سكرتێرێ گشتیێ حزبا شیوعی یا ئیراقی دبێژیت: پاشڤە زڤڕین ژ فیدرالیەتێ و ڕێزنەگرتنێ ل مافێن گەلێ كورد دێ بیتە هۆكارێ قەیرانەكێ كو پارچەبوون و نە سەقامگیریا ئیراقێ دێ ئەنجامێن وێ بن، هەروەسا داخوازێ ژ هێزێن سیاسی دكەت دەست ب سیستەمێ فیدرالیەتێ بکەن و دەستبەرداری مافێن گەلێ كورد نەبن.
ڕائید فەهمی، سكرتێرێ گشتیێ حزبا شیوعی یا ئیراقی سەبارەت فیدرالیەتێ دبێژیت» هندەك هێزێن سیاسی یێن ئیراقی چ ئەوێن دەنگ ب دستووری دای، یان ئەوێن پارێزەرێن دستووری، هەلوەستێ ڕۆهن نینە یان، حەزا تمام بۆ قایلبوونا ڕاستەقینە ب چەمكێ فیدرالیەتێ نینە، ب دیتنا وان فیدرالیەت داگێڕانەكە د ڕەوشەكا دیاركری دا و ژ ئەگەرێ هەڤسەنگیا هێزان بۆ كوردان هاتیە كرن».
ڕائید فەهمی دیاركر» د ئەڤرۆ دا ب گۆرەی شیانان بزاڤ هەنە بۆ بەرتەنككرنا دەستهەلاتێن فیدرالی، ئەڤە ژ ڕوویێ دەزگەهی و ب شێوەیەكێ گشتی پەیوەندی ب دۆسێیا فیدرالیەتێ و قەبوولكرنا دەستهەلاتێن وێ ڤە هەیە».
سكرتێرێ گشتیێ حزبا شیوعی یا ئیراقی، ڕەخنە ل هەلوەستێ پشكەك ژ ئالیێن دژەبەرەیێن هەرێما كوردستانێ دگریت و دبێژیت» پشكەك ژ پرسێ پەیوەندی ب ناكۆكیا سیاسی ڤە هەیە، پەیوەندی ب هەرێما كوردستانێ و پەیوەندیێن وێ ڤە هەیە؟ ب دەستهەلاتا ناڤەندی هەیە، ئەوژی ب شێوەیەكێ تەكتیكا وەرچەرخانە بۆ ناكۆكیا سیاسی ملكەچ ب سازانێن سیاسی ڤە، ئەو تێكگەهشتنە ل سەر زەمینەیەكا لەرزۆك هاتینە ئاڤاكرن، ئانكو ڕێزبوون و پێكڤەبوونەكە بۆ مەبەستەكا دیاركری دهێتە كرن و ژ پێخەمەت دەربازكرنا قەیرانەكا دیاركری، نەوەك بۆ چارەسەركرنا قەیرانێ، لەوما دەمێ بابەت ڕژد دبیت سەرباری وان تێكگەهشتنان، قەیران دروست دبیت، وەكو ئەوا د قانوونا بودجەی دا ڕوودای».
ب دیتنا ڕائید فەهمی، پشكەك ژ هێزێن سیاسی یێن ئیراقێ هەرێما كوردستانێ وەكو هەڤپشكێ سەرەكی ل ئیراقێ قەبوول ناكەن و گەلەك حەز ل سەر فیدرالیەتێ نینە، بەلكو ب زارەكی ب وێ چەندێ د ڕازی نە و هندەك جاران وەكو درووشم پێ د ڕازینە و دبێژیت» مخابن مە هەلوەستێ نەرێنی ژ ئەرەبان ل دۆر دستووری و مادەیا 140 و قانوونا پەترۆلێ و غازێ دیت و ل هەرێما كوردستانێ ژی تێكگەهشتنەك بۆ فیدرالیەتێ هەیە كو دبیت ژ فیدرالیەتێ زێدەتر بیت و بۆ كۆنفیدرالیێ بچیت».
دیاركر» پێدڤیە ل سەر وێ چەندێ د هەڤڕابین كو نابیت ئیراق ب وی شێوازی بهێتە بڕێڤەبرن كو بەری گوهۆڕینێن 2003 ل سەر چووی، ئیراقی ژی كورد و ئەرەب پێدڤیە پێكڤە ب شێوازەكێ گونجای و قەبوولكری ژ هەردو ئالیان ڤە ل بن چەترێ فیدرالیەتێ بژین، بەلێ د هەمان دەمدا پێدڤیە بەغدا و هەولێر دانپێدانێ ب دەستهەلاتێن وێ فیدرالیەتێ و ئاستێ وێ بكەن بێی كو بابەتی گۆمان و ناكۆكی تێدا بیت».
سەبارەت ب وان بزاڤێن ژ ئالیێ هندەك ئالیێن سیاسی یێن ئیراقی ڤی دهێنە كرن كو ژ ڕوویێ مللی ڤە دبیتە ئەگەرێ كەربێ دژی كوردان، ڕائید فەهمی دبێژیت» بەلێ، ئەو قەیرانە دێ بنە ئەگەرێ شۆڤینی و كەربێ و دەمارگێریێ، مخابن گەلەك جاران تاكو ل گۆتارێن سیاسەتمەداران ژی ب نەرێنی باسێ كوردان دكەن و كار بۆ بازار پەیداكرن بۆ بۆچوونێن نەراست دكەن كو پشتی سالا 2003 كورد ژ بودجەیا ئیراقێ مفادار بوون و ئەو مفاداربوونە ل سەر ملێ ئەرەب و پارێزگەهێن ناڤەراست و باشوورێ ئیراقێ بوو، ئەوژی ڕاست نینە، كورد وەلاتیێن ڕەسەنێن ئیراقێ نە و وەكو هەموو ئیراقیێن دی نە و وەلاتیێن پلە دو و سێ نینن، ئەوژی دهێتە گوتن كو هەرێما كوردستانێ پارێ بەسرا دبەت پرۆپاگندەیە، هەكە ب وێ ڕامانێ بیت، پارێزگەهێن دی ژی پارێ بەسرا دبەن و ئەڤە بۆچوونەكا بەرتەنگە و دوورە ژ گیانێ وەلاتیبوونێ».
گوت ژی» بۆچوونەك ل دەف پتریا حزبان هەیە، هەتاكو ئەوێن د ڕێڤەبرنا دەولەتێ ژی دا د پشكدار ل دۆر چەمكێ فیدرالیەتێ و دانپێدان ب مافێن نەتەوەیی چ بۆ كوردان بیت، یان نەتەوەیێن دی بیت كو نەهاتینە چەسپاندن، تێكگەهشتنەك ژی هەیە سەبارەت وێ چەندێ كو ئەرەب نەتەوەیێ مەزنترە، ئەوە دێ بیتە هۆكارێ گەلەك قەیرانان، هەتاكو ل گۆتارێن سیاسەتمەداران ژی ئەو جۆرە دەمارگێریە هەیە و ئەو جۆرەكە ژ شۆڤینیەتێ و ب پشتڕاستی ڤە بابەتەكێ ترسناكە ل سەر سەقامگیریا وەلاتی».
سكرتێرێ گشتیێ حزبا شیۆعی یا ئیراقی ئاماژێ دكەت ژی كو هەر پاشڤەچوونەك ژ فیدرالیێ، قەیرانان دروست دكەت و دبێژیت» نابیت ژ بیرا مە بچیت كێشەیا مەزن د دامەزراندنا دەولەتا ئیراقێ دا پەیوەندی ب پرسا كوردی ڤە هەبوو، ئەو پرسە وەكو مینەكێ یە د لەشێ دەولەتێ دا و پاشڤەچوون د سۆزێن بریتانیا و ئەوێن دی بۆ كوردێن ئیراقێ ڕوودا و كورد خستنە چارچۆڤەیەكێ قەیرانی دا كو ئەگەرێ تەقاندنێ هەیە».
هەروەسا دبێژیت» هەر پاشڤەچوونەك ژ فیدرالیەتێ دێ كارەساتێ بۆ ئیراقێ دروست كەت و دێ مەبەتە پێكدادانەكێ كو سنۆر هەرێما كوردستانێ بهێتە ب هێزكرن و گەشەكرن، چونكە بێی فیدرالیەت دێ ئیراق پارچە بیت».

هەولێر، قائید میرۆ

بەرپرسەكێ پشكا هەلبژارتنێن پارتی دیموكراتی كوردستان ئاشكراكر، پشتی دەستپێكرنا ڕێكارێن بڕێڤەچوونا پرۆسەیا هەلبژارتنێن جڤاتێن پارێزگەهێن ئیراقێ، پارتی ژی دەست ب بەرهەڤیان كریە و بڕیارە ل چەند ڕۆژێن بهێت پشكا هەلبژارتنێن پارتی ڕێكارێن قانوونی بگریتە بەر و خوە بەرهەڤ بكەت بۆ ئەنجامدانا هەلبژارتنان، ب تایبەتی ل پارێزگەهێن كورد تێدا وەكو نەینەوا و كەركووكێ.
نیازی حەمە عەزیز، بەرپرسێ راگەهاندنا پشكا هەلبژارتنێن پارتی بۆ ڕۆژنامەیا (ئەڤرۆ) گوت « پارتی وەكو هەموو ئالیێن دی یێن سیاسی ل ئیراقێ ل بەرە خوە بەرهەڤ بكەت بۆ ئەنجامدانا پرۆسەیا هەلبژارتنێن جڤاتێن پارێزگەهان ل ئیراقێ، بەلێ هێشتا وەكو قەوارە پارتی خوە تۆمار نەكریە، چونكە هێشتا دەم مایە بۆ خوە تۆماركرنێ و ل ڕۆژێن بهێت پارتی ب شێوەیەكێ فەرمی دێ ناڤێ خوە ل كۆمسیۆنا بلند یا سەربخوە یا هەلبژارتنان ل ئیراقێ تۆمار كەت و دێ پشكداریەكا كارا هەبیت د هەلبژارتنێن بهێت یێن جڤاتێن پارێزگەهێن ئیراقێ دا، كو بڕیارە ل دووماهیا ئەڤسالە ئەو هەلبژارتن بهێنە ئەنجامدان».
گوت ژی» ژبلی پارێزگەهێن هەرێما كوردستانێ هەموو پارێزگەهێن ئیراقێ دێ هەلبژارتن تێدا هێنە ئەنجامدان و پشكا هەلبژارتنێن پارتی دیموكراتی كوردستان ژی مژوولی خوە بەرهەڤكرنێ یە بۆ هەلبژارتنان و هەموو ڕێكارێن قانوونی دێ بجهـ ئینیت، ل هەموو پارێزگەهێن كورد تێدا هەین دێ پارتی لیست و بەربژار بۆ جڤاتێن پارێزگەهان هەبن، ب تایبەتی ل هەردو پارێزگەهێن كەركووكێ و نەینەوا، چونكە ل كەركووكێ ڤێجارێ گرنگی بۆ كوردان هەیە كو پارتی ل جڤاتا نوونەرێن ئیراقێ ڕێگربوو پارێزگەها كەركووكێ بهێتە جوداكرن و بەری نوكە دگەل هەلبژارتنێن جڤاتێن پارێزگەهێن ئیراقێ ل كەركووكێ هەلبژارتن نەدهاتنە ئەنجامدان، بەلێ ب پێداگیریا پارتی ڤێجارێ دگەل پارێزگەهێن دی ل كەركووكێ ژی دێ پرۆسەیا هەلبژارتنان هێتە ئەنجامدان».
نیازی حەمە عەزیز ئاماژە كر» ڕاستە ژڤانێ هەلبژارتنێن جڤاتێن پارێزگەهێن ئیراقێ هاتیە دیاركرن كو ل دووماهیا ئەڤسالە ئەو پرۆسەیە بڕێڤە بچیت، بەلێ هێشتا پێنگاڤێن كریاری ژی نەهاتینە هاڤێتن ژئالیێ كۆمسیۆنا بلند یا هەلبژارتنێن ئیراقێ ڤە، پارتی پێگەهەكێ دیرۆكی ل نەینەوا و كەركووكێ هەیە، لەوڕا دێ زۆرترین بەرهەڤی ل هەردو پارێزگەهان هێنەكرن بۆ ئەنجامدانا هەلبژارتنێن ئەڤسالە، د دەمێ گونجایی دا پارتی دیموكراتی كوردستان دێ هەموو ڕێكارێن قانوونی و یێن تایبەت ب پرۆسەیا هەلبژارتنان ڤە دەستپێكەت و بێگومان هێزەكا وەكو پارتی خوەدی جەماوەر و دەنگدەرەكێ زۆرە ل دەڤەرێن كوردستانی ئەڤەژی دێ بیتە ئەگەرێ وێ چەندێ پارتی بشێت پشكداریەكا كارا و ڕۆلەكێ سەرەكی هەبیت د هەلبژارتنێن جڤاتێن پارێزگەهێن ئیراقێ دا».

كۆمسیۆنا بلند یا سەربخوە یا هەلبژارتنان ل ئیراقێ ڕاگەهاند، وەرگرتنا داخوازیێن تۆماركرنا هەڤپەیمانیان بۆ پشكداریكرنێ د هەلبژارتنێن جڤاتێن پارێزگەهێن ئیراقێ دا دەستپێكریە و دێ بۆ دەمێ مەهەكێ بەردەوام بیت.
عیماد جەمیل، ئەندامێ تیما ڕاگەهاندنێ ل كۆمسیۆنا بلند یا سەربخوە یا هەلبژارتنان ل ئیراقێ گوت» هەر ژ ڕۆژا شەمبیا بۆری فەرمانگەها پارت و قەوارەیێن سیاسی ل كۆمسیۆنا بلند یا سەربخوە یا هەلبژارتنان ل ئیراقێ دەست ب وەرگرتنا داخوازیێن تایبەت ب تۆماركرنا هەڤپەیمانیان بۆ هەلبژارتنێن جڤاتێن پارێزگەهان کر و دێ ئەڤ پرۆسەیە هەتا ڕۆژا 30 ڤێ مەهێ بەردەوام بیت».
جڤاتا وەزیرێن ئیراقێ، ڕۆژا 18-12-2023 دیاركریە بۆ ئەنجامدانا هەلبژارتنێن جڤاتێن پارێزگەهێن ئیراقێ، كو ئەو هەلبژارتن ل هەرێما كوردستانێ ناهێنە ئەنجامدان.
وی ئەندامێ تیما ڕاگەهاندنا كۆمسیۆنا بلند یا سەربخوە یا هەلبژارتنێن ئیراقێ گوت ژی» فۆرم ل پشكا تۆماركرنا پارتان بۆ تۆماركرنا هەڤپەیمانیان هەیە و ب ڕێكا وێ فۆرمێ دووماهی پێزانین دهێنە پێشكێشكرن و كۆمسیۆن پشت بەستنێ ل سەر دكەت».
هەروەسا گوت ژی» پێدڤیە ناڤێ سەرۆكێ هەڤپەیمانیێ و ناڤێ هەڤپەیمانیێ بهێتە تۆماركرن، هەروەسا پێدڤیە ناڤێ هەڤپەیمانیێ ژی یێ نوو بیت».
سەبارەت ب ژڤانێ پێشكێشكرنا ناڤێن بەربژاران بۆ هەلبژارتنێن جڤاتێن پارێزگەهێن ئیراقێ، عیماد جەمیل گوت» ژ 15/7 تۆماركرنا بەربژاران دەستپێ دكەت و هەتا ڕۆژا 13/8 دێ بەردەوام بیت».

ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان ڕادگەهینیت، پشتی سێ خۆلان ل جڤاتا نوونەرێن ئیراقێ، فراكسیۆنا پارتی دیموكراتی كوردستان شیا پڕۆژەیێ ڕاكێشانا ئاڤا دیجلەی ژ بەعاج بۆ شنگالێ جهگیر بكەت و حوكمەتا ئیراقێ بۆ بجهئینانا وی پڕۆژەی پێگیر بكەت.
مەحما خەلیل، ئەندامێ جڤاتا نوونەرێن ئیراقێ ژ فراكسیۆنا پارتی گوت» فراكسیۆنا پارتی دیموكراتی كوردستان پشتی سێ خۆلان ل جڤاتا نوونەرێن ئیراقێ شیا پڕۆژەیێ ڕاكێشانا ئاڤا دیجلەی ژ بەعاج بۆ شنگالێ جهگیر بكەت».
هەروەسا ڕاگەهاند» فراكسیۆنا پارتی شیا حوكمەتا ئیراقێ پێگیر بكەت بجهئینانا وی پڕۆژەی و بودجەیا تایبەت بۆ ب مەزێخیت».
مەحما خەلیل وی پڕۆژەی ب پڕژەیەكێ ستراتیژی د هەژمێریت و دبێژیت» وەكو مە سۆز ب وەلاتیێن خوە دای، دێ د خزمەتكرنا وان دا د بەردەوام بین».

سەرۆك مەسعود بارزانی ب توندی كریارا سۆتنا قورئانا پیرۆز شەمزاركر و د پەیامەكێ دا ڕاگەهاند، كریارا نە ڕەوا یا سۆتنا قورئانا پیرۆز ب هیچ شێوەیەكێ ناچیتە د چارچۆڤەیێ ئازادیا ڕادەڕبرینێ دا.
دەقێ پەیاما سەرۆك بارزانی..
كریارا نە ڕەوا یا سۆتنا قورئانا پیرۆز ب هیچ شێوەیەكی ناچیتە د چارچۆڤەیێ ئازادیا ڕادەربرینێ دا و هیچ بەهانەیەك بۆ نینە. ئەڤە برینداركرنا هەست و سۆزا هەموو موسلمانێن جیهانێ یە و گەلەك ب توندی شەرمزار دكەین. ئەڤ جۆرە كریارە دژی گیانێ تەباییێ و پێكڤەژیانێ یە و خزمەتا گۆتارا تاری و بەلاڤكرنا كەربێ دكەت و پێدڤیە ل سەر هەموو ئالیەكی ڕێگریێ لێ بكەت.
هەروەسا د بەیاننامەیەكێ دا سەرۆكایەتیا هەرێما كوردستانێ بەلاڤكر» سۆتنا قورئانا پیرۆز شەرمزار دكەین. كارەكێ تمام نە ڕەوایە و دێ بیتە ئەگەرێ پەیداكرنا كەربێ، گەفان ل پێكڤەژیانێ و ئاشتبوونێ دكەت».
هەروەسا تێدا هاتیە» پێدڤیە ڕێز ل بیر و باوەر و هەستێ ئایینی و پیرۆزیێن هەموو ئایین و مەزهەبان بهێتە گرتن و ڕێك نەهێتە دان ژ ئالیێ هیچ كەس و ئالیەكی ڤە ئازادیێ بكاربینیت بۆ بێڕێزیكرنێ ب پیرۆزیێن ئایینی».
هەڤدەم، مەسرور بارزانی، سەرۆكێ حوكمەتا هەرێما كوردستانێ د پێگەهێ خوە یێ تایبەت ل سەر تۆرا جڤاكی یا تویتەری بەلاڤكر» سۆتنا قورئانا پیرۆز شەرمزار دكەم، دخوازم ڕێزگرتن ل هەموو پەرتوكێن ئەسمانی یێن پیرۆز بهێتە گرتن و ڕێك ل تێكدانا پێكڤەژیانێ بهێتە گرتن».
هەروەسا وەزارەتا ئەوقاف و كاروبارێن ئایینی ل حوكمەتا هەرێما كوردستانێ د بەیاننامەیەكێ دا ل دۆر ڕوودانا بێڕێزیكرنێ و سۆتنا قورئانا پیرۆز ل وەلاتێ سوید ئەو ڕەفتارە ب دوور ژ بهایێن مرۆڤایەتی و دژی بنەمایێن دیموكراسی و پێكڤەبوونێ و ئایینداریێ هەژمارت.
وەزارەتا ئەوقاف و كاروبارێن ئایینی ل حوكمەتا هەرێما كوردستانێ ئاماژەكر» پێدڤیە دەزگەهێن پەیوەندیدار ل وەلاتێ سوید ب قانوونێ ڕێگریێ ل ڤان شێوە ڕوودانان بكەن و بكەرێ سەرەكی ژی ڕوو ب ڕوویێ دادگەهێ بكەن».

سەرۆك مەسعود بارزانی ب هەلكەفتا جەژنا قوربانیا پیرۆز پەیامەك بەلاڤكر و تێدا ئاماژەكر، ژ خودێ مەزن دخوازم خێر و بەرەكەت و سلامەتی بۆ هەموو خەلكێ كوردستانێ بدەستڤەبهێت.
هەروەسا گوت» هیڤیدارم ئەڤ هەلكەفتا پیرۆز ببیتە ئەگەرێ سەقامگیریێ و تەباییێ ل دەڤەرا مە و سەرانسەری جیهانێ».

سەرۆكێ هەرێما كوردستانێ، نێچیرڤان بارزانی د پەیامەكێ دا ب هەلكەفتا جەژنا قوربانیا پیرۆز گوت، بلا ئەم هەموو پەیام و ڕامانێن جەژنێ د گەردەن ئازادكرنێ و پێكهاتنێ و ئاشتبوونێ، بكەینە دەلیڤەیەكا نوو بۆ نووكرنا پەیوەندیێن خوە و بەرپەڕەكێ نوو ل گەل هەڤدو ڤەكەین.
گوت ژی، گەلێ كوردستانێ ژ هەموو تشتەكی زێدەتر چاڤەڕێی وێ چەندێ یە ژ هێز و ئالیێن سیاسی جەژنێ بكەنە دەلیڤەیەكا ئێكڕێزیێ و تەباییێ و پێكڤە كاركرنێ، تاكو ئەم هەموو پێكڤە بشێین بەر ب پاشەڕۆژەكا باشتر پێنگاڤان بهاڤێژین و بلا ئەم هەموو بەر ب وێ چاڤەڕێبوونێ ڤە بچین.

سەرۆكێ حوكمەتا هەرێما كوردستانێ، مەسرور بارزانی ب هەلكەفتا جەژنا قوربانیا پیرۆز پەیامەك بەلاڤكر و تێدا گوت، گەرمترین پیرۆزباهیان ئاراستەی موسلمانێن هەرێما كوردستانێ و ئیراقێ و جیهانێ دكەم، ب تایبەتی پێشمەرگێن قەهرەمان و هێزێن ئاسایشا ناڤخوە و كەسوكار ومالباتێن سەربلندێن شەهید و ئەنفالكریان. هەروەسا دیاركر ژی، ب وێ هیڤیا جەژن ببیتە ئەگەرێ تەباییێ، لێبۆرینێ، خێر و خوەشیێ، پێشكەفتنا زێدەتر یا وەلاتێ مە و پەیدابوونا ئاشتیێ و سەقامگیریێ ل دەڤەرێ و جیهانێ ب گشتی.

ل ڕۆژا سێیێ ژ جەژنا قوربانی یا پیرۆز سەرەدانا پێشمەرگێن میحوەرێ پردێ كر و د چارچۆڤەیێ سەرەدانا خوە دا پەیڤەك پێشكێشكر و ئەڤە دەقێ وێ یە…
زۆر سوپاس كو هوون بەرهەڤ بووین و هەوە ڕێك دا بهێن سەرەدانا هەوە بكەین ل ڕۆژێن جەژنێ، كو دبینین خەلك ل مالێن خوە جەژنێ دكەن ب سایا زەحمەت و خەبات و وەستیانا هەوەیە، كو هەوە سەنگەرێن خوە پاراستین و كوردستان ژی پاراستیە، بۆ وێ چەندێ ئەم بشێین ب ئارامی و خوەشی جەژنێ بگێڕین، ب ڕاستی ئەڤە جهێ دەستخوەشیا هەموو ئالیەكی یە.
دخوازم ژ نێزیكڤە بهێم د خزمەتا هەوە دا بم و پیرۆزباهیێن جەژنێ ل هەوە بكەم، دەستخوەشیێ ل هەوە بكەم و ژ نێزیك هەڤدو ببینین. پێشتر دبیت مە گەلەك ژ هەوە دیتبن، ل دەمێن گەلەك نەخوەش، دزانم كو ئەڤ میحوەرە میحوەرەكێ گەلەك سەرەكی بوو بۆ پاراستنا قەوارەیێ هەرێما كوردستانێ، پشتی كو خیانەتا 16 ئۆكتۆبەرێ هاتیە كرن، ڤێرێ ڕێگر بوو ل وێ چەندێ ئەو پیلانا پیس ب سەركەڤیت و قەوارەیێ كوردستانێ تێكبدەت. ئەڤە جهێ دەستخوەشیێ یە كو هوون شیاین زالبن ل سەر هەموو پیلانێن خراب كو ژ ئالیێ نەحەزان ڤە بۆ هەرێما كوردستانێ هاتبوونە داڕێشتن و د بەردەوام ل سەر وێ چەندێ كو كوردستانێ بپارێزن.
ئینشائەللا هەموو ئومێدێن ڤی نەتەوەی دێ بدەستڤە هێن و ئەو دەڤەرێن كو هەتا نوكە ژی د بن دەستێ مە دا نینن كو دهێتە گۆتن دەڤەرێن كێشە ل سەر یان دەڤەرێن دەرڤەی ئیدارەیا هەرێما كوردستانێ، مە پێخوەشە ئەوژی ب شێوەیەكێ ئاشتیانە و بجهئینانا مادەیێ 140 یێ دستووری، ئەوژی جارەكادی ب خوەشی بزڤرن بۆ سەر كوردستانا مە یا خوەشتڤی.
ئەم بەردەوام پێگیرین ب وی دستووری و ڕێككەفتنێن ئاشتیانە یێن مە ل گەل حوكمەتا فیدرالی هەین، بەلێ دهەمان دەم دا ئەم داكۆكیێ ژی ل سەر مافێن دستووری یێن خوە دكەین و ب هەموو شێوەیەكی وان مافان د پارێزین.
دزانین د ڤی دەمی دا ئەو مافە یێن هاتینە پێشێلكرن، بەری دەمەكی مە دیت كو هەتا غەدر ل جوتیارێن مە ژی دهێتە كرن و ژ سەر ئەردێن وان دهێنە دەركرن و خەلكێ دی دئینن، ئەو كەسێن نوكە هاتینە ئینان هاتینە شوینا وان جۆتیارێن كورد، توركمان كو خەلكێ ڕەسەنێ دەڤەرێ نە و ل جهێن وان ئاكنجی بكەن.
من ل وی دەمی ل گەل سەرۆك وەزیرێن ئیراقێ ئاخڤت و من گوتێ ئەڤە پێشێلكرنا دستووری یە و گوهۆڕینا دیموگرافیا دەڤەرێ یە و پێدڤیە جەنابێ تە وەكو سەرۆك وەزیران نەكەڤیە ڤی بەرەی و وەكو سەرۆك وەزیرێن هەموو ئالیەكی ڕەفتارێ بكەی و ڤێ غەدرێ قەبوول نەكەی. سۆز دا من و گوت دێ پێرابوونان و دووڤچوونێ كەم. ئەم بزاڤێ دكەین بۆ وێ چەندێ مادەیا 140 وەكو خوە بهێتە بجهئینان، هەر چەندە مخابن، بەلێ ئالیێن دی گەلەك د پێگیر نینن ب ڕێككەفتنان. سەرەرای ڤێ چەندێ هەتا دووماهی قۆناغ دێ بزاڤا وێ چەندێ كەین تشت ب ئاشتیانە بهێنە چارەسەركرن، هەكە ستەم و غەدر ژی ل مە هاتە كرن، ب پشتەڤانیا خوەدێ و هەبوونا هەوە هەتا دووماهی هەناسە دێ بەرگریێ ژ ئاخ و نیشتمان و كەرامەتا ڤی مللەتی كەین و ئەم ژی د خزمەتا هەوە داینە و ل گەل هەوەینە.

هەولێر، قائید میرۆ

سەرۆكێ ناڤەندا چاوی كورد بۆ پرسێن سیاسی ڕادگەهینیت، چو ڕاستی بۆ لاوازكرنا هەرێما كوردستانێ نینە ژئالیێ بەغدا ڤە و بەری نوكە چەندین جاران بزاڤێن لاوازكرنا هەرێما كوردستانێ هاتبوونە كرن، بەلێ هەموو ئەو بزاڤ هاتنە ژناڤبرن و دبێژیت، پێدڤیە فڕاكسیۆنێن كوردستانی چاڤدێریا بجهئینانا قانوونا بودجەی بكەن و د دەمێ بجهـ نە ئینانێ ڕێككەفتنا سیاسی بهێتە بكارئینان.
دلشاد نامیق، سەرۆكێ ناڤەندا چاوی كورد بۆ ڕۆژنامەیا (ئەڤرۆ) گوت « پێدڤیە هەرێما كوردستانێ چاڤدێریا بجهئینانا قانوونا بودجەیا ئیراقێ بكەت، بتایبەتی فڕاكسیۆنێن كوردستانی و یا پارتی ب هووری چاڤدێریا قانوونا بودجەی بكەن، چونكە بەری پەسەندكرنا قانوونا بودجەی ڕێككەفتنا سیاسی دناڤبەرا هەرێما كوردستانێ و بەغدا هەبوویە، چونكە ژ ئەنجامێ دەركەفتنا موقتەدا سەدری پرۆسەیا سیاسی، حوكمەتا نوكەیا ئیراقێ ژئالیێ كەمینەیەكا شكەستن ئینای ڤە هاتیە پێكئینان و ڕێككەفتنا سیاسی بۆ پێكئینانا حوكمەتا ئیراقێ هاتیەكرن و پارتی ژی پشكدارەكێ سەرەكیێ وێ ڕێككەفتنێ یە، لەوڕا دڤێت بەری قانوونا بودجەی بهێتە بجهئینان چاڤدێری ل سەر هەبیت، هەتا ڕێككەفتنا سیاسی وەكی خوە بهێتە بجهئینان و هەر پاشڤەچوونەك هەبیت د سیاسەتا قانوونا بودجەی دا دێ ڕێككەفتنا سیاسی هێتە بجهئینان و ل سەر ئاستێ سیاسی كار ل سەر بهێتەكرن».
دیاركر» پشتی ١٠ سالان بۆ جارا ئێكێ یە دێ بەغدا پشكا هەرێما كوردستانێ هنێریت و ل سالێن بۆری قانوونا بودجەی دهاتە پەسەندكرن ل ئیراقێ، بەلێ هەرێما كوردستانێ داهات هەبوو، نوكە هەرێما كوردستانێ داهات نینە و چاڤەڕێی بەغدا دكەت، ئەز ب باوەرم نابیت هەرێما كوردستانێ چو هێلێن سۆر هەمبەری بەغدا هەبن، بەروڤاژی هەكە ئالیێن سیاسی ل هەرێما كوردستانێ هەڤڕكی هەبیت و ناكۆكی ژی هەبن د ناڤبەرا خوە دا، بەلێ دڤێت سنۆرەك بۆ بەغدا هەبیت و بێدەنگ نەبن، هەتا بنەمایێن دستووری هەمبەری هەرێما كوردستانێ نەهێنە بنپێكرن، ب دیتنا من دڤێت ئالیێن سیاسی لەزێ بكەن بۆ دانانا دستوورێ هەرێما كوردستانێ بۆ وێ چەندێ دەزگەهێن هەرێما كوردستانێ بهێنە موكمكرن و ئالیێن سیاسی نەشێن ل بەغدا دژی هەرێما كوردستانێ بن».
خویاكر» ئەو پڕۆپاگندەیێن باسێ لاوازكرنا هەرێما كوردستانێ دكەن چو ڕاستی بۆ نینن، چونكە بەغدا نەشێت ئیرادەیا خوە ل سەر هەرێمێ ب سەپینیت، چونكە بەری نوكە بزاڤێن لاوازكرنا هەرێما كوردستانێ هاتینە کرن ل سالێن ٢٠١١و ٢٠١٧و ٢٠٢٠، بەلێ هەموو وان بزاڤان شكەستن ئینا و نەشیان هەرێما كوردستانێ لاواز بكەن، ئیراق وەلاتەكێ تەوافوقیە و نەشێت هەرێما كوردستانێ لاواز بكەت، بەلێ هەكە بەرهەڤی بۆ بهێنەكرن دشێن دستووری بن پێبكەن، بەلێ ئەو پێزانینێن باس ل هنارتنا هێزا لەشكری بۆ سنۆرێن هەرێما كوردستانێ ژئالیێ بەغداڤە دكەن تنێ پڕۆپاگندەنە و هندەك وەلاتێن هەرێمی ل پشت وان پرۆپاگندەیانە، پێدڤی بوو ڕێككەفتنا سیاسی وەكوخوە بهێتە بجهئینان، بەلێ مخابن هندەك هێزێن دەرڤەی پارتی نەشێن بڕیارا خوە بدەن و قانوونا بودجەی ب ڤی شێوەی هاتە دەربازكرن و ڕێككەفتنا هەرێمێ و بەغدا یا بوویە ڕێككەفتنا پارتی و بەغدا، ئەڤەژی دەرئەنجامێ ناكۆكیێن ئالیێن سیاسی و دەستێوەردانێن دەرەكی ل بڕیارێن هندەك ئالیێن كوردی یە، ئەڤە د دەمەكیدایە ئەو هێزێن سیاسی پشكەكن ژ هەرێما كوردستانێ و لاوازبوونا هەرێمێ لاوازبوونا وانایە ژی».
هەروەسا گوت»نوكە ل بەغدا تنێ حساب بۆ پارتی دهێتەكرن و پێدڤیە ئالیێن دی ژی پێداچوونێ د سیاسەتا خوە دا بكەن، هندەك خالێن ناڤا بودجەیا هەرێما كوردستانێ ب دلێ هەرێمێ نینە ژوان ژی ئەو بڕگا ئاماژە دكەت هەكە داهات وەكی خوە نەهێتە بەلاڤكرن سەرۆك وەزیرێن ئیراقێ دەستێوەردانێ بكەت، هەموو خەلك دزانیت بەری نوكە ژی تشتێ وەسا نەبوویە».