ئه‌ڤرۆ نيوز:

بەرپرسەکێ ئەمریکی دیارکریە کو شاندەکێ ئیرانی دەمەکە ل ئەمریکا نە و ل گەل بەرپرسێن کۆچکا سپی ب نھێنی دانوستاندنان دکەن، شاندێ ئیرانێ ھەموو ئەو ١٢ خالێن بەری نھا ئەمریکا ژ ئیرانێ داخواز کربوون قەبوول کرینە و داخواز ژ ئەمریکا دکەن کو دانوستاندن ب نھێنی برێڤە بچن و ئەمریکا دەلیڤە بدەتە ئیرانێ دا ڤان داخوازیان بجە بینیت.
بەرپرسەکێ ئەمریکی کو نەخواستیە ناڤێ خوە ئاشکرا بکەت بۆ رۆژناما واشنتۆن پۆست یا وی وەلاتی دیارکریە کو شاندەکێ ئیرانێ دەمەکە ل ئەمریکا نە و ب نھێنی ل گەل بەرپرسێن کۆچکا سپی دانوستاندنان دکەن، ئیرانی دبێژن ئەو ١٢ خالێن بەری نھا ئەمریکا ژ مە داخواز کربوو ئەم دێ ڤان خالان بجە ئینین لێ دڤێت ئەمریکا فشارێن خوە ل سەر مە کێم بکەت و دەلیڤێ بدەتە مە دا بشێین ڤان خالان بجە بینین و ھەروەسا ئیرانێ ئەو یەک ژی دیارکریە کو بەرھەڤە ھێزێن خوە ژ سووریێ و یەمەنێ ڤەکێشیت و ل ھەمبەر ڤێ یەکێ ژی داخواز ژ ئەمریکا دکەت سزایێن نوو ل سەر ئیرانێ نەسەپینیت.
رۆژناما واشنتۆن پۆست یا ئەمریکی ئاماژە ب ھندێ ژی کریە کو ترامپ ل دژی دانوستاندنان نینە لێ دیارکریە کو وی نەڤێت شاشیێن ل سەردەمێ ئۆبامای دوبارە بکەت و ھەکە ئیران گەرەنتیێ بدەت کو دێ ڤان ١٢ خالان بجە بینیت وی دەمی چ ئاریشە نینن لێ ھەکە تنێ دیسان بەرپرسێن ئیرانێ یاریێ ب دەمی بکەن و بخوازن مفای ژ دەمی وەربگرن و دەست ب پیلانێن نوو بکەن وی دەمی دێ ئەمریکا ب توندی ئیرانێ سزا دەت و ھەتا پیلانا ھێرشەکا سەربازی ل دژی ئیرانێ ژی د بەرنامێ ترامپی دا ھەیە.
ل دۆر ڤی بابەتی ھەتا نھا دەزگەھێن راگەھاندنا ئیرانێ چو داخۆیانی نەداینە، لێ چەندین کەسایەتیێن ئیرانی ل ئەمریکا و ئورۆپا دیار دکەن کو ھەکە براستی ژی بەرپرسێن ئیرانێ بخوازن وەلاتی ژ کارەساتێن نوو ب پارێزن دڤێت بەری ھەر تشتەکێ دەست ب گوھۆرینێن مەزن بکەن، چونکو سیستەمێ نھا نەشێت ببیتە بەرسڤا داخوازیێن خەلکی و ژ بەر ھندێ ژی رۆژ ب رۆژێ دەنگێ نەرازیبوونێ ل دژی سیستەمێ بلند دبیت و ل ئالیێ دی رەوشا ئابووری یا ئیرانێ ژی گەلەکێ خراب بوویە و ھەژاری و بێکاری گەھشتیە ئاستەکا ھەری بلند و نێزیکی نیڤا جڤاکێ ئیرانێ نھا د ھێلا ھەژاریێ دا دژین و ئەو یەک ژی نیشا ددەت کو رەوشا نھا وەسا بەردەوام ناکەت.
ئەو یەک د دەمەکێ دایە کو دوھی ژی ئیسرائیلێ ھێرشی چەندین بنگەھێن سەربازی یێن ئیرانێ ل سووریێ کرن و ل گۆر دەزگەھێن راگەھاندنێ پتر ژ ٥٠ سەرباز و ئەفسەرێن ئیرانێ ھاتنە کوشتن، پشتی کو ئەمریکا خوە ژ رێککەڤتنا ئەتۆمی ڤەکێشای ئیسرائیل بەردەوام ھێرشی بنگەھێن سەربازی یێن ئیرانێ دکەت و رۆژانە ب دەھان ئەفسەر و سەربازێن ئیرانێ دھێنە کوشتن، ھەتا نھا ژی بەرپرسێن ئیرانێ ب فەرمی دانپێدان ب کوشتنا سەربازێن خوە ژ ئالیێ ئیسرائیلێ ڤە نەکرینە و تەرمێ کوشتیان ژی ب نھێنی دھێنە ڤەشارتن و گڤاشتنەکا مەزن ل دەزگەھێن راگەھاندنێ ژی دھێتە کرن کو ڤان بابەتان بەلاڤ نەکەن.
ل ئالیێ دی گرتن و سێدارەدانا لاوێن کورد و کەسێن کو دژبەریا سیستەمێ نھا دکەن ل ئیرانێ بەردەوامە و ب تایبەتی ل رۆژھەلاتێ کوردستانێ ل چەندین باژێران رەوشەکا نەئاسایی یا ھەی، چونکو خەلک ژ بەر بێکاریێ و زۆرداریا دەستھەلاتێ و نەبوونا دەلیڤێن کاری دخوازن جارەکا دی دەست ب خوەنیشادانان بکەن و بەرپرسێن ئیرانێ ژ ترسا خوەنیشادانان ھێزەکا مەزن رەوانەی باژێرێن رۆژھەلاتێ کوردستانێ ب تایبەتی ژی باژێرێن سنوری کرینە.