەردەم مە دوپاتی ل ئەوێ چەندێ كریە كو نابینە ژێدەرێ گەفێ بۆ جیرانێن خوە ب تایبەتی ئیرانێ.
دوهی دوشەمبی 8/1/2024، نێچیرڤان بارزانی، سەرۆكێ هەرێما كوردستانێ ب مەبەستا دەربرینا هەڤخەمیێ بۆ قوربانیێن تەقینا باژێرێ كرمان یێ ئیرانی، سەرەدانا قونسلخانەیا ئیرانێ ل هەولێرێ كر.
نێچیرڤان بارزانی د داخۆیانیەكا رۆژنامەڤانی دا، گوت» داعشا تیرۆرست، دیاردەیەكا ناوچەییە و ل دەڤەرا مە هەیە، ل گەل ئیرانێ مە دوپاتی ل ئەوێ چەندێ كریە كو دڤێت بەردەوام بین د هاریكاریێ و كاركرنێ ل گەل هەڤدو بۆ بنبڕكرنا ئەوان تیرۆرستان».
هەروەسا گوت» بۆ دەربرینا هەڤسۆزیا هەرێما كوردستانێ و سەركردایەتیا هەرێما كوردستانێ، ل هەمبەر ئەوی كارێ تیرۆرستی كو ل كرمان هاتیە ئەنجامادن، كو بوویە ئەگەرێ شەهیدبوونا ب دەهان خەلكێ بێگونەهێ ئەوی باژێری، ئەم یێن هاتین بەهیداریا خوە بگەهینینە كۆمارا ئیسلامی یا ئیرانێ و خەلكێ ئیرانێ ب گشتی و باژێرێ كرمان ب تایبەتی، هەڤسۆزی و هەڤخەمیا خوە بگەهینینێ».
بەری ئەوێ داخۆیانیا رۆژنامەڤانی، د دیدارەكێ دا ل گەل قونسلێ گشتیێ كۆمارا ئیسلامی یا ئیرانێ ل هەولێرێ، سەرۆكێ هەرێما كوردستانێ، سەرەرای گەهاندنا بەهیداری و هەڤخەمیا هەرێما كوردستانێ ب سەركردایەتی و گەلێ ئیرانێ، بەهیداریەك د تۆمارا بەهیداریێ دا نڤیسی و ئاماژە ب ئەوێ چەندێ كر ل ئیراقێ و هەرێما كوردستانێ وەكو قوربانیێن دەستێ تیرۆرێ، باشتر د خەما مالبات و كەسوكارێن قوربانیان تێدگەهن و سەرەرای هەڤسۆزیێ و هەڤخەمیێ، هیڤیا سلامەتیێ بۆ برینداران خواست.
د كۆنگرەیێ رۆژنامەڤانی دا، نێچیرڤان بارزانی، سەرۆكێ هەرێما كوردستانێ راگەهاند» دئینینە بیرا خوە، د چەند سالێن بۆری دا، دەمێ داعش هاتی، كۆمارا ئیسلامی یا ئیرانێ هاریكاریا ئیراقێ و هەرێما كوردستانێ كر و مە سوپاسیا ئەوان كر بۆ هەموو ئەوان هاریكاریێن پێشكێشی ئیراقێ و هەرێما كوردستانێ كرین».
سەرۆكێ هەرێما كوردستانێ دوپاتكر ژی» مە، د بەرێ دا و نوكە ژی دوپاتی ل ئەوێ چەندێ كریە، ب هیچ شێوەیەكی نابینە ژێدەرێ گەفێ بۆ سەر جیرانێن خوە ب تایبەتی ژی بۆ سەر ئیرانێ».
بەهیداریا قونسلخانەیا ئیرانێ ل هەولێرێ بۆ قوربانیێن دو تەقینێن رۆژا چارشەمبیا بۆری 3/1/2024 یێن باژێرێ كرمان بوو، كو ل نێزیك گۆڕێ قاسم سولەیمانی، فەرماندەیێ بەرێ یێ فەیلەقا قودس یا لەشكرێ پاسدارێن ئیرانێ و ل دەمێ بڕێڤەچوونا رێوڕەسمێ سالڤەگەرا چارێ یا كوشتنا وی، هاتینە روودان و ژ ئەگەرێ تەقینان هەتا نوكە 91 كەسان گیانێ خوە ژ دەستدایە.

دوهی دوشەمبی 8/1/2024، مەسرور بارزانی، سەرۆكێ حوكمەتا هەرێما كوردستانێ، پێشوازی ل ئیریك شۆڤالیێ، بالیۆزێ فڕەنسا ل ئیراقێ كر، كو ب هەلكەفتا ب دوماهی هاتنا ئەركێ وی سەرەدانا سەرۆكێ حوكمەتا هەرێمێ كربوو.
مەسرۆر بارزانی، سوپاسیا بالیۆزێ فڕەنسا كر بۆ وی دەمێ ل هەرێما كوردستانێ، كار ژ پێخەمەت پێشڤەبرنا پەیوەندیێن دو ئالی كری و هیڤیا سەركەفتنێ ژی د ئەركێن داهاتی دا بۆ خواست.
بالیۆزێ فڕەنسا ل ئیراقێ پێزانینا خوە بۆ هاریكاری و هەماهەنگیا ب هێز یا حوكمەتا هەرێما كوردستانێ ل گەل بالیۆزخانەیا فڕەنسا و قۆنسلخانەیا وێ دەربڕی.
بابەتەكێ سەرەكیێ كۆمبوونێ، كو یان برێم، قۆنسلێ گشتیێ فڕەنسا ل هەرێما كوردستانێ بەرهەڤ بوو، تایبەت بوو ب گرنگیا پاراستنا ئاسایش و سەقامگیریا هەرێما كوردستانێ ، هەروەسا هەردو ئالی د هەڤڕا بوون ل سەر پێدڤیا پێگیریبوونا ئیراقێ ب سیستەمێ دیموكراسی و فیدرالی و رێزگرتن و دابینكرنا مافێن دستووری یێن گەلێ كوردستانێ.

دوهی دوشەمبی 8/1/2024، مەسرور بارزانی، سەرۆكێ حوكمەتا هەرێما كوردستانێ، پێشوازی ل ئەندریا ناسی، بالیۆزێ نەمسا ل ئیراقێ كر.
د دیدارەكێ دا، دووماهی پێشهاتێن رەوشا گشتی یا ئیراقێ و دەڤەرێ و پێشڤەبرنا پەیوەندیێن دو قۆلی هاتنە باسكرن، هەروەسا سەرۆكێ حوكمەتا هەرێمێ ئاماژە ب پەیوەندیێن دێرین و تایبەت د ناڤبەرا هەرێما كوردستانێ و وەلاتێ نەمسا و پشتەڤانیا ئەوی وەلاتی بۆ گەلێ كوردستانێ كر د قۆناغێن جودا دا.
بالیۆزێ نەمسا ل ئیراقێ خواستا وەلاتێ خوە بۆ پێشڤەبرنا پەیوەندیان ل گەل هەرێما كوردستانێ نیشاندا و پشتەڤانی بۆ قەوارەیێ دستووریێ هەرێما كوردستانێ دوپاتكر.
هەردو ئالی د هەڤڕا بوون ل سەر پاراستنا سلامەتیا نوونەرایەتیێن دبلۆماسی ل ئیراقێ و بەردەوامبوونا ئەوان د ئەركێن خوە دا ژ پێخەمەت پاراستنا ئاسایش و سەقامگیریا ئیراقێ و هەرێما كوردستانێ.
ئەڤرۆ كۆمبوونێن جڤاتا نوونەرێن ئیراقێ دێ دەستپێكەن و پرۆژەیێ قانوونا بودجەی ژی دێ هێتە راستڤەكرن

جێگرێ سەرۆكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ رادگەهینیت: دانوستاندن د ناڤبەرا هەرێما كوردستانێ و ئیراقێ دا ل دۆر بەرهەڤكرنا پڕۆژەیەكی بۆ راستڤەكرنا قانوونا بودجەیا گشتی یا ئیراقێ د بەردەوامن و چاڤەڕێ دهێتە كرن ل دو حەفتیێن بهێن دا بهێتە هنارتن و كار دكەین ب زووترین دەم بهێتە راستڤەكرن و بەهرا هەرێما كوردستانێ ژ بودجەی ب گۆڕەی قانوونا بودجەی یا راستڤەكری بهێتە هنارتن.
مەریوان قەرەنی، جێگرێ سەرۆكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ گۆت» ل رۆژا سێشەمبی 9/1/2024 دێ بێهنڤەدانا جڤاتا نوونەرێن ئیراقێ ب دووماهی هێت و وەرزێ نوو یێ جڤاتا نوونەران دێ دەستپێكەت، پلان و بەرنامە و كارێ مە یێ بەراهیێ چارەسەركرنا كێشەیا بودجەیا هەرێما كوردستانێ یە، چونكە دانوستاندن د بەردەوامن بۆ ئەوێ چەندێ پڕۆژەیەك بهێتە هنارتن بۆ جڤاتا نوونەران بۆ راستڤەكرنا قانوونا بودجەی، چاڤەڕێ دكەین ل دو حەفتیێن داهاتی پڕۆژەیێ راستڤەكرنا قانوونا بودجەی بگەهیت، ل گەل گەهشتنا ئەوی پڕۆژەی ژی بۆ جڤاتا نوونەران دێ كاركەین كو ب زووترین دەم بهێتە راستڤەكرن، ژ بەر كو دانوستاندن د بەردەوامن و هندەك كار ماینە بهێنە تمامكرن».
جێگرێ سەرۆكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ ئەوژی دیاركر» هەتا قانوونا بودجەیا گشتی یا ئیراقێ دهێتە راستڤەكرن و ب گۆڕەی قانوونا راستڤەكری بودجەیا هەرێما كوردستانێ دهێتە هنارتن رێكەكا دی دێ هێتە بكارئینان بۆ هنارتنا مووچەیێن فەرمانبەران، چونكە نابیت ل هەموو ئیراقێ تنێ مووچەیێن فەرمانبەرێن هەرێما كوردستانێ نەهێنە دان و خەلكێ هەرێما كوردستانێ بهێتە برسیكرن، لەوما چاڤەڕێی بەرنامە و پێشنیازێن حوكمەتا هەرێما كوردستانێ دكەین و دێ كارێن خوە ل سەر ئەوی بنەمای ئەنجام دەین».

سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: هاتنا شاندێ حوكمەتا هەرێما كوردستانێ بۆ بەغدا گەلەك یا گرنگ بوو و دخوازین سێ بابەتان ل گەل بەغدا ئێكلا بكەین، ئەوژی چارەنڤیسێ سێ مووچەیێن سالا بۆری، راستڤەكرنا قانوونا بودجەی و زێدەكرنا كریا دەرئینانا پەترۆلێ ل هەرێما كوردستانێ، لەوما كارێ رژد ل سەر دكەین بۆ ئەوێ چەندێ بهێنە چارەسەركرن و ژ نوكە و وێڤە مووچەیێن فەرمانبەرێن هەرێمێ ب هیچ تشتەكێ دی ڤە نەهێتە گرێدان و ب تمامی و ل دەمێ خوە بهێتە هنارتن.
د. ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ گوت» لژنەیەك د ناڤبەرا حوكمەتا هەرێما كوردستانێ و بەغدا و لژنەیا دارایی ل جڤاتا نوونەرێن ئیراقێ هاتیە دروستكرن، شاندێ حوكمەتا هەرێما كوردستانێ د ڤێ سەرەدانێ دا چەندین دیدار هەنە ل گەل لژنەیا حوكمەتێ و لژنەیا دارایی ژی، كارێ سەرەكی یێ مە ژی وەكو جڤاتا نوونەران دێ ئەو سێ بابەتە بن».
گوت ژی» پێدڤیە پەیڤا (ئینفاق فعلی) د قانوونا بودجەی دا نەمینیت، بۆ ئەوێ چەندێ مووچەیێن فەرمانبەرێن هەرێما كوردستانێ هەڤشێوەیێ دەڤەرێن دی ب هیچ تشتەكێ دی ڤە نەهێتە گرێدان و ل دەمێ خوە بهێتە هنارتن».
ئاماژەكر» ئەم ژی وەكو جڤاتا نوونەران پشتی بێهنڤەدانا جڤاتێ ب دوماهی دهێت دێ كارێ مە یێ سەرەكی بودجە و مووچەیێن فەرمانبەرێن هەرێما كوردستانێ بیت، بۆ ئەوێ چەندێ رێككەفتن بهێتە كرن ب جۆرەكی كو د ژڤانێ خوە دا مووچەیێن فەرمانبەران بهێنە هنارتن و ئێدی مووچە نەبیتە كێشە و گیرو ببیت».
رۆهنكر ژی» پێدڤیە گرفتا ئەوان سێ مووچەیێن ل سالا بۆری نەهاتینە دان بهێتە چارەسەركرن و بۆ ئەڤسالە ژی قانوونا بودجەی بهێتە راستڤەكرن و ژ (ئینفاق فعلی) بهێتە جوداكرن، تاكو مووچەیێن فەرمانبەران ب تمامی و ل دەمێ خوە بهێتە هنارتن و گیرو نەبیت، گۆژمەیێ پێدانا كریا دەرئینانا پەترۆلێ كێم هاتیە دانان و بهێتە زێدەكرن، لەوما ئەم دوپاتیێ ل سەر ئەوان سێ خالان دكەین كو پێدڤیە بهێنە چارەسەركرن».