بەرپرسێ لقێ سێ یێ پارتی دیموكراتی كوردستان ل كەركووكێ د كۆنفرانسەكێ رۆژنامەڤانیدا داخوازا پاشئێخستنا پڕۆسەیا سەرژمێرییا گشتییا ئاكنجییان كر بۆ پشتی بجهئینانا مادەیا 140 یا دستووری و داخواز ژی ژ ئاوارەیێن كەركووكێ كر كو ل هەولێرێ و سلێمانیێ د ئاكنجینە، بزڤڕنە كەركووكێ بۆ وێ چەندێ د قۆناغێن هەژمارتنێ خوە تۆمار بكەن.
محەمەد كەمال، بەرپرسێ لقێ سێ یێ پارتی دیموكراتی كوردستان ل كەركووكێ د وی كۆنفرانسێ رۆژنامەڤانیدا گۆت» دڤێت لەز نەهێتە كرن و رەوشا كەركووكێ بهێتە ئاساییكرن پاشی پڕۆسەیا سەرژمێرییا گشتی یا ئاكنجییان ل كەركووكێ بهێتە كرن، لەوما داخواز دكەین ئەڤ پڕۆسەیە بهێتە پاشئێخستن و لەز د ئەنجامدانا وێ دا نەهێتە كرن، چونكە مادەیا 140 نەهاتیە بجهئینان».
راگەهاند ژی» وەلاتیێن كەركووكێ یێن ئاوارە هەكە نەزڤرنە جهێن خوە ژی، هەموو مافێن وان ژ هاریكاریێن پێدانا ئاهێن خوارنێ ژ ئالیێ بریكاران ل گەل پشكا پەترۆلی و هەموو هاریكاریێن دی دێ هێنە بڕین و دێ ژ هەموو ماف و هاریكارییان هێنە بێ بەهركرن، لەوما داخواز دكەین هەموو خەلكێ كەركووكێ یێن ئاوارەبووی ل سەرانسەری هەرێما كوردستانێ بزڤڕن جهێن خوە».
بەرپرسێ لقێ سێ یێ پارتی ل كەركووكێ ئاماژەكر» ب گۆڕەی رێكار و رێنمایێن سەرژمێرییا گشتیا ئاكنجییان د ئێك خانیدا دەلیڤەیا هەی سێ خێزان خوە تۆمار بكەن، هەروەسا وەلاتیێن ئاوارە دشێن بزڤڕن و ل مالێن خزمێن خوە دشێن خوە تۆمار بكەن».
سەبارەت پڕۆسەیا ب ئەرەبكرنێ گۆت» گوندێ زەرتك تاكو سالا 1988 كو هاتبوو خرابكرن ئێم مالا ئەرەب ژی تێدا نەبوو، بەلێ نوكە ل قۆناغا هەژمار لێدانێ یا پڕۆسەیا سەرژمێریێ نێزیكی 28 مالێن ئەرەب و هەشت مالێن كورد تێدا یێن هاتینە تۆماركرن، د دەمەكیدا زێدەتر ژ 250 خێزانێن رەسەن یێن خەلكی وی گوندی ل دەڤەرێن كوردستانێ یێن پەرت و بەلاڤ بووین و خەلكێ ئەرەب ل جهێ وان یێن هاتینە تۆماركرن، ئەڤە ژی مەترسیێن سەرژمێرییا گشتییە».
محەمەد كەمال، بەرپرسێ لقێ سێ یێ پارتی ل كەركووكێ گۆت ژی» دخوازین بەری 5/10/2024 وەلاتی بزڤڕنە كەركووكێ و جهێن خوە و خوە ل مالێن مرۆڤ و كەسوكارێن خوە تۆمار بكەن، هەروەسا چەند رۆژان ژی بەری 20/11/2024 ل وان مالان بەرهەڤ ببن بۆ وێ چەندێ قەدەغەیا هاتنوچوونێ نەبیتە رێگر و د سەرژمێرییا گشتیدا پشكدار بن و بهێنە تۆمار كرن».

سلێمانیێ، عەزیز هەورامی:

كۆمەكا ب ناڤ سیاسی و پەرلەمانتار دەستێن خوە دكەنە د ناڤ دەستێ ئالیێ ئیراقی دژی قەوارە و مافێ گەلێ كورد، بەرپرسەكا حزبا سۆشیالیست دیموكراتا كوردستانێ ژی دبێژیت: هندەك پەرلەمانتارێن كورد مەترسینە ل سەر دۆزا كوردی، هەروەسا دیاردكەت كو پێدڤییە ناڤمالا كوردی بهێتە رێكخستن.
تەنا تاهر، ئەنداما مەكتەبا سیاسییا حزبا سۆشیالیستا دیموكراتا كوردستانێ بۆ رۆژنامەیا (ئەڤرۆ) گوت» ل گەل نێزیكبوونا هەلبژارتنان كێشە د پەیوەندیێن د ناڤبەرا بەغدا و هەولێرێدا ژ ئالیێ هندەك حزبێن كوردستانی و ئیراقی دهێنە دروستكرن تنێ بۆ كرمكرنا دەنگان، ئەوژی ژ ئالیێ چەند حزبێن سیاسی یێن ناڤخوەیی بەرهەڤی بۆ ئەڤێ رەوشێ هاتیە كرن».
تەنیا تاهر گوت ژی «بۆ چارەسەركرنا كێشەیێن د ناڤبەرا بەغدا و هەولێرێدا مە پێدڤی ب ئەوێ چەندێ یا هەی ناڤمالا كوردی رێكبێخین و ئالیێن سیاسی بگەهنە ئەوێ باوەریێ دروستكرنا قەیرانان بۆ كوردستانێ ب رێكا بەغدا بۆ كۆمكرنا دەنگان، چارەسەرییەكا شاشە».
ئاماژەكر» ب دیتنا مە حوكمەتا هەرێما كوردستانێ هوورتر كاربكەت ل سەر پێكئینانا شاندەكێ بلند یێ شارەزا بۆ دانوستاندنێ ل گەل دەستهەلاتدارێن ئیراقێ بۆ چارەسەركرنا هەموو كێشەیێن د ناڤبەرا هەردو حوكمەتاندا هەین، دڤێت هەموو كێشە د مووچەیاندا نەهێنە كۆمكرن د دەمەكیدا مە كێشەیا ئاخێ یا هەی».
پتر گوت» هندەك حزبێن كوردستانی عاتیفەیا وەلاتییان دلڤینن ل سەر بنەمایێ مووچەی، بۆ كۆمكرنا دەنگان، نەشیاینە ل سەر بنەمایێ پڕسێن نیشتمانی و نەتەوەیی بكەنە پڕسەكا سەرەكی و كار ل سەر بكەن، تنێ هەستا وەلاتییان د لڤینن بۆ كۆمكرنا دەنگان د هەموو هەلبژارتناندا».
خویاكر ژی» مەترسیدارترین جۆرێ دژایەتییا كوردستانێ ئەو پەرلەمانتارێن كوردن كو ژ ناڤمالا مە بكەنە پڕسەكا سەرەكی و كار ل سەر بكەن، تنێ بۆ لڤاندنا هەستا وەلاتییان بۆ كۆمكرنا دەنگان یێن چووینە بەغدا و دژایەتییا مە دكەن، ئەو پەرلەمانتارە وەسا ب مەترسینە كو ژ ئەوان پەرلەمانتارێن سوننە و شیعە یێن دژی كوردان د ئاخڤن د مەترسیدارترن».

سەرپەرشتیارێ رەڤەندا کوردستانی ل دیاسپۆرا دیار دکەت پتر ژ ٥ ملیۆن کورد ل دەرڤەیی کوردستانێ دژین و وەکو دیاسپۆرا کوردی وان دڤێت کار بۆ پاراستنا ناسنامەیا کوردی ل دیاسپۆرا بکەن و هەروەسا وان دڤێت ل گەل کوردێن ئەرمەنستانێ و حوکمەتا وی وەلاتی ژی پەیوەندیێن خوە گەلەک بهێز بکەن.

شیفا بارزانی سەرپەرشتیارێ گشتی یێ رەڤەندا کوردستانی بۆ رادیۆیا ئێریڤانێ دیار دکەت، ئەو گەلەک کەیفخوەشە کو وەکو نەڤیێ بارزانیێ نەمر و ٦٦ سالان پشتی بارزانیێ نەمر سەرەدانا رادیۆیا ئێریڤانێ دکەت و ئاماژە ڤێ یەکێ دکەت کو پەیوەندیێن گەلێ کورد و ئەرمەنستانێ دیرۆکی نە، گەلەک بەلگەیێن دیرۆکی سەبارەت ب پەیوەندیێن گەلێ کورد و ئەرمەنستانێ هەنە، چەندین روودانێن دیرۆکی ژی هەنە، وەکو نموونە سالا ١٩٢٠ دەمێ جینوسایدا گەلێ ئەرمەنی وی دەمی ب فەرمانا جەنابێ شێخ ئەحمەد بارزانی، بارزانیێ نەمر و ٢٠٠ پێشمەرگە د هەوارا گەلێ ئەرمەنی دچن و دشێن گەلەک خێزانان ژ جینوسایدێ قورتال بکەن و ١٨ پێشمەرگە ژی شەهید دکەڤن، ئەو یەک ژی نیشا ددەت کا پەیوەندیێن گەلێ کورد و ئەرمەنی چەند بهێز و دیرۆکی نە.
ناڤهات د پشکەکا دی یا ئاخڤتنا خوە دا ئەو یەک ژی دیار کر، وەکو رەڤەندا کوردستانی ل دیاسپۆرا ئەو کار بۆ پاراستنا کەلتور و زمانێ کوردی د ناڤ کوردان دا دکەن، چونکی پتر ژ پێنج ملیۆن کورد ل دەرڤەیی کوردستانێ دژین و وان دڤێت مفای ژ ئەزموونا دیاسپۆرا ئەرمەنی وەربگرن و پەیوەندیێن خوە ژی ل گەل وان بهێزتر بکەن و نها ژی پەیوەندیێن گەلەک باش د ناڤبەرا هەرێما کوردستانێ د ئەرمەنستانێ دا هەنە و گۆت: (سەرۆک کۆمارێ ئەرمەنستانێ سەرەدانا هەولێرێ کر و ل ئالیێ دی نها پەیوەندیێن سیاسی و ئابووری ژی گەلەک د باشن، وەکو ئێریڤان ژی نێزیکترین پایتەختە بۆ هەرێما کوردستانێ و مە دڤێت د بیاڤێن ئابووری، جڤاکی و گەلەک بیاڤێن دیتر دا پەیوەندیێن خوە ل گەل برایێن خوە یێن کورد ل ئەرمەنستانێ و هەروەسا خەلکێ ئەرمەنستانێ ب گشتی باشتر و بهێزتر بکەین).
سەبارەت ب رۆلێ رادیۆیا ئێریڤانێ ژی شیڤا بارزانی دیار کر، د دەمێن گەلەک سەخت و دژوار دا، دەمێ دوژمنێن گەلێ کودستانێ ب هەموو شیانێن خوە ئێرشێ کوردستانێ کری، دەمێ گوندێن کوردستانێ هاتنە سوتن، وی دەمی کەسی بەحسێ کوردان و ئازارێن وان نەدکر، د وان رۆژێن سەخت و دژوار دا هەموو کوردان گوهێ وان ل رادیۆیا ئێریڤانێ بوو، نها ژی ناڤێ ب سەدان کچێن کورد ژ بەر رادیۆیا ئێریڤانێ کرینە ئێریڤان و گۆت: (د نەخوەشی و ئاوارەیێ و رۆژێن دژوار دا کو کەسێ بەحسێ کوران نەدکر وی دەمی رادیۆیا ئێریڤانێ وەکو کلۆپەک ل تۆنێلەکا تاری بوو، ژ بە ڤێ یەکێ رۆلێ رادیۆیا ئێریڤانی گەلەک یا گرنگە، رادیۆیا ئێریڤانێ د ناڤ دلێ هەر کوردەکێ دایە).
شیفا بارزانی د دووماهیا ئاخڤتنا خوە دا ژی دیار کر، دێ بەردەوام سەرەدانا ئەرمەمستانێ کەین، دێ پەیوەندین خوە د بیاڤێن جوا جودا ل گەل برایێن خوە پێش ئێخینین، مە بەرنامێن گەلەک باش هەنە دا پەیوەندیێن خوە ل گەل کوردان ل ئەرمەنستانێ باشتر لێ بکەین، دا برایێن مە یێن کورد ل ئەرمەنستانێ ژی بشێن سەرەدانا هەریما کوردستانێ بکەن.

دوهی شەمبیێ 21/9/2024، سەرۆكێ حوكمەتا هەرێما كوردستانێ، كارگەها سلیڤانا بۆ ب بازاركرنا گەنمێ جۆتیاران ل زاخۆ ڤەكر.
د رێوڕەسمێ ڤەكرنا وێ كارگەهێدا، مەسرور بارزانی، سەرۆكێ حوكمەتا هەرێما كوردستانێ، پەیڤەك پێشكێشكر و ئەڤە دەقێ وێ یە:
گەلەك كەیفخوەشم كو ئەڤرۆ پێكڤە ل ڤێرێ كۆمبووینە بۆ ڤەكرنا پڕۆژەیەكێ دی یێ گرنگ ل ڤێ دەڤەرێ كو ئەوژی سایلۆیا سلیڤانایە. ئەڤ سایلۆیە د چارچۆڤەیێ بەرنامەیێ حوكمەتێ بۆ ب بازاركرنا بەرهەمێ گەنمێ جۆتیارێن كوردستانێ ل گەل كەرتێ تایبەت ب گۆڕەی ستانداردێن جیهانی یا هاتیە دروستكرن و ئەز دەستخوەشیێ ل كۆمپانییا (خوشناو) دكەم و هیڤیدارم د چارچۆڤەیێ پلانێن حوكمەتێدا، خزمەتەكا باشتر یا جۆتیارێن دەڤەرێ بكەن و بزاڤێ بكەن هەر چ زوویە ڤی پڕۆژەی بەرفرەهتر بكەن و كارگەهێن پەیوەندیدار ب بەرهەمێن گەنمی ڤە دامەزرینن.
مە بزاڤ یا كری گرنگییەكا تایبەت ب كەرتێ چاندنێ و پیشەسازییا خوارنێ بدەین، لەوما سالا بۆری ل هەموو دەڤەرێن كوردستانێ چ وەكو حوكمەت و چ ب هاریكارییا كەرتێ تایبەت، مە چەندین سایلۆ و پڕۆژەیێن چاندنێ ئەنجامداینە.
مە ب كریار دەست ب دیتنا بازارێ ناڤخوەیی و دەرەكی بۆ بەرهەمێن جۆتیارێن خوەشتڤی یا كری و ژ ڤی رووی ڤە ژی دێ بەردەوام بین، ئەڤرۆ بەرهەمێ جۆتیارێن مە دگەهیتە بازارێن وەلاتێن ئەرەبی و ئۆرۆپی، گەلەك یا گرنگە جۆتیارێن مە ژی ئاستێ كوالێتییا بەرهەمێن خوە ب بلندی رابگرن و چاندنا خوە ب رێكێن زانستی و تەكنەلۆژییا سەردەم پێشبێخن.
چاندن ئێك ژ تەوەرێن سەرەكی یێن بەرنامەیێ مەیە بۆ هەمەجۆركرنا ئابوورێ كوردستانێ و ئەڤرۆ پێشكەفتنا كەرتێ چاندنێ و پێشەسازییا خوارنێ ب هزاران دەلیڤەیێن كاری بۆ گەنجان زیدە كرینە. ئارمانجا مە ژی ئەوە كو جڤاكێ تنێ بكارهێنەر ببیتە جڤاكەكێ بەرهەمهێنەر، ژبەر وێ چەندێ ئەم ب هەموو جۆرەكی د پشتەڤانییا بەرهەمێن ناڤخوە دێ بەردەوام بین تاكو ئەو كارگەه و پڕۆژە بەردەوام بن و بشێن هەڤڕكیێ و ململانێ ل گەل بەرهەمێن دەرڤە ژی بكەین.
هیڤیدارم ئەڤ كارگەهە بكەڤیتە د خزمەتا هەموو كوردستانێ دا و ب تایبەتی ژی خەلكێ دەڤەرا ئیدارەیا سەربخوەیا زاخۆ.

سەرۆكێ حوكمەتا هەرێما مەسرور بارزانی د چاڤپێكەفتنەكا تایبەت دا ل گەل كەنالێ (الحدث) باس ل چەند پڕسەیان كر و دوپاتكر، هەكە نیازەك ل دەف بەغدا هەبیت، هەرێما كوردستانێ یا بەرهەڤە و چارەسەركرنا ناكۆكییان یا ب ساناهییە، هەروەسا هیچ ئالییەكێ سیاسی نەشێت چاوانییا پەیوەندیێن د ناڤبەرا بەغدا و هەولێرێدا دیار بكەت.
سەبارەت رەوشا شنگالێ و زڤڕینا ئاوارەیان بۆ جهێن خوە، سەرۆكێ حوكمەتا هەرێما كوردستانێ دبێژیت» مە رێككەفتنا شنگالێ ل گەل حوكمەتا فیدرالییا ئیراقێ ئیمزاكر، بەلێ نەهاتە بجهئینان و هەبوونا پارتییا كاركەران ژی بوویە رێگر ل پێشبەری ئاڤەدانكرنا شنگالێ و زڤڕینا ئاوارەیان بۆ جهێن خوە.
هەروەسا ئاماژە كر، پارتییا كاركەران ل ئەوان دەڤەران بەلاڤ دبیت، كو هیچ پەیوەندی ب ئەوان ئەجیندایان نینە كو بانگەشێ بۆ دكەن، لەوما هەبوونا پەكەكێ د بەرژەوەندییا هەرێما كوردستانێ و دەڤەرێدا نینە.
سەبارەت سەرەدانا مەسعود بزیشكیان، سەرۆككۆمارا ئیسلامییا ئیرانێ بۆ ئیراقێ و هەرێما كوردستانێ، مەسرور بارزانی گۆت» ئەو سەرەدان روودانەكا گرنگ بوو و هیڤیدارم ببیتە دەستپێەكەكا باش بۆ پێشڤەبرن و پێشئێحستنا پەیوەندییان».
گۆت ژی» هەلوەستێ مە ل دۆر ئەوان هێرشێن مووشەكی یێن ل سەر هەرێما كوردستانێ هاتینە كرن یێ رۆهن بوو، كو هیچ بنگەهەكێ ئیسرائیلی ل هەرێما كوردستانێ نینە، لەوما هێرشا ئیرانێ ل سەر هەرێما كوردستانێ یا دادپەروەرانە نەبوو، تەمۆت ژی د نە رەوا بوون، مە داخواز ژی ژ ئیرانێ كریە ئەوان تۆمەتان ب بەلگە بسەلمینیت، بەلێ هەتا نوكە هیچ بەلگەیەك ل سەر ئەوان تۆمەتان پێشكێش نەكریە.
سەبارەت هەلبژارتنێن پەرلەمانێ كوردستانێ و مافێ پێكهاتەیان، مەسرور بارزانی گۆت» بڕیارا دادگەها فیدرالییا ئیراقێ بۆ هەلوەشاندنا كورسیێن پێكهاتەیان هیچ پەیوەندی ب دستووریڤە نینە، بەلێ هندەك كەس یێن هەین دخوازن حوكمڕانی یا ناڤەندی (مەركەزی) بیت و باوەری ب فیدرالیزمێ نینە».
سەرۆكێ حوكمەتا هەرێما كوردستانێ ئەوژی دیاركر» ئیراق وەلاتەكێ فرە پێكهاتەیە و دڤێت ب هەڤپشكییا راستەقینە بهێتە بڕێڤەبرن، هەروەسا د نڤیسینا دستووریدا كورد د پشكداربوون و د پێگیرن ژی بجهئینانا وی وەكو خوە، بەلێ ژ بلی كوردان پێكهاتەیێن دی ژی یێن هەین و د ئەوێ باوەریێ دانە كو دستووری هەموو مافێن وان مسۆگەر نەكرینە، لەوما دستوور چارەسەركرنا كێشەیان بخوەڤە دگریت و نابیت لایەنگێری تێدا بیت و د بەرژوەندییا ئالییەكی دژی ئالییەكی دی بهێتە بكارئینان.
سەبارەت ناكۆكیێن د ناڤبەرا هەرێما كوردستانێ و ئیراقێدا، سەرۆكێ حوكمەتا هەرێما كوردستانێ د ئەوێ چاڤپێكەفتنێدا گۆت» هەرچەندە راگرتنا هنارتنا پەترۆلا هەرێما كوردستانێ زیانێن زێدەتر ژ 19 ملیار دۆلاران ب ئابوور و داهاتێ گشتیێ ئیراقێ یێ گەهاندی، بەلێ كێشەیا مە ل گەل بەغدا گەلەك ژ ئەوێ چەندێ مەزنترە تنێ د مووچەی و پەترۆلێدا بهێتە كورتكرن». هەروەسا راگەهاند» ئەوێن هەرێما كوردستانێ ب قەچاخچییەتا پەترۆلێ تۆمەتبار دكەن، بلا بەلگەیێن راستەقینە بەرچاڤ بكەن».
هەروەسا ئاماژە دا كو پەیوەندیێن هەرێما كوردستانێ و ئیراقا نوكە ل سەردەمێ محەمەد شیاع سودانی، سەرۆك وەزیرێن ئیراقێ پێشڤەچوونەكا باش بخوەڤە دیتییە، لەوما هەكە نیازا چارەسەركرنێ ژ ئالیێ بەغدا ڤە هەبیت، هەرێما كوردستانێ یا بەرهەڤە و چارەسەری ژی یا ب ساناهییە، چونكە هیچ ئالییەكێ سیاسی نەشێت چاوانییا پەیوەندیێن د ناڤبەرا بەغدا و هەولێرێدا دیار بكەت.

دوهی شەمبیێ 21/9/2024 مەسرور بارزانی، سەرۆكێ حوكمەتا هەرێما كوردستانێ، بەرێ بنیاتێ دروستكرنا جۆتسایدێ شێخان – لالش ل سنۆرێ پارێزگەها دهۆكێ دانا.
د رێوڕەسمێ دانانا بەرێ بنیاتێ وی پڕۆژەی، مەسرور بارزانی پەیڤەك پێشكێشكر و ئەڤە دەقێ وێ یە:
كەسایەتیێن ئایینی و ریهسپی و مەزنێن ئایینی و جڤاكی ل ڤێ دەڤەرێ، هوون گەلەك ب خێر هاتن و ئەز گەلەك یێ خوەشحالم كو ئەڤرۆ د خزمەتا هەوە دامە بۆ رێوڕەسمێ دانانا بەرێ بنیاتێ جۆتسایدێ شێخان – لالش.
ل دەستپێكا مەها شەش یا ئەڤسالە هەر ل ڤێ دەڤەرێ، مە بەرێ بنیاتێ جادەیا (باعەدرێ – ئێتیت) دانا، ب تمامبوونا هەردو پڕۆژەیان كەرتێ ڤەگوهاستنێ و هاتنوچوونێ ل ڤێ دەڤەرێ دێ پێشكەفتنەكا باش بخوەڤە بینیت.
دەمێ من سەرەدانا پەرستگەها لالشێ كری، ل سەر داخوازییا خەلكێ ئەڤێ دەڤەرێ بۆ دروستكرنا ڤێ جادەیێ، مە سۆز دا هەوە كو ئینشائەلا خودایێ مەزن دەلیڤەیێ بدەت، ئەم دێ ڤێ جادەیێ دروست كەین، ئەڤرۆ سوپاس بۆ خودای ئەم یێن ل ڤێرێ بۆ بجهئینانا وێ سۆزێ.
ژ بەر هەبوونا پەرستگەها لالش یا پیرۆز، سالانە ب هزاران خووشك و برایێن مە یێن ئێزدی و خەلكێ دی ژی، سەرەدانا ئەڤێ دەڤەرێ دكەن، تمامبوونا ئەڤێ جادەیێ، دێ زەحمەت و وەستییانا سەرەدانكەر و زیارەتكارێن لالش كێم بیت.
ئەڤ دەڤەری ژی ژ روویێ ئابووری و چاندنێ و گەشتیاری و شوونواری گەلەك یا گرنگە. بەلێ یا ژهەموو گرنگتر ئەوە كو ئەڤ دەڤەرە نموونەیەكا گەلەك جوان یا كەلتوورێ پێكڤەژیانێیە ل هەرێما كوردستانێ، ئەم ب ئەڤی كەلتووری و گیانێ هەڤدوقبوولكرنێ د جوانین و سەرێ مە ل هەموو جیهانێ یێ پێ بلندە، لەوما هەروەكو جاران هەر چ د شیانێن مەدا بیت بۆ خزمەتكرنا ئەڤێ دەڤەرێ، خەمساریێ ناكەین.
هەرچەندە پڕۆژەیێن گرنگ ل ئەڤێ دەڤەرێ و سنۆرێ پارێزگەها دهۆكێ ب گشتی یێن هاتینە ئەنجامدان و ئەركێ مەیە كو خزمەتا وەلاتیێن خوە بكەین، هیڤیدارین خودایێ مەزن پشتەڤانێ مەبیت و د هەموو رەوشاندا دێ د كاروانێ ئاڤەدانكرنا كوردستانێدا د بەردەوام بین، سەرەرای هەموو ئاستەنگ و رێگریێن ل مە هاتینە كرن بۆ ئەوێ چەندێ نەشێین ئەجیندایێن مە بۆ خزمەتكرنا خەلكێ هەرێما كوردستانێ داناین بجهبینین، بەلێ سوپاس بۆ خودایێ مەزن و ب پشتەڤانییا مللەتێ مە یێ خۆڕاكر، د بەردەوام بووین و دێ بەردەوام بین».
خووشك و برایێن ئێزدی بێگومان قوربانییەكا ئێكجار مەزن یا دای و گەلەك ئێش و ئازار یێن دیتین، سەرەرای هەموو ئەوان كارەسات و فەرمان و كۆمكوژیێن ب سەرێ وان هاتین، د بەردەوامن ژ بەرگریێ ژ زمان، كەلتوور و ناسنامەیا خوە. حوكمەتا هەرێما كوردستانێ دوبارە دكەت یا پێگیرە ب پاراستنا مافێن خووشك و برایێن ئێزدی و هەموو بزاڤەكێ ژ پێخەمەت زێدەتر خزمەتكرنا وان و كێمكرنا ئێش و ئازارێن وان كەت.
هەروەسا ئەم د بزاڤێن خوە دا ل گەل حوكمەتا فیدرالی د بەردەوامین بۆ ئاساییكرنا رەوشا شنگالێ، ب جۆرەكی كو گرۆپێن چەكدار یێن بیانی و میلیشییا ل شنگالێ نەمینن و ئیدارەیا شنگالێ ژی بكەڤیتە دەستێ خەلكێ رەسەنێ دەڤەرێ، ئەڤە ژی تنێ ب رێكا بجهئینانا رێككەفتنا شنگالێ دێ هێتە كرن كو دێ رێكێ خوەش كەت بۆ ئاڤەدانكرنا شنگالێ و دەوروبەرێن وێ هەتا هەموو ئاوارەیێن وێ دەڤەرێ ب سەربلندی بۆ دەڤەرا خوە بزڤرن، هەروەكو پێشتر ژی مە گۆتی. كوردستان مالا هەموو خووشك و برایێن مە یێن ئێزدییە كو ژ شنگالێ و دەڤەرێن دی ژی هاتین و نوكە ل ڤێرێ د ئاكنجینە ژ ئەگەرێ هێرشا درندانەیا داعشێ ل سەر وێ دەڤەرێ یان ژی ژ بەر هەر ئەگەرێ دی. دەرگەهێن هەموو مالان یێ ڤەكری بوو بۆ وان، سوپاسییا خەلكێ پارێزگەها دهۆكێ و شێخان و ڤێ دەڤەرێ دكەم كو مالێن خوە و نانێ خوە ل گەل خووشك و برایێن دی هەڤپشك كری.
پشتڕاست بن هندی ئەم مابین، دڤێت ئەڤ وەلاتە وەلاتێ پێكڤەژیانێ بیت، دەرگەهێن كوردستانێ دێ د ڤەكری بن بۆ هەر كەسەكێ پێدڤی ب كوردستانێ بیت بۆ پاراستنا ژیان و كەرامەتا خوە، كوردستان دێ مالا وان بیت.
هیڤیدارم ئەڤ پڕۆژەیە ژی بكەڤیتە د خزمەتا ڤێ دەڤەرێ و خەلكێ هەموو كوردستانێ و هەموو ئەوان سەرەدانكەرێن كو سەرەدانا پەرستگەها لالش دكەن، ئینشائەلا دێ مفای ژ ڤی پڕۆژەی وەرگرن.

سەرۆكێ حوكمەتا هەرێما كوردستانێ راگەهاند: ئارمانجا مە باشتركرنا كوالێتی و ئاستێ خزمەتگوزاریێن ساخلەمییە د كەرتێ گشتیدا.
دوهی چارشەمبی 18/9/2024، مەسرور بارزانی، سەرۆكێ حوكمەتا هەرێما كوردستانێ د پەیڤا رێوڕەسمێ دانانا بەرێ بنیاتێ مەزنترین نەخۆشخانەیا چارەسەرییا پەنجەشێرێ، ل سەر ئاستێ ئیراقێ و هەرێما كوردستانێ، گۆت» خوەشحالم بەرێ بنیاتێ نەخۆشخانەیەكا گەلەك گرنگ هەولێرێ ددانین، كو نەخۆشخانەیا چارەسەرییا پەنجەشێرێیە و ب ئاست و كوالێتییەكا بلند دهێتە دروستكرن و دێ كەڤیتە د خزمەتا وەلاتیێن باژێرێ هەولێرێ و هەموو كوردستانێدا».
مەسرور بارزانی گۆت ژی» ل هەرێما كوردستانێ چەند نەخۆشخانەیێن تایبەت ب چارەسەرییا نەخۆشێن پەنجەشێرێ یێن هەین كو خزمەتەكا مەزن یا وەلاتیێن مە دكەن، هەروەسا نەخۆشێن دەڤەرێن دی یێن ئیراقێ بۆ چارەسەریێ دهێنە نەخۆشخانەیێن كوردستانێ».
سەرۆكێ حوكمەتا هەرێما كوردستانێ د پەیڤا خوە دا سوپاس پێزانێنا خوە ئاراستەی نوشدار و كارمەندێن كەرتێ ساخلەمیێ كر ژ بەر ئەو خزمەتا پێشكێشی وەلاتییان دكەن.
مەسرور بارزانی ئەوژی بەرچاڤكر» كەرتێ ساخلەمی ل هەرێما كوردستانێ پێدڤی هێشتا چاكسازی و خزمەتێن مەزن یا هە، لەوما ل دەستپێكا كابینەیێدا چاكسازییا ساخلەمی د كارێن من یێن بەراهیێ بوو، بۆ ئەڤێ مەبەستێ ژی مە راوێژ ل گەل پسپۆرێن دەرڤەی وەلاتی ژی كر، بەلێ مخابن بۆ دەمێ دو سالان فشار و پەتایا كۆرۆنایێ هەموو كەفتە سەر ئەڤی كەرتی و كاریگەری ل سەر پێنگاڤێن مە هەبوو، سەرەرای ئەڤێ چەندێ ژی پێنگاڤێن بەرچاڤ د رێكخستنا دەرمانان دا یێن هاتینە هاڤێتن».
سەرۆكێ حوكمەتا هەرێما كوردستانێ ئاماژەكر» دڤێت د كەرتێ ساخلەمیدا كەرتێ گشتی و كەرتێ تایبەت د هەڤسەنگ بن و پێكڤە گەشێ بكەن، كوالێتییا ساخلەمی د كەرتێ گشتیدا دڤێت باشتر بیت، دڤێت وەلاتی ژی ل نەخۆشخانەیێن گشتی هەست ب خزمەتێ بكەن، لەوما مە هندەك پێنگاڤێن كریاری د ئەڤی بواریدا یێن دەستپێكرین، هەروەسا من نڤیسینگەها خوە یا راسپاردی تاكو ب هەماهەنگی ل گەل وەزارەتا ساخلەمی وەكو پڕۆژەیێ تاقیكەر چەند نەخۆشخانەیێن كەرتێ گشتی پێشبێخن، ژوان نەخۆشخانەیا رزگاری كو ئێكە ژ مەزنترین نەخۆشخانەیێن كوردستانێ كو دەست ب ئەڤی پڕۆژەی هاتیە كرن».
سەرۆكێ حوكمەتا هەرێما كوردستانێ دیاركر ژی» رێژەیا پەنجەشێرێ ل ئەڤێ دەڤەرێ وەكو هەموو جیهانێ یا زێدەبووی، لەوما دڤێت ب هووری هەم كار ل سەر چارەسەركرنا نەخۆشێن مە بكەین هەم چارەسەرییان ژی بۆ نەخۆشێن خوە پەیدا بكەین، ژ پێخەمەت كیچمكرنا بارگرانیێن چارەسەركرنا نەخۆشێن پەنجەشێرێ، ئەم دێ هاریكارییا سندۆقا هاریكارییا نەخۆشێن پەنجەشێرێ كەین، هیڤیدارین وەلاتی و كەرتێ تایبەت ژی بشێن هاریكارییا ئەڤێ سندۆقێ بكەن».
مەسرور بارزانی دوپاتكر ژی» حوكمەتا هەرێما كوردستانێ هەموو شیانێن خوە ژ پێخەمەت باشتركرنا رەوشا ساخلەمی و بلندكرنا ئاست و كوالێتییا نەخۆشخانە و دەزگەهێن ساخلەمی دئێخیتە كاری» هەروەسا گۆت ژی» ل هەرێما كوردستانێ شیانێن زانستی و نوشداری یێن گەلەك باش مە یێن هەین كو دشێن ب شێوەیەكێ باشتر خزمەتا وەلاتیێن مە بكەن».
سەرۆكێ حوكمەتا هەرێما كوردستانێ ل دووماهییا پەیڤا هوە هیڤییا زوو باشتربوونێ بۆ هەموو نەخۆشێن پەنجەشێرێ خواست و گۆت» هەر چ د شیانێن مە دا بیت بۆ هاریكاری و چارەسەركرنا وان خەمساریێ ناكەین» هەروەسا هیڤی خواست كۆمپانییا بجهئینەرا پڕۆژەیێ دروستكرنا نەخۆشخانەیا پەنجەشێرێ زوو بشێت نەخۆشخانەیێ دروست بكەت تاكو هەر چ زوویە بكەڤیتە د خزمەتا وەلاتییاندا.

زنار تۆڤی:

ئەندامەكێ لژنەیا پەترۆل و غازێ ل جڤاتا نوونەرێن ئیراقێ راگەهاند: ئەمریكا و ئۆپێك فشاران ل حوكمەتا ئیراقێ دكەن بۆ ئەوێ چەندێ بەری هاتنا وەرزێ سەرمایێ دەست ب هنارتنا پەترۆلا هەرێما كوردستانێ بهێتە كرن، داكو هەرێما كوردستانێ ب هەرێمەكا ئارام بمینیت و پشكدار بیت د هنارتنا پەترۆلا ئیراقێدا، هەر چەندە هەتا نوكە حوكمەتا ئیراقێ ل گەل حوكمەتا هەرێما كوردستانێ و ئەو كۆمپانیێن پەترۆلێ یێن كو ل هەرێما كوردستانێ كار دكەن رێكنەكەفتییە بۆ دەرئینانا پەترۆلێ، دیسان دڤێت گرێبەستێن پەترۆلێ ل هەرێمێ بهێنە نووكرن ب رێكا كۆمپانییەكا قانوونی یان ژی ب رێكا ئالیێ سیێ، لەوما پەترۆلا هەرێمێ بۆ ژدەرڤە نەهاتیە هنارتن.
د. سەباح سوبحی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان زێدەتر بۆ رۆژنامەیا (ئەڤرۆ) دبێژیت» بزاڤێن مە بۆ هنارتنا پەترۆلا هەرێما كوردستانێ د بەردەوامن و حوكمەتا هەرێما كوردستانێ بەرهەڤییا خوە نیشاندایە، بەلێ پێدڤییە حوكمەتا ئیراقێ پێنگاڤێن جددی و ب كریار بهاڤێژیت، هەروەسا نوكە ئەمریكا و ڕێكخراوا ئۆپێك یێن هاتینە سەر خەت و دخوازن پەترۆلا هەرێما كوردستانێ بەری هاتنا وەرزێ سەرمایێ بهێتە هنارتن، لەوما دڤێت ئەڤ سالە پەترۆلا هەرێما كوردستانێ بۆ دەرڤە بهێتە هنارتن».
ناڤهاتی گۆت ژی» ڕێكخراوا ئۆپێكێ دڤێت هەرێما كوردستانێ د هنارتنا پەترۆلا ئیراقێدا پشكدار بیت و پشك تێدا هەبیت، چونكی ئیراقێ ب تنێ ئێك رێك یا هەی بۆ هنارتنا پەترۆلێ ئەو ژی بەسرایە، لەوما رێكەكا دیتر ژی یا هەی، ئەو ژی بۆڕییا پەترۆلا هەرێما كوردستانێیە بۆ بەندەرێ جەیهان، ئەمریكا ژ پێخەمەتی ئارامییا دەڤەرێ و نەبوونا كێشەیا كێمیا سۆتەمەنییێ ب تایبەتی ل وەرزێ زڤستانێ كو ئێكەتییا ئورۆپا پێدڤی ب پەترۆلا زێدەتر یا هەی، چەندین جاران داخواز ژ حوكمەتا ئیراقێ كرییە و دیسان فشار ژی ل حوكمەتا ئیراقێ كریە بۆ ئەوێ چەندێ پڕۆسەیا هنارتنا پەترۆلا هەرێما كوردستانێ دەستپێبكەت، چونكی بۆ هەرێما كوردستانێ سەقامگیری گەلەك یا گرنگە».
د. سەباح سوبحی دیار كر ژی» نوكە دانوستاندن دبەردەوامن و هەكە هنارتنا پەترۆلا هەرێما كوردستانێ دەستپێبكەت، پەترۆلا كەركووكێ ژی ب رێكا بۆڕییا پەترۆلا هەرێمێ دێ چیت و پەترۆلا هەرێما كوردستانێ و كەركووكێ دێ بیتە 750 هزار بەرمیل د ڕۆژەكێدا، لەوما بزاڤ د بەردەوامن و هەر چاوا بیت، پێدڤییە هنارتنا پەترۆلا هەرێما كوردستانێ بۆ دەرڤە دەستپێبكەت».

هەولێر، قائید میرۆ

پەیڤدارێ مەكتەبا رێكخستنا پارتی دیموكراتی كوردستان ل كەركووكێ ئاشكراكر، ل نێزیك دێ پارتی بارەگەهێ مەكتەبا رێكسختنێ ل كەركووكێ ڤەكەت و گۆت ژی، هێشتا پارتی بڕیارا پشكداریێ د كۆمبوونێن جڤاتا پارێزگەها كەركووكێدا نەدایە.
مەهدی موبارەك، پەیڤدارێ مەكتەبا رێكخستنا پارتی ل كەركووكێ بۆ رۆژنامەیا (ئەڤرۆ) گۆت « هەتا نوكە مە وەكو پارتی دیموكراتی كوردستان بڕیار نەدایە پشكداریێ د كۆمبوونێن جڤاتا پارێزگەها كەركووكێ و حوكمەتا نافخوەیا كەركووكێدا بكەین، بەلێ ئەم چاڤەڕێی هەلویستێ سەركردایەتییا خوە دكەین و هەر بڕیارەكا بهێتەدان دێ پارتی ل كەركووكێ پێگیربیت، چونكە رێككەفتنا هاتیەكرن بۆ دیاركرنا پارێزگارێ كەركووكێ و پۆستێن پارێزگەهێ پێرابوونێن ساخلەم نەبوون و دێ زیان هەبن، لەوڕا پێدڤی بوو پارتی و ئالیێن دی ژی پشكداری هەبایە، ژبلی پارتی ئالی و پێكهاتەیێن دی ژی یێن هەین كو پشكداریێ د حوكمەتا نافخوەیا كەركووكێدا ناكەن و سكالا ژی یا تۆماركری.
مەهدی موبارەك ئاماژەكر» پشتی روودانێن 16ی ئۆكتۆبەرا 2017 بارەگەهێن پارتی ل كەركووكێ نەمابوون، بەلێ ل سالا بۆری بەری هەلبژارتنێن جڤاتێن پارێزگەهێن ئیراقێ بارەگەهێ لقێ سیێ پارتی ل كەركووكێ و لیژنەیێن سەر ب لقێ ڤە هاتنە ڤەكرن و د بەردەوامن ل سەر كارێن خوە، هەروەسا ل سەر فەرمانا سەرۆك بارزانی بارەگەهێ جڤاتا سەركردایەتییا پارتی وەكو دیاری ژئالیێ سەرۆك بارزانی پێشكێشی زانكۆیا كەركووكێ هاتیەكرن، نوكە ئەم یێ كار ل سەر ڤەكرنا بارەگەهەكێ دی دكەین و كاروبارێن ڤەگەڕیانا مەكتەبا رێكخستنا كەركووكێ دكەین بۆ ئەڤی باژێڕی و ل نێزیك دێ مەكتەبا رێكخستنێ هێتە ڤەكرن، هەروەسا مە بارەگەهێ لژنەیا خۆرماتوو یێ هەی كو پشتی 16ی ئۆكتۆبەرێ هاتیە چۆلكرن، بڕیارە پارتی جارەكادی ب فەرمی ڤەگەڕیت بۆ قەزا خۆرماتوو و بارەگەهێ پارتی ل وێ دەڤەرێ بهێتە ڤەكرن بۆ خزمەتكرنا خەلكێ دەڤەرێ، ل هەر دەڤەرەكا پارتی تێدابیت دێ خزمەتا خەلكی كەت و وەلاتی ژی یێن گەهشتینە ئەوێ باوەریێ تنێ پارتییە بەرگریێ ژ ئاخ وخەلكێ كوردستانێ دكەت».

رێڤەبەرێ گشتیێ دیوانا وەزارەتا ناڤخوە ل حوكمەتا هەرێما كوردستانێ، راگەهاند : هەلبژارتنێن پەرلەمانێ كوردستانێ ژ ئالیێ كۆمسیۆنا بلند یا سەربخوە یا هەلبژارتنان ل ئیراقێ دێ هێنە ئەنجامدان و سەرپەرشتیكرن. حوكمەتا هەرێما كوردستانێ ژی ژ روویێ ئەمنی ڤە لژنە هەیە بۆ هاریكارییا پڕۆسەیێ و لژنەیا بلند یا ئەمنی ب سەرۆكایەتییا وەزیرێ ناڤخوەیییە و لژنەیێن ئەمنی ل پارێزگەه و ئیدارەیێن سەربخوە ب سەرپەرشتییا پارێزگەر و سەرپەرشتیارێ ئیدارەیێ و ئەندامەتییا نوونەرێن دەزگەهێن پەیوەندیدار هاتینە دروستكرن.
د. هێمن میرانی، رێڤەبەرێ گشتیێ دیوانا وەزارەتا ناڤخوەیی د داخۆیانییەكا رۆژنامەڤانیدا گۆت » بەرهەڤی ب باشی یێن هاتینە دەستپێكرن چونكە جارا ئێكێ نینە هەلبژارتن ل هەرێمێ دهێنە ئەنجامدان، هەموو بەرهەڤی ژی یێن هاتینە كرن كو پڕۆسەیەكا هەلبژاتنان یا ئارام بڕێڤەبچیت و هەموو خەلكێ كوردستانێ ب ئازادی پشكداریێ بكەن و دەنگێ خوە بدەن. وەكو وەزارەتا ناڤخوەیی دێ هەموو كارەكێ كەین بۆ ئەوێ چەندێ پڕۆسەیەكا ئازاد و ئارام و بێ گرفت بڕێڤەبچیت. ئەركێ لژنەیا ئەمنییە كو سندۆقێن دەنگدانێ و كارمەندێن كۆمسیۆنێ و هەموو ئەو چاڤدێرێن كو ژ ئالیێ رێكخراوێن جڤاكێ مەدەنی یێن ناڤخوەیی و نێڤدەولەتی هاتین بپارێزن و ل گەل پاراستنا دەنگێ خەلكی».
میرانی ئاماژەكر» رێك ب هەوا پێشوەخت یا هەلبژارتنان ناهێتە دان چونكە هێشتا دەمێ هەوا هەلبژارتنان یێ مای و هەوا درێژ خەلكی د وەستینییت و بێزار دكەت. هەروەسا هەوا پێشوەخت بەرۆڤاژی قانوونا كۆمسیۆنا بلند یا هەلبژارتنایە و هیڤیدارین ئالی پێگیر بن. كۆمسیۆنێ لژنە و رێنمایێن خوە یێن هەین و دشێت سەرپێچكاران سزا بدەت. هەڤدەم هەر ئالییەك چەكی یان بابەتێ قەدەغەكری بەلاڤ بكەت، دێ پێرابوونان ل گەل وەرگرین. هەر وەلاتییەكێ چەكی ژی وەربگریت وەكو چەكێ قاچاغ و ژدەرڤەی قانوونی دێ رەفتار دگەلدا هێتە كرن و ب گۆڕەی مادەیا 15 ژ قانوونا چەكی دێ هێتە هنارتن بۆ دادگەهێ».
دیاركر ژی» پێدڤییە هەوا ه9ەلبژارتنان ئارامییا كوردستانێ و ئاسایشا جڤاكی ل بەرچاڤ وەربگریت. ئاسایییە هەر حزبەكێ بەرنامەیێ خوە پێشكێش و بەرچاڤ بكەت، چونگە دەنگدەر هەموو ئالییان دنیاسیت و كەسێ نوو نینە د مەیدانێدا، هەموو یێن هاتینە تاقیكرن، راستە لیستێن نوو یێن هەین بەلێ ئەوان كەسان پێشتر خەلكی سەرەدەری دگەلدا هەبوو و دنیاسن. خەلك یێ هشیارە و دزانیت چاوان رەفتارێ بكەت و كێ هەلبژێریت. ل دەف مە یا گرنگە حزبێن سیاسی د چارچۆڤەیێ بەرژەوەندییا گشتی رەفتارێ بكەن و ئارامییا هەوا هەلبژارتنان و دەنگدانێ تێك نەدەن. د كۆمبوونا لژنەیا بلند دا باس ل ئەوێ چەندێ هاتیە كرن كو دێ كارەكێ باش بیت ل سەر ئاستێ پارێزگەهان لژنەیەكا لاوەكی ب بەرهەڤبوونا كۆمسیۆنێ ل گەل نوونەرێن ئالیێن سیاسی كۆمبوونان بكەت و ئەم هەموو د ئاستێ بەرپرسیارەتیێدا رەفتارێ بكەین.