ئه‌ڤرۆنيوز:
ب چاڤدێريا سه‌رۆك بارزانى، سوباهى سێشه‌مبى 7 ته‌باخا 2018 ئێكه‌تيا لاوێن ديموكراتا كوردستانێ دێ كۆنگرێ خوه يێ هه‌شتێ ب ناڤێ (كۆنگرێ پێشمه‌رگه) ل هۆلا سه‌عد عه‌بدولا ل هه‌ولێرێ گرێده‌ت.
260 ئه‌ندام دێ پشكداريێ دكۆنگرێ ناڤبرى دا كه‌ن كو بۆ ده‌مێ دۆ رۆژان دێ يێ به‌رده‌وام بيت وتێدا دێ سكرتێر وستافه‌كێ نوو بۆ مه‌كته‌با سكرتاريه‌تێ هێنه هه‌لبژارتن.
ئەڤرۆ نیوز ، زنار تۆڤی:
ئەڤرۆ دووشەمبێ 6 تەباخێ جارەکا دیتر ب شێوەکێ بەرچاڤ لیرێ تورکی بهایێ خوە هەمبەری دراڤێن بیانی ژ دەستدا و ئاستەکێ پیڤانەیی د دابەزینا بهایێ خوە دا تۆمار کر.
ب ئەگەرێ وێ قەیرانا دناڤبەرا تورکیا و ئەمریکا دا ل سەر دەستگیرکرنا قەشەکێ ئەمریکی ل تورکیا دروست بووی، ماوێ چەند رۆژانە بهایێ لیرێ تورکی د دابەزینێ دایه و ئەڤرۆ بهایێ وی بۆ نزمترین ئاستێ پیڤانەیی بەرامبەری دۆلاری دابەزی و ١٠٠ دۆلارێ ئەمریکی ب ٥١٤ لیرێن تورکی مامەلە پێ هاتیە کرن، دێتە چاڤەرێ کرن کو بهایێ لیرەی زێدەتر بهێتە خوار.
ئه‌ڤرۆ نيوز:
كۆمسيۆنا بلندا سه‌ربه‌خۆيا هه‌لبژارتنان ل عيراقێ هه‌ژمارتنا ده‌نگێن هه‌لبژارتنێن جڤاتا نوونه‌رێن عيراقێ ب ده‌ستى بۆ ده‌نگان ب دووماهى ئينا.
د نووچه‌كێ ب له‌ز دا كو تله‌ڤزيۆنا عيراقيه يا فه‌رمى به‌لاڤكريه و ئه‌ڤرۆ نيوز دووڤچوونا بابه‌تى كريه، كۆمسيۆنا بلندا سه‌ربه‌خۆيا هه‌لبژارتنان ل عيراقێ ئه‌ڤرۆ رۆژا دوشه‌مبى رێكه‌فتى 6ى ته‌باخا 2018ێ هه‌ژمارتنا ب ده‌ست يا ده‌نگێن هه‌لبژارتنێن جڤاتا نوونه‌رێن عيراقێ ب ره‌نگه‌كێ فه‌رمى ب دووماهى هات.
ل 3ى تيرمه‌ها 2018ێ كريارا ب ده‌ست هه‌ژمارتنا ده‌نگان بۆ ئه‌نجامێن هه‌لبژارتنێن جڤاتا نوونه‌رێن عيراقێ ل سه‌ر داخوازا جڤاتا نوونه‌ران و پشتى بڕيارا دادگه‌ها فيدرال ده‌سپێكر بوو.
ئه‌ڤرۆ نيوز:
مالپه‌رێ شه‌فه‌ق نيوز به‌لاڤكريه كو عيراق و ئوردن ل سه‌ر هاريكاريا له‌شكرى و ئه‌منى ل سه‌ر پرسا به‌رسينگگرتنا تيرۆرێ رێكه‌فتنه‌ك ئيمزا كر.
په‌يڤدارێ وه‌زاره‌تا ده‌رڤه يا عيراقێ ئه‌حمه‌د مه‌حجوب راگه‌هاند كو هه‌ردو وه‌لاتێن عيراق و ئوردن رێكه‌فتنه‌كا هه‌ماهه‌نگيێ يا له‌شكرى ب مه‌ره‌ما پاراستنا ئه‌منيه‌تا سنورێن د ناڤبه‌را هه‌ردو وه‌لاتان و لێكگوهاڕتنا پێزانين و به‌رسينگگرتنا تيرۆرێ ئيمزا كر.
ده‌رباره‌يى وێ رێكه‌فتنێ مه‌حجوب گۆت: “رێكه‌فتن ژ لايێ وه‌زيرێ به‌ره‌ڤانيا عيراقێ عيرفان حه‌يالى و فه‌ريق مه‌حمود فه‌ريحان سه‌رۆك ئه‌ركانێ سۆپايێ ئوردن ئيمزا كريه.
سنورێن وه‌لاتێ عيراقێ ل گه‌ل ئوردن ل لايێ پارێزگه‌ها ئه‌نبار و وان ده‌ڤه‌رانه ب درێژا 181 كيلۆمه‌تران.
ئه‌ڤرۆ نيوز:
هه‌ردو مه‌كته‌بێن سياسى يێن پارتى ديموكراتى كوردستان و ئێكه‌تى نشتيمانى كوردستان ل هه‌ولێر دێ كۆم بن ب مه‌ره‌ما دانوستاندنێ ل دۆر چاوانيا پشكداريكرن د حوكمه‌تا عيراقێ يا داهاتى دا.
سه‌عدى ئه‌حمه‌د پيره، ئه‌ندامێ مه‌كته‌با سياسى و ئاخفتنكه‌رێ ب ناڤێ ئێكه‌تى نشتيمانى كوردستان گۆت: “نيڤرۆيا ئه‌ڤرۆ دوشه‌مبى 6ى ته‌باخا 2018ێ هه‌ردو مه‌كته‌بێن سياسى يێن پارتى ديموكراتى كوردستان و ئێكه‌تى نشتيمانى كوردستان ل هه‌ولێر دێ كۆم بن.
ده‌رباره‌يى ناڤه‌رۆكا كۆمبوونێ سه‌عدى پيره گۆت: “كۆمبوون دێ درێژه‌پێده‌را كۆمبوونێن بۆرى بيت ل دۆر پرسێن سه‌ره‌كى بيت، سه‌ره‌رايى به‌حسكرنا چه‌ند پرسێن ناڤخۆيى يێن كوردستانێ ژى، به‌حس ل بزاڤێن پێكئينانا حوكمه‌تا نوو يا عيراقێ و چاوانيا پشكداريكرنا كوردان د وێ حوكمه‌تێ دا هێته كرن”.
ئه‌ڤرۆ نيوز:
ئاژانسا رويته‌رز ل سه‌ر زارێ به‌رپرسێن ئه‌ندونسيا راگه‌هاند كو ژمارا قوربانيێن ئه‌ردهه‌ژا دوهى ل هه‌ردو دورگێن لۆمبرگ و بالى گه‌هشتيه 91 كه‌سان.
به‌رده‌فكێ فه‌رمانگه‌ها كاره‌ساتێن سرۆشتى راگه‌هاند كو دهێته پێشبينيكرن ژمارا قوربانيان هێشتا بلند ببيت ژ به‌ر كو هه‌تا نوكه چاره‌نڤيسێ گه‌له‌ك كه‌سان يێ به‌رزه‌يه و گۆت: “تيمێن مه به‌رده‌وام يێ د لێگه‌ريانێ دا”.
زێده‌تر گۆت: “هه‌تا نوكه تيمێن وان يێن دناڤ پاشمايێن ئاڤاهيێن هه‌رفى دا لێگه‌ريانێ دكه‌ن”.
ئاماژه ب وێ چه‌ندێ ژى كر كو د ناڤا قوربانيان دا چو كه‌سێن بيانى نه‌بووينه.
دوهى بيڤه‌له‌رزه‌كا ب قه‌بارێ 6.1 پله ل دووڤ پيڤه‌رێ ريخته‌ر هه‌ردو دورگێن لۆمبرگ و بالى هه‌ژاندن و به‌رى حه‌فتيه‌كێ ژى بيڤه‌له‌رزه‌كا دى ل هه‌مان ده‌ڤه‌ر دابوو، به‌لێ زيانێن وێ كێمتر بوون كو 16 كه‌سان گيانێ خوه ژ ده‌ست دابوو.
ئه‌ڤرۆ نيوز:
ل گوندێ كانی قرژاله یێ نێزیكی هه‌ولێرێ عەمباره‌كا چه‌ك و ته‌قه‌مه‌نیان په‌قى.
ژێده‌ره‌كى بۆ رووداو راگه‌هاند كو ده‌مژمێر 23:00ى 5ى ته‌باخا 2018ێ، ل گوندێ كانی قرژاله عه‌مباره‌كا چه‌ك و ته‌قه‌مه‌نیان ته‌قیه.
رێڤه‌به‌رێ به‌ره‌ڤانیا باژێرى ل هه‌ولێر شڤان عە‌بدولقادر بۆ رووداوگۆت: “پشتی ته‌قینێ ئاگر ده‌ركه‌فتیه و ئاگر ژی ژ ئالیێ تیمێن وان ڤه هاتیه كۆنترۆلكرن”.
شڤان عە‌بددولقادر دا زانین كو د بوویه‌رێ ده چو زیانێن گيانى نه‌بووینه و هه‌تا نها ژی سه‌ده‌ما ته‌قینێ نه‌هاتیه زانین”.
ب گۆره‌يی پێزانينان ئەو عەمبار يێن هێزێن پیشته‌ڤانى 1 يا هێزێن پێشمه‌رگێ كوردستانێ بوون.
گوندێ كانی قرژاله 10 كیلۆمه‌ترا ژ رۆژاڤایێ باژارێ هه‌ولێرێ يێ دووره.
ئه‌ڤرۆ نيوز:
پارێزگارێ سلێمانیێ دێ سەردانا بەغدا کەت ژبۆ کو ھەولەکا نوو بدەن ھەتا کو تورکیا دۆرپێچا ل سەر فرۆکەخانا سلێمانیێ راکەت.
پشتی شەش مەھان ژ وێ دۆرپێچا کو بەغدا ب سەدەما ئەنجامدانا ریفراندوما سەربەخوەبوونا باشوورێ کوردستانێ خستە سەر ھەردو فرۆکەخانەیێن ھەولێر و سلێمانیێ، کۆمپانیا ماھان یا ئیرانی یەکەمین گەشتا ئەسمانیا خوە بۆ فرۆکەخانەیا ھەولێرێ دەسپێکر و پشتی وێ ژی گەلەک کۆمپانیێن دن ل پەی ھەڤ ھاتن و ھاتنووچوونا فرۆکەیان ژ ترکیێ و وەلاتێن ئورۆپی و عەرەبی ڤە دەست پێ کر.
ھەتا نھا تورکیا بریار نەدایە کو ئەسمانێ خوە ل سەر فرۆکەخانەیا سلێمانیێ ڤەکەت، ئەو ژی وەکو بەھانەیەک پشتی بوویەرا 3ێ تەباخا سالا 2017 کو دو کارمەندێن دەزگەھا میتێ ژ ئالیێ پارتیا کارکەرێن کوردستانێ ڤە ل ھاڤینگەھا دوکانێ ھاتنە رەڤاندن.
ئاخفتنکەرێ ب ناڤێ مەکتەبا سیاسی یا ئێکەتی نشتیمانی کوردستان، سەعدی ئەحمەد پیرە، رەد دکەت، کو د جڤینێن وان یێن ل گەل کۆنسولێ تورکیا یێن ل ھەرێما کوردستانێ دا، بەحسا راکرنا دوورپێچێن سەر فرۆکەخانەیا سلێمانیێ ھاتیە کرن و دبێژیت: “ئەم ھەر جارا کو ل گەل وان روونشتبین، مە بەحسا پێکئینانا حوکمەتا نوو یا عیراقێ و ھەولێن ئالیێن سیاسی یێن بۆ ڤێ ئارمانجێ کریە و ئەم نەچووینە ناڤا ھوودەکاریان.”
نيشاندان