ئەڤرۆ نیوز، نەوزاد ھلۆری:
وەلاتیەکێ ناحیا شێلادزێ خانویێ خوە خراپکر و ل جھێ خانوی باخچەکێ جوان و سەرنجراکێش ب تێچویەکا زۆر درۆستکریە ، ھەر چەند باخچە بو خێزانی و رونشتنێن تایبەت ھاتیە چێکرن بەلێ جوانکاریێن ناڤا باخچەی بویە سەدەم کو بوک و زاڤا و وەلاتی ب گشتی دەمێن خوە لێ ببورینن و کەنالێن راگەھاندنێ ژی بەرنامەیێن خوە تێدا تومار بکەن.
ئێقبال عومەر، خودانێ ئەوی باخچەی بو ئەڤرۆ نیوز گۆت: (بەری پێنج سالان من خانویەکێ کەڤن ھەبو ب رەخ خانویێ من یێ نھا ، و ئەز رابووم ب خراپکرنا ئەوی خانوی و شوونا وی باخچەکێ جوان و سەرنجراکێش درۆستکر ، و تێدا زێدەتری 110 دارێن جواروجورێن فێقی چاندینە ئەڤە زێدەباری چاندنا چەندین جورێن گول و میتک و فریزی ، و ھەتا نھا نێزیکێ 16 ھزار دولاران من د چێکرنا باخچەی دا مەزاختینە).
زێدەتر گۆت: (ھەر چەند من باخچە بومەرەما بێھنڤەدانا خوە و خێزانا خوە درۆستکریە ، بەلێ ژبەرکو ژلایەکێ ڤە باخچە ب شێوەیەکێ جوان و سەرنجراکێش ھاتیە درۆستکرن ، و ژلایەکێ دنڤە بتنێ پارکەک ل شێلادزێ ھەیە و ئەو ژی دویری سەنتەرێ باژێری یە ، خەلکەکێ زور قەستا ناڤا باخچێ مالا من دکەن و دەمێن خوە لێ دبورینن ، ئەڤە سەرەرای کو باخچێ من بویە جھێ گرتنا دیمەنێن بووک و زاڤا و درۆستکرنا ئەلبووم و نیشانیێن بووک و زاڤا ، و دیسان بویە ستودیویەک بو کەنالێن نافخوە و تومارکرنا بەرنامەیێن خوە).
ئێقالی د درێژاھیا ئاخفتنێن خودا دیارکر ژی کو دناڤ باچخەی دا زێدەباری داروباری و گولێن جوراوجۆر و دیمەنێن سەنجراکێش دھەمان دەم دا چەند سیلاڤ و نافور ژی ھاتینە چێکرن و گۆت ژی: (چێکرنا چەند سیلاڤ و نافوران دناڤا باخچەی دا و شرشر و دەنگێ وان خوشی و زەوقەکێ تایبەت دایە باخچەی و دل و دەرونێ مرۆڤی ئارام دکەت ، و نەخوشترین تشت بو من ئەوە دەما کو ئاڤا سەرەکی یا شێلادزێ ژ کاردکەڤیت و چەند روژان گیرودبیت ، و ئەز رۆژانە نێزیکێ چوار دەمژمێران ب ئاڤدان و سەخبێرکرنا باچخەی رادبم ژبەرکو باخچە وەکو زاروەکێ ساڤایە و بەردەوام پێدڤی ب چاڤدێریێ یە و ھەردەما ئاڤ گیروبیت ئەز ب تانکەران ئاڤێ دکرم).
نيشاندان