ئەڤرۆ نيوز:

پشتی راگەھاندنا ئەنجامێن ھەلبژارتنێن تورکیا ئاشکرا بوو کو دەنگێ ھەدەپێ ل چەندین پارێزگەھێن مەزن یێن باکورێ کوردستانێ ب رێژەکا مەزن کێم بووینە و ل ئستەنبۆل، ئەنقەرە، ئزمیر و چەندین باژێرێن دی یێن تورکیا ژی دەنگێ ھەدەپێ زێدە بووینە، کورسیێن ئاکپارتیێ ل باکورێ کوردستانێ ژ یێن ھەدەپێ زێدەترن.

پشتی راگەھاندنا ئەنجامێن ھەلبژارتنێن پەرلەمانێ تورکیا دەرکەفتە ھۆلێ کو ھەدەپێ ژ سەرجەم ٦٧ کورسیان تنێ ٤٤ کورسی ژ باکورێ کوردستانێ بدەستڤە ئیناینە و بەرۆڤاژی ھەدەپێ، ئاکپارتیێ تنێ ل باکوری کوردستانێ شیایە ٧٧ کورسیان ب دەنگێ کوردان بدەستڤە بینیت و ل چەندین باژێران ژی ئاکپارتی حزبا ئێکێ بوویە و ھەروەسا دەنگێ ئەردۆگانی ژی ل گەلەک دەڤەرێن باکورێ کوردستانێ زێدە بوون.

ل دۆر ڤی بابەتی ئەحمەد شانلی نڤیسەرێ کورد بۆ رۆژناما ئەڤرۆ دیارکر کو ئەنجامێن سەرنجراکێش د ڤان ھەلبژارتنان دا ھەنە، یا ئێکێ دەنگێ ھەدەپێ ل باژێرێن تورکیا یێن وەکو ئستەنبۆل، ئەنقەرە، ئزمیر، مێرسین و چەندین باژێرێن دی ل گۆر ھەلبژارتنێن سالا ٢٠١٥ زێدە بووینە و بەرۆڤاژی ڤێ یەکێ ل باژێرێن کوردی یێن وەکو ئامەد، شەرنەخ و سێرت دەنگێ ھەدەپێ ل گۆر ھەلبژارتنێن سالا ٢٠١٥ کێم بووینە و ئاکپارتیێ ژی دەنگێ خوە زێدە کریە، ئەو یەک ژی نیشا ددەت کو ھەدەپە خوە ژ کوردان دوور کریە و بەربژارکرنا چەندین کەسێن تورک و شەرێ خەندەقان ژ ئەگەرێن سەرەکی بووینە کو دەنگێ ھەدەپێ ل باکورێ کوردستانێ کێم بوویە.

ناڤبری د بەردەوامیا ئاخڤتنا خوە دا ئەو یەک ژی دیارکر کو ھەدەپێ چو بەرنامەکێ وەسا بۆ باشکرنا ژیانا خەلکی نەبوو و ھەموو درووشمێن وان سیاسی بوون، ئەو بەحسێ ئاشتیێ و پێکڤەژیانێ و دیموکراسیێ دکەن، لێ گەلێ کورد ل باکورێ کوردستانێ دخوازیت رەوشا ژیانا وان ب تایبەتی ژی د بیاڤێ ئابووری دا باش بیت و ئاکپارتیێ گەلەک سۆز د ڤێ دەربازێ دا دابوونە کوردان و گۆت: (ئەز دبێژم ئەو دەڤەرێن کو شەرێ خەندەقان لێ ھاتەکرن و بۆ ئەگەرێ وێرانبوونا چەندین باژێران ل وان دەڤەران کوردان دەنگێ خوە دایە ئەردۆگانی و ئاکپارتیێ و ئەو یەک ژی شکەستنەکا مەزنە بۆ ھەدەپێ و دڤێت پەکەکە و ھەدەپە پێداچوونەکا باش د سیاسەتا خوە دا بکەن).

ل دۆر زێدەبوونا دەنگێ ھەدەپێ ل باژێرێن مەزنێن تورکیا ژی ناڤبری دیارکر کو ھەدەپێ گەلەک کەسێن تورک بەربژار کربوون دا دەنگێ وان بدەستڤە بینیت، ئەو کەسێن چەپێن تورک دەنگێ خوە دانە ھەدەپێ، لێ دڤێت ژبیر نەکەین کو چەندین ملیۆن کورد ل ئستەنبۆل و ئەنقەرە و باژێرێن دی یێن تورکیا دژین و ھەدەپێ ڤێجارێ شیا دەنگێ وان ژی بدەستڤە بینیت و گۆت: (لێ سیاسەتا شاش یا ھەدەپێ وەسا کر کو ئیسلامیێن کورد دەنگێ خوە بدەنە ئاکپارتیێ، پێدڤی بوو ھەدەپێ گرنگی ب ئالیێن ئیسلامی ل باکورێ کوردستانێ دابا و پێدڤی بوو چەندین زانایێن ئایینی ژی ژ ئالیێ ھەدەپێ ڤە ھاتبانە بەربژارکرن، لێ مخابن ئەو یەک نەھاتە کرن و ئاکپارتیێ ژی شیا مفایی ژ شاشیێن ھەدەپێ وەربگریت و رێژا دەنگێ خوە ل گۆر ھەلبژارتنێن بۆری پاراست و ل گەلەک دەڤەران زێدە ژی کر، ئەو یەک ژی نیشا ددەت کو دڤێت ھەدەپێ راستیا نھا ببینیت و دانپێدانێ ب ھندێ بکەت کو نەشیایە سیاسەتەکا راست ل گۆر جڤاکێ کوردی ل باکورێ کوردستانێ برێڤە ببەت و ژ بەر ھندێ ژی ھژمارەکا بەرچاڤ یا کوردان دەنگێ خوە دانە ئاکپارتیێ و ئەردۆگانی).

ئه‌ڤرۆ نيوز، فاتما مزوورى:

له‌شكرێ توركيا راگه‌هاند كو شه‌ش پێگه‌هـ و چه‌په‌رێن په‌كه‌كێ يێن ناڤ ئاخا هه‌رێما كوردستانێ ژ لايێ فرۆكێن شه‌ر ڤه‌ هاتينه‌ بۆمبه‌بارانكرن.

سه‌رۆك ئه‌ركانيا توركيا د داخۆيانيه‌كێ دا راگه‌هاند كو شه‌ڤا ده‌ربازبووى 26ى خزيرانا 2018ێ فرۆكێن شه‌رى يێن توركيا ل ده‌ڤه‌رێن ئاڤا شين و باسيان حه‌فته‌نين يێن هه‌رێما كوردستانێ ئۆپه‌راسيۆنێن ئه‌سمانى ئه‌نجام داينه‌.

ب گۆره‌ى داخۆيانيا سه‌رۆك ئه‌ركانيا توركيا شه‌ش پێگه‌هـ و چه‌په‌رێن په‌كه‌كێ ب ئارمانج گرتينه‌ و هه‌شت گه‌ريلايێن په‌كه‌كێ هاتينه‌ كوشتن.

د داخۆيانيێ دا ئاماژه‌ ب وێ چه‌ندێ هاتيه‌ كرن كو فرۆكێن بێ فرۆكه‌ڤان ئه‌ڤ پێگه‌هه‌ ده‌ستنيشانكرينه‌ و فرۆكێن F-16 ژى بۆمبه‌بارانكرينه‌.

ده‌رباره‌ى ڤێ داخۆيانيا سه‌رۆكاتيا ئه‌ركانێ له‌شكرێ توركيا باسكێ له‌شكرى يێ په‌كه‌كێ و هێزێن پاراستنا گه‌ل (هه‌په‌گه‌) چو داخۆيانى نه‌داينه‌.

ئەڤرۆ نيوز:

فەرماندێ فەرماندەیا پێشمەرگێ کوردستانێ ل شنگال راگەھاند، ھەتا نھا پەکەکە د ناڤا شنگالێ دا مایە و ئەو فلمێ وان چێکری کو شنگال ب جە ھێلایە، فلمەکێ کۆمێدی بوو و چو راستی بوو نەبوون.

قاسم شەشۆ، فەرماندێ فەرماندەیا پێشمەرگێ کوردستانێ ل شنگال تایبەت بۆ ئەڤرۆ دیار کر، ئەو دەمێ پەکەکێ بریار دای خوە ژ شنگالێ ب ڤەکێشن، ب تنێ سیناریۆیەک بوویە بۆ ھندێ سۆپایێ تۆرکیا ھێرشێ نەکەنە سەر وان و ب تنی فلمەکێ کۆمێدی بوویە، چونکو نھا پەکەکە ھەر وەکو جاران ل ناڤا شنگالێ ماینە و ھێزێن وان ژ بەر ھینگی زێدەتر ژی لێ ھاتینە.

خویاژی کر، تورکیا و عیراق و ئەمریکا ژی دزانن نھا پەکەکە ل شنگالێ یە و خوە نەڤەکێشایە و ھەبوونا وان ل دەڤەرێ جھێ مەترسیێ یە، چونکو ھەردەم شنگال ل بەر مەترسیا ھندێ یە ھێرشەکا چەکدار و ئاسمانی یا مەزن بھێتە سەر و پێدڤیە فشارەکا مەزن ل سەر پەکەکێ بھێتە کرن و ھەتا نھا ژی بارەگایێن پەکەکێ ل شنگالێ ماینە.

شەشۆ ئاشکرا کر کو ل شوونا پەکەکێ بەرەڤانیێ ژ کوردێن باکووری بکەن، ھاتینە لۆلۆیا تڤەنگا خوە کریە د سەرێ برایێن خوە یێن کورد دا ل ھەرێما کوردستانێ و مەرەما ھەبوونا وان ل شنگال ئەوە ئەگەر ھات و ل قەندیل شکەستن، بارەگایێ خوە یێ سەرەکی ل شنگالێ بدانن.

فەرماندێ فەرماندەیا پێشمەرگێ کوردستانێ ئەو یەک ژی ئاشکرا کر کو ھەتا نە پەکەکە موچەیێن خوە ژ حۆکمەتا عیراقێ وەردگرن و حوکمەتا عیراقێ ھاریکاریا وان دکەت بۆ ھندێ ئەو ل شنگال بمینن و رەوشا شنگالێ تێکبدەن.