ئه‌ڤرۆنیوز:
ترومبێله‌كا هه‌لگرا تابلۆیێ پارێزگه‌هه‌كا هه‌رێما كوردستانێ ب 40 كیلۆیێن هێرۆیینێ ل باژێره‌كێ توركى ده‌ست ب سه‌ر دا دهێته گرتن.
ل دووڤ ده‌نگوباسه‌كێ تۆرا (CNNturk)، پشتى پشكنینا ترومبێله‌كا ژ جۆرێ شۆفرلێت كو هه‌لگرا تابلۆیێ هه‌ولێرێ یه، 40 كیلۆیێن ماده‌یا هیرۆیینێ تێدا هاته دیتن كو بهایێ وێ ب سێ ملیۆن لێرێن توركى (650 هزار دۆلار) دهێته خه‌ملاندن.
ئاسایشا توركیا راگه‌هاند ئه‌و ترومبێل ل باژێرێ ترابزۆن ده‌ست ب سه‌ردا هاته گرتن وسێ كه‌س كو دناڤ وێ ترومبێلێ دا بوون هاتنه ده‌سته‌سه‌ركرن.
ئه‌ڤرۆنيوز:
كه‌شناسيا عيراقى راگه‌هاند، پلێن گه‌رمێ ل باشوورێ عيراقێ دێ گه‌هنه 50 وبۆ ده‌مێ پێنج رۆژان دێ يا به‌رده‌وام بيت.
كه‌شناسيا عيراقێ به‌لاڤكر” پێله‌كا گه‌رمێ دێ پتريا ده‌ڤه‌رێن عيراقێ ڤه‌گريت ول رۆژا ئێكشه‌مبى 1/7/2018 دێ ده‌ستپێكه‌ت وهه‌تا رۆژێن چارشه‌مبى وپێنجشه‌مبى دێ يا به‌رده‌وامبيت”.
دياركر ژى” دده‌مێ وان پێنج رۆژان دا، پلێن گه‌رمێ ل هنده‌ك ده‌ڤه‌ران دێ گه‌هنه 50 يێ ول باژێرێ به‌غدا دێ گه‌هيته 47 ێ”.
ئاماژه دا كو ئه‌و پێلا گه‌رمى دێ زێده‌تر ل پارێزگه‌هێن باشوورێ عيراقێ وه‌كو ناسريه وبه‌سره وعوماره ڤه‌گريت.
ل دووڤ راگه‌هاندنه‌كا رێڤه‌به‌ريا گشتى يا كه‌شناسيێ ل هه‌رێما كوردستانێ ژى، پلێن گه‌رمێ ل پارێزگه‌هێن هه‌رێما كوردستانێ دێ ب ڤى شێوه‌يى بن: هه‌وليڕ 41 پله، سلێمانى 40 پله، دهۆك 39 پله.
ئه‌ڤرۆ نیوز ، نه‌وزاد هلۆرى:
ب مه‌ره‌ما ئاڤه‌دانكرنا گوندان حوكمه‌تا هه‌رێما كوردستانێ تورا كاره‌با نیشتمانى بۆ گونده‌كێ دو مالى ل سنورێ ناحیا ئه‌تروش یا سه‌ر ب قه‌زا شێخان راكێشا، موختارى وى گوندى ژى دیاركر كو راكێشانا كاره‌بێ بۆ گوندێ وان دێ بیته ئه‌گه‌رێ ڤه‌گه‌راندنا هژماره‌كا خێزانێن دى كو نها ل ده‌رڤه‌ی گوندى دژین.
محه‌مه‌د عه‌لى سلێمان، موختارێ گوندێ روبه‌تكێ بۆ ئه‌ڤرۆ نیوز گۆت: (ل چه‌ند رۆژێن بۆرى حوكمه‌تا هه‌رێما كوردستانێ تورا كاره‌با گشتى بۆ گوندێ مه راكێشا كو دنهادا تنێ دو ل گوندى دژین و پشتى دابینكرنا كاره‌با نیشتمانى هژماره‌كا خێزانێن دى ره‌زامه‌ندى یا خوه نیشاندایه كو ئه‌و ژى ڤه‌گه‌رن گوندى و ده‌ست ب ژیانه‌كا نوو بكه‌ن).
زێده‌تر گۆت: (گوندێ روبه‌تكێ چه‌ندین جاران ژلایێ رژێما به‌عس هاتیه خراپكرن و خه‌لكێ گوندى هه‌موو ده‌ربه‌ده‌ر بووینه و نها ل دهۆك و شێخان و چه‌ند ده‌ڤه‌رێن دى دژین و گوندێ مه ئێكه ژ گوندێن خوش ، گونده‌كێ گه‌له‌ك گونجایه بۆ ب خوه‌دانكرنا ته‌رش و كه‌والى و ئه‌نجامدانا كارێن چاندنێ و درۆستكرنا ره‌ز و بیستانان و ب ئاڤه‌دانكرنا گوندى دێ ژیانه‌كا دى بو خه‌لكێ گوندى زڤریته ڤه).
موختارێ گوندێ ناڤبرى دیاركر ژى كو دابینكرنا چه‌ند خزمه‌تگوزارێن دى دێ خزمه‌ته‌كا باشتر بۆ خه‌لكێ گوندى هێته‌كرن و زێده‌تر گۆت: (گوندێ روبه‌تكێ پتر ژ 150 خێزانان پێكدهێت، به‌لێ ژبه‌ر نه‌بوونا خزمه‌تگوزاریان تنێ دو مال تێدا دژین، و دابینكرنا كاره‌بێ دێ بیته ده‌ستپێكه‌ك كو خه‌لك ڤه‌گه‌رن گوندى و نها نێزیكێ 10 خێزانێن دى دێ ڤه‌گه‌رن گوندى)
ئه‌ڤرۆنيوز:
ڤه‌كۆلينه‌كا زانستى يا ئه‌مريكى كو ل نه‌خوه‌شخانا ماساتشوستس هاتيه ئه‌نجامدان، دياركر كو دبيت فاكسينا “BCG” يا نه‌خوه‌شيا سلێ، چاره‌سه‌ريه‌كا باش بيت بۆ نه‌خوه‌شيا شه‌كرێ يا ژ جۆرێ ئێكێ.
رۆژناما ( ديلى ميل) يا بريتانى به‌لاڤكر “وێ ڤه‌كۆلينێ دياركر كو راده‌يا شه‌كرێ ل خوينا وان نه‌خوه‌شێن فاكسينا سلێ بۆ هاتيه دان به‌رى سێ سالان هاتيه خوار وگه‌هشتيه رادێن شه‌كرێ ل ده‌ف كه‌سێن سروشتى كو نه‌خوه‌شيا شه‌كرێ ل ده‌ف نينه”
ل دووڤ وێ رۆژنامێ” فاكسينا سلێ غلوكوزى پتر دكێشيت وئه‌ڤ چه‌نده دبيته ئه‌گه‌رێ نزمبوونا راده‌يا شه‌كرێ دخوينێ دا”.
ئه‌ڤرۆنيوز:
رێڤه‌به‌رێ ئاسايشا هه‌ولێرێ ل دۆر ته‌قينا عومباره‌كاچه‌كى وته‌قه‌مه‌نيێ يا سه‌ر ب هێزا پێشمه‌رگه‌ى ڤه راگه‌هاند، ئه‌ڤرۆ عومباره‌كا چه‌كى وته‌قه‌مه‌نيێ يا سه‌ر ب فه‌رمانده‌يه‌كا هێزا پێشمه‌رگه‌ى ڤه ته‌قى.
ليوا تارق نورى، رێڤه‌به‌رێ ئاسايشا هه‌ولێرێ، زێده‌تر بۆ كوردستان تى ڤى گۆت” ژئه‌گه‌رێ پێگيرى نه‌كرنێ ب بنه‌مايێن چه‌ك هه‌لگرتنێ وخراب دانانێ وبلندبوونا پلێن گه‌رمێ، عه‌مباره‌كا هه‌لگرتنا چه‌كى ل به‌حركێ په‌قى وچو زيانێن گيانى نه‌بوون وتنێ زيانێن دراڤى بوون”.
گۆت ژى” چو ده‌سته‌كێ تيرۆرێ وئه‌نقه‌ست ل پشت ته‌قينا وێ عومبارێ نه‌بوو، به‌لكو ژ ئه‌گه‌رێ خراب عومباركرنا چه‌كى دناڤ عومبارێ دا وبلندبوونا پلێن گه‌رمێ ئه‌و روودانه په‌يدابوويه”.
دياركر” هه‌بوونا عومبارێن چه‌ك هه‌لگرتنێ دناڤ باژێران دا، يا دووره ل بنه‌مايێن به‌رگريا شارستانى وپێدڤيه عومبارێن چه‌ك هه‌لگرتنێ ل ده‌رڤه‌ى باژێران بن وب باشى و بشێوه‌كێ رێكوپێك بهێنه عومباركرن تاكو روودانێن ب ڤى شێوه‌ى روو نه‌ده‌ن”.
ئه‌ڤرۆنيوز:
كۆمسيۆنا بلند يا هه‌لبژارتنان ل عيراقێ برياره‌ك ل دۆر هژمارتنا ب ده‌ست يا ئه‌نجامێن هه‌لبژارتنێن عيراقێ ده‌ركر.
له‌يس جابر، په‌يڤدارێ كۆمسيۆنا بلند يا هه‌لبژارتنان ل عيراقێ ئه‌ڤرۆ شه‌مبيێ 30/6/2018 راگه‌هاند” ل رۆژا سێشه‌مبى يا داهاتى 3/7/2018 دێ ده‌ست ب هژمارتنا ده‌نگان ب ده‌ست هێته كرن ب سه‌رپه‌رشتيا دادوه‌ران”.
له‌يس جابر گۆت ژى” هژمارتنا ده‌نگان ب ده‌ست ل پارێزگه‌هێن كه‌ركووك، سلێمانى، هه‌ولێر، دهۆك، نه‌ينه‌وا وسه‌لاحه‌دين دێ ده‌ست پێكه‌ت ول پارێزگه‌هێن دى دێ ل دووڤ خشته‌كى بيت كو دێ كۆمسيۆن ديار كه‌ت”.
دياركر ژى” پرۆسا هژمارتنا ده‌نگان ب ده‌ست دێ هێته ئه‌نجامدان ب به‌رهه‌ڤبوونا چاڤدێرێ نه‌ته‌وێن ئێكگرتى ونوونه‌رێن باليۆزخانان وحزب وچاڤدێرێن نێڤده‌وله‌تى وده‌زگه‌هێن راگه‌هاندنێ وهه‌ردو وه‌زاره‌تێن به‌رگريێ وناڤخوه دێ ب ئه‌ركێ پاراستنا پرۆسێ رابن”.
ئه‌ڤرۆنيوز:
باژێرڤانيا ئه‌سنيۆرت كو پشكه‌كه ژ باژێرڤانيا ستانبۆلێ ل توركيا، ب هه‌وه‌كێ رابوويه بۆ ژێڤه‌كرنا لافيتێن ماركێت وخوارنگه‌هان وجهێن فرۆشتنا جلكان ئه‌وێن ب زمانێ عه‌ره‌بى ل سه‌ر هاتيه نڤيسين.
عه‌لى ئه‌حمه‌د، وه‌لاتيه‌كێ عيراقى يه، خودانێ جهه‌كێ تايبه‌ت ب خوارنێن سه‌رپێ، بۆ ئه‌ڤرۆنيوز گۆت” باژێرڤانيێ خواست كو تنێ 25% ژ نڤيسينا لافيتان ب زمانێ عه‌ره‌بى بيت و 75% ب زمانێ توركى بيت”.
ئه‌ڤرۆنيوز:
ئه‌ندامه‌كا هه‌ڤپه‌يمانيا نه‌سر ب سه‌رۆكاتيا حه‌يده‌ر عه‌بادى راگه‌هاند، ل گه‌ل ب دووماهى هاتنا ده‌مێ په‌رله‌مانێ عيراقێ، 100 په‌رله‌مانتار ب خێزان ڤه چووينه ده‌رڤه‌ى عيراقێ، ئاماژه دا ژى كو هنده‌ك په‌رله‌مانتار تنێ ل روونشتنا سووندا قانوونى ل 2014 به‌رهه‌ڤ ببوون.
جه‌ميله ئه‌لعوبه‌يدى، ئه‌نداما هه‌ڤپه‌يمانيا نه‌سر بۆ مالپه‌رێ (المعلومه) گۆت” 100 په‌رله‌مانتارێن عيراقێ ب خيزان ڤه ل ده‌مێن بۆرى چووينه ده‌رڤه‌ى عيراقێ كو هنده‌ك ژ وان دهه‌لبژارتنان دا ب سه‌رنه‌كه‌فتن وهنده‌ك ژى نه‌هاتنه به‌ر‌بژاركرن ژلايێ ليستێن وان ڤه بۆ خۆلا نوو، هنده‌ك ژى ژبه‌ر پرسێن دادوه‌رى وگه‌نده‌ليێ”.
گۆت ژى” مه هنده‌ك په‌رله‌مانتار تنێ ل روونشتنا سووندا قانوونى يێن ديتين وهنده‌ك په‌رله‌مانتار ژى پشكدارى دهه‌موو روونشتنان دا يا كرى”.
ئه‌ڤرۆنيوز:
مالپه‌ره‌كێ يه‌مه‌نى به‌لاڤكر كو گرۆپێ حوسيێن يه‌مه‌نێ داخوازا هاريكاريێ ژ حه‌شدا شه‌عبى يا عيراقى كريه بۆ پشكداريێ دشه‌رێ يه‌مه‌نێ دا.
مالپه‌رێ (يه‌مه‌ن نيوز) به‌لاڤكر” نوونه‌رێ حوسيان ل عيراقێ، محه‌مه‌د ئه‌لقبلى، ل گه‌ل ئه‌بو باقر ئه‌لده‌راجى، فه‌رماندێ گرۆپا (وعد الله) يا سه‌ر ب حه‌شدا شه‌عبى ڤه ل رۆژا چارشه‌مبيا بۆرى كۆمبوويه”.
وى مالپه‌رى دياركر كو دوێ كۆمبوونێ دا به‌حس هاته كرن بژارده‌يێن به‌رده‌ست ودشيان دا هه‌ين بۆ پشته‌ڤانيا حوسيێن يه‌مه‌نێ ودرێژكرنا كونترۆللا وێ ل سه‌ر رووبه‌رێ ئاخا يه‌مه‌نێ ئه‌وا دبن ده‌ستهه‌لاتا وان دا”.
نيشاندان