ئه‌ڤرۆ نيوز، فاتما مزوورى:

پۆلیسێن هه‌ولێرێ راگه‌هاند، ل باژارۆكێ كه‌سنه‌زان یێ سه‌ر ب باژارێ هه‌ولێرێ ڤه‌ ئەفسه‌ره‌كێ هێزا پێشمه‌رگه‌ى ب گوله‌ى هاته‌ كوشتن.

ئاخفتنكه‌رێ پۆلیسێن هه‌ولێرێ هۆگر عە‌زیز بۆ ئه‌ڤرۆ نيوز گۆت: “ده‌مژمێر 21:30 شه‌ڤا سێشه‌مبێ 12ێ خزیرانا 2018ێ، ل به‌ر ده‌رێ مزگه‌ڤتا فارووق ل باژارۆكێ كه‌سنه‌زان ته‌قه‌ ل ئەفسه‌ره‌كێ هێزا پێشمه‌رگه‌ى هاته‌ كرن و د ئەنجامێ دا‌ ئەو ئەفسه‌ر هاته‌ كوشتن”.

هۆگر عە‌زیز ناسنامه‌یا وی ئەفسه‌ری ئاشكه‌را‌ كر و گۆت: “ناڤێ وی ئەفسه‌رێ پێشمه‌رگه‌ى كو د ڤێ بوویه‌رێ دا‌ گيانێ خوه‌ ژ ده‌ست دايى‌، شێخ عوسمان عه‌بدولله‌ بوو”‌.

ئاخفتنكه‌رێ پۆلیسێن هه‌ولێرێ خۆياكر كو ئه‌و ئەفسه‌رێ پێشمه‌رگه‌ى ده‌ما كو مزگه‌فتا فارووق ل كه‌سنه‌زان ده‌ركه‌فتی‌، ژ ئالیێ كه‌سێن نه‌نياس ڤه‌ ته‌قه‌ ل وی هاتیه‌ كرن و دو گوله‌ ڤێ كه‌فتينه‌ و د ئەنجام دا‌ هاتیه‌ كوشتن.

پۆلیسێن هه‌ولێرێ دا زانين ژى كو ته‌رمێ وى بۆ نوشداريا داد ل هه‌ولێر هاتيه‌ ره‌وانه‌كرن و به‌رێن ڤه‌كۆلينێ ژى بۆ بوويه‌رێ هاتينه‌ ڤه‌كرن.

هه‌روه‌سا رابه‌ر شێخ نوری كو كه‌سه‌كێ نێزیكێ وی ئەفسه‌رێ پێشمه‌رگه‌یێ كوشتی یه‌، گۆت: “پشتی شێخ عوسمان عه‌بدولله‌ ژ نڤێژێن ته‌راویحان خلاس بوويى، ژ مزگه‌فتێ ده‌ركه‌فته‌ ژ ده‌رڤه‌، د وى ده‌مى دا‌ ته‌قه‌ ل وی هاتيه‌ كرن و هه‌ر د هه‌مان ده‌م دا‌ گيانێ خوه‌ ژ ده‌ست دا”.

ئه‌ڤرۆ نیوز:
سه‌رۆك وه‌زیرێن عیراقێ ره‌ت كر كو ئه‌نجامێن هه‌لبژارتنێن په‌رله‌مانێ عیراقێ بهێنه‌ هه‌لوه‌شاندن و دیاركر” ل ده‌ستهه‌لاتا حوكمه‌ت و په‌رله‌مانى نینه‌، ئه‌نجامێن هه‌لبژارتنان هه‌لبوه‌شینن”.
حه‌یده‌ر عه‌بادى د كۆنفرانسێ رۆژنامه‌ڤانى یێ رۆژانێن سێ شه‌مبى دا راگه‌هاند” ب تنێ دادگه‌ها فیدرالى دشێت بڕیارێ بده‌ت هه‌لبژارتن ل عیراقێ بهێنه‌ دووباره‌ن كرن یان نه‌، دده‌ستهه‌لاتا په‌رله‌مانى دا نینه‌ داخوازا دووباره‌ ئه‌نجامدانا هه‌لبژارتنان بده‌ت”.
سه‌رۆك وه‌زیرێن عیراقێ دیاركر: ئه‌م نازڤرینه‌ پاش، هه‌لبژارتن هاتنه‌ كرن، پێدڤیه‌ له‌ز د پێكئینانا حوكمه‌تا نوو یا عیراقێ دا بهێته‌ كرن، كاره‌كێ رێكخستى یێ دهێته‌ كرن كو ئیراقێ به‌ره‌ڤ ئاقاره‌كێ نه‌دیار ببه‌ن، ئه‌م رێیێ ب ڤێ یه‌كێ ناده‌ین و سوتنا كوگه‌هه‌كا سندوقێن ده‌نگدانێ ل به‌غدا و ل دووڤ ئه‌نجامێن ده‌ستپێكێ، ده‌سته‌ك ل پشت هه‌بوو، كاره‌كێ ئه‌نقه‌ست بوو”.

ئه‌ڤرۆ نیوز، نه‌وزاد هلۆرى:

ل شه‌ڤا بۆرى ل سه‌نته‌رێ باژێرێ دهۆكێ دزیكه‌ره‌ك كه‌فتیه‌ ماله‌كا تاخێ گژه‌به‌را ل سه‌نته‌رێ باژێرێ دهوكێ و 55 غرامێن زێرى ل گه‌ل هنده‌ك پاره‌ى دزینه‌.

هاشم رێكانى، خودانێ ‌وێ مالێ بۆ ئه‌ڤرۆ نیوز گۆت: (ل شه‌‌ڤا بۆرى ئه‌ز چبوومه‌‌ كرێكاریێ ل ده‌رڤه‌ى مالا خوه‌ و خێزانا من ژى چبو مزگه‌فتێ كه‌ شه‌ڤا (ليلة القدر) بوو ، ئه‌م هاتینه‌ ئاگه‌هداركرن ژلایێ جیرانه‌كێ مه‌ ڤه‌ كو كه‌سه‌ك چویه‌ دمالا هه‌وه‌ دا ، پشتى ئه‌ز هاتیمه‌ مال دياربوو كو دزیكه‌ره‌ك كه‌فتيه‌ مالا مه‌ و 55 غرامێن زێرى ل گه‌ل 130 هزار دیناران دزینه‌)

زێده‌تر گۆت: (ئه‌ز گومانا خوه‌ ل كه‌سێ نابه‌م و من هێزێن ئه‌منى و پۆلیس و ئاسایش ئاگه‌هداركرینه‌ ، و من ڤیا بێژم ژى كو تنێ من ئه‌و پاره‌ و زێر دمالا خوه‌ دا  هه‌بوون و ئه‌و ژى برن ، نها ئه‌ز دخانیه‌كێ ته‌جاوزدا دژیم و ژبلى كرێكاریێ چو كارێن دى ناكه‌م و دخوازم كو جهێن شوله‌ژێ بشێن ب زووترین ده‌م ‌وى دزیكه‌رى بگرن و زێر وپارێن من بزڤرینن ڤه‌)