ئه‌ڤرۆ نيوز:
بۆریس جۆنسن وه‌زيرێ ده‌رڤه‌يێ بريتانيا ده‌ست ژ كارێ خوه كێشا، پشتى كو دوهى ده‌يڤيد داڤيس وه‌زيرێ چوونه ده‌رڤه ده‌رڤه‌يا بريتانيا ژ ئێكه‌تيا ئوروپا ده‌ست ژ كارێ خوه كێشاى.
په‌يڤدارێ حوكمه‌تا بريتانيا رۆژا دوشه‌مبى راگه‌هاند كو بوريس جونسن وه‌زيري ده‌رڤه‌يي بريتانيا ده‌ست ژ كار كێشايه و سه‌رۆك وه‌زيران تيرێزا مه‌ى ده‌ست ژ كاركێشانا جونسن په‌سه‌ند كريه.
ئه‌ڤرۆ نيوز:
دھۆک پارێزگەھا ئێکێ یە دەست ب سیستەمێ نوو یێ کارەبێ کری و 10% ب دووماھی ھاتیە و بریارە د سال و نیڤان دا ھەموو پرۆژە بکەڤیتە کاری، ب دەست ب کاربوونا پرۆژەی 80% ئاریشا مووەلیدێن کارەبێ نامینیت و 22-23 دەمژمێران کارەبا گشتی دێ ھەبیت، پارێ کارەبێ وەکو نوکە ب پۆست دێ گەھیتە مالان و ھەر مالەکا سێ ھوشداری وەرگرتن کارەبا وی دێ ھێتە بڕین.
ئەندازیار ئیبراھیم حەسەن، جێگرێ رێڤەبەرێ گشتیێ کارەبا پارێزگەھا دھۆکێ بو رۆژناما ئەڤرۆ دیارکر کو بەری نوکە پرۆژەک ل دھۆکێ ھەبوو د گۆتنێ سمارت میتەر ئانکو (پیڤەرێ زیرەک)، بەلێ دھۆکێ ب تنێ ب کاردئینا و سەرکەفتن نەئینا.
دیارکر کو نوکە ئەڤ پرۆژێ نوو یێ ل وەزارەتێ ھاتیە ئیمزاکرن و ملیونەک و پێنجسەد ھزار پیڤەر دێ ھێنە گرێدان و بو پێنج کومپانیا یێ کەتی و ھەموو کومپانی بیانی نە، ھەنە یابانی و دانیمارکی و پێک دھێن ژ کومپانیێن پیڤەر و سندوقا و کێبلا و گرێدانێ و گۆت: ھەبوونا پێنج کومپانیا تشتەکێ باش نینە، چونکو ھەکە د پرۆژەی دا تو ئێکی بنیاسی دێ باشتر بیت و دێ پەیوەندی ب ساناھیتر کەڤیت.
دیارکر ژی پرۆژە ژ مەھا ئادارێ وەرە یێ ھاتیە ئیمزاکرن و پێدڤیە پشتی سال و نیڤا بکەڤیتە کاری و گۆت: ئەم نزانین دێ چو ئاستەنگ کەڤنە درێیێ دا و ئەم وەکو پارێزگەھا دھۆکێ رێژا 10% یێن چووین، بەلێ ھەولێر و سلێمانی ھندی مە نەچووینە.
جێگرێ رێڤەبەرێ گشتیێ کارەبێ دیارکر کو پروژە دێ پیڤەرا ب ستوونێن کارەبێ ڤەکەن و سندوقا بو دروست کەن، ھەر سندوقەکێ چار ھەتا پێنج پیڤەرا دێ تیدا بن و مفایێن وی ئەوە کەس نەشێت دەستکاریێ تێدا بکەت، و دێ ھێنە کونترولکرن و گۆتژی: پرۆژە یێ پێشکەفتی یە و دێ شێین رێکئێخین و ھەکە کارەب یا زێدەبیت دێ شێی ھەتا شێست ئەمپێران ژی دەین و ھەکە کێمتر بیت دێ چل ئەمپێر ھێنە دان و ب ڤی رەنگی ل دووڤ ھەبوونا کارەبێ دمینیت داکو بو ھەموویان بچیت و بشێن کونترول بکەین.
ئەندازیار ئیبراھیم حەسەن دیارکر ژی بو دانا پارەی دو پێشبینی ھەنە ئێک دبێژنێ (پریپەید) ب رێیا کارتێ و یا دوێ ب رێیا پۆستی کو وەکو بەری نوکە دێ ھێنە مالان و پارەی وەرگرن، سیستەمێ کارتێ بۆ وان جھانە یێن ب زەحمەت پارێن خوە ددەن و وی دەمێ ئەو دێ کارتێ کریت و پارەی دەت وەکو بەرێ، و پتریا وان دێ وەکو بەری نوکە بیت، جوداھی ئەوە یێ پارێ کارەبێ نەدەت سێ ھوشداری دێ بۆ چن و پشتی ھینگی کارەب دێ ژێ ھێتە بڕین، کارەب بڕین ژی نە ب رێیا برینا کێبلی یە، بەلکو کلیکەکە و ل کومپانیێ دێ ھێتە برین، و پشتی سەرەدانێ دکەت دێ سزایێ خوە دەت و کارەب دێ بو ھێتە زڤراندن و گۆتژی: جوداھیا ڤی پرۆژەی ئەوە کو دێ شێین رێکئێخین و بو ھەموو مالان وەکو ئێک دێ چیت، نەکو خێزانەک 100 ئەمپێرا ببەت و ئێکێ نەبیت.
جێگرێ رێڤەبەرێ کاربا دھۆکێ دیارکر ژی ھەتا پرۆژە کار نەکەت ئەو نەشێن دیاربکەن کا چەند سعەتا کارەب دێ ھەبیت و گۆت: رەنگە 22 – 23 سعەتا ھەبیت، ھەکە دروست کەتە دوارێ بجھئینانێ دا رەنگە 24 سعەتا ژی ھەبیت و دیارکر ژی: نوکە بەھرا دھۆکێ 430 -450 میگا دگەھن کو دھۆکێ پێدڤی یا ب 900 میگا ھەی، ئەمژی ل دووڤ کارەبا ھەی بەلاڤ دکەین و کونترول چەندێ فرێکەت ئەم وەسا سەرەدەریێ دکەین و گۆت: ھەکە پرۆژێ نوو بکەڤیتە کاری ھەتا 80% دێ ئاریشا مووەلیدا چارەسەربیت.
ئه‌ڤرۆنيوز:
ژبۆ بتر ھاماھەنگی و پشتەڤانیکرنا رێکخراوێن کار و خزمەتان پێشکێشی ئاواران و پەنابەران دکەن، ئیسماعیل محمەد، ھاریکارێ پارێزگارێ دھۆکێ بۆ کاروبارێن ئاواران و پەنابەران و ب ئامادەبوونا ئەدریس نەبی صالح رێڤەبەرێ جێبەجێ کار یێ بۆردێ کاروبارێن مرۆڤایەتی BRHA ل بارەگایێ بۆردی خەلاتێ رێزلینانێ ژ بال پارێزگەھا دھۆکێ ڤە ئاراستەی ھەردو رێکخراوان GRC و Syrian relief کر.
ل دەستپێکێ خەلاتێ رێزلینانی بۆ ھیلین نافع رێکخه‌را رێکخراوا خاچا سۆرا ئەلمانی GRC ھاتە کرن ژبەر رۆلێ رێکخراوا ناڤبری دبیاڤێ گەھاندنا ھاریکاریان بۆ ئاواران و پەنابەران و خەلکێ خوه‌جهێ پارێزگەھێ، پاشی خەلاتێ رێزلینانێ بۆ ھڤال سلیمان تاھر ریڤەبەرێ رێکخراوا Syrian relief ل دھۆکێ ھاته کرن ژبەر رۆلێ وان دبیاڤێ گەھاندنا ھاریکاریان بۆ ئاواران و پەنابەران.
دپەیڤەکێ دا هاريكارێ پارێزگه‌رێ دهۆكێ سۆپاسیا ھەردو رێکخراوان کر ژبەر وان خزمەتێن پێشکێش دکەن ل ناڤ ئاواران و پەنابەران و خەلکێ خوه‌جهيێ پارێزگەھێ، دیسان داخواز کر ھەردو رێکخراو د بەردەوام بن ل سەر کارێ خوه وپتر بزاڤا گرنگيێ ب ئەنجامدانا پرۆژێن پەیداکرنا دەلیڤێن کار بدەن پێخەمەت بتر خوه‌شکرنا ژیارا ئاواران و پەنابەران و خەلکێ خوه‌جهێ پارێزگەھا دھۆکێ.
ئه‌ڤرۆنيوز:
ژئه‌گه‌رێ كێمبوونا ده‌مژمێرێن كاره‌با گشتى ل پارێزگه‌ها به‌سرا وبلندبوونا پلێن گه‌رمێ ب شێوه‌كێ مه‌زن وزێده‌بوونا رێژا خوى دناڤ ئاڤا رووبارێ ( شه‌تولعه‌ره‌ب) دا، نه‌رازيبوونه‌كێ مه‌زن دناڤ وه‌لاتيێن به‌سرا دا په‌يدابوويه وگه‌هشتي رادێ رێكخستنا خوه‌نيشادانان.
حه‌سه‌ن دادوود، رۆژنامه‌ڤانه‌كێ پارێزگه‌ها به‌سره‌يه بۆ ئه‌ڤرۆنيوز گۆت” دوهى ئێكشه‌مبى 8/7/2018 خوه‌نيشادانه‌ك ل ده‌ڤه‌را باهله يا سه‌ر ب قه‌زا مده‌ينه ڤه ل باكوورێ پارێزگه‌ها به‌سرا هاته ئه‌نجامدان ژلايێ وه‌لاتيان ڤه وتێدا داخوازا ده‌ليڤێن كارى و باشتركرنا ره‌وشا خزمه‌تگوزاريان كر، دئه‌نجامدا ته‌قه ل خوه‌نيشادانان هاته كرن وكه‌سه‌ك هاته كوشتن وچار كه‌س ژى بريندار بوون”.
حه‌سه‌ن دياركر ژى” هه‌ر ئێڤاريا ئه‌ڤرۆ دوشه‌مبى 9/7/2018 ب ده‌هان وه‌لاتيێن قه‌زا (شه‌تولعه‌ره‌ب) ل رۆژهه‌لاتێ پارێزگه‌ها به‌سرا خوه‌نيشادانه‌ك رێكخست وه‌كو نه‌رازيبوونه‌ك ل سه‌ر زێده‌بوونا رێژا خوى دناڤ ئاڤێ دا وداخوازا باشتكرنا خزمه‌تگوزاريان ژى كر ب تايبه‌تى زێده‌كرنا ده‌مژمێرێن كاره‌بێ، هه‌ر وان خوه‌نيشانده‌ران پشته‌ڤانيا داخوازيێن وه‌لاتيێن خوه‌نيشانده‌رێن قه‌زا ئه‌لمده‌ينه ژى كر”.
ئاماژه دا ژى” خوه‌نيشانده‌ران رێ ل سه‌ر پرا ته‌نۆمه ب شێوه‌كێ به‌روه‌خت داخستبوو”.
دياركر ژى، نوكه ئاريشا ئاڤێ ژى ل به‌سرا يا په‌يدابووى و هاتيه سه‌ر ئاريشا نه‌بوونا كاره‌بێ كو ب شێوه‌كێ مه‌زن رێژا خوى دناڤ ئاڤێ دا يا زێده‌بووى وئاڤ ناهێته ڤه‌خوارن”.
خوياكر ژى” وه‌زاره‌تا ژێده‌رێن ئاڤێ ل عيراقێ ل 2/7/2018 راگه‌هاندبوو كو رێژا خوى ل رووبارێ (شه‌تولعه‌ره‌ب) ل به‌سرا يا گه‌هشتيه رێژه‌كا بلند وب زه‌حمه‌ت ئه‌و ئاڤه ئێدى بۆ بۆ ڤه‌خوارنێ بهێته بكارئينان”.
ئه‌ڤرۆنيوز:
سه‌رۆكێ ئێكه‌تيا ته‌پا پێ يا ئيسپانى، لويس روبياليس، ئه‌ڤرۆ دوشه‌مبى 9/7/2018 ناڤێ راهێنه‌رێ نوو يێ هه‌لبژارتيێ ئيسپانيا راگه‌هاند.
روبياليس خوياكر كو لويس ئينريكى، راهێنه‌رێ به‌رێ يێ يانا به‌رشه‌لونا، دێ ئه‌ركێ راهێنه‌ريا هه‌لبژارتيێ ئيسپانيا وه‌رگريت ل شوينا راهێنه‌رێ به‌روه‌خت فرناندۆ هيرۆى.
دياركر ژى كو هه‌ڤبه‌ستا ئينريكى دێ بۆ ده‌مێ دو سالان بيت.
ئه‌ڤرۆنيوز:
وه‌زيرێ ناڤخوه يێ عيراقێ يێ به‌رێ ئاشكراكر كو تيرۆرستێن داعشێ 75 گوند ژ حه‌مرين هه‌تا سامه‌را يێن داگيركرين.
باقر جه‌بر زوبێدى, وه‌زيرێ ناڤخوه يێ عيراقێ يێ به‌رێ دبه‌ياننامه‌كێ دا گۆت” پێزانينێن باوه‌رپێكرى يێن گه‌هشتينه من ل دۆر كونترۆلا داعشێن ( ويلايه‌تا سه‌لاحه‌يدن) ئه‌وێن خوه ل چيايێن حه‌مرين ئاسێ كرى، ل سه‌ر 75 گوندان هه‌ر ژ باشوورێ ناحيا ره‌شاد هه‌تا ده‌ڤه‌را متێبيجه ل رۆژئاڤايێ عوزه‌يم”.
زوبێدى كو سه‌ركرده‌كێ ديارێ جڤاتا ئيسلامى يا بلنده ل عيراقێ، گۆت ژى” ئه‌وا ئه‌ز تێبينيێ دكه‌م ئه‌و كو ده‌وله‌تا خيلافه‌تێ ل مووسلێ يا هاتيه ژناڤبرن، به‌لێ هه‌تا نوكه يا ماى ژ حه‌مرين هه‌تا سامه‌را”.
دهێته زانين كو چه‌كدارێن داعشێ ل ده‌مێن بۆرى چه‌ندين هێرش دژى له‌شكرێ عيراقێ وحه‌شدا شه‌عبى ووه‌لاتيێن مه‌ده‌نى كرينه ب تايبه‌تى ل رێيا دناڤبه‌را به‌غدا – كه‌ركووك، دئه‌نجامدا هێزێن عيراقێ ل رۆژا سێشه‌مبيا بۆرى ده‌ست ب ئۆپه‌راسيۆنه‌كێ كر ل بيابانێن ديالا وسه‌لاحه‌دين وده‌وروبه‌رێن كه‌ركووكێ بۆ پاقژكرنا وان دڤه‌ران ژ چه‌كدارێن داعشێ.
حه‌يده‌ر عه‌بادى سه‌رۆك وه‌زيرێن عيراقێ وفه‌رماندێ گشتيێ هێزێن چه‌كدار ل هه‌يڤا كانوونا ئێكێ 2017 راگه‌هاندبوو” عيراق ب تمامى ژ رێكخستيا داعشێ يا هاتيه ئازادكرن وپاقژكرن”.
ئه‌ڤرۆنيوز:
پارتى ديموكراتى كوردستان ل دۆر نڤيساره‌كا سه‌خته رادگه‌هينيت، ئه‌و نڤيسارا سه‌خته ئه‌وا به‌حس ل رێككه‌فتنێ ل دۆر وه‌رگرتنا پۆستێ سه‌رۆك كۆمارى ژلايێ سه‌رۆك بارزانى ڤه دكه‌ت، يا دووره ژ راستيێ وچو رێككه‌فتنێن ژ وى جۆرى نه‌هاتينه كرن.
ئه‌ڤرۆ دوشه‌مبى 9/7/2018، دتۆرێن جڤاكى دا، نڤيساره‌كى ب ده‌ست هاتيه نڤيسين به‌لاڤبوويه وتێدا وه‌سا هاتيه دياركرن كو نوونه‌رێ پارتى ديموكراتى كوردستان وچه‌ند لايه‌نێن دى يێن رێككه‌فتين وپارتى داخوازا پۆستێ سه‌رۆك كۆماراى يا كرى، ژلايێ نڤيسينگه‌ها راگه‌هاندنا فازل ميرانى، سكرتێرێ مه‌كته‌با سياسى يا پارتى ديموكراتى كوردستان، دراگه‌هاندنه‌كێ دا ره‌تكر وێ نڤيسارێ چو بنه‌ما بۆ هه‌بن.
نڤيسنگه‌ها راگه‌هاندنێ يا سكرتێرێ مه‌كته‌با سياسى يا پارتى دبێژيت” بۆ رايا گشتى رۆهن دكه‌ين كو ئه‌و به‌لگه‌نامه يا سه‌خته‌يه وچو راستى تێدا نينه وشێوازه‌كێ بۆ نێچيرا د ئاڤێ شێلى دا”.
هه‌روه‌سا ديار دكه‌ت” وى ده‌نگوباسى دبنه‌ره‌ت دا ره‌ت دكه‌ين وداخوازێ ژى ژ لايه‌نێن په‌يوه‌نديدار دكه‌ين، ڤه‌كۆلينێ بكه‌ن بۆ ده‌ستنيشانكرنا وى لايه‌نێ ئه‌و جۆره ده‌نگوباسه به‌لاڤكرى ولێپرسين دگه‌لدا بهێته كرن وبهێته دادگه‌هكرن”.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ دوشه‌مبى 9/7/2018 پێشوازى ل برێت مه‌كگورك هنارتيێ تايبه‌ت يێ سه‌رۆكێ ئه‌مريكى بۆ هه‌ڤپه‌يمانيا نێڤده‌وله‌تى يا دژى داعشێ وشانده‌كێ دگه‌لدا كر كو پێكهاتبوو ژ دۆگلاس سيليمان باليۆزێ ئه‌مريكا ل عيراقێ وكين كرۆس كونسۆلێ ئه‌مريكا ل هه‌رێما كوردستانێ .
دديداره‌كێ دا بيرورا ل دۆر دووماهى پێشهاتێن سياسى ل ده‌ڤه‌رێ وهه‌روه‌سا ره‌وشا سووريێ ونيگه‌رانيێن ل دۆر پاشه‌رۆژا گه‌لێ كورد ل سووريێ هاتن ئالوگوركرن، ومه‌كگوركى سياسه‌تا وه‌لاتێ خوه سه‌باره‌ت گوهۆرينێن هه‌رێمايه‌تى ونێڤده‌وله‌تى وره‌وشا سياسى وئه‌منى يا سووريێ به‌رچاڤكر.
ره‌وشا سياسى يا عيراقێ پشتى هه‌لبژارتنان وبزاڤێن پێكئينانا حوكمه‌تا نوو يا عيراقێ ته‌وه‌ره‌كێ دى يێ دديارێ بوو و تێدا سه‌رۆك بارزانى دووپاتكر كو ژبۆ دووباره نه‌بوونا شاشيێن بۆرى وگه‌هشتن ب هه‌ڤپشكيا راسته‌قينه، پێدڤيه هه‌ڤپيه‌مانيه‌كا هه‌مه‌لايه‌نه ل سه‌ر بنه‌مايێ هه‌ڤپشكيێ وسازانێ وهه‌ڤسه‌نگيێ ب هه‌موو هوورده‌كاريێن خوه‌ڤه بهێته دروستكرن وميكانيزم وسه‌قفێ زه‌مه‌نى ژى بۆ بجهئينانا وان هه‌رسێ پرنسيبان بهێته دانان بۆ وێ چه‌ندێ هه‌موو پێكهات هه‌ست ب وێ چه‌ندێ بكه‌ن كو دپرۆسا سياسى يا عيراقێ دا هه‌ڤپشكن وهه‌ر ل بن رۆناهيا وان هه‌رسێ پرنسيبان حوكمه‌ت بهێته پێكئينان.
دپشكه‌كا دى يا وێ كۆمبوونێ دا، هنارتيێ تايبه‌ت يێ سه‌رۆكێ ئه‌مريكا بۆ هه‌ڤپه‌يمانيا نێڤده‌وله‌تى يا دژى داعشێ راگه‌هاند كو وه‌لاتێ وى دێ به‌رده‌وام بيت دهاريكاريا عيراقێ وهه‌رێما كوردستانێ دا وبه‌رچاڤكر كو گه‌له‌ك ده‌ليڤه بۆ كارێ هه‌ڤپشك يێن هه‌ين ژبۆ بده‌ستڤه‌ئينانا سه‌قامگيريێ وباوه‌ريێ.
ئه‌ڤرۆنيوز:
ده‌روێش ئاكره‌يى ده‌مێ 33 سالايه باقلكێن كه‌لاندى ل دهۆكێ دفرۆشيت ودبێژيت ده‌مێ ماعونا باقلكا ب 10 فلسا و دو درهه‌م وسێ درهه‌مان من خێزانا خوه يا هه‌شت كه‌سى ب فرۆتنا باقلكان ب خودان دكر، به‌لێ نوكه وه‌سا نينه وژيان يا ب زه‌حمه‌تتر لێ هاتى.
ده‌رويش بۆ ئه‌ڤرۆنيوز دبێژيت” ل سالا 1985 من ده‌ست ب فرۆتنا باقلكێن كه‌لاندى ل سه‌ر عه‌ره‌بانێ كريه وهه‌تا نوكه ئه‌ز يێ به‌رده‌وامم وده‌ستپێكا كارێ من ل ناڤ بازارێ دهۆكێ بوو “.
دياركر” نوكه كارێ من وه‌كو به‌رێ نه‌مايه، رۆژانه ئه‌ز چار هه‌تا پێنج كيلۆيان دفرۆشم، به‌رى نوكه من رۆژانه نێزيكى 20 كيلۆيان دفرۆتن وئه‌ز دچمه هه‌موو جه وتاخێن باژێرێ دهۆكێ، ده‌مه‌كى ژى ئه‌ز ل ناڤ بازارى بووم ، به‌لێ نوكه پتر ئه‌ز يێ دناڤ كۆلانێن تاخێ شاخكێ دا”.
گۆت ژى” ده‌مێ ماعونا باقلكا ب 10 فلسا وپاشى ب درهه‌مه‌كى بوو گه‌له‌ك بۆ من باشتر بوو وژيان ژى يا ب ساناهيتر بوو ژ نوكه”.
ده‌روێش دبيژيت” ئه‌ز ب خوه باقلكان دكرم ودكه‌لينم ومن مه‌عميلێن خوه يێن تايبه‌ت ژى يێن هه‌ين وگه‌له‌ك كه‌س يێن هه‌ين ته‌له‌فۆنا من دكه‌ن ودبێژن تو نوكه ل كيرێى دا بۆ خوه بهێنه باقلكا”.
ل دۆر ده‌مێن وى يێن كارى، دبێژيت” ل هاڤينان ژبه‌ركو سه‌قا يێ گه‌رمه وباقلك زوو خراب دبن، ئه‌ز ل ده‌مژمێر 2:30 نيڤرۆ ده‌ردكه‌ڤم ول ده‌مێ زڤستانان ژى ل ده‌مژمێر 8:30 سپێدێ ده‌ردكه‌ڤم”.
ئەڤرۆ نیوز ، زنار تۆڤی :
ئەڤرۆ دوشەمبی 9.7.2018 جارەکادی فرۆکێن سۆپایێ تورکی ب بەهانەیا هەبوونا چەکدارێن پەکەکێ گەلیێ بازێ ل سنورێ ناحیا کانی ماسێ بۆمبە بارانکر.
ئامەد سالح وەلاتیەکێ وێ دەڤەرێ یە بۆ ئەڤرۆ نیوز دیارکر: ئەڤرۆ دوشەمبی و لدەمژمێر 4:40 خولەک جارەکا دی فرۆکێن سۆپایێ تورکی گەلیێ بازێ ل ناحیا کانی ماسێ یێ سەر ب قەزا ئامێدیێ ڤە بۆمبە بارانکر و ڤێ چەندێ ترسەک ئێخستە دلێ خەلکێ گوندێن دەوروبەر و هەروەسا ئەڤە د ماوێ ڤان رۆژان دا دو جاران فرۆکان ئەڤ گەلیە بۆمبە بارانکر.
نيشاندان