ئه‌ڤرۆ نيوز، فاتما مزوورى:

ئاژانسا نووچه‌یێن ئه‌لعه‌ره‌بیه‌ ل سه‌ر زارێ عه‌قید ئه‌حمه‌د نایف په‌یڤدارێ هێزێن زێره‌ڤانی یێن سنوری ل پارێزگه‌ها ئه‌نبار به‌لاڤ كریه‌ كو عيراقێ ده‌ست ب دیواره‌كێ ئه‌منی ب درێژاهیا سنورێن سوریا كریه‌ ژبۆ رێگرتن ل هاتنا تيرۆریستان دا كو ئارامی و ئاسایشا عيراقێ بپارێزيت‌.

وی په‌یڤداری گۆتژی: ” ده‌ما 10‌ رۆژانه‌ وان ده‌ست ب دروستكرنا وی دیواری كرى‌ و دانانا تاوه‌رێن چاڤدێریێ ب درێژاهیا سنور ژی داناینه‌‌”.

ناڤبری هه‌روه‌سا ئاماژه‌ ب وێ یه‌كێ ژی كر كو وه‌كو قۆناغا ئێكێ ب درێژاهیا 20 كێلومه‌تران ل ده‌ڤه‌را قائیم ده‌ست ب ئاڤاكرنا دیواره‌كی كريه‌ و د ناڤبه‌را هه‌ر تاوه‌ره‌كی ژی ئێك كێلۆمه‌تر هه‌یه‌ تایبه‌ت ب چاڤدێریكرنا هێریشێن داعش بۆ سه‌ر ده‌ڤه‌رێ.

هه‌ر چه‌نده‌ حه‌يده‌ر عه‌بادى سه‌رۆك وزه‌يرێن عيراقێ نه‌مانا چه‌كدارێن داعش ل عيراقێ راگه‌هاندبوو كو نه‌ماينه‌ د ناڤ عيراقێ دا، به‌لێ هه‌ر ماوه‌ بۆ ماوه‌ى ل ده‌ڤه‌رێن سه‌ر سنور يێن سوريا هێرشان دكه‌نه‌ سه‌ر پارێزگه‌هێن عيراقێ و نوكه‌ ل ده‌ڤه‌رێن ده‌وروبه‌رێ كه‌ركووك ژى ب ره‌نگه‌كێ گه‌له‌ك به‌رچاڤ ديار بووينه‌.

ئه‌ڤرۆنيوز:

به‌رپرسه‌كێ وه‌زاره‌تا ژێده‌رێن ئاڤێ ل عيراقێ، ئه‌ڤرۆ دوشه‌مبى 2/7/2018  بۆ ئه‌ڤرۆنيوز دياركر كو برياره‌ ئه‌ڤرۆ توركيا ده‌ست ب داگرتنا سكرێ ئه‌ليسۆ بكه‌ت، ئاماژه‌ دا ژى كو ئه‌و ل هيڤيا رێژا ئه‌ڤرۆ يا ئاڤێ نه‌ بۆ پشت راستبوونێ ژ ده‌ستپێكرنا پرۆسا داگرتنا وى سكرى.

زافر عه‌بدوللا، شاره‌زا ل وه‌زاره‌تا ژێده‌رێن ئاڤێ ل عيراقێ بۆ ئه‌ڤرۆنيوز گۆت” بريار ئه‌وه‌ ئه‌ڤرۆ توركيا ده‌ست ب داگرتنا سكرێ ئه‌ليسۆ ب ئاڤێ بكه‌ت، د هه‌مان ده‌م دا ژى دێ ده‌ست ب كێمكرنا رێژێن ئاڤا دهێته‌ دناڤ عيراقێ دا كه‌ت”.

زافرى زێده‌تر گۆت” ل دووڤ رێككه‌فتنا هاتيه‌ كرن دناڤبه‌را عيراقێ وتوركيا، ل ده‌مێ ده‌ستپێكرنا داگرتنا سكرێ ئه‌ليسۆى ب ئاڤێ، دێ توركيا 90 مترێن سێ گۆشه‌ به‌رده‌ت وئه‌م ئه‌ڤرۆ دێ ل هيڤيا رێژێن ئاڤێ بين بۆ پشت راستبوونێ ژ ده‌ستپێكرنا پرۆسا داگرتنا وى سكرى”.

گۆت ژى” رێژا 90 مترێن سێگوشه‌ يێن ئاڤێ دێ ئاڤا ڤه‌خوارنێ بۆ ده‌مێ دو سالان بۆ عيراقێ دابين كه‌ت، به‌لێ تێرا چاندنێ ناكه‌ت، وى ده‌مى دێ عيراق بۆ چاندنێ پێدڤى بۆ ئاڤا بارانان وئاڤا عومباركرى بيت”.

ئه‌ڤرۆنيوز:

جێگرێ سه‌رۆكێ ده‌سته‌يا حه‌شدا شه‌عبى ره‌خنه‌ ل رۆلێ حوكمه‌تا عيراقێ گرت د به‌رهنگاريا داعشێ دا پشتى راگه‌هاندنا سه‌ركه‌فتنێ ل سه‌ر وێ رێكخستيا تيرۆرستى ودياركر كو 20 هه‌تا 24 هزار داعشى نوكه‌ يێن ل عيراقێ ونيزيكى 6 هزار داعشێ يێن ل مه‌يدانێ وب كارێن ره‌ڤاندنێ وكوشتنێ رادبن وه‌كو ئه‌وا ل ڤێ دووماهيێ دژى 6 وه‌لاتيێن كه‌ه‌ربه‌لا وئه‌نبار ئه‌نجامداى.

ئه‌بو مه‌هدى ئه‌لموهه‌ندس، جێگرێ ده‌سته‌يا حه‌شدا شه‌عبى دداخۆيانيه‌كا رۆژنامه‌ڤانى دا دياركر كو زڤرينا تيرۆرستان بۆ عيراقێ ژئه‌گه‌رێ پرۆسا سياسى يه‌ كو رێ دايه‌ ئه‌و كه‌سێن تيرۆرستان دحه‌وينن بزڤرن ده‌ڤه‌رێن خوه‌ وگۆت” حه‌شدا شه‌عبى هه‌موو ده‌ڤه‌رێن بيابانێ يێن رزگاركرين” وپێدڤيه‌ هه‌موو هيزێن ئه‌منى هه‌ڤكاريێ بكه‌ن ژبۆ كونترۆلكرنا ره‌وشێ وگرتنا ڤى به‌رپه‌رێ مه‌ترسيدار”.

ئه‌ڤرۆ نيوز:

ئه‌ندامه‌كێ هه‌ڤپيه‌مانيا سائيرون ب سه‌رۆكاتيا موقته‌دا سه‌در دداخۆيانيه‌كێ دا بۆ ئه‌ڤرۆنيوز گۆمانا خوه‌ دياركر ژ په‌يدابوونا ديارده‌يا سه‌خته‌كاريێ دپرۆسا هه‌لبژارتنا ده‌نگان ب ده‌ست.

جه‌واد جبوورى، ئه‌ندامێ هه‌ڤپه‌يمانيا سائيرون بۆ ئه‌ڤرۆنيوز گۆت”هنده‌ك ژ په‌رله‌مانتارێن شكستن دهه‌لبژارتنێن 12/5/2018 دا ئيناى، بزاڤێن ئه‌نجامدانا سه‌خته‌كاريا پرۆسا هژمارتنا ده‌نگان ب ده‌ست دكه‌ن ب مه‌ره‌ما بده‌ستڤه‌ئينانا كورسيێن په‌رله‌مانى كو ب رێيا وێ چه‌ندێ دوباره‌ ڤه‌گه‌رنه‌ ده‌ستهه‌لاتێ”.

جه‌واد گۆت ژى”ئه‌و په‌رله‌مانتارێن شكه‌ستن دهه‌لبژارتنان دا ئيناى هنده‌ك فه‌مانبه‌ر خستينه‌ دناڤ كۆمسيۆنێ دا ب مه‌ره‌ما گوهۆرينا ئه‌نجامان”.

ناڤبرى ره‌تكر گوهۆرين دده‌نگ وكورسيێن ليستا سائرون دا بهێنه‌ كرن وگۆت” كورسيێن سائيرون دێ هه‌ر وه‌كو خوه‌ مينن، به‌لكو دبيت دو كورسى دهژمارتنا ده‌نگان ب ده‌ست زێده‌ ژى ببن”.